“Hom mbra Me Nkyɛn”

Ɔyɛ me enyisɔ dɛ menye hom wɔ Jesus Christ N’asɔr a ɔwɔ hɔ ma Nda a Odzi Ekyir Ahotseweefo ehyiadzi yi ase. Iyi nye N’Asɔr. Yɛfa Ne dzin to hɛn do ber a yɛhɛn N’ahenman no mu no. Ɔyɛ Nyame, Ɔbɔadze no, na Odzi mu. Yɛnnkye bo, na owu na bɔn tum hɛn. Naaso wɔ No dɔ a Ɔwɔ ma hɛn nye hɛn ebusua ebusua no, Ɔto nsa frɛ hɛn dɛ yɛmbɛn No. Ne nsɛm nyi: “Hom ntwe mbɛn me na mobɔtwe abɛn hom; hom nhwehwɛ me enyiberdo na hom bohu me; hom mbisa na hom nsa bɛkã; hom mbɔ mu, na wobobue ama hom.”¹

Easter ber yi wɔkaa hɛn siantsir a yɛdɔ No no, na anohoba a Ɔdze bɔ N’esuafo anokwafo ma wɔbɛyɛ N’anyɛnkofo adɔfo no. Agyenkwa no bɔɔ dɛm anohoba no, na Ɔkãa kyerɛɛ hɛn mbrɛ Odua som a yɛdze ma No no do, ba hɛn nkyɛn. Mfatoho kor nye nyikyerɛ a Ɔdze maa Oliver Cowdery ber a ɔnye Nkɔnhyɛnyi Joseph Smith soom Ewuradze wɔ Mormon Nwoma ne nkyerɛasee ber mu no: “Hwɛ, ɔwo nye Oliver, na maakasa akyerɛ wo osian w’apɛdze ntsi; dɛm ntsi kora dɛm nsɛm yi do wɔ w’akoma mu. Dzi nokwar, na bɔ mbɔdzen dzi Nyame ne mbrasɛm do, na medze mo dɔ abasa no botwa wo ho ehyia.”²

Menya enyigye a erebɛn Agyenkwa no a nna Ɔno rebɛn no, no ho sũahu, ber a metaa yɛ setsie wɔ mbrasɛm ho ara no.

Hom so hom enya sũahu yinom bi. Ibi a ɔbɛyɛ ber a isaan mu yii dɛ ibɔkɔ sacrament nhyiamu. Ɔyɛɛ dɛm maa me Ahomgyeda, ber a nna musuar. Dɛm nda no mu no nna yɛkɛgye sacrament wɔ ewimbir nhyiamu mu. Mekaa da kor bi, mfe 65 mboree a abɛsen no, ber a mesie mbrasɛm no dɛ menye m’ebusua na Ahotseweefo no bɔboa ano ehyia no, ɔda ho twe me bɛn Agyenkwa no.

Nna abowano ayɛ sum na awɔw. Mekaa dɛ metsee asɔrdan mu kandzea na hyew nkã dɛm ewimbir no a menye m’awofo no. Yedzii sacrament no a, Aaron Asɔfodzifo hyiraa do no, na yenye hɔn Ɔsor Egya dzii ahyɛmu dɛ daa yɛbɛkaa Ne Ba na yeesie Ne mbrasɛm no.

Nhyiamu no baa ewiei no, yɛtoow ndwom “Abide with Me; ’Tis Eventide,” a no mu nsɛm nye “O Agyenkwa, nnye me ntsena anafua yi.”³

Metsee Agyenkwa No dɔ na dɛ Ɔbɛn me dɛm ewimbir no. Na metsee Sunsum Krɔnkrɔn no N’awerɛkyekye no.

Nna mepɛ dɛ mekenyan Agyenkwa No dɔ na dɛ Ɔbɛn me ho atsenkã no a menyaa no mbabun ber sacrament nhyiamu mu no. Ntsi ɔnnkyeree no, mesiee mbrasɛm kor so. Mohwehwɛɛ kyerɛwsɛm no mu. No mu no, muhun dɛ mubotum asan ama Sunsum Krɔnkrɔn no ama maatse dza Ewuradze a Ɔasoɛr n’esuafo ebien no tsee ber no a Ɔpeen do dɛ ɔbɛba hɔn fie na ɔnye hɔn atsena no.

