Ba Pigpig Nirib Mat’aw

Gub falfalaen’ ngay ni nggu weliy e daba’ mornga’agen e murwel ko pi’in ni bpin ko fare Sulyarmen nibe ul’ul’ i yaen. Rib magagiyel ni kab kakrom ma pi’in ni bpin e baga’ fanraed ko fare tonom rok fare Chitamangdaed nibay u Tharmiy. President Russell M. Nelson e fil, “Rib momaw’ ningan foleg ga’ngin urngin banan ni … ke rrin’ fapi bpin, ni gathi kemus ni fan ko tabinaew machane fan ko Galasia rok Someol, niyaed e le’ngiy, mitin, titaw; walagey ni bpin fa anty; sensey fa tiyugang’; ma ribga’ niyaed e yaedbe ayuweg fare mich.” ¹

Boech e duw kakrom fare Relief Society u Nauvoo ko 178, fare Profet Joseph Smith e fanownag fapi bpin ko galasia ningar “ngar murwelgaed nib gel nge mada’ ko ngiya’ likar [thapeg] gubin banan.” ² Fanow roraed e ngaed filed e daba’. Kar ta’arebgaed kar laked lungun fare profet miyaed par nib gel e mich roraed ngak Yesus Kristus miyaed toy fare talbulean ni gadaed sak’iy u dakean e daba’. Sisters, ke taw ko ngiyal’ rodaed. Bay e murwel rodaed nike pii’ Somoel, ma mich rodaed, nge rogon nrayag ningaed pii’ed e ayuw e rib ga’fan.

President Spencer W. Kimball e weliy: “Ra ngan mang bee’ ni bpin nib mat’aw ko ngiyal’ ney u fayleng, u mm’on ko fare bin migid e wub rok fare Tathapeg, e ba pigpig nirib mat’aw. Gelngin e pi’in ni bpin nib mat’aw e daba’ e rayag ninge ayuweg gonpa’an ragag gelngin yay ko boech e ngiyal’ ndariy e gafgow riy.” ³

President Nelson e ku woed ni yoeg: “Gube wenignag ngak fapi pi’in ni bpin ko [fare] Galasia … Mu rrin’ e tin nib tu’uf ulane tabinaew rom, ulane binaew rom, nge lan gil’ilungun Got—nib bo’or ko tin ni’um rrin’ nsomm’on.” ⁴

Dawri n’uw napan ngay, makan tawa’ath nigeg, ni gamaed boech e bitir ko Primary, ni kug mada’ niged President Russell M. Nelson ko fare na’un ni woed ya’an e tabinaew rok Smith u Palmyra, New York. Motoyil ko n’en ninge fil e profet rodaed ngak fapi bitir ko rogon e n’en nrayag ningar rrin’ed ningar ranod nga mm’on.

Sister Jones: Guba’adag ni nggu nang ko bay banan ni gamaed ba’adag ningam fithed ngak President Nelson. Gamaed ba par u charen fare profet. Bay banan nirig ga’abadag ningam fith ngak e profet? Arrogon, Pearl.

Pearl: Mo’maw’ e murwel ko profet? Woed ni, gama murwel ni gubin ngiyal’, ndariy e tofan riy?

President Nelson: “Arrogon rib mo’maw’. Gubin banan ni gadaed be rrin’ ni ngaed boded fare Tathapeg ab mo’maw’. Woed e biney, napan ni ba’adag Got ninge pii’ fare Ragagi Motochiyel ngak Moses, ngan e yog ngak Moses ninge yaen ngay? Taban farengi burey, nikan noeg e Mount Sinai nga’. Ere Moses e btu’uf ninge yaen u taban farengi burey nga mada’ nga taban ni ngeyag ninge thapeg fare Ragagi Motochiyel. Woed, nrayag ninge ga’ar fare Chitamangiy nibay u Tharmiy, “Moses, mu tabab u wur, mug tabab u roy, magdow mada’ nga lukungun.” Danga’, ya Somoel e ba’adag e gidii’ nima gay rogon, ya ran gay rogon mara yib e tawa’ath riy. Ni woed e biney, gama fil skul ko rogon i chibeg e piano?

Fapi Bitir: “Arrogon.”

Pearl: “Guma fil rogon i chubeg fare violin.”

President Nelson: “Ma gama fil rogon?”

Fapi Bitir: “Arrogon.”

President Nelson: “Mang era buch ni fa’anra dam mu fil rogon?”

Pearl: “Garam pagtilin.”

