Ngara Rael er a Ikel Ngerchelir

A rak ra 1947 a mlo meng dart el rak er sel sils er a re kot el Uriul-klebesei el Santo lekerd er a Salt Lake Valley. Betok el ungil klebesei a mla er ngii er seikid el rak, me a betok el omereng el saul a mildung el kirir tirkel oltirakl er a Jesus Kristo el millibech a rael, omekedechor a blai, millalem a dellomel er a ked, e milengedmokl a delengchokl.

A President J. Reuben Clark, el mle Kot el Counselor er a First Presiency, a dilli a tara kot el ungil cheldecheduch el kirir tirkal uchelel a Ikelesia er sera October 1947 el klou el ongdibel.

Chelsel a klemechel, e a President Clark a chilat ra re mle mengeteklel tial omerael, er a Brigham Young, Heber C. Kimball, Wilford Woodruff, Parley P. Pratt, ma lmuut el bebil. Eng di,a kmal mle moktek er ngii a diak dil chilat a le riruul tirkal chad. Ng bai, mle moktek er ngii a millekoi el kirir tirkel chad el ngklir a diak dodengei malechub el llechukl ra reksi er a Ikelesia. A suobel el dai ra klmechel a kmo, “Tirkel mla er sel Uriul Kareta.”¹

A President Clark a mlo komakai el smodii a teletael me a ringel el blol chau tirkal chad el mla er sel uriul kareta ra ikel bek el mekemanget lomerael el lokiu a ked. Ng mle chemat er tirkaikid el chad, el bek el sils, bek el sandei, bek el buil, e mengard er a hokori ra ikal kareta el ngara mederir—e mlo chemau a betok lolibesongel ra omerollir.

President Clark a dilung, “Tirkel mlara uriul kareta a millemolem, e mlo skareter, ulebodes ocherir, ea bebil e te mlo mesaul a rengrir, e uleba mesisiich el klaumerang el kmo a Dios a betik a rengul er tir, e a mla moluut el ebangkelio a klemerang, e a Rubak a ulemekrael er a Rodam er tir luleba medal omerael.”²

Ng mlo mengesimer er tial tekingel lobal tial subechii ra rengud el tekoi: “Tirkal ngariou a rengrir el chad, mesisiich a klaumera er tir, e mesisiich loureor, e melemalt a klengar tir, mesisiich el mengereomel ra dikesed, e a kuchotii a beltkil a renguk, omengull, me a omelengmes el kirir.”³

Sera 1990, e a President Howard W. Hunter, el sel taem eng Merredel ra Chelechad er a teruich me a terung el Apostol, a dilii a klemechel el kirir a rebetok el chedal a Ikelesia el blak a rengrir el mesiou e kmal kekerei a lechub eng diak a chetengakl lengai.

A President Hunter a silodii:

“Ng dilii a [ngeasek e mesisiich a rengul el Captain Moroni]:

“‘Omko a rokui el chad el mle sebechir, e sebechir, e mo sebechir el mo uaia Moroni, e mesang, le a klisichel a beluu er a ngau a mo omritel; oi, a diablong a mo diak a klisichel mengetikaik ra rengelekel a chad’ (Alma 48:17).

“Ng meral ungil tekoi el mora merael chisel e mesisiich el chad. … Ngara erul bades ruriul a tekoi el kirel a Helaman me a rodam er ngii, el kuk diak el sal kmal uaia Moroni, me a donguiu er ngii eng kmo:

“‘Chelecha, e a Helaman me a rodam er ngii a dirrek el chiloit a omesiungir el mora rechad el uaia Moroni’ (Alma 48:19).”

A President Hunter a millemolem, “Ng belkul a kmo, ng uaisei el Helaman a kuk dimlak el sal uaia Moroni, eng di ngmle mesiou; el mle, klou a ultutelel el uaia Moroni.”⁴

A President Hunter a milellach er kid el rokui el kirel a diak el cheloit el omsiunged. Ng dilu el kmo: “A lsekum e komelchesiu er kau er chelechal rak ma ikal merael mei el rak el omoruul tekoi a diak el rellau el mo merael chisem, e bol klou a rengum. Betok el chad el mla kiei a dirrek el dimlak bo lorael chisir. Mosiou e mukreoul, el blak a rengum e berrotel.”⁵

Ak mereng a sulir a remilion el chedal a Ikelesia el chelechal sils el te mei ra Osobel⁶ e melemolem el ngara rolel a telbiil lokiu uriul—e meral diak di lemechoit omesiungir. A mesisiich el klaumera er kemiu er a Chedam er a Babeluades me a Rubak el Jesus Kristo me a blak el reng lodars a klengar kemiu a rullak el mo ungil chad e ungil loltirakl.