Mekenkanee faa Ne Mbeamuduabɔ na nsiei, ne da a otsĩa ebiasa no ho. Mbaa anokwafo na binom hun dɛ woepireew ɔbo no efi nda no ho, na wohun dɛ No honandua nnyi hɔ. Wɔbaa no ɔdɔ mu dɛ wɔdze ngo rebɛsera No honandua no.

Abɔfo beenu gyinaa hɔ na wobisaa hɔn dɛ dɛn ntsi na wosuro, rese dɛ:

“Ɔyɛ dɛn na hom rohwehwɛ nyia ɔtse ase no wɔ ewufo mu yi?

“Onnyi ha, na ɔasoɛr: hom nkaa mbrɛ ɔda ho wɔ Galilee no, ɔkãa kyerɛɛ hom,

“Dɛ, ɔsɛ Nyimpa Ba no dɛ wobeyi no ahyɛ ndzebɔnyɛfo nsa na wɔabɔ no mbeamudua mu, na da a otsĩa ebiasa no ɔasoɛr bio.”⁴

Mark Asɛmpa no dze ɔbɔfo kor ne kwankyerɛ kã ho: “Na hom nkɔ nkɛkã nkyerɛ n’esuafo no, ɔnye Peter dɛ, Oedzi hom enyim kɔ Galilee: hɔ na hom bohu no, dɛ mbrɛ ɔsee hom.”⁵

Nna Asomafo no na esuafo no aboa ano wɔ Jerusalem. Dɛ mbrɛ hɛn so yɛbɛyɛ no, wosuroi na wɔbɔɔ mu dze ahobow kasae faa No wu ho, nye No wusoɛr ho amandzɛɛ a wɔatse no hɔn ntseasee a ɔwɔ ho.

Esuafo no mu beenu dɛm ewiaber no, nantsewee fi Jerusalem wɔ kwan do a wɔrokɔ Emmaus. Christ a Ɔasoɛr no puee wɔ kwan no do na Ɔnye hɔn nantsewee. Nna Ewuradze aba hɔn nkyɛn.

Luke nwoma no ma hɛn kwan ma yɛnye hɔn tu anamɔn:

“Na ɔbaa dɛ, woridzi nkɔmbɔ na woribisabisa hɔnho no, Jesus nankasa twee bɛɛn hɔn nye hɔn siaan anan kɔreee.

“Na wosuoo hɔn enyiwa mu, ma woennhu ne nyimpa ban.

“Na ɔsee hɔn dɛ, Ebɛn nsɛm nye yi a hom dze ridzi nkɔmbɔ nam yi, na hom werɛ ahow yi?

“Na hɔn mu ɔbaako a ne dzin dze Cleopas see no dɛ, Ɔwo nko na eyɛ ɔhɔho wɔ Jerusalem, na innyim dza ɔaba nda yi?⁶

Wɔkãa kyerɛɛ No hɔn yaw dɛ Jesus ewu, Ɔno a wɔtweer no dɛ Ɔbɛyɛ Israel Pomfo no.

Mbrɛ ɔbɛdan biara no Ewuradze a Ɔasoɛr no dze ɔdɔ ndze kasae ber Ɔsee esuafo beenu yinom a woridzi awerɛhow na worusũ yi.

“Na ɔnoara see hɔn dɛ, Ao nkwasea a hom yɛ nyaa wɔ hom akoma mu dɛ hom bɛgye dza nkɔnhyɛfo no kãe nyina edzi:

“Ana ɔnnsɛ dɛ Christ no dɛ obohu dɛm amandze na ɔakɔ n’enyimnyam mu?

“Na ɔhyɛɛ ase fi Moses nye nkɔnhyɛfo no nyina do kyerɛɛ hɔn nkyerɛw nyina mu dza ɔfa no ho no ase.”⁷

Nkyii na ber no a ɔayɛ me ahomka fitsi meyɛ banyimba kakraba no bae:

“Na wɔbɛɛn ekuroba a wɔrokɔ mu no, nna ɔyɛɛ dɛ dza ɔrokɔ n’enyim.

“Na wɔhyɛɛ no dɛ, Nye hɛn ntsena: na orudu ewimbir, na adze reyɛ asa. Na ɔmanee dɛ ɔnye hɔn bɛtsena.”⁸

Agyenkwa no gyee too mu anafua dɛ ɔbɛhɛn N’esuafo no fie a ɔbɛn Emmaus ekuroba no.