President Nelson: “Arrogon, dabiyag ningam mon’og, fa uw rogon? Ere fare fulweg riy e arrogon, o Pearl. Bagel e athamgil riy, bagel e murwel riy, ma bo’or banan ningan fil riy, ma dariy e tomur riy. Rib mangil! Rib mangil, ya bachane gubin ngiyal’ ma gadaed be mon’og i yaen. Ka’ar rogon ko bin migid e yafos ni kagdaed be mon’og i yean.

Fulweg rok President Nelson ngak e pi bitir ney e kab ga’fan ngodaed. Somoel e ba’adag e gidii’ nima gay rogon, maran gay rogon mara yib e tawa’ath riy. Gadaed ul’ul’ ningan fil rogon. Gubin ngiyal’ ma gadaed be mon’og ni fa’an gadaed ra gay rogon ngaed leked Somoel. ⁵ Dar sap ko tin polo’ ni kadba’. Ngaed ul’ul’ gaed ngaed darod nga tabab farengi burey u Mount Sinai. Ya rayan boech e ngiyal’ ngay, ma fare malekag rodaed e riyul’ nib tu’uf ningan athamgil riy, min fil rogon, machane rogon nikad dugliyed u wun’daed ningaed mon’oggaed riy era fek fare tawa’ath ngodaed ni manemus. ⁶

Mang boech banan nikad filed rok Profet Joseph Smith nge fare bin Somm’on e Yi’iy ko mornga’agen e athamgil, murwel nib gel, nge fil rogon? Fare bin Somm’on e Yi’iy e pii’ ngodaed wo’en rodaed nib thil, nge murwel rodaed nib ul’ul’ i yaen. Gadaed gidii’en e pi’in ni bpin ko mich, e rayag ningaed sapgaed ko fapi yalen nib riyul’ rok Profet Joseph ko tin nike buch rok ninge ayuwegdaed ningaed thapaged fapi yi’iy nifan ngodaed. Ni woed:

• Ngaed murwel gaed u fithik e tin nib mo’maw’.

• Ngaed sapgaed ko fapi thin nib thothup ni ngeyag ningaed thapeged e gonop ko tin ningan rrin’.

• Magdaed dag e mich rodaed nge tin nib riyul’.

• Magdaed fanay gelngindaed ngaed weniggaed ngak Got ninge ayuwegdaed ko gin nibay fare murwel ko mo’oniyan’ riy.

• Magdaed yoeg e tin ni gadaed ba’adag u gum’ircha’endaed ngak Got.

• Magdaed taga’ ko fare tamilang Rok ninge powi’iy e tin nikaed mel’eged nge tin nike pii’ ngodaed ma arram rogon ni gadaed be sap Ngak.

• Ma gadaed manang ni manangdaed ni gubin nge fithingandaed nge fapi murwel rodaed nib tu’uf ningaed rrin’ed. ⁷

Ma kuwoed, ni sulweg Joseph Smith fare llowaen’ nibay fal’ngindaed’ nge kagdaed manechubog. Bachane biney e tha’ rodaed ngak e Chitamangdaed nibay u Tharmiy, mich u wun’ug ngay nibe taga’ ngodaed ningaed thapeged e pi yi’iy ney nibe yib Rok.

Fare Somoel e yoeg ngak Emma Smith ninge “thapeg fare Kan ni Thothup,” me fil bo’or banan, “me tay e tin nu fayleng banan ni tomur, … me chichi’iy pa’ ko tin nib ga’fan,” me “ta’arebnag [ir] ko fapi motochiyel” rok Got. ⁸ Fil rogon e rib ga’fan ko mon’og, nrib ga’fan nibe un fare Kan ni Thothup ngay nibe fil ngodaed e tin nib tu’uf ningaed ted nga palog ni dani ga’fan—nibe yipfan e tin nra wawliy daed fa talag e mon’og rodaed.

President Nelson e ga’ar, “gube wenignag ngomed ningam ga’ niged e thothup romed ningam thapegned e yi’iy.” ⁹ Thin rok e profet rodaed e be par rog ma gube tafneynag rogon ningaed mon’oggaed nga mm’on. Ke wenig ngodaed, nibe dag nib ga’fan e biney. Fil ngodaed rogon ningaed pired nib fos ulan fare fayleng nib sug ko denen ni gadaed be rrin’ fapi yi’iy nikan thapeged. ¹⁰ Napan ni gadaedra rrin’, ma gadaed be tayfan fapi motochiyel rok Somoel, makan michegnag ngodaed, ni ku woed Emma Smith, “nran tay nga dakean loelugendaed e tin ni mat’aw .” ¹¹ Fare profet Joseph Smith e fil nib tu’uf ningaed nanged ni biney e kanawo’ ni gadaedbe yaen ngay e ke pii’ Got mat’won. Ya fa’anra dariy e biney e llowaen’, ma bay “nra tomalnag e tafney [rodaed].” ¹²

