Mlar Ngii a Kall
Sel dosiik el mo kldmokl er a klengar er kid, eng sebeched el mo obangel a ringelel a klengar el klou a rengud.
Uchei er a lomul a bisir a rechad el uchul tial bekuiuiuul secher ngarngii chelechal taem, e sel kaeri er ngak el mo remei e lek kureor el mlara tara beluu, a mlo mekngit a temel, meng mlo diak el sebechek el merael er a Sandei. Ng mlo ngarngii a temek er a delongelel omerollek er a skoki meng mlo sebechek el mo er a sakrament miting, e dirrek el mlo sebechek el dmung a sesei el klemechek. Uriul er a miting, e a ta el deakon a mlei e oker ngak a lsekum ak medengelii a President Nelson e mla aksiub er a chimal. A kulenger el kmo ak medengelii, e mla aiksiub er a chimal, el uaisei, el chedal a Merredelel a Klebisop, meng ngarngii a techellek el mo mesang a President Nelson me a re counselors er ngii er a chelsel a tal sandei.
Ngkal ngeasek el deacon a mlo dengchokl er a kingall, e oldars chimal mo rebab, e dulang, “Tia sel meral kot lungil sils er a klengar er ngak!” Rodam me a rodos, ng locha diak kudars a chimak el mo rebab e oldiu, eng di ak kmal mereng a saul el kirel a ngar el profet me a ulekrael el dengai er re profet, me a rechad er a ues, rechad er a ocholt, el tokuni aika el taem er a olasm.
Mla er a uchelel a taem, ea Rubak a ulmekrael er a Rechedal el mo olngeseu el mengedmokl er tir er a tekoi er a chedaol me a klechad el mo oltngakl a kerior el Ngii a medengei el mo duubech eleng telengtengil tial klengar er a beluulechad. A ikal kerior a locha di mo er a tal chad malechub eng ngidil teletael, engdi a ulekrael er a Rubak a mo sobecheklid e ngosukid el di moltuil er kid el orrenges e meruul a Tekingel. A ungil okesiu a ngarsel cheldecheduch er a babier er a Genesis, el kid a silubii el kirel a Joseph er a Egypt me a sel llemesel el silodii a berusel a Pharaoh.
“Ma Joseph a dilu er a Pharaoh, … a Dios a ulechotii a Pharaoh er sel kirel mo meruul er ngii. …
“Uaisei, Ng mor ngii a euid el rak el le kekuii a beluu er a Egypt el rokir:
“E a uriul er sei e ng mor ngii euid el rak el le bosech; ma rokui el ungil rak a di lobes er a Egypt.” 1
A Pharaoh a ulerenges er a Joseph e, ulenger a ikel Dios a ulechotii er a chelsel a berrusel meng kmal di mlo mereched el mo mengedmokl el kirel a ikel merael el mei. A chedaol llechukl a melluches el kmo:
“A ikel euid el rak er a le kekuii, eng dilubech a kmal betok el dellomel.
“Ma Joseph a chiludel a rokui el kall el dilubch er a ikel euid el rak. …
“A Joseph chiludel a mais el mlo ua idisel a chelchol er a daob, … me ng mlo diak lolebodeb; ele ng diak el sebechel medebodeb er a idisel.” 2
Se er a bol merek a ikel euid el rak er a kekuii, e touchais el kmo “a euid el rak er a bosech a ulemuchel, el di uale dilung a Joseph: Ng mlar ngii a bosech er a ikel bebil er a beluu; e ngdi Egypt a mlar ngii a kall er ngii el rokir.” 3
Chelechal taem, e kede ngeltengat el re profet a mengetikaik er kid el ungil medengei a ulsbechelled el mo kudmeklid el omtok a kerior el ngii “a mo er ngarngii” 4 e dirrek el medengei a telkelel malechub eng bul el kid a mo chemau sel dolasm el mo oltirakl a tekingir.
Ngarngii a bleketakl e klemedengei el kmo a ikel rellel a COVID-19, me a meringel el kerior, a mo er a ngidil chad e imuul el mo er a bekbedengir a rechad, buai, me a klechelid er a bek el beluu. Ng mlo diak a ureor me a kerekerngem a mlo kekerei e le sel techall a mla metemall eleng terbengel a ureor me a klisichem el mo oureor a dikeang leng secher me a otireklel a llach ra beluu a uchul.
