ການເປີດສະຫວັນເພື່ອຊ່ວຍເຫລືອ
ຂໍໃຫ້ເຮົາໃຊ້ສັດທາຂອງເຮົາໃນອົງພຣະເຢຊູຄຣິດເຈົ້າ ເປັນພາກປະຕິບັດ!
ຊ່າງເປັນພາກກອງປະຊຸມທີ່ພິເສດ ແລະ ດີເລີດແທ້ໆເນາະ! ຂອບໃຈຫລາຍໆ, ລາວດີ ແລະ ແອນໂຊ. ພວກເຈົ້າເປັນຕົວແທນທີ່ດີເລີດແທ້ໆໃຫ້ແກ່ກຸ່ມຍິງໜຸ່ມ ແລະ ກຸ່ມຊາຍໜຸ່ມຂອງສາດສະໜາຈັກ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ພວກເຮົາໄດ້ຍິນຫລາຍຢ່າງໃນມື້ນີ້ກ່ຽວກັບການຟື້ນຟູສາດສະໜາຈັກ—ສາດສະໜາຈັກນີ້ເອງທີ່ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ໄດ້ສະຖາປະນາຂຶ້ນ ລະຫວ່າງການປະຕິບັດສາດສະໜາກິດຂອງພຣະອົງຢູ່ໃນໂລກ. ການຟື້ນຟູນັ້ນເລີ່ມຕົ້ນເມື່ອ 200 ປີກ່ອນ ໃນລະດູໃບໄມ້ປົ່ງ ເມື່ອພຣະເຈົ້າອົງເປັນພຣະບິດາ ແລະ ພຣະບຸດຂອງພຣະອົງ, ພຣະເຢຊູຄຣິດ, ໄດ້ມາປະກົດຕໍ່ຊາຍໜຸ່ມໂຈເຊັບ ສະມິດ.
ສິບປີຫລັງຈາກພາບທີ່ມາໃຫ້ເຫັນທີ່ເໜືອທຳມະຊາດນັ້ນ, ສາດສະດາໂຈເຊັບ ສະມິດ ແລະ ອີກຫ້າຄົນ ໄດ້ຖືກເອີ້ນໃຫ້ເປັນຜູ້ສ້າງຕັ້ງສາດສະໜາຈັກທີ່ຟື້ນຟູຂອງພຣະຜູ້ເປັນເຈົ້າ.
ຈາກກຸ່ມນ້ອຍນັ້ນ ທີ່ຊຸມນຸມກັນໃນວັນທີ 6 ເດືອນເມສາ, 1830, ບັດນີ້ມີສະມາຊິກຫລາຍກວ່າ 16 ລ້ານຄົນຕະຫລອດທົ່ວໂລກ. ຄວາມດີທີ່ສາດສະໜາຈັກນີ້ໄດ້ເຮັດຕະຫລອດທົ່ວໂລກ ໃນການບັນເທົາທຸກ ແລະ ຊ່ວຍເຫລືອມວນມະນຸດ ໄດ້ເປັນທີ່ຮູ້ຈັກກັນດີໂດຍທົ່ວໄປ. ແຕ່ຈຸດປະສົງຕົ້ນຕໍ ແມ່ນການຊ່ວຍເຫລືອຊາຍ, ຍິງ, ແລະ ເດັກນ້ອຍໃຫ້ຕິດຕາມອົງພຣະເຢຊູຄຣິດເຈົ້າ, ຮັກສາພຣະບັນຍັດຂອງພຣະອົງ, ແລະ ມີຄ່າຄວນສຳລັບພອນອັນຍິ່ງໃຫຍ່ທີ່ສຸດທັງໝົດ—ນັ້ນຄື ການມີຊີວິດນິລັນດອນນຳພຣະເຈົ້າ ແລະ ນຳຄົນທີ່ເຂົາເຈົ້າຮັກ.
