Kaukledem el obengkel a Rubak

Chelsel aikel buil er a kim kot el mo bechiil, e a bechik a ulechotii a rengul soal el mesuub a tekoi er a chelitakl. Ng mle soak el rulii a rengul mo ungil, me ak mlo rulii a tekoi el bol mechas a rengul er kirel. Ak mlo er a stouang er a klekedelel a chelitakl, e milcherar a piano el beresent el mor er ngii. Ak mal mle semeriar mak ngiluu a risit lotungii er a chelsel a tomobako e rongedii ra klebokel el buroski, e mlengiil er ngii loureng a sulel a betikerarengul el rubak er ngii.

Me tia era lebekengii tia el tomobako e leues a ngara chelsel, eng omes er ngak e dilu el kimo, “A chedil, e kau, ke meral ungil! E hall e kuker er kau: tiang beresent ma lechub eng blals?” Uriul er a kimdak el mesaod er tia el beresent, e a ki tilbiir el mo olutii. Aki mengeriomel le ki mle ngalk er a skuul, ngosisiu el klengar er a rebetok el dirk mlo bechiil el rengeask . Tia el okesiu a ngilsukak el mo omtab ra klou el ututelel a mesisiich el kaukledem er a rebechiil el chad e dirrek el ngara omeruul ng sebechel ngesuir a bechik me a ngak el mo oba ta reng me a ta uldasu.¹

A olluut er a ebangkelio er a Jesus Kristo ouchais er a osisichakl er a mesisiich el klaukledem er a delongelel a sechal me a redil, ngara klengar er a chutem me a mo er a ulebongel. Te locha kakerous er a blekeradel me a ngerachel, eng di a redil me a sechal a osisiu el edaol el a urelir er a Uldesuel a Dios el kirel a dueureng er a Rengelekel.² Tia bleketakl sebeched el mesang er a uchelel er a Rubak a ledul kmo “diak lungil a sechal a le dil ngii el tang; ma kemesang [Ngii a mo] rulii a keldemel el mo ngosuir.”³

Ngara udesuel a Rubak, a “kldemel” a mo chelmengel er a rokui el tekoi lobekel a Adam el mesisiich el klaukledem.⁴ Ng meral tekoi, a Eve a mle klou el klengeltengat el mora klengar er a Adam. Ngultuil er a aikel chedaol el blekerdelel ma teletellel a Eve, eng milerkii a osengel a Adam el mo kaukledem el lobengkel el mo kudmeklii a udesuel a Rubak el Dios me a rokui ngelekel a mo nguu a dueureng.⁵

Ka mei e domtab aikel teblo el meklou a ututelel osisichakl el smisichii a klaukledem er a delongelel a sechal me a redil. Sel kot el osischakl a kid a rokui el di osisiu er a medal a Dios.⁶ Ngokiu tia el osisichakl ra ebangkelio, a kle kekerous ra redil me a sechal a diak el bol terbengii a ikel diak a ulebengelel telbelil er a Dios el mora Rengelekel el sechal me a redil. Diak a tara chad el diak el ngarbab a techellel el mo nguu a sel kot el ngarbab el renged er a diak ulebengelel klengar.⁷ Ngii el Osobel a mengemedaol er kid el rokui, el ngelekel a Dios, “mei er Ngak e mngai a rokui el klungiaol el lolab; e Ngii a diak el kotouar er a ngii dil chad el mei er Ngii.”⁸ Ng uaisei, lokiu tial cheldecheduch, e kid el rokui a diosisiu er a medal a Dios.

Sel sekum a rebechiil el chad a medengelii e otutii tia el osisechakl, e diak bol kaiueribech el kmo techa kot el merredel me a techa ongerung el merredel er a telungalk. Ng diak el ngarngii a ngarbab me a ngariou er a chelsel a chebechiil, e dirrek el diak merael ruchei me a lechub a okiu uriul er a tara chad. Te obekel el merael er a bitang me a bitang, di osisiu, el chedaol ngelekel a Dios. A robekl a merael mo ta udesuir, me a rengrir, me a moktek er tir lobengekel a Chedam er a Babeluades me a Jesus Kristo,el,⁹ el omekrael e mengudel er a telungalk.

