Jesucristo Ha’e Tuvakuéra mbarete

Pepensa piko sapy’ánte tuicha riesgo Ñande Ru Yvagagua ojagarráva káda ombou peteĩ ita’ýra ko yvy ári? Ko’ãva Ita’ýra ha Itajyrakuéra Ha’e omoheñóiva’ekue espíritu-icha. Ha’ekuéra oreko peteĩ potencial ijapyra’ỹva. Oĩ destinado oikóvo chuguikuéra tekove igloriósova py’aguapy, grásia ha añeteguágui. Upevére, ou ko yvy apére indefensoite, ndojapokuaáivo haimete mba’evete ỹrõ hasẽ ojerurévo pytyvõ. Iñeromandu’a ára ohasava’ekuégui Tupã renondépe oñemo’ã peteĩ vélore, ha upéicha avei pe jeikuaa mávapa ha’ekuéra añete, ha mávapa ikatu oiko chuguikuéra. Ha’ekuéra oforma iñentendimiento tekove, mborayhu, Tupã ha Iplángui umi mba’e ohechávagui tapichakuérape oĩva ijererekuéra, especialmente ituvakuéra, añetehápe oñeha’ãva avei hína ontende opa umi mba’e.

Tupã ome’ẽ tuvakuérape “tembiaporã sagrádo omongakuaa hag̃ua ita’yrakuérape mborayhu ha tekojoja reheve, omyanyhẽ hag̃ua hemikotevẽkuéra físico ha espiritual-va ha tombo’e chupekuéra … iñe’ẽrendu hag̃ua Tupã rembiapoukapykuérare.”⁴

Upéva ohupytýma oheja hag̃ua oke’ỹre pyharekue jepeve umi túva iporãvévape.

Che mensáhe tuvakuérape kóva:

Ñandejára penderayhu!

Ha’e oĩ penendive.

Ha’e oĩ pende ykére.

Ha’e ningo pene mbaretekue pegia hag̃ua pende ta’yrakuérape oiporavo porã hag̃ua.

Pejagarra upe priviléhio ha rresponsavilida py’aguasu ha vy’a reheve. Ani peñeha’ã peme’ẽ ko yvagagua jehovasa ykua ambue tapichápe. Umi Evanhélio valor ha principio-kuéra márko mbytépe, peẽ ha’e umi pegia hag̃ua pende ra’ykuérape umi ára ha ára jeiporavo detalle-pe. Peipytyvõ pende ra’ykuérape omopu’ã hag̃ua jerovia Jesucristo-re, ohayhu Iñevanhélio ha Itupao, oñembosako’ívo oiporavo porã hag̃ua opa hekove aja. Añetehápe, upéva niko Tupã plan tuvakuérape g̃uarã.

Satana oñemoĩta penderehe, peneresamboykéta ha oñeha’ãta penedesanima.

Upevére, peteĩteĩ ta’yrakuéra orresivi Cristo Resape peteĩ línea directa-icha yvágape. Ha pe Salvador penepytyvõ, pendegia ha penembokyre’ỹta. Peheka Ipytyvõ Peporandu Ñandejárape!

Jesucristo ha’eháicha umi imitãva pu’aka, Jesucristo avei ha’e tuvakuéra pu’aka.

Sapy’ánte ikatu ñañeporandu ndaikatupyryveichénepa ambue tapicha ogia ha ombo’e hag̃ua ñande ra’ykuérape. Ha katu noimportái mba’eichaitépa peñandu napendekatupyryiha, peẽ peguereko peteĩ mba’e penembopu’akáva ijojaha’ỹhaichaite: pene mborayhu pene mitãre.

Peteĩ túva térã sy mborayhu ita’ýra terã itajýrare niko peteĩ pu’aka imbaretevéva ko universo-pe. Ha’e peteĩ mba’e pokã mba’e apytépe ko yvypegua añetehápe ikatúva ijapyra’ỹ.