ຂະນະທີ່ເຮົາສະເຫລີມສະຫລອງເຫດການທີ່ໄດ້ເກີດຂຶ້ນໃນປີ 1820, ມັນສຳຄັນທີ່ຈະຈື່ຈຳວ່າ ຂະນະທີ່ເຮົານັບຖື ໂຈເຊັບ ສະມິດ ເປັນສາດສະດາຂອງພຣະເຈົ້າ, ແຕ່ມັນບໍ່ໄດ້ເປັນສາດສະໜາຈັກຂອງໂຈເຊັບ ສະມິດ, ຫລື ເປັນສາດສະໜາຈັກຂອງມໍມອນ. ນີ້ແມ່ນສາດສະໜາຈັກຂອງພຣະເຢຊູຄຣິດ. ໃນເລື່ອງທີ່ສາດສະໜາຈັກຂອງພຣະອົງຄວນຖືກເອີ້ນແບບໃດນັ້ນ ພຣະອົງໄດ້ສັ່ງວ່າ: “ສາດສະໜາຈັກຂອງເຮົາຈະຖືກເອີ້ນດັ່ງນັ້ນໃນຍຸກສຸດທ້າຍ, ວ່າສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.”
ຂ້າພະເຈົ້າເຄີຍໄດ້ກ່າວມາແລ້ວກ່ຽວກັບຄວາມຈຳເປັນທີ່ຈະຕ້ອງເອີ້ນຊື່ແທ້ຂອງສາດສະໜາຈັກ. ນັບແຕ່ເວລານັ້ນມາ, ຫລາຍສິ່ງກໍຖືກປ່ຽນແປງເພື່ອໃຫ້ຖືກຕ້ອງ. ຂ້າພະເຈົ້າຮູ້ບຸນຄຸນຕໍ່ປະທານເອັມ ຣະໂຊ ບາເລີດ ແລະ ກຸ່ມອັກຄະສາວົກສິບສອງ, ຜູ້ໄດ້ເຮັດຫລາຍສິ່ງຫລາຍຢ່າງກ່ຽວກັບເລື່ອງນີ້ ຕະຫລອດທັງເລື່ອງທີ່ຂ້າພະເຈົ້າຈະປະກາດໃນຄ່ຳຄືນນີ້.
ຜູ້ນຳຂອງສາດສະໜາຈັກ ແລະ ພະແນກຕ່າງໆ, ໜ່ວຍງານທີ່ກ່ຽວຂ້ອງ, ແລະ ສະມາຊິກຫລາຍລ້ານຄົນ—ແລະ ຄົນອື່ນໆ—ບັດນີ້ໄດ້ໃຊ້ຊື່ແທ້ຂອງສາດສະໜາຈັກ. ຄູ່ມືແບບແຜນຂອງສາດສະໜາຈັກ ກໍໄດ້ຖືກປ່ຽນແປງ. ເວບໄຊ້ຫລັກຂອງສາດສະໜາຈັກ ປະຈຸບັນນີ້ແມ່ນ ChurchofJesusChrist.org. ທີ່ຢູ່ຂອງອີເມວ, ຊື່ຂອງເວບໄຊ້, ແລະ ຊ້ອງສື່ສານມວນຊົນ ກໍໄດ້ຖືກດັດແປງໃໝ່. ກຸ່ມນັກຮ້ອງທີ່ຮັກແພງຂອງພວກເຮົາ ປະຈຸບັນນີ້ຖືກເອີ້ນວ່າ ກຸ່ມນັກຮ້ອງແທໂບແນໂກທີ່ບໍລິເວນພຣະວິຫານ.
ພວກເຮົາໄດ້ທຳການປ່ຽນແປງຫລາຍຢ່າງ ເພາະຖ້າຫາກວ່າເຮົາເອົາພຣະນາມຂອງພຣະຜູ້ເປັນເຈົ້າ ອອກໄປຈາກຊື່ຂອງສາດສະໜາຈັກ ຂອງພຣະອົງ, ແລ້ວກໍຊ່ຳກັບວ່າ ເຮົາບໍ່ໃຫ້ ພຣະອົງ ມີຄວາມສຳຄັນ ໃນການນະມັດສະການ ແລະ ໃນຊີວິດຂອງເຮົາ. ເມື່ອເຮົາຮັບເອົາພຣະນາມຂອງພຣະຜູ້ຊ່ວຍໃຫ້ລອດ ຕອນເຮົາຮັບບັບຕິສະມາ, ເຮົາໄດ້ເຮັດສັນຍາທີ່ຈະເປັນພະຍານ, ທັງໃນວາຈາ, ຄວາມຄິດ, ແລະ ການກະທຳຂອງເຮົາ, ວ່າພຣະເຢຊູຄື ພຣະຄຣິດ.