Ngara tabesul el klaukledem, “e a beltikelreng a diak di doutekoi er ngii kede bai meruul er ngii, … lokiu a reteru lomeoab ra ngalk el ngii a tara chedaol ngerchelel a chad.”¹⁰ “Ngokiu tai el mera el omeruul, ea obekel a mo dmak el di mo tang er sel klisiich er a ‘diak ulebengelel deluil’ e ‘diak el bol morimerl’ el melmolmel el mora chedaol el klengar er tir me a rengelekir a rengelekir el ‘diak a ulebengelel.’”¹¹

Sel ongerung el osisechakl er a Golden Rule, osisecheklel a Osobel er a le ngara bebul a bukl: “Moruul el mora re chad aikel somiu a loruul el ekor kemiu.”¹² Tia el osischakl a ochotii a blekeradel er a kaukerreu, kaukuak, kltalreng, e kaiuesirs el mo tmaut er sel ongerung el klou el llach: “Bo le betik a rengum er a ngar bitar kau el ua le betik a rengum er kau.”¹³ Ng kmal di mo uldak ngii ma ikel bebil er a blekerdelel a Klekristiano el ngargii a ulserechakl reng, delmedemk, klengariou el reng, me a blekerurau.

A mo ngosukid el mo metebengii a otutel tial osisechakl, eng sebeched lomes er a aikel chedaol el diak a ulebengelel deleongel el Dios a ulemekdubech er a delongelel a rekot el mle demad ma delad, el Adam me a Eve. Mete mlo tal chelechad,¹⁴ el mekdebechii a deleuill lomak er a tir el dmak el merael kakull e kaukerreu e kaubeltikelreng, diak lomdasu er a kuk di soal e bai osiik er a mo klungiolir er tial omerrolir el mora diak a ulebengel el klengar.

A ika kid el osisiu el teletael a dolasem lomak er a chebechiil er a chelechal taem. Ngokiu a chebechiil el moak er a templo, a redil me a sechal a mo soisb er a chedaol ureor er a chelbechiil er sel sebechs e diak a ulebengelel telbiil. Ngokiu tial ureor el urelel a priesthood, ea rubekl a ngmai a chedaol klengeltengat me a chedaol klisiich el mo mengeluolu er a tekingel a telungalek alsekum te oltirakl aikel ruoel er a chedaol telbiil. Ng omuchel er tiakid el taem, ea rubekl omakes el bedul uchei e karuruul e kaiuesirs e dirrek el mesisiich el kaukledem lobengkel a Rubak, tokubets a aikel chedaol urrerir el omecheliu el bdelul e menguteling er a telungalk.¹⁵ A omecheliu me a omenguteling a mo kmeed el osisisiu el ngerachl, tia belkul a kmo a edil me a edam a “kirir el kaukledem e kaingeseu el tabesul a ngerchelir”¹⁶ e dirrek el ngarngii a tabesul klaingeseu er a omengedereder ra telungalek.

“A omekerreu a belkul a kmo omekerroul, olsisechakl, me a olngeseu” er a rechedal a telungalk, tia meketmokel lokiu a osisecheklel a ebangkelio er a klemerang el ngii a omekdubech er a klaumerang er kid er a Chedam ra Babeluades me a Jesus Kristo” el ngara ungil mauori e ra osisechakl. A bdelul me a lechub omenguteling a belkul a kmo “olengeseu e omekrael er a rechadal a telungalk el mo kiei er a rengedel a Dios. Tia meketmokl lokiu a omesiou me a osisechakl lobengkel a delmekemek, klengariou el reng, me a klikiid el belktikelreng.” Ng uldimukl er ngii a “mengideb a telungalk er a nglunguuch er a bekl sils, omesuub er a ebangkelio me a bebir er a teletelel a omesiou.” A rechedam ma a rechedil a klaukledem el oureor, “el oltirakl er a okesiul a Jesus Kristo, “el mo kudmokl aikal [erul meklou] el ngerachel.”¹⁷

Ng kmal kou a ututellel a bododengei el kmo a kaberment er a telungalk a oltirakl er a omengederer el ngara chedam, e ngargii a kekerous er ngii me a orretel a chedaol priesthood er a Igeleisa.¹⁸ Tial omngededered el mlara chedam a melultk el mora kaubuch el sechal ma e redil el mo dechor e mo mukerkeriil er a medal a Dios er a otutel a aikal ngerchelir er a telungalk. Tia ngar ngii a mesisiich el klaukledem—e kongei lotirakl a bek el telengtengil a kldung—el ngii a mesa techellel lomekerou er tial klaukledem el ngara cheltel a beltikerreng me a klaingeseu.¹⁹ A aika el tokubets el ngerachel a diak el ngarngii a terebel er a dereder e kmal diak el uldimukl er ngii a ngidil omecheracheb me a klisiich.