Ko’ág̃a, ikatu peñandu joaju perekóva pende ra’y térã rajy ndive ndaha’éi pe iporãmbáva. Ha katu upépe niko pe Salvador pu’aka ojehechauka. Ha’e omonguera umi hasývape, ha omonguerakuaa umi joaju interpersonal. Ha’e omultiplika umi mbujape ha pirakuéra, ha omultiplikakuaa avei mborayhu ha vy’apavẽ pende rógape.

Pene mborayhu pende ta’yrakuérare oforma peteĩ jere iporãva oñembo’e hag̃ua pe añetegua ha oñemopu’ã hag̃ua jerovia. Pejapo pende rógagui peteĩ ñembo’e, tekombo’e ha jerovia róga; peteĩ vy’a rembiasa róga, peteĩ tenda oĩháme peteĩ ñepertenese remiandu; peteĩ Tupã róga.⁵ Ha “pejerure Túvape opa pene korasõ mbarete reheve, penerenyhẽ hag̃ua ko mborayhu haʼe omeʼẽvaʼekuégui opa umi haʼévape itaʼýra Jesucristo remimboʼe añete.”⁶

Ambue mbarete peguerekóva, tuvakuéraicha, ha’e oportunida pemomba’apóvo peteĩ influencia meme ha ára ha ára. Umi angirũ, mbo’ehára ha umi tapicha influyente umi redes sociales-pe ou ha oho. Ha katu peẽ ikatu ha’e influencia ikonstantevéva ha oñemova’ỹva pende ta’yrakuéra rekovépe.

Pene ñeha’ã ojoguakuaa michĩha oñembojojárõ umi ñe’ẽpu hatã pende ra’ykuéra ohendúva yvórape. Sapy’ánte ikatu peñandu ndapehupytyiha hína heta mba’e. Ha katu penemandu’áke “mbaʼe michĩ rupive Ñandejára ikatuha ojapo tuicha mbaʼe”⁷ Ikatu ningo peteĩ noche de hogar, peteĩ evanhéliore ñemongeta térã peteĩ ehemplo porã nomoambuéi pende ta’yrakuéra rekove peteĩ jave, peteĩ amandykyre nombokakuaái sapy’a peteĩ ka’avo. Ha katu umi mba’e michĩ ha isensíllova oiko meméva, ára ha ára, omongaru porãve pende ra’ykuérape peteĩ diluvio ocasional rãngue.⁸

Upéicha ha’e Ñandejára ojapoháicha. Ha’e oñe’ẽ peẽme ha pende ta’yrakuérape peteĩ ñe’ẽpu oporombopy’aguapýva ha ivevyi’asýva, ndaha’éi peteĩ ñe’ẽpu sununúva.⁹ Nomonguerái Naamán-pe “tuicha mba’e” reheve, ha katu pe jejohéi mba’e’apo isensíllo ha mantéva rupi.¹⁰ Israel ta’yrakuéra oguerovy’a peteĩ festín ynambukuéra reheve desierto-pe, ha katu pe omoingovéva chupekuéra ha’ékuri pe maná milagro michĩ ha isensíllova—imbujape ára ha ára.¹¹

Hermano ha hermana-kuéra, pe mbujape ára ha aragua ojeprepara ha ojeservi porãve ógape. Pe jerovia ha testimónio oñefomenta porãve hekópe ha ha’etépe, peteĩ teĩ vokádo rupi, umi momento michĩ ha isensíllovape, tekovépe osyry memévo ára ha ára.¹²

Peteĩteĩ moménto ha’e peteĩ moménto ñehekombo’erã. Opa ñe’ẽ ha mba’e’apo ikatu ha’e peteĩ gía ojeiporavokuaa hag̃ua.¹³

Ikatu ndapehechapya’éi pene ñeha’ã efecto. Ha katu ani peñeme’ẽ. “Opa mba’e oikova’erã hi’órape,” he’i Ñandejára. “Upévare ani penekaneʼõ tembiapo porãgui, [pe]moĩgui hína peteĩ tembiapo guasu pyenda”¹⁴ Mba’e tembiapo ikatu tuichave ñaipytyvõgui umi Tupã ta’yrakuéra imba’eguasuetéva oikuaa hag̃ua máva añete hikuái ha omopu’ã hag̃ua ijerovia Jesucristo, Iñevanhélio ha Itupaóre? Jesucristo ohovasa ha ombotuicháta pene ñeha’ã meme.

