ວັນທີ່ບໍ່ສາມາດລືມ

ກອງປະຊຸມໃຫຍ່ສາມັນ ເດືອນຕຸລາ 2024

14:19

ວັນທີ່ບໍ່ສາມາດລືມ

ໂດຍ ແອວເດີ ແກຣີ ອີ ສະຕີບເວັນສັນ

ແຫ່ງກຸ່ມອັກຄະສາວົກສິບສອງ

ໃນຊ່ວງເວລາຕໍ່ໄປນີ້ຈະເປັນໂອກາດທີ່ເພີ່ມຫລາຍຂຶ້ນສຳລັບສະມາຊິກຂອງສາດສະໜາຈັກໃນທຸກແຫ່ງຫົນ ໃນການແບ່ງປັນຂ່າວດີເລື່ອງພຣະກິດຕິຄຸນຂອງພຣະເຢຊູຄຣິດ.

ຄຳນຳ

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ປະຫວັດສາດຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍໃນສະໄໝນີ້ ແມ່ນເຕັມໄປດ້ວຍປະສົບການອັນສັກສິດ ທີ່ສະແດງໃຫ້ເຫັນວ່າພຣະຜູ້ເປັນເຈົ້າໄດ້ນຳພາສາດສະໜາຈັກຂອງພຣະອົງ. ເຖິງແນວໃດກໍຕາມ, ມີໜຶ່ງທົດສະວັດໃນປະຫວັດສາດຂອງພວກເຮົາທີ່ໂດດເດັ່ນເໜືອທົດສະວັດອື່ນໃດ—ທົດສະວັດຈາກປີ 1820 ເຖິງປີ 1830. ເລີ່ມຕົ້ນດ້ວຍປະສົບການຂອງສາດສະດາໂຈເຊັບ ສະມິດ ຢູ່ໃນປ່າສັກສິດ ໃນລະດູໃບໄມ້ປົ່ງຂອງປີ 1820, ເມື່ອເພິ່ນໄດ້ເຫັນພຣະເຈົ້າອົງເປັນພຣະບິດາ ແລະ ພຣະບຸດຂອງພຣະອົງ, ພຣະເຢຊູຄຣິດ, ແລະ ດຳເນີນຕໍ່ໄປຈົນເຖິງວັນທີ 6 ເດືອນເມສາ, 1830, ຊຶ່ງທົດສະວັດນັ້ນບໍ່ຄືກັບທົດສະວັດໃດໆ.

ລອງພິຈາລະນາເຫດການທີ່ໜ້າອັດສະຈັນເຫລົ່ານີ້! ສາດສະດາໜຸ່ມໄດ້ສົນທະນາກັບທູດໂມໂຣໄນ, ໄດ້ແປແຜ່ນຈາລຶກຄຳ, ແລະ ໄດ້ຈັດພິມພຣະຄຳພີມໍມອນ! ເພິ່ນໄດ້ເປັນເຄື່ອງມື ຊຶ່ງຜ່ານທາງເພິ່ນ ຖານະປະໂລຫິດແຫ່ງອາໂຣນ ແລະ ເມນຄີເສເດັກໄດ້ຖືກຟື້ນຟູ, ແລະ ແລ້ວເພິ່ນໄດ້ຈັດຕັ້ງສາດສະໜາຈັກຂຶ້ນ! ອໍລີເວີ ຄາວເດີຣີ ໄດ້ບັນຍາຍເຖິງຍຸກນັ້ນໄວ້ຢ່າງດີ: “ວັນທີ່ບໍ່ສາມາດລືມ.” ເຫດການມະຫັດສະຈັນໄດ້ສືບຕໍ່ມາຈົນເຖິງທຸກວັນນີ້.

ຂ້າພະເຈົ້າຂໍແນະນຳຢ່າງກ້າຫານວ່າ ປີນີ້ເຮົາໄດ້ເລີ່ມຕົ້ນທົດສະວັດທີ່ອາດພິສູດໄດ້ວ່າ ເປັນທົດສະວັດທີ່ຍິ່ງໃຫຍ່ພໍໆກັບທົດສະວັດແຫ່ງການກໍ່ຕັ້ງ ເມື່ອເກືອບສອງສັດຕະວັດມາແລ້ວ.

ທົດສະວັດຂອງເຮົາ

ຂ້າພະເຈົ້າຈະອະທິບາຍໃຫ້ຟັງ. ລະຫວ່າງປີ 2024 ນີ້, ແລະ ປີ 2034, ເຮົາຈະປະສົບກັບເຫດການສຳຄັນທີ່ຈະສົ່ງຜົນໃຫ້ເກີດມີໂອກາດພິເສດໃນການຮັບໃຊ້, ການເປັນນ້ຳໜຶ່ງໃຈດຽວກັນກັບສະມາຊິກ ແລະ ໝູ່ເພື່ອນ, ແລະ ເພື່ອແນະນຳສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍໃຫ້ຜູ້ຄົນຮູ້ຈັກຫລາຍກວ່າທີ່ເຄີຍມີມາ.