Sel klengar er a Adam me Eve, ruriul er a Sers er a Eden, a kmal ungil lochotii tia el klaukledem er a chedil me a chedam el kaingeseu lomekerreu e btelul a omenguteling er a telungalk. Ngara osisechakl er a hong er a Moses, e tirka el obekl a mle dmak el meringel loureor e mlo kesib el omekdubech a siungel a a telungalk er tir; ²⁰ te ulmechell er rengelelkir el mei er a beluulechad;²¹ te mle dmak lomekedong er a ngklel a Rubak e rirengesii a oto er a Ngerel “el ngara mobedul a Sers er a Eden”;²² te kilngei a llechul a Rubak el bilsterir e millasm el dmak lolngesenges.²³ Tir a mle “olecholt a [ika] el osisechakl el mora rengelekir el sechal me a redil”²⁴ e dirrek el “millemolm el dmak loleker er a ngklel a Rubak” er a rokui el ngesengesir.²⁵

Rodam me a rudos er ngak, a omekerreu me a omengutling a techall er a omesuub, eng diak el lolibesongel. A tara chad a sebechel ngarngii a ngerchelel eng di diak el di ngii el tang a meruul er ngii. A mekedung el obekl sel lungil lomtab a ika el eru el me klou el osisechakl, e te mo dmak loreor el mengkar e omecheliu er a klebechel el klechad me a ungil reng er a rengelelkir. Te dirrek el ngosuterir a rengelelkir el mo otngakl a mengkit er a reng er chelechal taem lokiu a ulekerreu er a ungil tekingel a Rubak el mla mocholt er a profet er Ngii.

Ng uasei el rechedam me a rechedil a kaukledem e kaingeseu er aikakid el chedaol el ngerachel, eng di “a lebor ngii a chelitechut, kodall malechub eng kuk di ngodelch el teletael eng kirel kuk mo mengodech a teletelel aikal ngerachel.”²⁶ A lebebil er a taem e a chad el bechiil a mo meruul a ngerchelel a chedam me a chedil er a diosisiu el taem el sebechel di kedeb el taem me a lechub eng di merko el uaisei.

Ak dirk mlo merek el mesa tara redil mesobil me a sechal mesobil. Te di diul mesobil, er a chelsel a telungalk er tir, eng di te klaukledem lobengkel a Rubak, e mla obult a klengar er tir rokir el omekeroul er a rengelekir e mui el mesterir aikel lousbech er a bedengir er a reng me a bedengir er a tech. Chelsel a meringel taem el mo diak le bechiil, el tirka dimlak el bol mikou osengir el kirel a chedaol telbiil er a templo lobengkel a Rubak me aikel diak ulebengelel yaksok er Ngii el me er tir. Tedi diul mle osiik er chimal a Rubak el mo ngosuterir er a rokui el tekoi era lolasm el lotekangel a ringel e lorael er a rolel a telbiil. Te oumerang er a Rubak el mo ngosuterir ra ikel lousbech, e diak dil chelechal klengar ng dirrek el mo cherechar. Te di diul ulmekerreu er a rengelekir lokiu a ungil osisechakl lobengkel a delmedemek, me a ngariou el reng, me a klikiid el beltkilreng, er a osisiu el taem el ngarngii a ongarm er a chelsel a klengar er tir. Ngokiu a klemedengei er ngak, e terikal teru el mesobil loungalk a diak loltelechakl era Dios er a aikel kerior el mlo er tir. Te bai, e omes el bedul ruchei loba cherrungel el llomes er a urungulir e klou a rengrir er a ikel klengeltengat el Rubak a mo mesterir. ²⁷

Rodam me a rodos, a Osobel a meskid a cherrungel el okesiul a uldekial a reng me a kltalreng er a a moktek er a osisechakl lobengkel a Chedam er a Babeluades. Ng miluluuch el kirir a re oltirakl er ngii, el kmo, “Me bol tal chad; el uai kau, e Chedam, el ngar ngak, me ngak el ngar kau, me tir el dirrek bol tang el ngar kid: … me bol tal chad, el uaikid el tang.”²⁸

Rodam me a rodos, ak sioning el mor kau el kmo alsekum e kid—el redil me a resechal—a dmak loureor el ngara meral tabesul klaukledem, e kede mo melchesuar sel kltalreng losisecheklel a Osobel sel de kedmokl aikel chedaol ngerachel ma ureor er a deleuill er a chebechiil. Ak yaksok er kau, el ngara ngklel a Kristo, a rengud a rechad “a mo dmak el di mo tang er a beltikelreng el mo er a tang me a tang,”²⁹ e kid a mo ngmai a mui el deuerreng er tia lomerael el mora diak ulebengelel klengar, e dirrek el kmal mo klou a techelled el mo olengeseu er a ta me a tang el dmak lobengkel a ta me a tang el ngii a kmal di merael el mo mekudem.²⁹ A kulecholt er a klaumerang er ngak el kirel aika el klemerang loba chedaol el ngklel a Osobel Jesus Kristo, amen.