Ɔnye hɔn tsenaa ase dzidzii. Ɔfaa paanoo, na ohyiraa do, na obubui maa hɔn. Na hɔn enyiwa buei ma wohun No. Na Ɔyeew hɔn enyiwa do. Luke kyerɛɛw esuafo a woehyira hɔn no hɔn nkã-tse maa hɛn: “Na wɔsee hɔnho dɛ, Ɔnye hɛn rekasa wɔ kwan mu, na obuee kyerɛwsɛm no mu kyerɛɛ hɛn no, hɛn akoma annhyehye hɛn mu anaa?”⁹

Na dɔn no mu ara, esuafo beenu no sii mu kɔr Jerusalem ntsɛmara bɛkãa dza woesi hɔn do no kyerɛɛ Asomafo dubiako no. Ber no mu ara no Agyenkwa no puei bio.

Na obue nkɔnhyɛ a ɔfa No ndwuma ho dɛ Ɔbɔbɔ werdam ama N’Egya ne mba nyina hɔn bɔn, na oebubu owu mpokyerɛ mu.

“Na ɔsee hɔn dɛ, Dɛmara na wɔakyerɛw no, dɛ Christ no bohu amandze na da a otsĩa ebiasa no ɔasoɛr efi ewufo mu:

“Na woedua ne dzin do akɛkã nnuho nye bɔnfakyɛ akyerɛ amanaman nyina, wobefitsi ase wɔ Jerusalem.

“Na hom yɛ iyinom ho adasefo.”¹⁰

Agyenkwa Ne nsɛm no yɛ nokwar ma hɛn so, tse dɛ, Ne tsetse esuafo no. Hɛn nyina yɛyɛ iyinom ho adasefo. Na enyimnyam bɔhyɛ a yɛgyee too mu ber a wonumaa hɛn baa Jesus Christ N’asɔr a ɔwɔ hɔ ma Nda a Odzi Ekyir Ahotseweefo mu no, nkɔnhyɛnyi Alma daa no edzi pefee kyerɛɛ hɛn mfeha mfeha a abɛsen no, wɔ Mormon esu ho:

“Na ɔbaa dɛ ɔsee hɔn dɛ: Hwɛ, Mormon esu wɔ ha (na dɛm na wɔfrɛɛ esu no) na hwɛ, hom enya pɛ dɛ hom bɛba Nyame no nguanbuw mu, na wɔafrɛ hom no nkorɔfo, na hom pɛ dɛ hom soasoa kor biara n’adzesoadze ama ɔyɛ har;

“Nyew, na hom pɛ dɛ hom nye hɔn a hɔn werɛ ahow dzi hɔn yaw, nyew, na wɔkyekye hɔn a wohia awerɛkyekyer no hɔn werɛ, na wogyina dɛ Nyankopɔn n’adasefo aber nyina wɔ adze nyina mu, wɔ gyinabew biara a hom wɔ mu no mu, kesi owu mu mpo, ama Nyankopɔn apon hom, na wɔakan hom afora owusoɛr edzikamfo no hɔn mu, ama hom eenya onnyiewiei nkwa—

“Afei mese hom dɛ sɛ iyi yɛ ɔpɛ a ofi hom akoma mu a, nna ebɛnadze na osiw hom kwan dɛ wobonuma hom wɔ Ewuradze ne dzin mu, ayɛ dasegye wɔ n’enyim dɛ hom nye no edzi ahyɛmu ntsi wɔnnkɛpɛ, dɛ hom bɔsom no na hom edzi ne mbrasɛm do ama oeehue no Sunsum mbordo egu hom do?

“Na afei ber a nkorɔfo no tsee dɛm nsɛm yi no, wɔbɔɔ hɔn nsamu enyigye mu, na wɔtsẽaa mu dɛ: Iyi yɛ ɔpɛ a ofi hɛn akoma mu.”¹¹

Yɛwɔ ahyɛmu ase dɛ yɛbɔboa hɔn wɔwɔ ahohia mu na yɛbɛyɛ adasefo ama Agyenkwa no hɛn nkwa nda nyina mu.