ການສະເຫລີມສະຫລອງວັນເກີດຄົບຮອບ 100 ປີຂອງປະທານແນວສັນ.

ເຮົາຫາກໍໄດ້ເປັນພະຍານເຖິງອຳນາດຂອງຊ່ວງເວລາປະຫວັດສາດ ໃນຂະນະທີ່ເຮົາໄດ້ຮ່ວມກັບຜູ້ຄົນນັບສິບລ້ານຄົນ ເພື່ອສະເຫລີມສະຫລອງວັນເກີດຄົບຮອບ 100 ປີຂອງປະທານຣະໂຊ ເອັມ ແນວສັນ.

ເມື່ອລາຍງານວັນເກີດຂອງປະທານແນວສັນ, Newsweek ໄດ້ຂຽນຫົວຂໍ້ຂ່າວວ່າ, “ຜູ້ນຳສາດສະໜາທີ່ອາຍຸຫລາຍທີ່ສຸດໃນໂລກ ມີອາຍຸຄົບ 100 ປີ.” ແລ້ວເຂົາເຈົ້າໄດ້ຈັດລຽງລຳດັບຜູ້ນຳສາດສະໜາທີ່ອາວຸໂສທີ່ສຸດ 10 ຄົນ—ໂດຍມີປະທານແນວສັນເປັນອັນດັບແລກໃນລາຍຊື່ ຊຶ່ງລວມທັງສັນຕະປາປາ ແຟຣນຊິສ ແລະ ອົງດາໄລລາມະ.

ຄຳຖະແຫລງສະບັບນີ້ຈາກບົດຄວາມໃນ New York Times ສະແດງໃຫ້ເຫັນເຖິງທັດສະນະຄະຕິຂອງການລາຍງານຂ່າວລະດັບນາໆຊາດຈຳນວນຫລາຍ: “ໃນຮອບການເລືອກຕັ້ງປະທານາທິບໍດີ [ສະຫະລັດ] ທີ່ໄດ້ກະຕຸ້ນໃຫ້ຄົ້ນຫາຈິດວິນຍານກ່ຽວກັບການແກ່ຊະລາ ແລະ ການເປັນຜູ້ນຳ, ເຫດການສຳຄັນຂອງທ່ານ ແນວສັນແນະນຳວ່າ, ຢ່າງໜ້ອຍໃນສາດສະໜາຈັກຂອງເພິ່ນ, ອາຍຸທີ່ມີສາມຕົວເລກບໍ່ຄ່ອຍຈະໜ້າຕຳໜິຫລາຍປານໃດ. ເພິ່ນເປັນບຸກຄົນທີ່ໄດ້ຮັບຄວາມນິຍົມຊົມຊອບໃນບັນດາສະມາຊິກຂອງສາດສະໜາຈັກ, ຜູ້ບໍ່ໄດ້ເບິ່ງປະທານຂອງຕົນເປັນພຽງຜູ້ບໍລິຫານເທົ່ານັ້ນ ແຕ່ໃນຖານະ ‘ສາດສະດາ, ຜູ້ພະຍາກອນ, ແລະ ຜູ້ເປີດເຜີຍນຳອີກ.’”

ພວກເຮົາມີຄວາມກະຕັນຍູຫລາຍທີ່ວັນສຳຄັນຂອງປະທານແນວສັນ ເຮັດໃຫ້ເຮົາມີໂອກາດແນະນຳສາດສະດາຂອງພຣະເຈົ້າໃຫ້ຜູ້ຄົນທົ່ວໂລກໃຫ້ຮູ້ຈັກ, ຊຶ່ງເປັນການສະເຫລີມສະຫລອງ ທີ່ບໍ່ສາມາດລືມ.

ລານອາຄານສຳນັກງານຂອງສາດສະໜາຈັກທີ່ໄດ້ຮັບການປັບປຸງໃໝ່.

ໃນຕົ້ນລະດູໄບໃມ້ປົ່ງປີນີ້, ລານຕຶກທີ່ຖືກສ້ອມແປງໃໝ່ໃນບໍລິເວນພຣະວິຫານ—ທຸງນາໆຊາດ ທີ່ເປັນຕົວແທນຂອງປະເທດຕ່າງໆ ບ່ອນທີ່ສາດສະໜາຈັກຖືກຮັບຮູ້—ໄດ້ຖືກເປີດຕົວ. ທາງເຂົ້າລານຕຶກຖືກໝາຍໄວ້ໂດຍອານຸສາວະລີຫີນປູນດ້ວຍຄຳທຳນາຍເຫລົ່ານີ້: “ແລະ ເຫດການຈະບັງເກີດຂຶ້ນໃນຍຸກສຸດທ້າຍ, ເມື່ອຈະມີພູທີ່ເປັນບ່ອນຕັ້ງພຣະວິຫານຂອງພຣະຜູ້ເປັນເຈົ້າຈະຖືກສະຖາປະນາຂຶ້ນເທິງຈອມພູທັງຫລາຍ ຊຶ່ງມັນຈະສູງກວ່າເນີນພູທຸກໆໜ່ວຍ ແລະ ປະຊາຊາດທັງປວງຈະຫລັ່ງໄຫລໄປບ່ອນນັ້ນ.”