Ambuéicha Ñandejára oipytyvõha mbarete tuvakuérape ha’e pe rrevelasiõ personal don rupive. Tupã oñohẽse Ijespíritu ogia hag̃ua tuvakuérape.

Peñembo’e ha pejapysakávo pe espíritu-re, Ha’e ohechaukáta peẽme umi peligro oĩ ñemĩva.¹⁵ Ha’e orreveláta peẽme pende ta’yrakuéra don, imbaretekue ha ijepy’apy nomombe’úiva hikuái.¹⁶ Tupã penepytyvõta pehecha hag̃ua pende ta’yrakuérape Ha’e ohechaháicha chupekuéra, ipínta okapegua mboypýri, pehecha peve oĩva ikorasõme.¹⁷

Tupã pytyvõ reheve ikatu peñemoarandu peikuaa porãve hag̃ua pende ra’ykuérape ipotĩ ha imarangatuveháicha. Che poinvita pe’asepta hag̃ua Tupã ñeikuave’ẽ pegia hag̃ua pene familia rrevelasiõ personal rupive. Peñembo’e pehekávo Igía.¹⁸

Ikatu pytyvõ tuichavéva Jesucristo ome’ẽva tuvakuérape ha’e korasõmegua “ñemoambue mbarete”.¹⁹ Upéva ha’e peteĩ milagro peteĩteĩ ñande ñaikotevẽva.

Peimo’ãmi sapy’a ko situasiõ: Peẽ peime capilla-pe pehendúvo peteĩ discurso familia-kuéra rehegua. Pe discursante omoha’anga hína peteĩ óga perfecto ha peteĩ familia iperfectovéva gueteri. Ména ha tembireko araka’eve ndojoavýi. Ta’yrakuéra ndohejái escritura-kuéra ñemoñe’ẽ ndaha’éirõ ojapo hag̃ua hembiaporãnte. Ha música de fondo-ramo oñehendu “Amad a otros”²⁰. Discursante og̃uahẽ mboyve pe parte-pe opavave vy’apópe omopotĩha baño, peẽ pepensáma: “Che familia ningo naipohãvéima”.

Hermano ha hermana-kuéra pohayhuetéva, trankílonte! Opavave kongregasiõpe oñepensa upeichaite! Añetehápe opavave tuvakuéra okyhyje naiporãmbáirõ g̃uarã.

Vy’arã, oĩ peteĩ pytyvõ divíno ykua tuvakuérape g̃uarã: Jesucristo. Ha’e ningo ha’e ñane korasõmegua ñemoambue mbarete ykua.

Peipe’ávo pene korasõ pe Salvador ha hekombo’ekuérape, Ha’e ohechaukáta peẽme pene kangykue. Pejeroviárõ Jesucristo-re peteĩ korasõ mirĩ reheve, Ha’e ojapóta umi mba’e kangy taimbarete.²¹ Ha’e ningo peteĩ Tupã ojapóva milagro-kuéra.

He’isépa upéva peẽ ha pene familia pendeperfectotaha? Nahániri. Ha katu pejapo porãvéta. Pe Salvador grásia rupive, pokã pokã pedesarrollavéta umi atrivúto tuvakuéra oikotevẽva: mborayhu Tupã ha ita’yrakuérare, paciencia, ñeñangarekokuaa, jerovia Cristo-re ha py’aguasu oiporavo porã hag̃ua.

