Elder Michael J. Teh
No te Hitu Ahuru

Ua parau Elder Michael John Teh e, e mea faufaa atoa te tere i te tipaeraa—te tereraa ihoa ra o te oraraa nei. Ua parau Elder Teh e, na to’na piiraa ei misionare rave tamau i te matahiti 1986 ra i faataa i te taa-ê-raa i roto i to’na tere i te tahuti nei no te mea ua haapuaihia to’na iteraa papû o te evanelia.

« Ua riro ta‘u misioni ei faaohuraa no to‘u oraraa. Ua riro ei haamaitairaa nehenehe mau », o ta’na ïa i parau. « Ua roaa ia‘u te ite i to‘u Metua i te Ao ra e i Ta’na Tamaiti, ia Iesu Mesia. Ua roaa ia‘u te iteraa e, e nehenehe au e pii i to‘u Metua i te Ao ra i te tahi noa’tu taime e e aparau vau Ia’na. Ua riro te reira ei puna rahi no te tamahanahanaraa no‘u ».

Ua parau Elder Teh e, te feia atoa o te farerei i te mau tipuupuuraa puromu i roto i to ratou oraraa, titauhia ia imi i te hoê iteraa papû, ia nehenehe e tauturu ia ratou ia faaea noa i ni‘a i te e‘a mau.

« E heheu mai to tatou Metua i te Ao ra i te parau mau ia outou ia imi outou na roto i te pure ia roaa to outou iho iteraa papû », o ta’na ïa i parau. « Aue ïa iteraa maitai e, ia ite outou iho e ia nehenehe ia faaite papû i taua parau mau ra ».

Ua fanauhia Elder Teh ia Martin e ia Norma Teh i te 25 no Tiunu 1965 i te Oire no Davao, i Davao Del Sur, i te fenua Philipino. Ua haere atu to’na utuafare i Manille i te 12raa o to’na matahiti, area râ, ua hoi atu oia i to’na oire ai‘a i muri mai i to’na pii-raa-hia i roto i te Misioni no Davao Philipino.

I muri mai i ta’na misioni, ua roaa ta Elder Teh parau tuite no te faatereraa ohipa i te Fare Haapiiraa Tuatoru no De la Salle i Manille. Ua rave oia ei papa‘i parau no na matahiti e maha i roto i te Hiero no Manille i Philipino, e i reira to’na faaipoiporaa ia Grace May Weedon i te 16 no Titema 1989. E toru a raua na tamarii.

Ua mauruuru Elder Teh i to’na amuiraa e te feia faatere o te Ekalesia. Ua tavini na oia ei episekopo, ei tauturu no te peresideni titi, ei melo apooraa teitei e ei tauturu no te peresideni misioni. I teie taime a piihia’i oia i roto i te Pŭpŭ Matamua no te Hitu Ahuru, te tavini ra oia ei Hitu Ahuru Area e ei Tauturu Piti i roto i te peresideniraa Area no Philipino.