ທີ່ຜ່ານມາ, ຂ້າພະເຈົ້າໄດ້ສັນຍາວ່າ ຖ້າຫາກເຮົາ “ເຮັດໃຫ້ດີທີ່ສຸດ ໃນການເອີ້ນຊື່ແທ້ຂອງສາດສະໜາຈັກຂອງພຣະຜູ້ເປັນເຈົ້າ, ແລ້ວພຣະອົງ ຜູ້ເປັນເຈົ້າຂອງສາດສະໜາຈັກ ຈະຖອກເທອຳນາດ ແລະ ພອນຂອງພຣະອົງລົງມາເທິງຫົວຂອງໄພ່ພົນຍຸກສຸດທ້າຍ, ໃນວິທີທີ່ເຮົາບໍ່ເຄີຍເຫັນມາກ່ອນ.” ຂ້າພະເຈົ້າຂໍກ່າວຄຳສັນຍານັ້ນອີກ ໃນມື້ນີ້.
ໃນການຊ່ວຍເຮົາໃຫ້ຈື່ຈຳພຣະອົງ ແລະ ເພື່ອຊີ້ບອກ ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ວ່າເປັນ ສາດສະໜາຈັກຂອງພຣະຜູ້ເປັນເຈົ້າ, ພວກເຮົາຍິນດີທີ່ຈະແນະນຳສັນຍາລັກ ທີ່ຊີ້ບອກເຖິງຄວາມສຳຄັນຂອງພຣະເຢຊູຄຣິດ ຢູ່ໃນສາດສະໜາຈັກຂອງພຣະອົງ.
ສັນຍາລັກນີ້ແມ່ນລວມທັງຊື່ຂອງສາດສະໜາຈັກ ຢູ່ໃນຫີນເສົາເອກ. ພຣະເຢຊູຄຣິດຄື ຫີນເສົາເອກຫລັກຂອງເຮົາ.
ຢູ່ທາງກາງຂອງສັນຍາລັກ ມີຮູບ ທີ່ທ່ານທໍວາເຊັນ ໄດ້ແກະສະຫລັກຈາກຫີນອ່ອນເພື່ອເຮັດເປັນຮູບປັ້ນ ພຣະຄຣິດ. ມັນເປັນພາບຂອງພຣະຜູ້ເປັນເຈົ້າຜູ້ຟື້ນຊີບ, ທີ່ຊົງພຣະຊົນ ເດ່ພຣະຫັດ ອອກໄປຫາທຸກຄົນ ຜູ້ທີ່ຈະມາຫາພຣະອົງ.
ຕາມສັນຍາລັກ, ພຣະເຢຊູຄຣິດຢືນຢູ່ກ້ອງປະຕູໂຂງ. ປະຕູໂຂງເຕືອນເຮົາເຖິງການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດ ທີ່ອອກມາຈາກອຸບໂມງ ໃນມື້ທີສາມ ຫລັງຈາກການຄຶງຂອງພຣະອົງ.
ຫລາຍຄົນອາດຮູ້ສຶກຄຸ້ນເຄີຍກັບສັນຍາລັກນີ້ຢູ່ແລ້ວ ເພາະເຮົາໄດ້ຮູ້ດົນນານມາແລ້ວ ເຖິງການຟື້ນຟູພຣະກິດຕິຄຸນ ທີ່ກ່ຽວພັນກັບພຣະຄຣິດຜູ້ຟື້ນຊີບ ທີ່ຊົງພຣະຊົນ.