Ñane rembiapo ñamopu’ã hag̃ua jerovia Jesucristo-re oñesentra ógape, oñenfoka tapichápe. Ha oñeipytyvõ Tupaóre. Umi escritura sagrádo ha profetakuéra ñe’ẽ’yképe, pe Salvador Tupao oikuave’ẽ heta rrekúrso oipytyvõ hag̃ua tuvakuéra ha ta’yrakuérape oiporavo porã hag̃ua:

• Para la Fortaleza de la Juventud: Una guía para tomar decisiones nome’ẽi ndéve peteĩ lista mba’épa rejapóta térã nderjapomo’ãigui. Ombo’e umi añetegua ijapyra’ỹva penepytyvõ hag̃ua peiporavóvo peñesentrávo Jesucristo ha hekombo’ekuérape. Pemoñe’ẽ upéva pende ra’ykuéra ndive. Peheja chupekuéra toñe’ẽ upévagui. Peipytyvõ chupekuéra oreko hagua ko’a añetegua ijapyra’ỹva ogiávo ijeiporavokuéra.²²

• Umi PFJ conferencia-kuéra ha’e ambue rrekúrso hechapyrãitéva Aha’arõ opavave umi imitãva toasisti. Ainvita umi jóvenes adultos solteros-pe opartisipa hag̃ua ko’ã conferencia-pe mentor ha konsehéroramo. Ainvita tuvakuérape toaprovecha pe kyre’ỹ espiritual umi imitãva oguerúva ógape PFJ conferencia-kuéra rire.

• Umi Jesucristo Tupao Santokuéra Ára Pahapegua mitã ha joven-kuéra oreko mbo’ehára, asesor ha mentor-kuéra. Py’ỹi peẽ peg̃uahẽ peteĩ tapicha imitãva rekovépe peteĩ momento klávepe omopu’ã ha ombojepytaso hag̃ua pe jerovia ha testimonio. Pende apytépe oĩ umi adulto soltero. Oĩ araka’eve naifamilíaiva va’ekue. Pe servicio kyre’ỹ peẽ peme’ẽva Tupã ta’yrakuérape isagrádo Tupã resa renondépe.²³

Che angirũnguéra, che hermano ha hermanakuéra pohayhuetéva, peteĩ ta’ýra térã tajýra jerovia ñemopu’ã ojogua oñeipytyvõvo peteĩ yvoty taipoty. Ndaikatúi peitira hakãgui pemboyvateve hag̃ua. Ndaikatúi peipe’a pe yvoty kuru ipoty pya’e hag̃ua. Ha ndaikatúi napeñangarekói pe yvotýre ha peha’arõ tokakuaa ha taipoty ha’eñoreínte.

Ikatúva ha pejapova’erã ñemoñarẽ pyahúre ha’e peme’ẽ yvy porã ha oporomombaretéva orekóva acceso yvagagua y osyrývape. Peipe’apa umi ñana ha oimeraẽ mba’e ojokóva yvagagua kuarahy resape. Pemoĩ umi jere iporãvéva kakuaarã. Peheja ñeha’arõkuaa reheve ñemoñare pyahu tojapo jeiporavo inspirádo ha Tupã tojapo Imilagro. Pe rresultádo iporãvéta, oñeimo’ã’ỹve ha oporombovy’avéva oimeraẽ ambue mba’égui ikatúva peẽ pehupyty pendejeheguínte.

Túva Yvagagua plan-pe, familiakuéra joaju propósito ningo taha’e tapiate g̃uarã. Upévare, tuvakuéraicha, peẽ araka’eve peñeme’ẽva’erã, jepe napendeorgullósoi mba’éichapa oikókuri umi mba’e ymave.

Jesucristo ndive, pe Mbo’ehára Oporomonguera ha Oporosalváva, akoiete ñañepyrũkuaa jey; Ha’e ome’ẽ tapiaite esperanza.

Jesucristo niko ha´e familia-kuéra mbarete.

Jesucristo ha’e mitãrusukuéra mbarete.

Jesucristo ha’e tuvakuéra mbarete.

Upévagui che atestifika, Jesucristo rérape. Amén.