Mo er tirkel mla mo chemau tiang, aki melatk e omdasu el kiriu, e mesisiich el oumerang el kmo a ungil sils a merael mei. Ko mla mukngeltengat er a rebisop me a re branch president el osiik e olngeseu er a rechedal a ikelesia er ikel lousbech e ngarngii a donguu me a klalou el ousbech el sebechel ngosukau el lmuut el toketekii a klengar er kau e mekrolau er sel teletael- er a siungel a klengar sel moruul aikal osisecheklel a omengedmokl.
Chelechal taem, e tial bekuiuiuul el secher el mla tomelii a kerruul me a klengar er a rechad, eng locha diak el bo longaisisiu er sel klechubechub er a Osobel el mo oumechad el kirel tial teletael el betok rechad a ngara ringel e mo olengit er tir mel dil mereched el mo mengudel a kall me a udoud el kirel a ngar medad el team. Engdi, tia a diak el belkul a kmo ngkired el oumechad er kid— er aikel osisecheklel a omengdomokl … ngdi ikakid el osisechakl a kdmekill loeak “a llomes me a klebechel lomeruul” 5 me a ngarmedad el klebesei e sebeched el dmung, el di uai ikel lullekoi a Joseph er a Egypt “mlar ngii a kall, “ 6
A Rubak a diak el longerchir er kid el mo meruul a ikel ngii a diak el sebeched, Ngii a bai mengerchir er kid el mo meruul a ikel ngii a sebeched, er sel sebeched el taem. A President Nelson a ulmeklatk er kid er tial mlo merek el klou el ongdibel er kid el kmo, “A Rubak a betik a rengul er a ureor.” 7
A remerredel er a Ikelesia a blechoel omekduch a rengrir a Uriul-klebesei el Santo “el mo keldmokl el kirel a cherarou er a klengar sel ngarngii a kelir ma relmir me a sesei el ududir el keldmokl.” 8 Osisiu el taem, kede mla mesuub el “mo mellomes” e “diak dekuk kmal mo imis” 9 er a urered el mo meruul a ikel dousbech er a blid ma omengudel el udoud. A ulsbechall el babier el dai er ngii a Personal Finances for Self-Reliance, el tilobed er sera 2017 e sebeched el mesang er a Church website el llechukl er a 36 el bedengel omelekoi, a omuchel loba klemechel a Kot el Omerredel, el kmo:
“A Rubak a mla melekoi el kmo, ‘tiang a moktek er ngii el mengedmokl el kirel a resanto er ngii’ [Doctrine me a Covenants 104:15]. Tia el ocholt a yaksok el mla er a Rubak el kmo Ngii a mo oldars a klengeltengat er a klechad e mo omok a chesmerel a siungel a klechad. …
“… Me sel kengei e kiei el olab a ikal osisechakl a mo uchul e kemiu a mo ngmai a klengeltengat er a klechad el blel yaksok a Rubak.
“A ki olengit er kemiu me bo mungil mesuub e ousbech a ika el olisechakl e bo molsisechakl el mo er a telungalek er kemiu. Me sel moruul a ikang, e a klengar er kemiu a mo mukngeltengat … [e le] kemiu a ngelekel a Demad er a Bableuades. Ngii a betik a rengul er kemiu e diak el bo el obes er kemiu. Ng medengelkau e keldmokl el moldars a chedaol klengeltengat er a siungel a klechad el lekor kau.” 10
Tial babier a ngarngii a bliongel el kmal kirel a omerellel e kiei el ousbech aikel ngarngii el ududem, mengeluolu er a telungalek er kau er a ringel, oungerachel a udoud ra temel a kerior, e mo mengudel el kirel a ngarmedad el taem, me a muut el bebil e mo er a rokui el chad el ngarsel website er a Ikelesia malechub eng okiu tirkel remerredel er a ikelesia el ngarsel basio el omkiei er ngii.