ແນ່ນອນທີ່ເຫດການສຳຄັນທີ່ຈະເກີດຂຶ້ນໃນຊ່ວງ 10 ປີຂ້າງໜ້າ ອາດເປັນການສະແດງໃຫ້ເຫັນຢ່າງໜຶ່ງທີ່ຄຳທຳນາຍຂອງເອຊາຢາກຳລັງຈະເກີດເປັນຈິງ.

ລອງໄຕ່ຕອງເຖິງຈຳນວນພຣະວິຫານຫລວງຫລາຍທີ່ເປີດໃຫ້ເຂົ້າຊົມ ແລະ ອຸທິດ ທີ່ວາງແຜນໃຫ້ເກີດຂຶ້ນໃນທົດສະວັດຕໍ່ໄປ, ຊຶ່ງອາດຈະມີເຖິງ 164 ແຫ່ງ ແລະ ຈະເພີ່ມຂຶ້ນເລື້ອຍໆ. ລອງນຶກພາບວ່າທ່ານ ແລະ ໝູ່ເພື່ອນຂອງທ່ານຫລາຍສິບລ້ານຄົນຍ່າງຜ່ານບ້ານຂອງພຣະຜູ້ເປັນເຈົ້າ. ຈຸດສູນກາງສັນຍາລັກຂອງເຫດການເຫລົ່ານີ້ຈະເປັນການອຸທິດພຣະວິຫານເຊົາເລັກ ແລະ ກິດຈະກຳຕ່າງໆທີ່ກ່ຽວຂ້ອງ. ນີ້ຈະເປັນວັນທີ່ບໍ່ສາມາດລືມຢ່າງແນ່ນອນ.

ປີ 2030 ຈະມີໂອກາດທົ່ວໂລກໃນການຮ່ວມສະເຫລີມສະຫລອງວາລະຄົບຮອບສອງຮ້ອຍປີ ຂອງການຈັດຕັ້ງສາດສະໜາຈັກ. ເຖິງແມ່ນມັນໄວເກີນໄປທີ່ຈະເວົ້າເຖິງວິທີທີ່ສາດສະໜາຈັກຈະຮັບຮູ້ເຫດການສຳຄັນນີ້ແນວໃດ, ແຕ່ແນ່ນອນມັນຈະເຮັດໃຫ້ເຮົາສາມາດເຊື້ອເຊີນຄອບຄົວ, ໝູ່ເພື່ອນ, ເພື່ອນຮ່ວມງານ, ແລະ ແຂກຜູ້ມີກຽດ ໃຫ້ “ມາເບິ່ງ” ແລະ ເພື່ອຈະເຂົ້າໃຈໄດ້ດີຂຶ້ນ ເຖິງຜົນກະທົບອັນມີພະລັງ ທີ່ພຣະວິຫານມີຢູ່ໃນຊີວິດຂອງສະມາຊິກຂອງສາດສະໜາຈັກ.

ກິລາໂອລິມປິກລະດູໜາວ ປີ2002 ໃນເມືອງເຊົາເລັກ.

ໃນປີ 2034, ບຸກຄົນສຳຄັນ, ນັກທ່ອງທ່ຽວ, ນັກກິລາທົ່ວໂລກ ນັບຫລາຍພັນຄົນຈະຫລັ່ງໄຫລໄປຕາມຖະໜົນຫົນທາງຂອງເມືອງເຊົາເລັກ, ຊຶ່ງເປັນເວທີສຳລັບການແຂ່ງຂັນກິລາໂອລິມປິກ. ບາງທີອາດບໍ່ມີການສາທິດຄວາມເປັນນ້ຳໜຶ່ງໃຈດຽວກັນໃນທົ່ວໂລກ ທີ່ຍິ່ງໃຫຍ່ກວ່າການສະແດງອອກໃນກິລາໂອລິມປິກ. ສາຍຕາຂອງຄົນທົ່ວໂລກຈະຈ້ອງມອງຢູ່ທີ່ສາດສະໜາຈັກ ແລະ ສະມາຊິກຂອງສາດສະໜາຈັກ, ເຮັດໃຫ້ມີໂອກາດຢ່າງຫລວງຫລາຍໃນການເປັນອາສາສະໝັກ, ຮັບໃຊ້, ແລະ ແບ່ງປັນຂ່າວດີ, ຜ່ານທາງການກະທຳຄວາມດີ—ຊຶ່ງເປັນເຫດການທີ່ບໍ່ສາມາດລືມ.