Ng betik a renguk er kemiu. Ak chemat er kemiu. Ak mereng a suliu. E oldanges er kemiu.

A tekoi el ngara Babier er a Mormon ledilii a Samuel Lamanite a smodii a kumelchesiu er ngii el kiriu.

“Le oumesingd er tir a ngara rolel aikel ngerchelir, e ngara omengull el mora Dios, e kerekikl loltirakl a llechul me a teletelel. …

“Oi, ak dmu er kemiu, el kmo oumesingd er tir a meruul el uaisei, e te melasm loba blakereng me luchul e lngiteterir a rebebil er a rodam er tir el mo medengelii a klemerang.”⁷

A kuumerang el kmo a tekoi el “ngara rolel aikel ngerchelir” a melutk el kirir a rodam me a rodos losiik el mo dengchokl er a bita er a rechad el tir a dengchokl el di tiltang er a ikel temel a miting er a ikelesia me a lmuut el bebil er a teletael. Te melemolem el melasm el “mengelaod er tirkel lousbech ongelaod,”⁸ e diak longerchir a chetengakl.

A tekoi el “ngara rolel aikel ngerchelir” a melutk el kirir a rebechiil me a rengalek lolngeseu er a re kldemir, rechad er a blirir, a lechub eng ngalek el mesiou er a chelsel a mla moluut el Ikelesia er a Rubak. Te kerekikl, cheklemuk, e a diak deues el blekerdelir a blechoel uchul a klengeltengat el mora rebetok el chad me a telungalek el di mochu chemolt er sel diak a ulebengelel klengar.

A tekoi el “ngara rolel aikel ngerchelir” a melutk el kirir a rechad el tir, a mla mo cheroid er a Dios, eng di a klengariou el reng er tir a,rulterir-lobult el muut el mo er Ngii,⁹ el mo ouchel a rengrir ra kngterir, e osiik er sel mengikiid e omekungil el klisichel a Tngakireng er a Osobel. A mei er a Kristo¹⁰ lokiu a bult el mora rolel a telbiil el mo cheroid er a mekngit me a “ngodech el rael”¹¹ a kmal klou a belkul chedaol e melemalt el teletael. Me sel lolemolem loba klaumerang e diak bol mesaul er a ungil lomeruul, e tir a meleketek er a dodai er a klou el ureor er a klengar tir,¹² “er a rokui el telcheroll el mo er a ulebongel.”¹³

A tekoi el “ngara rolel aikel ngerchelir” a melutk er a remelemalt el chad el tir a sorir el mo rrengodel er a Osobel lokiu a chedaol telbiil me a ruoll er a ebangkelio er Ngii—eng di locha mo diak el sebechir leng kuk bebil er a tekoi el ngii englakl er sel telkelir. Ak yaksok er kemiu el kmo a ringel a mo kebekakl e a blekongesenges ma blakereng er kemiu loutekangel mengiil er sel soal a Dios a di mo ungil besul “toltirakl er sel temel a Rubak.”¹⁴ “A langel a di nga er ngii se el kesus, eng di a deurreng a mei se el bo el tutau.”¹⁵

A tekoi el “ngara rolel aikel ngerchelir” a melutk el kirir a roleiuiid a tekoi el chad er a beluuelchad el rokir el mesiou er a Rubak lokiu a ngesou er tir el mora resechelirir me a rechedal a ikelesia el mo “rongesii a cherrengelel a ebangkelio lokiu a {tekingir], me a [omelkingir].”¹⁶ A oto er a ngerir, ngemedecheduch lolab chimorir, me a oidel a llechukl a olecholt a diak a ulebengelel klemerang, e uaisei el mekesai er kid a medengei a ngklir a lechub e doureng a sulir. Ngokiu a sengk er a oidel a tekoi el tir a ngeltengat el kirel, e a roleuiid a tekoi a blak a rengrir el mesiou, e oumesingd, er tir, a olngeseu er a rechad el mo nguu a sengk er a klaumerang lokiu omenguiu me a orngesel a tekingel a Dios.¹⁷

A tekoi el “ngara rolel aikel ngerchelir” a melutk er a blak a rengrir el bechiil el sechal me a redil el oltirakl a telbilir ma ngerchelir el mo omdois e omekeek er a beluulechad, e mukngeltengat er a klisiich me a duchelreng el mo omtebechel er a rengelekir er a temel a miting er a sakrament. Tial di merael mo cheliseksikd el beluuelchad el betok a ringel me a ngodech el teletael, e tirkal mesisiich a rengrir el chad a diak lorrenges a teletael er a beluulechad, te bai orrenges er a klikiid e klou a belkul ra klengar ra moktek er a Chedam er a Babeluades el kirel a deureng er a Rengelekel.

