Klisiich Loutekangel

Sera kusuub osischeklel a betik er a rengud el profet, el President Russell M. Nelson, e ak mlo metik er a tekoi el ngii a blechoel lousbech er ngii er a betok el cheldechedechal. Tial tekoi a klisiich.

Sera kot longdibel ruriul er a lemoterekokl el Apostol, e a President Nelson a milngedecheduch el kirel a klisiich.¹ E mla melemolem lolisechakl el kirel a klisiich er a chelsel a betok el rak. Chelecha el bla doterkeklii a President Nelson el profet er kid, eng mla olisechakl el kirel a klisiich— tokuni klisichel a Dios—e mekera denguu ngii el klisiich. Ng mla olisechakl el kmo ng mekera denguu a klisichel a Dios sel doldingel er a rebebil,² e mekera ouchel reng a lesiotai er a klisichel a Jesus Kristo me a Tngakireng er Ngii er a klengar kid,³ e mekera priesthood—el klisiich me a ngerachel er a Dios—a lomekngeltengat er a rokui el tir a meruul e oltirakl a telbiil Lobengkel.⁴ A President Nelson a mla sioning el kmo a klisichel a Dios a mo er a rokui el tir a mla ngmai a klengeltengat er a templo sel loltirakl a telbilir.⁵

Ng kmal mlo botech a renguk er a tekoi ledilii a President Nelson er sera April 2020 el klou longdibel. Ng millekoi er kid el mo “mesuub e meluluuch el kirel a klisiich me a klemedengei e bla dengai lokiu a klengeltengat—a lechub e kede mo ngmai ruriul lokiu a klengeltengat.”⁶

A nger el kirel tiang, e ak mla mesuub e meluluuch e mla suub a bebil er a meklou a belkul tekoi el kirel a klisiich me a klemedengei el ngak a mla ngmai lokiu a klengeltengat—a lechub ak mo ngmai ruriul lokiu a klengeltengat.

A klemedengei er kid er a ikel kired el meruul e mo nguu a klisiich er a Dios er a klengar kid a diak el beot, eng di ak mla metik el kmo ng sebechel mekedmokl lokiu omesubel er a uldesued me a nglunguuch er a Chedaol Reng el mo omekellomes er kid.⁷ A Elder Richard G. Scott a milskid a bleketakl lomesodel a klisichel a Dios: ng “klisiich el muut el remuul a betok er a ikel sebeched el di kid el remuul.”⁸

A dokekii a rengud me a bedenged er a tekingel a Dios me a dodai er a klaumerang er a Jesus Kristo a klou a belkul kirel a ngeiul a klisichel a Dios el mo ngosukid er a ikal meringel el taem. A lak denguu a tekingel a Dios me a klaumerang er a Jesus Kristo el dualm er a rengud, e a klaumerang er kid a sebechel mo mechitechut, e kid a metom er a klisiich el Dios a soal lomeskid. A klsuul klaumerang a diak loureor. Ng di tal klaumerang me a tekingel a Dios a mekekii a bedenged e sebechel sobecheklid—e rullii el mo sebeched el nguu a Klisichel.

A Sister Johnson me a ngak er a ki momekeroul er a rengelekam, e a ki milngelechel er tir el mo mesuub a klekedall er a chelitakl. A ki kilengei er tir el mo mesuub a chelitakl alsekum e te blak a rengirr el mesuub lousekool er a bek el sils. A tal Sabadong, a Jalynn el ngelekam el redil a mle semeriar el mo milil ngii me a resechelil, e dirkak lengara omesuub lousekool a piano. Ng mle medengei el kmo ng kirel lousekool lokedei el bung, meng millatk el rullii a temel, leng dimlak el soal mesuub lousekool lengelakl er a di tal bung er sel temel.

A lorael lengelakl er a microwave el bedul a piano, eng mlo dechor e milet a bebil er a botang. E bai dimlak el relii a taem, ng bai rirelii taem er a microwave lokedei el bung e metir a botang er ngii. Uriul er a kmeed lluich el bung losuub lousekool, eng merola el mo er a uum el mlo omes el kmo uangera klungel taem a medechel e bai meteknge er a microwave el mla tmaut er a ngau.

Ng rurta el me er a rebai el kulngedmokl e rikl, e oldiu el kmo a blai a mla meseseb. Ak di mle mereched el remurt el mo er a blai, e meral, milsa tial microwave el mekerkard er a ngau.

Me ak millasm el mesebechakl er a blimam meng diak el meseseb, me ak di mlo chelireuakl er tial microwave, e medelii a seng, e ulesbech er ngii el kiderii lotengelii riou. Ak millasm losebelii a sils er kemam me a blimam, e a kulmiroi er tial microwave el di cheltuotel a seng er ngii el melasm el mengeroid er ngii meng diak el sbechii er ngak, e ak tilobed el mo er a rebai, e kmal mirrenguk el mediklii tial microwave er a mekesong. Tiaikid, eng mlo sebecham el mekodir a ngau loba ralm er a hos.

Ngera mlo cheleuid? A microwave ousbech er a kmo ngerang el melai er a klisichel, me a lak a ngera er a chelsel mengurs er a klisichel, e tial oven a di ngii el melai er a klisichel, e mo mekeald, e sebechel tmaut a ngau er ngii, luchul a telmellem a lemeseseb.⁹ Tial rokir el microwave er kemam a tilaut a ngau er ngii leng dimlak a ngera er a chelsel.