ຊ່ວງເວລາທີ່ຈະມາເຖິງເຫລົ່ານີ້ຈະໃຫ້ໂອກາດສະມາຊິກຂອງສາດສະໜາຈັກໃນທຸກແຫ່ງໄດ້ແບ່ງປັນຂ່າວດີຂອງພຣະກິດຕິຄຸນຂອງພຣະເຢຊູຄຣິດຜ່ານທາງວາຈາ ແລະ ການກະທຳ, ເປັນທົດສະວັດທີ່ບໍ່ສາມາດລືມ.

ຂ່າວດີ

ໃນການປະຊຸມໜຶ່ງອາທິດກ່ອນວັນເກີດຂອງເພິ່ນ, ປະທານແນວສັນໄດ້ແບ່ງປັນເຫດຜົນທີ່ເພິ່ນທະນຸຖະໜອມວະລີທີ່ວ່າ “ຂ່າວດີ.” ໃນທາງຜິວເຜີນ, ເພິ່ນໄດ້ສັງເກດເຫັນວ່າ, ວະລີນີ້ຟັງແລ້ວໜ້າຊື່ນຊົມ ແລະ ມີຄວາມສຸກ. ແຕ່ “ຂ່າວດີ” ບົ່ງບອກຫລາຍກວ່ານັ້ນ. ເພິ່ນໄດ້ອະທິບາຍວ່າ ວະລີນີ້ມາຈາກພາສາກຣີກເດີມວ່າ euangelion, ຊຶ່ງແປວ່າ “ຂ່າວປະເສີດ” ຫລື “ພຣະກິດຕິຄຸນ.” ຄວາມສຸກ ແລະ ຄວາມຊື່ນຊົມໃນຊີວິດນີ້ ແລະ ຊີວິດໜ້າມັກເຊື່ອມໂຍງເຂົ້າກັບພຣະກິດຕິຄຸນຂອງພຣະເຢຊູຄຣິດ. ດັ່ງນັ້ນ ວະລີທີ່ວ່າ “ຂ່າວດີ” ຈຶ່ງສາມາດຈັບຄວາມໝາຍສອງຢ່າງນີ້ໃນທາງທີ່ປະເສີດ.

“ຊາຍ [ແລະ ຍິງ] ເປັນຢູ່ກໍເພື່ອພວກເຂົາຈະໄດ້ມີຄວາມສຸກ.” ພຣະບິດາເທິງສະຫວັນໄດ້ຈັດຕຽມແຜນແຫ່ງຄວາມສຸກທີ່ເຮັດໃຫ້ເກີດຄວາມຊື່ນຊົມຜ່ານທາງພອນຂອງພຣະອົງ. ສິ່ງເຫລົ່ານີ້ແມ່ນລວມທັງການຢູ່ໃນທີ່ປະທັບຂອງພຣະອົງຊົ່ວນິລັນດອນເປັນຄອບຄົວ. ການຊົດໃຊ້ຂອງພຣະເຢຊູຄຣິດເປັນສູນກາງໃນແຜນຂອງພຣະເຈົ້າໃນການໄຖ່ເຮົາ. ເພື່ອຈະໄດ້ຮັບຊີວິດນິລັນດອນ, ເຮົາຕ້ອງມາຫາພຣະຄຣິດ. ເມື່ອເຮົາເຮັດເຊັ່ນນັ້ນ “ແລະ ຊ່ວຍຄົນອື່ນໃຫ້ເຮັດຄືກັນ, ເຮົາໄດ້ມີພາກສ່ວນໃນວຽກງານແຫ່ງຄວາມລອດ ແລະ ຄວາມສູງສົ່ງຂອງພຣະເຈົ້າ.”

ຂ່າວສານຂອງຂ່າວດີນີ້ເຖິງພຣະກິດຕິຄຸນຂອງພຣະເຢຊູຄຣິດ ແມ່ນຂ່າວສານທີ່ສຳຄັນທີ່ສຸດໃນໂລກ. ແລະ ນັ້ນຄືທີ່ມາຂອງຊາວໜຸ່ມ ແລະ ຜູ້ໃຫຍ່ໜຸ່ມຂອງສາດສະໜາຈັກ.