ບັດນີ້ສັນຍາລັກນີ້ຈະຖືກໃຊ້ເປັນເຄື່ອງໝາຍແບບໃໝ່ ສຳລັບອຸປະກອນ, ຂ່າວຄາວ, ແລະ ໂຄງການເປັນທາງການຂອງສາດສະໜາຈັກ. ມັນຈະເຕືອນທຸກຄົນວ່າ ນີ້ຄືສາດສະໜາຈັກຂອງພຣະຜູ້ຊ່ວຍໃຫ້ລອດ ແລະ ວ່າເຮົາທຸກຄົນ ໃນຖານະສະມາຊິກຂອງສາດສະໜາຈັກ, ໃຫ້ຄວາມສຳຄັນຕໍ່ພຣະເຢຊູຄຣິດ ແລະ ສາດສະໜາຈັກຂອງພຣະອົງ.
ບັດນີ້, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ມື້ອື່ນຈະເປັນວັນອາທິດບຸນກ້ານຕານ, ດັ່ງທີ່ແອວເດີ ກອງ ໄດ້ສິດສອນຢ່າງໂວຫານ. ແລ້ວເຮົາຈະເຂົ້າສູ່ອາທິດພິເສດ ທີ່ສຳຄັນທີ່ສຸດກັບບຸນອີດສະເຕີ. ໂດຍທີ່ເປັນຜູ້ຕິດຕາມພຣະເຢຊູຄຣິດ, ມີຊີວິດຢູ່ໃນວັນເວລາທີ່ ການລະບາດຂອງພະຍາດໂຄວິດ-19 ໄດ້ເຮັດໃຫ້ທຸກບ່ອນໃນໂລກວຸ້ນວາຍ, ເຮັດໃຫ້ເຮົາບໍ່ພຽງແຕ່ກ່າວເຖິງພຣະຄຣິດ ຫລື ສັ່ງສອນເລື່ອງພຣະຄຣິດ ຫລື ໃຊ້ສັນຍາລັກທີ່ເປັນຕົວແທນໃຫ້ແກ່ພຣະຄຣິດເທົ່ານັ້ນ.
ຂໍໃຫ້ເຮົາໃຊ້ສັດທາຂອງເຮົາໃນອົງພຣະເຢຊູຄຣິດເຈົ້າ ເປັນພາກປະຕິບັດ!
ດັ່ງທີ່ທ່ານຮູ້ຈັກ, ສະມາຊິກຂອງສາດສະໜາຈັກໄດ້ຖືສິນອົດເຂົ້າເດືອນລະເທື່ອ.
ຄຳສອນເລື່ອງການຖືສິນອົດເຂົ້າ ມີມາແຕ່ສະໄໝບູຮານ. ມັນໄດ້ຖືກປະຕິບັດໂດຍບຸກຄົນສຳຄັນຢູ່ໃນພຣະຄຳພີ ດົນນານມາແລ້ວ. ໂມເຊ, ດາວິດ, ເອຊະຣາ, ເນເຫມີຢາ, ເອສະເທີ, ເອຊາຢາ, ດານີເອນ, ໂຢເອນ, ແລະ ຄົນອື່ນໆຫລາຍຄົນ ໄດ້ຖືສິນອົດເຂົ້າ ແລະ ສັ່ງສອນເລື່ອງການຖືສິນອົດເຂົ້າ. ຜ່ານທາງການຂຽນຂອງເອຊາຢາ, ພຣະຜູ້ເປັນເຈົ້າໄດ້ກ່າວວ່າ: “ການຖືສິນອົດເຂົ້າທີ່ເຮົາຕ້ອງການ ບໍ່ແມ່ນ ດັ່ງນີ້ບໍ? ຄືແກ້ໂສ້ແຫ່ງການກົດຂີ່ ແລະ ປົດແອກແຫ່ງຄວາມບໍ່ຍຸດຕິທຳ ແລະ ປົດປ່ອຍຄົນທີ່ຖືກກົດຂີ່ໃຫ້ເປັນອິດສະລະ?”