Mesel momdasu a osisecheklel a omngedmeklel, eng sebeched el omes el mo er a Joseph er a Egypt el kirel a mellomes el uldasu. Sel lodengei el kmo ngera mo duubech a diak el mui el mo ngosuterir el mo soiseb er ikel rak el “bosech” a lak el ngara ringel er sel temel a a ikel rak el kekuii. Ng bai dimlak lousbech a ikel rokui el ulmekeroul a rechedal a Pharaoh, ng mlo rengii olkael me a otirakl, el di oltobed a ikel kuk di sebechel el mo er a ulsbechall er sel taem, ma dirrek a ngarmedal taem, subechal. Sel lodengei el kmo ng mo er ngii a meringel el taem a dimlak a ngera el rellii. Ng kirir el mo ngarngii a loruul, el e klisichel a urerir eng, “mlar ngii a kall.” 11
Tiang a uchul sel klou a belkul el ker: “Ma leuaisei, e ngerang?” A ungil basio el omuchel er ngii sel bo modengei el kmo a rokui el tekoi a chedaol el mo er a Rubak, e dimlak a ta el taem, el ngii mileskid a llach er a klechad. 12 A rokui el tekoi, ngii, a melutk el mo er a Jesus Kristo el ngii a dodai el kired el meleketek a kedmeklel a klechad er kid.
A keldmokl er a klechad me a siungel a klengar a belkul a kmo “moumerang lobang a krasia, malechub eng klisichel, a Jesus Kristo me a klisichel a urered, e kid a mo sebeched el ngmai a rokui el usbechall er a chedaol me a klechad er tial klengar el ngii a kirel merkid me a telungalek er kid.” 13
Dechelel a teletelel a chedaol dodai el kirel a omengedmeklel a klechad a uldimukl omeruul “loeak a llomes me a klebechel lomeruul,” 14 el belkul a kmo mokokau el mengudel a kall me a udoud el mo melai a taem, me a bung e a oltirakl er a “kekerei e beot el omeruul” a belkul, 15 el ngii a olechotel a klaumerang el kmo a Rubak a mo smisichii a mekekerei el blak a rengud el ureor.
Lobang a chedaol dodai, eng sebeched el mo ungil remuul a ikel erul meklou a ultutelel el tekoi er a omengedmeklel a klechad—oungerachel a udoud me a oleketmekimel er a blai.
A klou a belkul olisechak el mo ungil loungerachel a udoud a uldimukl a harau a ongeltarech me a tenget; e bol sebeched el mo diak a belsed, e kudmeklii e kiei el ousbech a ngarngii el ududed, e mengudel el kirel a ngarmedal taem.
A osisecheklel a oleketmekimel er a blai a uldimukl er a chelludel el kall, ngarngii a ralm, me a dirrek el bebil er a ulsbechall el kirel a chad me a telungalek, e le “sel kot el ungil oleketmekimel” 16 a ngara blai, e le ngii “a kot el beot al basio el ngarngii a ikel dousbech er ngii.” 17
Me sel bo dechau aikal chedaol el osisechakl e osiik er a omekellomes er a Rubak, e kid a mo omekrael el mo mendengelii sel usesuel a Rubak el kired, dersta el chad me a telungalek, e ngera sel kot el lungil suobel el kirel a chedaol el omengetmokl. Sel kot el klou a ultutelel el bakes er ngii rokui a sel mo omuchel.
A Elder David A. Bednar a ulsisecheklii tial suobel ser a ledung: “Sel mouedikel a olechotel a mengedmokl loba klaumerang. … A mera el klaumerang a mokdubech lokiu a Rubak el Jesus Kristo el ngii a blechoel lorolau el mo meruul.” 18
Rodam me a rodos, tial beluulechad el di mengodech, eng kired el mo keldmokl el kirel a diak el ulterekokl el taem. Ngii mesel lorael el mo ungil besul aikal merael mei el klebesei, kid a medengei el kmo a tekingel a klechad el ngii a morbab e meriou a di melemolem. Me sel bo dekeldmokl er a klechad, eng sebeched el mo chemau a omelasm er a klengar el obang a klou el reng me a budech el ngara rengud, e mo uai a Joseph er a Egypt, el sebeched el kmul kmo er a chelsel a meringel el teletael, “Mlar ngii a blauang.” 19 El ngara a ngklel a Jesus Kristo, bol uaisei.