Walagen maed Rok’ Kristus.

Pi fagar rog, kad thapeged e mo’olung ni rib fel’ daba’. Kad thamey fare Ya’el rok’ Somoel nge t’uf Rok’ ufithik’ fapi milwol rok’ e pi tiyugang. Gube thamey puf mat’awn e rayog ni nggu non ngomed ni bin tomur u mo’olung ney. Gube meybil fare Ya’el rok’ Somoel nima pared ngodad napan ni ngad falfalaen’ gad uta’abang ulan e pi walagen maed rok’ Kristus.

Profet rodad nib t’uf rodad, President Nelson ke fil: “Gube pining gubin chongin e galasia ni ngan dag min tayfan gubin e bitir rok Got. Gadadra sug e gum’racha’daed ko t’ufeg ngak urngin e bitir ku Got.”¹ Galasia ney ma paer ulangab e feyleng, thingarda folgad e pinning ney rok’ e profet rodad niba ga’fan ni ra gelnag e gil’ilungun Somoel ulangab e feyleng.

Fare gospel rok’ Yesus Kristus ma fil’ gadad gubin e bitir rok’ e galibthir nu tharmiy ko ya’el rodad nima t’ufeg ngodad² nge kad pared ulan e tabinaw u powchen Got umon gadad kar gargelendad u feyleng. Fare gospel ku Yesus Kristus ba machib nag gadad gubin ni sunmiy u ta’ab rogon ya’an Rok Got.³ Ere, dariy’ e thilthil toelngin riy’ u p’oewchen Ngak’,⁴ ma Ir “ri ta’reb e pumo’on ni sunumiy, me sum rok e re mo’on [nge ppin] nem girdi’en urngin e nam.”⁵ Ere, gadad gubin ni bay e rogon nib thothup, michmich, nge gelnag e rogon, bachane bay “ta’reb e Got ni bay ni ir e Chitamangidad ni gadad gubin, ni ir e Somol rodad ni gadad gubin, ma be maruwel u pa’dad ni gadad gubin, ma bay u fithik’dad ni [gadad] gubin.”⁶

Woed e gachelpen Yesus, me pinningdad ni ngad gaa’ nag e mich rodad ulan, nge t’uf ngak, e pi walagdad ko ya’el napan ni ngad ta’areb gum’ircha’dad u ta’abang ngo fithik’ e t’ufeg rodad ngodad, dariy’fan e pi’nen nib thil rodad, nira gaa’nag e rogon rodad ni ngad ta’areb nag gubin e bitir rok’ God.⁷

Biney ni ke buch ngak e gidii’ ku Nephi ko l’agruw miri’ay e duw tomuren Kristus nike machib nagrad?

“Ma rriyulʼ ni dakuriy ba ulung i gidiiʼ ni aram fini falfalaenʼ ngab yang u fithikʼ gubin e pi gidiiʼ ni sunmiy Got nga paʼ. …

“Ara bay reb fapi Lamanites, ara beeʼ u ba ulung ni -ites; ya yaed ba taʼareb, ni fapi bitir rokʼ Kristus, nge piʼin taferaed fare gilʼilungun Got.

“Ma rib felʼ waʼathraed!”⁸

President Nelson nike weliy nib ga’ ni ngad pii’ e tayfan ngak e gidii’ napan nike yoeg: “Tasunmiy rodad ba pinningdad ni ngad pag e dabug rodad ngak reb e ulungi bitir rok’ Got. Fa’an bay demtrug e dabun rodad ngak reb e gidii’ ma thingarda kalngan’! … Gadad ma thingarda rrin’ed demtrug e pi’nen ulan e rayog rodad ni ngad thapeged e tayfan nifan gubin e pifak Got nib pumo’on nge ppin.”⁹ Riyul, e gidii’ kafram ni kar meleg e tayfan rodad nifan e pi’nen nib thil.¹⁰