Yebotum ayɛ a yɛnnkedzi nkõgu, gyedɛ yɛnya dɔ ma Agyenkwa no na yɛtse No dɔ a Ɔwɔ ma hɛn no. Yedzi anohoba a yɛabɔ no nokwar mu a, yɛbɛtse hɛn dɔ no a yɛwɔ ma No no. Obenyin osiandɛ yɛbɛtse No tum na dɛ Orudua No som mu rotwe abɛn hɛn.

President Thomas S. Monson ataa akaa hɛn anohoba Ewuradze dze ma N’esuafo anokwafo no: “Na obiara a ɔbɛgye hom no, hɔ na mo so mebɛba, osiandɛ mibedzi hom enyim. Mibedzi hom nyimfa na hom bankum, na mo sunsum bɛhɛn hom akoma mu, na m’abɔfoe etwa hom ho ehyia, na wɔasoa hom.”¹²

Kwan kor so wɔ hɔ emi na ɔwo aatse dɛ Ɔabɛn hɛn. Sɛ yɛsom No nokwar mu a, Ɔtwe bɛn hɛn ebusuafo a yɛdɔ hɔn no. Ber biara a wɔafrɛ me wɔ Ewuradze No som mu a okehia dɛ mutu kwan anaa megya m’ebusua hɔ no, meebohu dɛ Ewuradze rehyira me yer na me mba. Osiesiee N’asomfo adɔfo na akwan a m’ebusua tum twe bɛn No.

Hom aatse nhyira kor yi ara wɔ hom abrabɔ mu. Hom mu dodowara wɔ adɔfo a wɔaman efi onnyiewiei kwan no do. Hom bosusu dɛ, dɛn bio na hom botum ayɛ a ɔdze hɔn bɛsan aba. Hom botum atwer Ewuradze dɛ Ɔbɔtwe abɛn hɔn ber a hom dze gyedzi som No.

Hom kaa Ewuradze N’anohoba a Ɔdze bɔɔ Joseph Smith na Sidney Rigdon ber a nna woefi hɔn ebusuafo nkyɛn wɔ N’edwuma ho ntsi: “M’anyɛnkofo Sidney Rigdon na Joseph, hom ebusuafo ho ye; wɔhyɛ me nsamu, na dza oye ma me no na mebɛyɛ ama hɔn; na mo mu na tum nyina wɔ.”¹³

Tse dɛ Alma na Ohen Mosiah, awofo nokwafo binom asom Ewuradze yie akyer, naaso hɔn mbofra amanman, hɔn awofo afɔrbɔ a wɔabɔ ama Ewuradze nyina ekyir no. Wɔayɛ dza wobotum nyina na ɔyɛ dɛ mbrɛ woennkesi hwee, woenya mboa efi anyɛnkofo adɔfo na nokwafo mpo ekyir no.

Alma na ne mber do Ahotseweefo no bɔɔ mpaa maa ne babanyin na Ohen Mosiah mbabanyin no. Ɔbɔfo bi bae. Wo mpaabɔ na hɔn a wɔdze hɔn gyedzi dzi dwuma no dze Ewuradze No somfo bɛba abɔboa w’ebusua mu mba. Sɛ Satan na n’akãdofo a, hɔn botae nye dɛ wɔbɛsɛɛ ebusua ebusua wɔ abrabɔ yi nye daapem mu no, mpo tu hyɛ hɔn do a, wɔbɔboa hɔn ma wɔasan mu afa fie kwan akɔ Nyame hɔ.

Hom bɛkaa nsɛm a ɔbɔfo no kãa kyerɛɛ Alma Kakraba na Mosiah ne mbambanyin no wɔ hɔn etuatsew mu no: “Na ɔbɔfo no see bio dɛ: Hwɛ, Ewuradze atse no nkorɔfo hɔn mpaabɔ, nye n’akowaa Alma so a ɔyɛ w’egya no ne mpaabɔ; osiandɛ ɔdze gyedzi mapã bɔɔ mpaa wɔ ho ama eenya nokwar yi ho nyimdzee; iyi ntsi na maba merebɛda Nyame no tum nye tumdzi edzi akyerɛ wo ama eehu dɛ Nyame tsie no nkowaa hɔn mpaabɔ dɛ mbrɛ hɔn gyedzi tse.”¹⁴