ສຳລັບຄວາມເຂັ້ມແຂງຂອງຊາວໜຸ່ມ

ບັດນີ້, ໃນຂະນະທີ່ທົດສະວັດທີ່ຈະມາເຖິງ ອາດເຕັມໄປດ້ວຍວັນ ທີ່ບໍ່ສາມາດລືມ ສຳລັບສະມາຊິກຂອງສາດສະໜາຈັກທຸກຄົນ, ສິ່ງນີ້ສາມາດເປັນຈິງສຳລັບພວກເຈົ້າທີ່ເປັນຄົນລຸ້ນໃໝ່ໂດຍສະເພາະ. ພວກເຈົ້າໄດ້ມາສູ່ໂລກໃນຕອນນີ້ ເພາະພວກເຈົ້າໄດ້ຖືກເລືອກໃຫ້ຢູ່ນີ້ໃນເວລານີ້. ພວກເຈົ້າມີພະລັງ ແລະ ຄວາມສາມາດພຽງພໍທີ່ຈະເປັນສານຸສິດຂອງພຣະຄິດ ໃນວິທີທີ່ບໍ່ເຄີຍມີມາກ່ອນ.

ປະທານຈອດ ຄິວ ແຄນນັນ ໄດ້ສິດສອນວ່າ: “ພຣະເຈົ້າໄດ້ສະຫງວນດວງວິນຍານພິເສດໄວ້ສຳລັບຍຸກສະໄໝນີ້ ຜູ້ທີ່ກ້າຫານ ແລະ ຕັ້ງໃຈທີ່ຈະປະເຊີນໂລກ, ແລະ ອຳນາດທັງໝົດຂອງມານຮ້າຍ [ແລະ ເພື່ອ] … ສ້າງສາຊີໂອນຂອງພຣະເຈົ້າຂອງເຮົາຢ່າງບໍ່ມີຄວາມຢ້ານກົວຕໍ່ຜົນສະທ້ອນໃດໆ.”

ເພາະສິ່ງນັ້ນ, ຂ້າພະເຈົ້າຢາກເວົ້າກັບພວກເຈົ້າຄົນລຸ້ນໃໝ່, ເພື່ອເຊື້ອເຊີນໃຫ້ພວກເຈົ້າລອງນຶກເບິ່ງວ່າ ທົດສະວັດໜ້າ, ຊຶ່ງບໍ່ສາມາດລືມ, ສາມາດເປັນ ສຳລັບພວກເຈົ້າ ແນວໃດ. ພ້ອມນີ້ຂ້າພະເຈົ້າຂໍສະເໜີຄຳແນະນຳ ແລະ ກຳລັງໃຈທີ່ລຽບງ່າຍສອງສາມຂໍ້ ທີ່ອາດຊ່ວຍເສີມກຳລັງພວກເຈົ້າລະຫວ່າງທົດສະວັດທີ່ຈະມາເຖິງນີ້.

ເຊັ່ນດຽວກັບພວກເຈົ້າຫລາຍໆຄົນ, ຂ້າພະເຈົ້າມີສະມາດໂຟນ ທີ່, ບາງຄັ້ງມັນດຶງຮູບພາບມາສະແດງ ທີ່ຂ້າພະເຈົ້າໄດ້ເຮັດໃນມື້ໃດມື້ໜຶ່ງໂດຍສະເພາະ. ມັນເປັນເລື່ອງແປກສະເໝີທີ່ເຫັນຫລາຍສິ່ງຫລາຍຢ່າງມີການປ່ຽນແປງສຳລັບຂ້າພະເຈົ້າ ແລະ ຄອບຄົວຂອງຂ້າພະເຈົ້າ ໃນເວລາພຽງບໍ່ເທົ່າໃດປີ.

ລອງນຶກພາບວ່າ ໂທລະສັບ ຂອງພວກເຈົ້າ ຈະສະແດງຮູບພາບຫຍັງແດ່ໃນ 10 ປີຂ້າງໜ້າ! ພວກເຈົ້າອາດເຫັນຕົວເອງຮຽນຈົບມັດທະຍົມ ຫລື ວິທະຍາໄລ, ຮັບຂອງປະທານສັກສິດ, ໄປເຜີຍແຜ່, ແຕ່ງງານ, ແລະ ມີລູກຄົນທຳອິດຂອງພວກເຈົ້າ. ສຳລັບພວກເຈົ້າໂດຍສະເພາະ, ສິ່ງນີ້ຈະເປັນທົດສະວັດ ທີ່ບໍ່ສາມາດລືມ. ແຕ່ມັນຈະເປັນ ສອງເທົ່າ ຖ້າຫາກພວກເຈົ້າພະຍາຍາມຢ່າງຫ້າວຫັນທີ່ຈະກາຍເປັນແສງສະຫວ່າງໃຫ້ແກ່ໂລກ ເຖິງວິທີທີ່ຂ່າວດີຂອງພຣະກິດຕິຄຸນຂອງພຣະເຢຊູຄຣິດສາມາດເສີມສ້າງ ແລະ ຍົກລະດັບ ບໍ່ພຽງແຕ່ຊີວິດຂອງພວກເຈົ້າເທົ່ານັ້ນ, ແຕ່ຄົນໃນຄອບຄົວຂອງພວກເຈົ້າ, ໝູ່ເພື່ອນ, ແລະ ຜູ້ຕິດຕາມສື່ສັງຄົມຂອງພວກເຈົ້ານຳອີກ.