Mu lemnag morunga’age e m’ag nib thothup ni ma tay ngodad ngak Got, fonow ney nib thogthog President Nelson nike pii’ ire yang nib gaa’ nira fal’eg e nangfan ma dabi fal’eg e rongrong ko dabun nge thilyeg uthilin dad.¹¹ Machnae, woed Paul nike kuruf e thin ko fapi gidii nu Efesus, thingarda nanged fa’an ni ngad fulweg e fan ney, nira t’uf e ngongol rok’ e bee’ nge ulungi gidii’ ni ngad mang nib sobut’aen’, gum’aen’, nge athamgil ngak ngorad.¹²

Bay e ya’at mornga’agen e tiyugang nib Jew nike ba’adag e litheayaal’ ni bay l’agruw e fagar rok’. Ke fith ngorow, “Urogon ni ngam nangew nike taleg e neap’ nge ke tabab bin magid e rran?”

Ta’areb e fagar nike fulweg ni, “Napan ni ngam sap nga ngek nge kii’eg ngorow e saff nge kaming.”

Reb e fagar nike fulweg ni, “Napan ni ngam sap nge kii’eg ngorow e gak’iy ni olive nge gak’iy ni fig.”

Me tomur ni kar fith ngak e tiyugang nib ganop ta’abrogon e duwer. Tomuren nike lemnag boech, nike fulweg, “Napan ni ngam chel nga ngek nge sap e ‘awochean rok’ e ppin fa pumo’on nge yoeg, ‘Ir e walagen nib ppin; ir e walagen nib pumo’on.’”¹³

Pi walagen nib t’uf rog, gumanag ni bay e magal ko e rran nib biech ulan e yafos rodad nira ga’ nag napan ni ngad pii’ e liyor’ nge fel’ rogon ngak reb e bee’ woed e walagen nib riyul’ rok’ Kristus.

Napan e pigpig Rok’ u feyleng, Yesus nike dag e yalen ney napan ni ke “Me yan nga gubin yang, ni be rin’ e tin ni bfel’”¹⁴ ngak gubin gidii’, pinningrad ni ngar moy ngak nge thapeg e tin nib fel’ Rok’, dariy’fan e nam rorad, miit e gidii’, fa bay thil e yalen rorad. Nike pigpig, golnag, nge motoyil ngoraed e pi’nen ni yad ba t’uf, ni rib gaa’ ufithik’ e pi’in nib thin, nib achigchig, fa dar un’ed a ulungi gidii’. De siyeg demtrug ngorad machane nike pii’ e ba’adag nge t’uf, bachane nike sap ngorad ni woed e walagen, e pi bitir rok ta’abrogon e Chitimangiy.¹⁵

Ta’areb e ngiyal’ binem nike buch napan fare Tathapeg ke milekag nga Galilee, nge nike fek e kanawo’ ma yaen ufithik’ Samaria.¹⁶ Yesus ke mel’eg ni nge tofan u luwed ku Jakob. Napan nike paer, ke yib e bpin u Samaria ni nge l’ing e ran. Ulan e ganop rok’, Yesus ni ke fulweg, ke ga’ar, “Mpi’ boch e ran gu unum.”¹⁷

Fare bpin ke balyangaen’ bachane e bee’ nib Jew nike fith ngak e bee’ nu Samaria nifan e ayuw nge ke weliy e balyangaen’ rok’, ke ga’ar, “I gur e ga be’ u Israel mi gag e gu be’ u Samaria, ere ke di’in ma kam ning e ran ngog ni ngam unum? Ya piyu Israel e darir fanayed e ran ko pin’en nma fanay piyu Samaria e ran riy.”¹⁸

Machane Yesus, nike pag e yalen nib kakrom uthilin e bee’ u Samaria nge Israel, nike pigpig ngak e bpin ufithik e t’ufen, me ayuwegen ni nge nang fan mornga’agen—ni’ir, fare Messiah, ni ra weliy gubin e pi’nen nge nike soen nifan e sul rok’.¹⁹ Bachane e machib ney nib fel’ rogon fare bpin ney ke mil nga binaw nge yoeg ngak e gidii ney mang ni ke buch, ke ga’ar, “Gur i ir fare Messiah?”²⁰

