Te Aki Mwakuri ni Kabwakanako Tai n te Tairiki

E ngae ngke Ngai bon te ataeinaine, mwaitin weteakiu n te Ekaretia e irekereke ma reireinaia ataein te Moanrinan, n te aro are e a bon roota aron au iango ni kan karekea au beeba ni bwaati n reirei n te moanrinan. Ma n rinean are e na boboto iaona au kamatebwai ti aki ngaia te kawai n anga reirei n te Ekaretia ae na roota au waaki n reirei. Anne e rikirake ni mataata raoi ngke I a katauraoi nakon karekean au beeba ni bwaati.

Te kabanea ni mwakuri ae I riai ni katia bon te kabanea ni beeba are I riai ni kabwarabwara inanon te tuoaki n te taetae imataia teniman taan tutuo. Taan moti bon tabeman taan reirei ake a tia n anga reirei n au kiraati.

E bon babane raoi aron au beeba, I kabanea mwakoron te tairiki imwain te tuoaki n te taetae ma ana utu raou te mwaane. Ngke n nang okira mweengau, e taku tinana bwa ana kantaninga a na bane n nakoraoi bwaai ni kabane ao e manga taekinna bwa ngkana ko katauraoi raoi ao kona aki maaku (tara D&C 38:30).

E a roko te bong are imwina. A mwaiti iango ake a roko n au iango. I a uringa aron are I kan kitana te kaawa ae bubura are I bon ikawai rake iai n reita au reirei; I a ururing rawawataia au koraki ni kabwaka mwane ibukiu. I aki kona ni kariaia bwa ana un. Au kabanea ni ukeuke e na riai n nakoraoi.

Raou n reirei a tataninga naba nakon aia ukeuke. Ti a bane n raraomai taian titiraki ake a na tabekaki irouia taan tuoira, ma I namakina te kamanoaki ibukina bwa I a tia n tataro ibukin buokau ao ibukina naba bwa I ataia ae e ataia te Atua aron korakorau ni barongaan raoi, te kakaei, ao koreakin au beeba.

E a roko au tai. Imwin kabwarabwarakin au beeba nakoia taan tuoira, I a moanna ni kaekai titiraki. Imwin tabekan titiraki tabeua iaon au botoniango ake I a tia ni karaoia, e a titiraki temanna te tia tutuo, “Mwaitira te mwakuri ae ko kabanea ni korean te beeba aei?”

“E rangi ni korakora,” I kaeka. “I anga bwaai ni kabane ake iai irou ibukina bwa I tangiria bwa e na anga iango aika boou.”

“Mwakuri ni bwakanakontai n te tairiki?”

“Tiaki, I aki titiku ni karokoa bwakanakontai n te tairiki ni karaoan au bwai n reirei,” I taku. “I baronga au bong bwa I aonga ni katiai au mwakuri.”

Mataia taan tutuo a kaota te miimi. Te tia tutuo naba arei e taekina aei, “I kunea ae kamiimi bwa ko na riai ni kaotia ae ko aki tiku ni kabwakanakotai. Ti ataia ae raom n te reirei a tia ni karaoia, ibukin taian tairiki aika mwaiti.”

Temanna maibuakoia taan tutuo e taku, “Kariaia bwa n na karakina taekan te ataei aei. E bane n reke ana tai ibukin bwaai ni kabane. I kona n taekina aei ibukina bwa I ataa neiei. E reke ana tai ibukin ana kamatebwai, raoraona, ana utu, ao e bon reke naba ana tai n taromauri.”

“E koaua anne?” taan tutuo ake tabeman a manga miimi. “Tera te aro ae ko nako iai?”

“I kaaina Ana Ekaretia Iesu Kristo ibukia Aomata aika Itiaki ni Boong aika Kaitira.”

“Oo, eng, I ataia bwa tera te ekaretia anne,” e taku temanna.

“Ao ti reireinaki bwa ti na moantaai ni matu bwa ti aonga ni korakora nakon te bong are imwina.”

I namakina te rau ao te kamanoaki n taekinan te euangkerio, e ngae ngke I bon miimi n titirakinaki taekan te aro inanon tain te ukeuke n te kareke beeba.

“E koreaki am beeba ma te namakin ae korakora. E bon koro tamaroana. I bon taku bwa e riki naba aei man taian anua ake ko karauaki n reireinaki man am ekaretia.”

“Eng,” I taku. “I bon reireinaki n te ekaretia aron reireinaia ataei, ao e a bon tia ni buokai raoi ni karekean au beeba.”

“Ko bon karaoa raoi aron kanoana ni kawaina,” e manikangare temanna te tia tutuo. “Ti kaantaningaia bwa ko na aki toki man iriran te taromauri, ibukina bwa ko bae korakora n aron taian koaua ake ko karekei mai ikekei.”

E aki maan ao I a otinako man te ruu bwa aonga taan tutuo ni kaoti nakoa aia babaire. Uoua te miniti imwina ao a weteai.

“E bon aki matoatoa iroura bwa ti na roko n te boraraoi. Inanon nooran am banna ni katooto n anuam, am bwi aika moan te tamaroa, ao te beeba ae ko taekina arona n te bong aei, ara moti e bon katiteuanaki bwa e na reke am beeba ni bwaati, ae moan te tamaroa. Kona tekeraoi!”

Ngke I a tuangia au utu, a bon tang ni kimwareirei.

I kakoaua bwa ngkana e tuangira Tamara are i Karawa bwa ti na moantai ni matu bwa ti aonga n aki kua ao ni moantaai n uti bwa aonga ni kakorakoraaki rabwatara ma ara iango (tara D&C 88:124), E karaoa aei ma te kaantaninga ibukin kakabwaiakira. I bon kakaitau ibukina ngkai e karekea te kukurei nakoira te euangkerio inanon waakin nako maiura.