ພວກເຈົ້າອາດສົງໄສວ່າຈະເຮັດສິ່ງນີ້ໄດ້ແນວໃດ.

ສາດສະດາຂອງພຣະເຈົ້າໄດ້ສິດສອນເຮົາວ່າສິ່ງນີ້ເຮັດໄດ້ໂດຍຜ່ານທາງການເຮັດກິດຈະກຳທີ່ລຽບງ່າຍສີ່ຢ່າງ, ຊຶ່ງເອີ້ນວ່າໜ້າທີ່ຮັບຜິດຊອບທີ່ໄດ້ຮັບການແຕ່ງຕັ້ງຈາກສະຫວັນ: ທຳອິດ ການດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ; ສອງ, ການດູແລຜູ້ທີ່ຕ້ອງການຄວາມຊ່ວຍເຫລືອ; ສາມ, ການເຊື້ອເຊີນທຸກຄົນໃຫ້ຮັບເອົາພຣະກິດຕິຄຸນ; ແລະ ສີ່, ການເຕົ້າໂຮມຄອບຄົວເຂົ້າກັນຊົ່ວນິລັນດອນ. ຢ່າງໜ້າອັດສະຈັນ, ແຕ່ລະຢ່າງສາມາດເຮັດໄດ້ດ້ວຍວິທີປົກກະຕິ ແລະ ທຳມະຊາດ.

ໜ້າທີ່ຮັບຜິດຊອບທີ່ໄດ້ຮັບການແຕ່ງຕັ້ງຈາກສະຫວັນ

ຂ້າພະເຈົ້າສັນຍາກັບພວກເຈົ້າວ່າ ນີ້ຈະເປັນທົດສະວັດທີ່ບໍ່ສາມາດລືມ ສຳລັບພວກເຈົ້າ ຖ້າຫາກພວກເຈົ້າຍອມຮັບເອົາໜ້າທີ່ຮັບຜິດຊອບທີ່ໄດ້ຮັບການແຕ່ງຕັ້ງຈາກສະຫວັນສີ່ຢ່າງເຫລົ່ານີ້. ໃຫ້ເຮົາມາພິຈາລະນາສິ່ງນີ້ອາດໝາຍເຖິງຫຍັງ.

ໜ້າທີ່ຮັບຜິດຊອບສີ່ຢ່າງທີ່ໄດ້ຮັບການແຕ່ງຕັ້ງຈາກສະຫວັນ.

ໜຶ່ງ, ດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ. ສຶກສາຖ້ອຍຄຳຂອງສາດສະດາ, ແລະ ຮຽນຮູ້ທີ່ຈະຮັກພຣະບິດາຜູ້ສະຖິດຢູ່ໃນສະຫວັນຂອງພວກເຈົ້າ. ໂນ້ມໃຈຂອງພວກເຈົ້າໄປຫາພຣະອົງ, ແລະ ພະຍາຍາມເດີນຕາມທາງຂອງພຣະອົງ. ຖືກຍົກຂຶ້ນໂດຍ “ຄວາມໝັ້ນໃຈໃນພັນທະສັນຍາ” ທີ່ແອວເດີ ຢູລິດຊິສ໌ ໂຊອາເຣສ໌ ໄດ້ບັນຍາຍ. ຄວາມໝັ້ນໃຈນີ້ແມ່ນມາຈາກການເຮັດພັນທະສັນຍາທີ່ຈະຕິດຕາມພຣະເຢຊູຄຣິດ, ໂດຍຮູ້ວ່າ ພຣະຜູ້ຊ່ວຍໃຫ້ລອດຈະເພີ່ມຄວາມເຂັ້ມແຂງ ແລະ ສະໜັບສະໜູນພວກເຈົ້າ.

ໃຫ້ໝູ່ເພື່ອນຂອງພວກເຈົ້າເຫັນຄວາມຊື່ນຊົມທີ່ພວກເຈົ້າຮູ້ສຶກໃນການດຳລົງຊີວິດຕາມພຣະກິດຕິຄຸນ, ແລະ ພວກເຈົ້າຈະເປັນຂ່າວສານພຣະກິດຕິຄຸນທີ່ດີທີ່ສຸດ ທີ່ພວກເຂົາເຄີຍໄດ້ຮັບ.