Bay bo’or e t’uf rog ngak e gidii’ ni kar feked e magawon, achigchig nag, fa gafgow bachane e pi’in ni dar thamey nge dar lemnag, bachane, ulan e yafos rog, kug sap e amith nima fek e gidii’ nib fel’ ufithik e pufthin bachane ba thil e non, ya’an, fa rogon ni ngar fas gad. Gube thamey e kirbaen’ ulan e gum’ircha’eg nifan e pi’in mab lumor e laniyaen’raed, kireb e lemnag rorad, nge el’el’ e gum’ircha’rad udakaen e ganop ni yad ma thabi ga’fan ko reb e gidii’ bachane a pi’nen nib thil uthilin rad. Lemnag rorad nib achigchig nifan reb e gidii’ ma kirebnag e rogon rayog ni ngar sap gad ngorad ni woed fapi bitir ku Got.

Woed e pi profet kar weliyed, gadad ba pared ulan e rran ri bay mo’maw’ ni ra buch umon Bin Magid e Wub rok’ Tathapeg.²¹ Gubin e feyleng ba mang nib thil ufithik’ e kii’ nib ga’, binem nima gaa’ nag ko racial, aam, nge pi’nen ko socioeconomic. Kii’ ney ni ra thilyeg e tafney ngak e gidii’ nge ngongol rorad marunga’ reb e gidii’. Bachane e fan ney, bo’or e gidii’ ma lemnag, rrin e pi’nen, nge achigchig nag reb e miit e yalen, gidii’, nge ethnicities, nap’an ni ngar feked e ganop nib kireb, ni de mataw, nge bochingyal’ de fel’, ni ra sunmiy e thamey ko dabun, fekyath, kireb, nge damomuw ngorad. Thamey ney ni bay e lik’ngin ko uf’uf’, ga’nag rad, mo’owaen’, nge awaen’, pi folwok u rarogon e denen,²² pi’nen nib thil ko fapi fal’ngin nib t’uf rok Kristus. Fapi rogon ney ir gathi mangil nifan e pi’in ba guyed rogon ni ngar manged e gachelpen nib riyul’.²³ Nib riyul’, pi walegeg, dakiriy’ e tafen ko tafney nge ngongol nib kireb ngak e gidii’ nib thil ulan e ulungi ko pi Saint.

Gadad e pi fak ko m’ag, rayog ni ngad ayuweg ma chuw e ngongol ney napan gadad ma sapgad e pi’nen nib thil uthilin gadad nge owchen Tathapeg²⁴ nge lemnag morunga’agen e pi’nen ni ta’abrogon rodad—rogon rodad nib thothup nge lik’ngin’ rodad. Ku boech, rayog ni ngad guyed rogon ni ngad sapgad ulan e pi lik’aay, tin ba’adag, kirbaen’, nge amith rorad e bugul yoror rodad. Gubin dad e bitir ku Gok ni ba milekag, gadad ma ta’areb ulan e rogon rodad ni dabda machalbog nge ulan e cheag ni ngad ilal’ gad. Kan pinningdad ni ngad dared u buut uta’abong, ufithik’ e gapas, ma sug e gum’ircha’dad ko t’uf ngak Got nge gubin gidii’—fa, woed Abrahm Lincoln nike yol, “dariy’ e puwaen’ ngak; nge adag ngak gubin.”²⁵

Kam lemnag morunga’agen e yalen ko ta’areb e gidii’ ni bay dag ngodad ufithik’ e rogon nib moem ulan e na’un rok’ Somoel? Gadad ma dared nga temple ufithik’ ta’areb e fan nge sug gad ko ba’adag ni ngad manged nib machalbog nge thothup u p’oewchen nib thothup Rok’. Me tayed e maad nib wechwech, fare Somoel ma thapeg gadad gubin nib pifak nib t’uf rok’, mo’on nge bpin ku got, lik’ngin’ ku Kristus.²⁶ Rib mangil e rayog gadad nima rrin’ed ta’abrogon e gam’ing, fal’eg ta’abrogon e m’ag, guyrogon ni ngad fasgad nib fel’ rogon, nge thapeg ta’abrogon e micheg nib manimus. Ta’abang dad u fan, gadad ma guyed ngodad ufithik’ bin bi’ech e owchdad, nge ulan e ta’areb dad, gadad ma madnam nifan e pinen nib thil rodad ma pifak Got nib thothup.

