Li resisite

Yon temwayaj sou reyalite Rezirèksyon Jezikri a se yon sous lespwa ak detèminasyon. E sa kapab konsa pou nenpòt pitit Bondye. Rezirèksyon an sete yon sous lespwa ak detèminasyon pou mwen yon jou ete an Jen 1969 kote manman m te mouri, li toujou rete sa pandan tout ane apre yo, e l ap toujou rete sa jiskaske m wè l ankò.

Tristès separasyon tanporè a te imedyatman ranplase pa bonè. Sete plis pase espwa yon reyinyon lajwa. Paske Senyè a revele anpil bagay atravè pwofèt li a e paske Sentespri a konfime verite Rezirèksyon an pou mwen, mwen ka wè nan lespri m kisa sa pral sanble lè nou reyini avèk moun nou yo ki sanktifye ak resisite yo.

“Se moun sa yo ki pral leve nan rezirèksyon moun ki jis yo. …

“Se moun sa yo ki gen non yo ekri nan syèl la, kote Bondye ak Kris la se jij tout moun.

“Se moun ki jis sa yo ki te vin pafè pa lantremiz Jezi, ki se medyatè nouvo alyans lan, ki te reyalize ekspyasyon pafè sa a pa mwayen pwòp san pa li ki te koule. (D&A 76:65, 68–69).

Paske Jezikri te kase chenn lanmò, tout pitit Papa nou ki nan Syèl la ki fèt nan mond lan ap resisite avèk yon kò ki pap janm mouri. Konsa temwayaj pa m ak pa ou konsènan verite gloriye sa a kapab chase doulè pèt yon manm fanmi oswa yon zanmi pou ranplase li pa bèl lespwa ak detèminasyon fèm.

Senyè a bay nou tout kado rezirèksyon, kote espri nou pral plase nan kò ki pap gen okenn enpèfeksyon fizik (gade Alma 11:42–44). Manman m pral parèt jèn ak bèl, efè laj yo ak efè dèzane soufrans fizik yo pral efase. Sa apral vini kòm kado pou li menm ak pou nou menm.

Men sa nan pami nou yo ki ta renmen viv avèk li pou tout tan yo dwe fè chwa pou kalifye yo pou jwi asosyasyon sa a, pou viv kote Papa a ak Pitit Gason Byeneme resisite l la demere nan laglwa a. Se sèl plas kote lavi familyal kapab kontinye etènèlman. Yon temwayaj konsènan verite sa a ogmante detèminasyon mwen pou m kalifye tèt mwen ak moun mwen renmen yo pou degre ki pi wo nan wayòm syèl la atravè Ekspyasyon Jezikri a k ap travay nan lavi nou (gade D&A 76:70).

Senyè a ofri nou yon gid nan rechèch pou lavi etènèl la nan priyè Sentsèn yo ki ede m e ki ka ede w tou. Yo envite nou pou nou renouvle alyans batèm nou yo nan chak reyinyon Sentsèn.

Nou pwomèt pou nou toujou sonje Sovè a. Anblèm sakrifis li a ede nou apresye grandè pri li te peye pou kase chenn lanmò a, pou ofri nou mizèrikòd, ak ba nou padon pou tout peche nou si nou chwazi pou nou repanti.

Nou pwomèt pou n respekte kòmandman l yo. Li ekriti yo ak pawòl pwofèt vivan yo e koute oratè enspire nan reyinyon Sentsèn nou yo raple nou alyans nou fè pou n respekte yo a. Sentespri a mete kòmandman nou pi bezwen respekte yo nan panse nou ak nan kè nou jou sa a.

Nan priyè Sentsèn yo, Bondye pwomèt pou l voye Sentespri a pou rete avèk nou (gade Mowoni 4:3; 5:2; D&A 20:77, 79). Nan moman Sentsèn sa a mwen vin twouve ke Bondye kapab ban m sa ki sanble yon entèvyou pèsonèl. Li raple m kisa m fè ki fè l plezi, bezwen mwen pou repantans ak padon, ak non ak vizaj moun Li ta renmen mwen sèvi pou Li.

Atravè ane yo, eksperyans repete sa a vin fè lespwa tounen santiman charite e pote asirans ke mizèrikòd prepare pou mwen pa mwayen Ekspyasyon ak Rezirèksyon Sovè a.

Mwen temwaye ke Jezikri se Kris resisite a, Sovè nou, ak egzanp ak gid pafè nou ou rive nan lavi etènèl la.