ອັກຄະສາວົກໂປໂລ ໄດ້ແນະນຳໄພ່ພົນຊາວໂກຣິນໂທໃຫ້ “ຖືສິນອົດເຂົ້າ ແລະ ອະທິຖານ” ພຣະຜູ້ຊ່ວຍໃຫ້ລອດເອງກໍໄດ້ປະກາດວ່າ ບາງຢ່າງຖືກ “ຂັບໄລ່ອອກ ໂດຍ ການອະທິຖານ ແລະ ການຖືສິນອົດເຂົ້າ.”
ເມື່ອບໍ່ດົນມານີ້ ຂ້າພະເຈົ້າໄດ້ກ່າວໃນວິດີໂອສື່ສານມວນຊົນວ່າ “ໃນຖານະທີ່ເປັນໝໍຝ່າຍສຸຂະພາບ ແລະ ໝໍຜ່າຕັດ, ຂ້າພະເຈົ້າຂໍຊົມເຊີຍຜູ້ຊ່ຽວຊານດ້ານການແພດ, ດ້ານວິທະຍາສາດ, ແລະ ທຸກຄົນ ຜູ້ໄດ້ທຳງານຕະຫລອດຊາວສີ່ຊົ່ວໂມງ ເພື່ອປ້ອງກັນການແຜ່ລາມຂອງພະຍາດໂຄວິດ-19.”
ບັດນີ້, ໃນຖານະປະທານຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ແລະ ເປັນອັກຄະສາວົກຂອງພຣະເຢຊູຄຣິດ, ຂ້າພະເຈົ້າ ຮູ້ ວ່າພຣະເຈົ້າ “ມີອຳນາດທຸກຢ່າງ, ມີຄວາມສະຫລຽວສະຫລາດທຸກຢ່າງ, ແລະ ມີຄວາມເຂົ້າໃຈທຸກຢ່າງ, ແລະ ພຣະອົງຮອບຮູ້ທຸກຢ່າງ ແລະ ມີຄວາມເມດຕາຈົນເຖິງຂັ້ນທີ່ມອບຄວາມລອດໃຫ້ແກ່ຜູ້ທີ່ກັບໃຈ ແລະ ເຊື່ອໃນພຣະນາມຂອງພຣະອົງ.”
ສະນັ້ນ, ໃນຊ່ວງໄລຍະທີ່ມີຄວາມຫຍຸ້ງຍາກຫລາຍນີ້, ຂະນະທີ່ການລະບາດແຜ່ລາມອອກໄປຢ່າງກວ້າງໄກ, ປົກກະຕິແລ້ວ ເຮົາຈະເອີ້ນຫາພຣະບິດາເທິງສະຫວັນ ແລະ ພຣະບຸດຂອງພຣະອົງ—ພຣະອາຈານຜູ້ປິ່ນປົວ—ເພື່ອໃຫ້ສະແດງລິດເດດທີ່ມະຫັດສະຈັນ ເພື່ອເປັນພອນໃຫ້ແກ່ຜູ້ຄົນຢູ່ໃນໂລກ.
ຢູ່ໃນວິດີໂອຂອງຂ້າພະເຈົ້າ, ຂ້າພະເຈົ້າໄດ້ເຊື້ອເຊີນທຸກຄົນໃຫ້ຮ່ວມກັບຂ້າພະເຈົ້າ ໃນການຖືສິນອົດເຂົ້າ ໃນວັນອາທິດ, ວັນທີ 29 ເດືອນມີນາ, 2020. ພວກທ່ານຫລາຍຄົນອາດໄດ້ເຫັນວິດີໂອ ແລະ ໄດ້ມີພາກສ່ວນໃນການຖືສິນອົດເຂົ້າ. ບາງຄົນອາດບໍ່ໄດ້ເຮັດ. ບັດນີ້ ເຮົາຍັງຕ້ອງການຄວາມຊ່ວຍເຫລືອຈາກສະຫວັນຢູ່.