ສອງ, ເອື້ອມອອກໄປດ້ວຍຄວາມເຫັນອົກເຫັນໃຈ ເພື່ອດູແລຄົນຂັດສົນ. ຕາມປົກກະຕິແລ້ວ ຄົນລຸ້ນຂອງພວກເຈົ້າມັກຈະໃສ່ໃຈກັບຄົນທີ່ໂຊກຮ້າຍ. ເມື່ອໃດກໍຕາມທີ່ເກີດໄພພິບັດ ແລະ ສະມາຊິກຂອງສາດສະໜາຈັກຟ້າວໄປຊ່ວຍທຳຄວາມສະອາດ ແລະ ປອບໂຍນຜູ້ປະສົບໄພ, ເບິ່ງຄືວ່າຄົນສ່ວນໃຫຍ່ທີ່ໃສ່ເສື້ອຍືດ “Helping Hands” ເປັນໄວລຸ້ນ ແລະ ໄວຊາວກວ່າໆ. ມັນເປັນທຳມະຊາດຂອງພວກເຈົ້າ “ທີ່ຈະແບກຫາບພາລະຂອງກັນແລະກັນ” ແລະ “ປອບໃຈຄົນທີ່ຕ້ອງການຄວາມປອບໃຈ.” ໂດຍການເຮັດສິ່ງນີ້ ເຮົາ “ປະຕິບັດຕາມກົດບັນຍັດຂອງພຣະຄຣິດ.”

ພວກເດັກນ້ອຍກຳລັງຮວບຮວມໝາກໄມ້ກວນເພື່ອເອົາໄປຊ່ວຍຄົນຂັດສົນ.

ເອເວັນ, ເດັກນ້ອຍປະຖົມໄວ, ໄດ້ຕັດສິນໃຈໃຊ້ເວລາລະຫວ່າງປິດເທີມລະດູຮ້ອນຈາກໂຮງຮຽນຂອງລາວ ເພື່ອຮວບຮວມສິ່ງຂອງສຳລັບການເຮັດແຊນວິດໃສ່ຖົ່ວກັບໝາກໄມ້ກວນ ເພື່ອບໍລິຈາກໃຫ້ທະນາຄານອາຫານໃນທ້ອງຖິ່ນຂອງລາວ. ລາວພົບເຫັນໂຄງການນີ້ໃນເວັບໄຊ JustServe. ທ້າວເອເວັນ ໄດ້ເກນໝູ່ນັກຮຽນທັງໝົດໃນຫ້ອງຂອງລາວໃຫ້ຊ່ວຍຮວບຮວມໝາກໄມ້ກວນຫລາຍກວ່າ 700 ຂວດ! ໃຫ້ຜູ້ຄົນທີ່ພວກເຈົ້າຮັບໃຊ້ຮູ້ວ່າ ຄວາມຫ່ວງໃຍທີ່ພວກເຈົ້າມີຕໍ່ເຂົາເຈົ້າ ມີຮາກຖານມາຈາກຄວາມຮັກທີ່ພວກເຈົ້າມີຕໍ່ພຣະເຈົ້າ ແລະ ຄວາມປາດຖະໜາຂອງພວກເຈົ້າທີ່ຈະປະຕິບັດຕໍ່ເພື່ອນບ້ານເໝືອນດັ່ງຕົນເອງ.

ສາມ, ເຊື້ອເຊີນທຸກຄົນໃຫ້ຮັບເອົາພຣະກິດຕິຄຸນ. ປີນີ້ພວກເຮົາໄດ້ເປີດເຂດເຜີຍແຜ່ໃໝ່ 36 ແຫ່ງທົ່ວໂລກ ເພື່ອຮັບຮອງທຸກຄົນທີ່ມີຄວາມປາດຖະໜາຈະຮັບໃຊ້ເຜີຍແຜ່ເຕັມເວລາ. ໃນຍຸກທີ່ຊາວໜຸ່ມຫລາຍຄົນເລືອກທີ່ຈະບໍ່ເຂົ້າຮ່ວມກິດຈະກຳທາງສາດສະໜາຢ່າງເປັນທາງການ, ນີ້ຖືວ່າເປັນໜ້າອັດສະຈັນ ແລະ ສະແດງໃຫ້ເຫັນເຖິງທຳມະຊາດອັນຍອດຍ້ຽມຂອງປະຈັກພະຍານຂອງພວກເຈົ້າ. ບໍ່ວ່າຈະເປັນການຮັບໃຊ້ເຕັມເວລາຫລືບໍ່ກໍຕາມ, ກະລຸນາຮັບຮູ້ຄວາມສາມາດອັນມະຫາສານຂອງພວກເຈົ້າ ທີ່ຈະມີອິດທິພົນຕໍ່ໝູ່ເພື່ອນ ຂະນະທີ່ພວກເຈົ້າຮັກ, ແບ່ງປັນ, ແລະ ເຊື້ອເຊີນເຂົາເຈົ້າໃຫ້ສຳຫລວດພຣະກິດຕິຄຸນຂອງພຣະເຢຊູຄຣິດ.