Ko biney e conference, ma gadaedra rung’ag e thin nib riyul’ ni gadaedra adag ningaed thilgaed, min mon’og, min be’echnag e yafos rodaed. U dakean fare yi’iy nifan ngodaed, ma rayag ni dabin thamiy “ni fare general conference e ke pag gelngin”—ma gadaedra chuw ni gadaed ba’adag ningaed rrin’ed ni gubin e chiney. Pi’in ni bpin e ma tay e arwach, machane dabyag ningan tay ni gubin, ma dani tu’uf, ningan tay nga loelugey ni gubin. Fare Thothup era ayuwegdaed nge dugliy ko bin ngan ko fapi murwel e ngaed sapgaed ngay e daba’. ¹³

Fare tu’ufeg rok e Chitamangdaed e be yib u dakean fare Kan ni Thothup nibe ayuwegdaed ningaed nanged Nibe ayuwegdaed ko tin ni gadaed be mon’og riy. Motoyil ko yi’iy nifan ngom e ma fekey ko tin ni gara mon’og riy nifan ngom. ¹⁴ . Motoyilgaed magdaed rrin’. ¹⁵ Me ga’ar Somoel, “Mu ning ko Chitimag u daken fithingag, u fithik e michaen’ ni ram athapeg, mra paer rom e Kan Thothup, nma micheg gubin e ban’en nib ga’fan ko pi gidii’ u fayleng.” ¹⁶ Murwel rodaed nibe ul’ul’ e ngaed thapaged fapi yi’iy ni kabe ul’ul’ i yaen.

Napan ni gadaedra rrin’ ni woed rogon, ma gadaedra thapeg boech gelngin nifan ngodaed ninge ayuwegdaed ko pigpig nge murwel ko thapegnag—ni riyul’ “nran tay e tin nu fayleng banan ni tomur, min sap ko tin ba’aray banan nib ga’fan.” ¹⁷ Ma aram rogon ni gadaed ra ayuweg e tin ba’aray e mfen ninge rrin’ ni ku ta’ab rogon.

Brothers nge sisters, gadaed gubin ma gadaed be sapnag gelngin Got ulane yafos rodaed. ¹⁸ v Bay banan ni rib fel’ ya’an riy u napan nra chagil e pumo’on nge bpin nga ta’abang ningar rined e murwel rok Got e daba’. Gadaed be thapeg fapi gelngin e priesthood nibe yib u dakean fare m’ag, nikan rrin’ u napan nikan tawfe nge thilin fapi rungrung ulane temple nib thothup. ¹⁹ President Nelson e fil ngodaed, “Gubin e pi’in ni pbin nge gubin e pumo’on ni fal’eg e m’ag ku Got me kol e tinem e m’ag, me ’un nib mat’aw ko gam’ing ko priesthood, e rayog ngorad gelngin Got.” ²⁰

N’en ni ngog e daba’ e danug nang ni gag e bay rog e pi n’ey, u dakean fapi m’ag rog, nge fare gelngin nibay ko priesthood. ²¹ Sisters, gube meybil ni gadaedra guy min cha’riy fare gelngin e priesthood “min “ta’arebnag [daed] ko fapi motochiyel”,” ²² min adag fapi thin nib thothup, min motoyil ko fapi thin rok e profet rodaed nib fos.

Dared ngaed rrin’ed e murwel rodaed nifan ngak e Chitamangdaed nibay u Tharmiy nge fare Tathapeg rodaed, “u fithik’ e mich nib miyuluy ngak’, ni gimed be taga’ ni polo’ nga dakean e pi ngongol rok’ e cha’ ni bay gelingin ni nge thapegey.” ²³ Ul’ul’gaed ngaed rrin’ed e biney e murwel rodaed nib thothup ningaed thapeged e tin tolang ni fal’ngindaed min ayuweg e gidii’ nibay u charendaed ningar rrin’ed ni ta’ab rogon u fithik e ayuw, tu’ufeg, pigpig, nge murunguy.

Elder James E. Talmage e pug oran ngodaed, “Champion rok fapi bpin e Yesus Kristus.” ²⁴ Ma bin tomur e murwel rok e pi’i ni bpin nibe ul’ul’ ko fare Sulyarmen, nga fan ngodaed ni gubin, ere mang murwel ab ga’fan ko biney? Gube micheg ni biney e ngayag ningan rung’ag Laman, ²⁵ ningan un Ngak, ²⁶ me pagan’uy Ngak, ²⁷ umin par nra bigimed ma ba t’uf rok bigimed. ²⁸ Gu manang nib fos. ²⁹ U dakean fithngan Yesus Kristus nib thothup, amen.