M’anohoba a medze bɔ hom a hom bɔ mpaa na hom som Ewuradze no, rennyɛ dɛ hom nsa bɛkã nhyira biara hom pɛ ama homho nye hom ebusua ebusua. Mbom mubotum abɔ anohoba dɛ Agyenkwa no bɔtwe abɛn hom na Ɔdze dza ɔkrɔn ehyira hom na hom ebusua. Hom benya No dɔ mu awerɛkyekyer na hom aatse dɛ Ɔrotwe abɛn hom ho mbuae, ber a hom tsen hom nsa som binom no. Ber a ekyekyer hɔn a wohia no hɔn epirakur, na edze No Werdambɔ mu nsanee tsew hɔn a woridzi awerɛhow wɔ bɔn mu ho no, Ewuradze No tum bɛma wo tsipia. Ɔatsen N’abasa mu akã wodze ho, dze aboa na woehyira Ɔsor Egya Ne mba a w’ebusua kã ho.

Woesiesie fie mbae enyimnyam ama hɛn. Nkyii na yebohu Ewuradze no a yɛadɔ no N’anohoba ne mãhyɛ no. Ɔno na Ɔbɛgye hɛn akɔ onnyiewiei nkwa no a yenye Ɔno na hɛn Ɔsor Egya betsena no. Jesus Christ kãa no kwan yi do:

“Hom mper dɛ hom bɛkyekyer me Zion. Dzi me mbrasɛm do wɔ adze nyina mu.

“Na sɛ idzi me mbrasɛm do na itsim kodu ewiei a ibenya onnyiewiei nkwa, akyɛdze a ɔsõ sen Nyame n’akyɛdze nyina.”¹⁵

“Na hɔn a wɔbɛtsena nkwa mu no benya asaase yi edzi, na hɔn a wobowu no bɔhom efi hɔn berɛ nyina mu, na hɔn ndwuma bedzi hɔn ekyir; na wobenya ahenkyɛw wɔ m’Egya fie no a mesiesie ama hɔn no mu.”¹⁶

Megye dase dɛ yebotum edua Sunsum no do edzi Ɔsor Egya Ne frɛɛ do: “Oyi nye mo Dɔba no. Tsie No!”¹⁷

Christ edua Ne nsɛm nye Ne fasusu do, akyerɛ hɛn mbrɛ yensi ntwe mbɛn No. Ɔsor Egya ba biara a ɔasan mu eyi dɛ obodua enuma abobow no mu ahɛn N’Asɔr mu no benya kwan wɔ abrabɔ yi mu ma wɔakyerɛkyerɛ no Ne asɛmpa no na ɔatse N’asomfo a Ɔafrɛ no Ɔfrɛ yi, “Hom mbra mo hɔ.”¹⁸

Ne ahyɛmu somfo biara a ɔwɔ N’asaase do ahenman mu nye sunsum wiadze mu no benya No Sunsum akwankyerɛ, ber a wohyira na wɔsom nkaafo ma No no. Na wɔbɛtse No dɔ nkã na woenya enyigye dɛ wɔatwe abɛn No no.

Meyɛ Ewuradze No Wusoɛr ho dasefo ampaara tse dɛ nkyɛ ewimbir no menye esuafo beenu wɔ fie a ɔwɔ Emmaus kwan no do. Minyim dɛ Ɔtse ase ampaara tse dɛ Joseph Smith ber a ohun Egya na Ɔba no wɔ Palmyra ndua kwaa anapa kan no mu.

Iyi nye Jesus Christ No nokwar Asɔr no. Asɔfodzi nsaafee a President Thomas S. Monson nko kitsa no mu na tum wɔ hɔ ma hɛn dɛ wɔsɔw hɛn ebusua ebusua ano ama yenye hɛn Ɔsor Egya na Ewuradze Jesus Christ atsena afebɔɔ. Yebegyina Agyenkwa N’enyim, enyim na enyim Atsɛmbu Da no mu. Ɔbɛyɛ enyigye mber ama hɔn a wodua No som mu wɔ abrabɔ yi mu atwe abɛn No no. Ɔbɛyɛ me enyigye dɛ mebɛtse nsɛmfua no: “Mbo, akowa pa nye nokwafo.”¹⁹ Megye ho dase dɛ Agyenkwa No a wɔasoɛr no na hɛn Pomfo No ne dasefo, wɔ Jesus Christ dzin mu, amen.