ສະນັ້ນ, ມື້ແລງນີ້, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ໃນວິນຍານຂອງພວກລູກຊາຍຂອງໂມໄຊຢາ, ຜູ້ໄດ້ ຖືສິນອົດເຂົ້າ ແລະ ອະທິຖານຢ່າງຫລວງຫລາຍ, ແລະ ໃນພາກສ່ວນໜຶ່ງຂອງກອງປະຊຸມໃຫຍ່ສາມັນ ເດືອນເມສາ 2020, ຂ້າພະເຈົ້າຂໍໃຫ້ທ່ານຈົ່ງຖືສິນອົດເຂົ້າອີກເທື່ອໜຶ່ງຕະຫລອດທົ່ວໂລກ. ສຳລັບຜູ້ທີ່ສາມາດເຮັດໄດ້, ຂໍໃຫ້ເຮົາຈົ່ງຖືສິນອົດເຂົ້າ, ອະທິຖານ, ແລະ ເປັນໜຶ່ງໃນສັດທາຂອງເຮົາອີກຄັ້ງ. ຂໍໃຫ້ເຮົາຈົ່ງອ້ອນວອນດ້ວຍຄຳອະທິຖານຂໍຄວາມບັນເທົາຈາກການລະບາດນີ້ຕະຫລອດທົ່ວໂລກ.
ຂ້າພະເຈົ້າຂໍເຊື້ອເຊີນ ທຸກຄົນ, ລວມທັງຜູ້ທີ່ບໍ່ໄດ້ນັບຖືສາດສະໜາດຽວກັນກັບພວກເຮົາ, ໃຫ້ຖືສິນອົດເຂົ້າ ແລະ ອະທິຖານໃນວັນສຸກທີ່ດີ, ວັນທີ 10 ເດືອນເມສາ, ເພື່ອວ່າການລະບາດຈະຢຸດຕິ, ຜູ້ດູແລຈະໄດ້ຮັບການປົກປ້ອງ, ເສດຖະກິດຈະ ຈະເລີນກ້າວໜ້າ, ແລະ ຊີວິດຈະກັບຄືນສູ່ສະພາບເດີມ.
ເຮົາຖືສິນອົດເຂົ້າແນວໃດ? ປົກກະຕິແລ້ວ ອົດສອງຄາບ ຫລື ອົດ 24 ຊົ່ວໂມງ. ແຕ່ໃຫ້ທ່ານຕັດສິນໃຈເອງ ວ່າທ່ານສາມາດເສຍສະລະໄດ້ຊ່ຳໃດ, ຂະນະທີ່ທ່ານຈື່ຈຳການເສຍສະລະອັນສູງສຸດທີ່ພຣະຜູ້ຊ່ວຍໃຫ້ລອດໄດ້ເຮັດເພື່ອທ່ານ. ຂໍໃຫ້ເຮົາຈົ່ງເປັນໜຶ່ງໃນການອ້ອນວອນ ຂໍການປິ່ນປົວຕະຫລອດທົ່ວໂລກ.
ວັນສຸກທີ່ດີ ຈະເປັນ ວັນ ທີ່ເໝາະສົມ ທີ່ຈະໃຫ້ພຣະບິດາເທິງສະຫວັນ ແລະ ພຣະບຸດຂອງພຣະອົງຮັບຟັງ ເຮົາ!
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າສະແດງຄວາມຮັກຕໍ່ທ່ານ, ພ້ອມທັງປະຈັກພະຍານຂອງຂ້າພະເຈົ້າ ເຖິງວຽກງານແຫ່ງສະຫວັນ ຊຶ່ງເຮົາມີສ່ວນຮ່ວມ. ນີ້ ແມ່ນ ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ພຣະອົງຢືນປະທັບຢູ່ເປັນປະມຸກ ແລະ ຊີ້ນຳທຸກສິ່ງທີ່ເຮົາເຮັດ. ຂ້າພະເຈົ້າຮູ້ວ່າ ພຣະອົງຈະຕອບຄຳອ້ອນວອນຂອງຜູ້ຄົນຂອງພຣະອົງ. ຂ້າພະເຈົ້າເປັນພະຍານໃນພຣະນາມອັນສັກສິດຂອງພຣະເຢຊູຄຣິດ, ອາແມນ.