De n’ew napan kug powi’iy e gidii’ nib ga’ ko nam nge am u fithik’ e bing e na’un nifan fare Brasília Brazil Temple. Kug soen ulan e seenggil nifan e thilyeg ko maad ni bay e vice president ko Brazil, nge kug nonew morunga’agen e maad nib wechwech gubin e gidii ma chuw ulan e temple. Kug weliy ngak e pow ko maad nib wechwech ma bayip’ fan gadad gubin e woed rogon Got nge ulan e temple, pi’nen rodad e gathi vice preseident ni fan e nam fa tiyugang ko galasia machane pi fak ko Chitimangiy nu Tharmiy.

Fare lul’ ni Iguaçú ma yaen ufithik yang nib yimuch ko Brazil nga mang boch e pi waterfall ma kanoeg fare Iguaçú Falls—ta’areb e pi’nen Got ni ke fal’eg nib fel’ ya’an ulan e feyleng, ni ke mang ta’areb ko medlip e ma’ang’ang udakaen e feyleng. Bo’or e raen ran yaen nga dakaen ta’areb e lul’ nge tomuren me seesey, me fal’eg bo’or ni bi’yu e pi waterfall. Bay gu non u fithik’ e pow, binir e rogon ko pi waterfall me weliy morunga’agen e tabinaw rok’ Got ulan e feyleng, bachane gadad ma thapeged ta’abrogon e lik’ngin ko ya’el, ni kar thapeged ko lik’ngin nib thothup. Machane, gadad gubin ma dared ufithik’ e pi’nen nib thil ko yalen, ethnicities, nge pi nam, ni bay e ganop nib thil, rogon, nge thamtham. Dariyfan binem, gadad ma dared ni pi fak’ Got nge pi walagedad ulan Kristus, ma dabda malog e tha’ nib thothup, nima fal’egdad e gidii’ nib thil nge e ulungi nib mangil.²⁷

Pi walegeg nib t’uf rog, gadad bat’uf ni ngad chelgad e gum’ircha’dad nge tafney rodad nga ganop nge mich ney ni gadad gubin e ta’abrogon u powchen’ Got, ni gadad gubin ma sug ko ta’abrogon e gelngin nib manimus. Gube athap gadad ma ba’adag e lik’ngin ko ya’el ni bay uthilindad nge ba’adag e pi’nen nib thil rodad. Fa’an ni ngad rrin’ed, gube micheg ngomed gadad ra dared ulan e rogon rodad, woed e raen ko Iguaçú Falls, nge dabda malog e tha’ nib thothup ni ma weliy morunga’dad e gidii’ nib thil, “fa’anra kad manged pifak, mrayag ngodad e fla’ab nike tay ni fan ko girdi’ rok’.”²⁸

Gube micheg ngomed napan ni ngad guyed rogon ni ngad dared ulan e rogon ney u yafos rodad, reb e rran nib bi’ech ra yib ni bay e magal nib bi’ech ni ra gelnag e rame’en ko yafos rodad, nge dag ngodad bo’or e pi’nen ni ra ba’adag, nge ga’ nag e pi ta’awath, fare pi’nen nib thil nike sunmiy Got uthilin dad.²⁹ Rayog ni ngad manged e talin ulan e Pa ni ngad ayuweg e liyoer nge ba’adag ufithik’ fapi bitir Rok’. Got ab fos. Yesus ir fare Tathapeg ko Fayleng. President Nelson e ire fare profet rok’ Got nibay nib fos daba’. Gube pii’ e m’ag rog marunga’agen fatin riyul’ ney udakaen e fithingan ku Yesus Kristus, amen.