Betok el bechiil lobekel a dirrek lultuil er a Dios sel sekum a melemalt el rengrir a diak lodengelii el kmo ng mekerang a lechub eng oingerang eng mo ungil aikel urungulir. Te “mengiil er a Rubak”¹⁸ e diak longerchir Ngii el mo oltirakl er sel sorir el taem. “Le sera uchelel a beluulechad el mei ea chad a dirkak el ues a lechub el renges, a lechub eng mad el mla mes, Kau el Dios, el mla remuul, e kudmokl a kmal meklou el tekoi el [kirir] tirkel mengiil er kau.”¹⁹

A tekoi el “ngara rolel aikel ngerchelir” a melutk el kirir a retelael loungerachel er a rengara nursery me a resensei er a primary el tir a betik a rengrir e olisechakl er a rengalek er a Ikelesia er a bek el Chedaol Sils.

Ka momtab er a diak a ulebengelel teletael er a omesiou er tirkal blak a rengrir loltirakl—me a klebokel klengeltengat el mo er tirkel mesiou er a rengalek.

“Ma [Jesus] a ngiluu a ngalek, el medengcheklii er a delongelir: e urekedii a chimal, e dilu er tir el kmo,

“Ngike el nguu a ta er tirkang el ngalek el ngara ngklek, a ngoikak: e ngike el ngoikak, a nguu ngike, el ngii a uldureklak.”²⁰

A tekoi el “ngara rolel aikel ngerchelir” a melutk el kirir a rengalek el mengedmokl er a remechuodel, a diak lungil a cheliuel chedil el mengelaod er a medekta el ngalek el “mengkar er a chesmerel” a blai,²¹ rechedal a Ikelesia el mereched el mong me te mengedmokl a ruoll er a rua kingall, me a rechad el siotai er a telungalek, sechelirir me a lekaodengei el chad el mei e leues, lemei e lolngeseu, e lemei el kiei.²²

Ak mla smaod a bebil er a okesiu er tirkel loltirakl-a telbiil el blak a rengrir loltirakl er a Jesus Kristo el uai kemiu lomakes el bedul uchei el “ngara rolel aikel [ngercheliu].” Betok er a lmuut el bebil er a okesiu er a re Uriul-klebesei el Santo a odars a “rengrir el rokir”²³ el mora Dios a debetik er a ikel blai lultuil er a Kristo me a chelsel a Ikelesia er a beluulechad el rokir.

Ko moubeltikereng e mesiou, orrenges e mesuub, omekerreu e mengelaod, e olisechakl e ouchais lokiu a klisichel Chedaol Reng. Ko blechoel lolsengerenger e meluluuch, e merael mo mesisiich a klengariou el reng er kemiu, e merael mo mesisiich a klaumera er kemiu er a Kristo, “el mo mui a [rengmiu] er a deureng, oi, el mo mengikiid a [rengmiu], el ngii el klikiid el reng a mei le kemiu … lotilii a [rengmiu] el mo er a Dios.”²⁴

Tirkel mla ruriul kareta, rokui el diak el mechoit omesiungir, me kemiu el chelechal sils e ko melemolem el ngara rolel aikel ngercheliu a klisichel a mla moluut el Ikelesia er a Osobel. El uaia telbilel a Rubak, “rokui el kingall me a omengedereder, blechebechel a omerreder me a klisiich, a kirel mo mocholt e mo melemolem el mo er tirke el tir a mla outekangel el oba blekeu el kirel a ebangkelio er a Jesus Kristo.”²⁵

A kuba deureng e sioning el kmo a Chedam er a Babeluades ma Betik er a rengul Ngelekel a ngar, e a yaksok er Tir a kmal klemerang, el ngara chedaol ngklel a Rubak el Jesus Kristo, amen.