ສີ່, ເຕົ້າໂຮມຄອບຄົວເຂົ້າກັນຊົ່ວນິລັນດອນ. ຂະນະທີ່ຂ້າພະເຈົ້າໄປຢ້ຽມຢາມພຣະວິຫານໃນທົ່ວໂລກ, ຂ້າພະເຈົ້າອັດສະຈັນກັບກຸ່ມຊາວໜຸ່ມທີ່ລໍຖ້າຢູ່ຫ້ອງບັບຕິສະມາ ແລະ ຈຳນວນຜູ້ໃຫຍ່ໜຸ່ມທີ່ມີເພີ່ມຫລາຍຂຶ້ນ ທີ່ຮັບໃຊ້ເປັນພະນັກງານພິທີການ. ເມື່ອບໍ່ດົນມານີ້ ກຸ່ມຜູ້ຄົນຫລາຍກວ່າ 600 ຄົນ ຈາກປະເທດສະກັອດແລນ ແລະ ອຽກລັງ ໄດ້ເດີນທາງໄປພຣະວິຫານເພຣສ໌ຕັນ ອັງກິດ, ເພື່ອປະຕິບັດພິທີການຫລາຍກວ່າ 4,000 ພິທີ, ຊຶ່ງສ່ວນຫລາຍແມ່ນສຳລັບບັນພະບຸລຸດທີ່ລ່ວງລັບໄປແລ້ວຂອງເຂົາເຈົ້າ! ຂ້າພະເຈົ້າຂໍຊຸກຍູ້ພວກເຈົ້າໃຫ້ມີສ່ວນຮ່ວມໃນປະຫວັດຄອບຄົວ, ໃຊ້ເວລາຢູ່ໃນພຣະວິຫານ, ແລະ ກະກຽມຕົວເອງໃຫ້ເປັນຊາຍ ຫລື ຍິງທີ່ພ້ອມຈະແຕ່ງງານກັບຄູ່ທີ່ມີຄ່າຄວນເທົ່າທຽມກັນຢູ່ໃນພຣະວິຫານ. ພັດທະນາແບບແຜນໃນຊີວິດຂອງພວກເຈົ້າ ຕັ້ງແຕ່ຕອນນີ້ ເພື່ອເຮັດໃຫ້ພຣະວິຫານເປັນພາກສ່ວນປົກກະຕິໃນຊີວິດຂອງພວກເຈົ້າ.

ສະຫລຸບ

ອ້າຍເອື້ອຍນ້ອງທີ່ຮັກແພງ, ເພື່ອນໜຸ່ມຂອງຂ້າພະເຈົ້າ, ອາດຈະມີຄວາມຫຍຸ້ງຍາກສຳລັບເຮົາແຕ່ລະຄົນໃນມື້ຂ້າງໜ້າ. ເຖິງຢ່າງໃດກໍຕາມ, ເມື່ອເຮົາເຂົ້າສູ່ທົດສະວັດທີ່ຈະມາເຖິງຂອງຊ່ວງເວລາທີ່ບໍ່ເຄີຍເປັນມາກ່ອນ, ຂໍໃຫ້ເຮົາຈົ່ງແບ່ງປັນຂ່າວດີ ຜ່ານທາງກິດຈະກຳທີ່ລຽບງ່າຍຂອງການດຳລົງຊີວິດ, ການດູແລ, ການເຕົ້າໂຮມກັນ. ເມື່ອເຮົາເຮັດເຊັ່ນນັ້ນ, ພຣະຜູ້ເປັນເຈົ້າຈະອວຍພອນເຮົາດ້ວຍປະສົບການທີ່ບໍ່ສາມາດລືມ.

ຂ້າພະເຈົ້າເປັນພະຍານວ່າ ຜູ້ທີ່ເຂົ້າຫາພຣະຜູ້ເປັນເຈົ້າດ້ວຍໃຈຈິງ ແລະ ດ້ວຍເຈດຕະນາອັນແທ້ຈິງ, ຜູ້ທີ່ມີພຣະນາມຂອງພຣະຜູ້ຊ່ວຍໃຫ້ລອດຢູ່ເທິງປາກຂອງເຂົາເຈົ້າ ແລະ ພຣະວິນຍານສັກສິດຢູ່ໃນຈິດວິນຍານຂອງເຂົາເຈົ້າ, ຜູ້ທີ່ຮ່ວມເດີນທາງອັນຍິ່ງໃຫຍ່ ແລະ ຮຸ່ງໂລດນີ້, ຈະຄົ້ນພົບ ແລະ ປະສົບກັບພອນແຫ່ງຊັ້ນສູງ ແລະ ໄດ້ຮັບພະຍານວ່າ ພຣະເຈົ້າໄດ້ຍິນທ່ານ, ຮູ້ຈັກທ່ານ, ແລະ ຮັກທ່ານ. ທ່ານຈະປະສົບກັບວັນທີ່ບໍ່ສາມາດລືມ. ໃນພຣະນາມຂອງພຣະເຢຊູຄຣິດ, ອາແມນ.