Osisiu, tirkel delalm a dmolech el klaumerang me a tekingel a Dios er a rengrir a sebechir el ngoriakl er a meringel lolibesongel, el cherarou a mo odurokl el me melemall er kid.¹⁰ Le lak, e a klaumerang, urunguled, me a belted a diak el meketeket, me kede mo uai tial bechachau el microwave, el sebeched el metemall.

Ak mla subii el kmo sel sekum a tekingel a Dios a dmolech el delalm er a rengud, lobengkel a klaumerang er a Jesus Kristo me a Tngakireng er Ngii, eng mekrolak el mo nguu a klisichel a Dios el mo selbechakl er a cherarou me a ngii di el ngerang lebetech el mei er ngak. Sel bo dechau a ringel, eng sebeched el mo ultuil er a yaksok er a Rubak el mlosisechakl er a Paulus: “Le a Dios a diak el bla el beskid a reng er a dakt; ng bai klisiich, me a beltikereng, me a ultebechel luldasou.”¹¹

Kede medengei el kmo sera lengalek e a Osobel a “mlukeroul, e mlo mesisiich er a reng, e mui e ra llomes: e a krazia er a Dios a ulebengkel.”¹² E medengei el kmo Ngii er a lorael klungang e a, “Jesus a mlo chachisois a llemesel me a klungel, e a Dios me a rechad a mle chemat er ngii.”¹³ E dirrek el medengei el kmo sera lomechelang a Urerel, e tirkel Rirngesii “a mlo mechas a rengrir er a osischeklel: le tekingel a mlarngii a klisichel.”¹⁴

Ngokiu a kedmeklel, e a Osobel a mlukeroul er a klisiich e mlo sebechel lodngakl ongetikaik er a Diablong.¹⁵ Sel doltirakl a blekeklel Osobel e dekedmeklid lokiu omesubed er a tekingel a Dios e dekilungii a klaumera er kid, e kid a dirrek el sebeched el nguu a klisiich er a Dios el mo odngeklii ongetikaik.

Chelechal taem el dosebech a kldibel el rulii meng meringel a de bo er a templo, e ak meral mla kudmeklak el mo melemolem el mesuub el kirel a klisichel a Dios el mei e rkid sel doruul e doltirakl a telbiil er a templo. El uaia ikel mle yaksok er sel nglunguuch er a oterkeklel a Kirkland Temple, kede tuobed er a templo lulsemuul er a klisichel a Dios.¹⁶ Ng diak a bo lak a klisiich er a Dios el longeltengat er a terkei el oltirakl a tebiil er a templo, e dirrek el diak a mo oreked er a sel klisiich er a temel a pandemic. A Klisichel a mo cheroid er a kid sel lak ede oltirakl a tebliil e diak e doruul aikel meruul er a kid el mo sebeched el melai a Klisichel.

Sera kusiou loungerachel er a mission lobengkel a bechik er a Thailand, Laos, me a Myanmar, e a ki mle sioning er a klisichel a Dios el mei er tirkel meruul e oltirakl a chedaol ruoll er a templo. A Temple Patron Assistance Fund a mle uchul eng betok el Santo er a ikal kldei el beluu a mlo er a templo ruriul er a blol chau a ringel e le charm el kirel a kedmeklir. Ak lotkak er a bok kebetech lobengterir a relluich el mesisiich a klaumerang er tir el Santo er a Laos er a skozio er a Bangkok, Thailand, el mlo olngeseu er tir el mo er a tara skozio er a Bangkok le te ngara skoki el mo er a Hong Kong. Tirkal chedal a ikelesia a mle mui er a deureng el mocha sebechir el mo er a blil a Rubak.

Sera ki bom kebetech lobengterir tirkal lungil Santo er a luut er tir, e sel ulekerulir lobengkel a klisiich er tial mlo er a templo e ngmai a klengeltengat e soiseb er a telbiil lobengkel a Dios a mle bleketakl. Tirkal Santo a meral tilobed er a templo “lulsemuul er a [Klisichel].”¹⁷ Tial klisiich el muut el mo remuul a betok er a ikel sebechir a milsterir a klisiich lotekangel a ringel er a rechedal a Ikelesia er a ikel belurir e merael bedul uchei el “klsool er a ngarbab e chetengakl el klumech, el ngara klemerang,”¹⁸ e melemolem el meleketek er a rengedel a Rubak er a beluu er a Laos.

Chelechal taem el dirkak bol sebeched el mo er a templo, e a derta er kid kede ultuil aikel telbiil el bla deruul er a templo el kudmeklii a bleketakl, e diak el mengodech el rolel a klengar kid? Aika el telbiil, a le motirakl, eng meskid osenged me a moktek er kid el kirel a ngara medad me a bleketakl el blakereng el mo ngmai aikel rokui el Rubak a mla yaksok lultuil er a klaumerang er kid.

Ak siotai er kemiu el mo osiik er a klisiich el Dios a soal lomeskemiu. A kuuchais el kmo sel dosiik er tial klisiich, e kede mo mukngeltengat er a ngarbab el klemedengei el kirel a beltkil a rengul a Chedam er a Babeluades el kired.

A kuuchais el kmo ng beltikereng er a Chedam er a Babeluades el kirem e kirek a uchul, e Ngii uldureklii a Di Chimong el Ngelekel, el Jesus Kristo, el mo Osobeled e Olsobel er kid. A kuuchais el kirel a Jesus Kristo, Ngii lolab a rokui el klisiich,¹⁹ e melekoi el ngara ngklel a Jesus Kristo, amen.