Kerekikl er a Melemalt Lomerritel

Sel mlomerek el October, a President Russell M. Nelson a mle melekoi er kid el mo omtab a klengar kid el uase ng mo uangerang omko “ikel dodengei er a Babier er a Mormon a di kiul mo dibus.”¹ Ngak a mla melbedebek er tial ker, me kemiu a locha dirrek el uaisei. A tal uldaso a dimei er a uldesuek—a lak a Babier er a Mormon ma bleketakl el tekoi er a osischeklel a Kristo me a tngakireng er Ngii, ak morker e osiik er a budech?

A osischeklel a Kristo—luldimukl a osisechakl me a chedaol ruoll er a klaumerang er a Kristo, ouchel reng, techolbechelid, sengk er a Chedaol Reng, me a outekangel el mora ulebongel—a betok el mosisechakl er a rokui el chedaol llechukl er a Oluut eng di kmal mesisiich er a chelsel a Babier er a Mormon.² Osischekl a omuchel er a klaumerang er a Kristo, ea rokui el telengtengil a ultuil er a klaumerang er kid er a tngakireng er Ngii.

A President Nelson a mla olisechakl, “A Babier er a Mormon a meskid a mui el klisiich el momedengelii a Tngakireng er a Jesus Kristo el debetik er ngii er angil dil ker.”³ Sel dungil medengelii a ngarbab el sengk er a Osobel, e kid a mo medengelii, er a uldesued me a rengud,⁴ a klemrang er a tekingel a President Nelson el uase a “klemerang el ngara Babier er a Mormon a ngar ngii a klisichel lomekungil, mengelaod, olluut, mesebechakl, melisiich, mellach, e oldeu a rengud.”⁵

A klou a belkul meskid a budech-meskii el ngara chelsel a Babier er a Mormon er a klemedengei e rkid er a Tngkaireng er a Osobel a osisechakl el kmo a chubechub er a Kristo a kudmeklii sel longerchir ngii a llemalt. Uaia Alma el silodii el kmo, “A Dios a ngii a mlo chuarm er a ringel el kirel a beluulechad, me bo denguu a chubechub el kirel a llemalt, e sumecheklii a llemalt, me a Dios bol mecherrungel, di Dios, e dirrek el chubechub el Dios.”⁶ A moktek er a Chedam el kirel a chubechub⁷—el chedaol llechukl omekedong er ngi el uase uldasou er a deureng⁸ malechub eng uldasou er a mo suobel⁹—a diak el sebechel mekedmokl a lak el motirakl a llemalt.

Eng di ngera sel kmal “longerchir ngii a llemalt”? Ka momtab a teletael dilubech el mora Alma. Kom dobedebekii, er sera lekekerei el chad, e a Alma a mirrael el kirel osiik el “melemall er a ikelesia.”¹⁰ E merang, a Alma millekoi er a ngelekel sechal er a Helaman el uase ngii “mlora ringel er a beluu er a ngau” le ngii a mla “mekodoterir a rebetok el ngelekel a [Dios]” el milngesuseu “er tir el mora klengit.”¹¹

A Alma silodii el mora ngelekel er a Helaman el uase a budech a mlei er ngii er sera “bo lolatk er a uldesuel” a osischeklel a demal “kirel a Jesus Kristo … sel lemei … el mo tngakireng er a kngtil a beluulechad.”¹² A Alma mle ouchel a rengul e ulengit er a chubechub er a Kristo¹³ e mlo melchesuar a deureng me a selbechakl sera bo lodengei el uase a Kristo a mlora ringel el kirel a klengit e mla nguubet aikel longerchir a llemalt. Meng mekerang, llemalt a loruul er ngii a Alma? A osischeklel a Alma ruriul a kmo, “Ng diak a diak el klikiid el soiseb er a rengedel a Dios.”¹⁴ A leuasiei, ea tebedechel a sebecheklel a Alma a locha sera, bo lodengei el uase a lak a chubechub, e a llemalt a tomer ngii meng diak luut el mo obengkel a Chedam er a Babeluades.¹⁵

Ngdi a deureng er a Alma ng kmal di—mle kirel mengeroid er ngii er a kelebsengel e ngii bol sebechel muut el mo er a Chedam? Kid a medengei el uase a Alma dirrek el mlara ringel el kirir tirkel ngii a uchul e te mlo cheroid er a klemerang.¹⁶ Ng di Alma dimlak el sebechel omekungil e olluuter tirkel ngii a millemall er tir. Ng dimlak el sebechel di ngii mo medengei el uase tir me te nguu a techall el mesuub osisecheklel a Kristo e mo ngeltengat el kiei ngara deureng loltirakl osisechakl. Ng dimlak el sebechel muut lolluut er tirkel mla mad el rirenges a blulak el osischeklel.

A President Boyd K. Packer a mle tal olisechakl el kmo: “A uldasou el silbecheklii a Alma … a tiakid: Olluut er a diak el sebechem lolutii, omekungil a telemall el diak el sebechem, meruul er a blam temelii el diak el sebechem el rulii a ngii a kmal moktek er a tngakireng er a Kristo.”¹⁷ A deureng er a klemerang el mlara uldesuel a Alma a kmo ng diak el di el ngii a mo klikiid er a klengit ng dirrek el tirkel tir a ngii a mla tomelteterir a dirrek el mo klikiid e mo cherrungel.

Betok el rak ruchei er a Alma bolodengelii tial osisechakl, e a King Benjamin a ulisechakl el kirel sel omekungil lokiu a tngakireng er a Kristo. A King Benjamin a millekoi el uase a “ungil klumech er a deureng” a lengiluu er a “anghel er a Dios.”¹⁸ A tara ikal ungil klumech a klemerang el uase a Kristo a mlora ringel e mlad el kirrel a kngtid me a telitur kid me luchul “e a melemalt el kerkeriil lebora rengelekel a chad.”¹⁹

Ngerang kmal mengerchir ngii a “melemalt lomerritel” er kid? E sel ongingil bades, e a King Benjamin a silodii el kmo, a melemalt el kerkeriil, el rsechel Osobel a mlechubel “el kirel a kngterir tirkel mla ruebet lokiu a rebetel a Adam” me tirkel “mla mad e dimlak lodengelii a moktek er a Dios el kirir, a lechub e te mle medengei e rirebet er a klengit.”²⁰ A melemalt el kerkeriil a kirel motaut, ngii a ulisechakl, me a “resechel a Kristo bol tngakireng” er a kengterir a remekerei el ngalek.²¹

Aika el bades olisechakl a klebokel osisechakl: el tngakireng er a Osobel a omekungil, el tada el sengk, er tirkel medengei eng di te ruebet er a klengit—me tirkel, tir a Jacob a melekoi el kmo, “ng dimlak el ngai a llach.”²² A ngercheled er a klengit a ultuil er a llomes el bla dengai a ultuil er a duch er kid lousbech er a mimokl el melilt.²³ Kid a medengelii tial omekungil e mengelaod el klemrang le kid loba Babier er a Mormon me a bebil er a chedaol llechukl er a Oluut.²⁴

Uaisei, el ngar ngii a llach el bla dengai, meng diak lak dodengelii a soal a Dios, meng ngercheled aike dolilt el meruul. A King Benjamin a milketeklii: “Ng kerior el mo er ngkel medengei e sola mo omtok er a Dios! Le mo suobel a diak el mei er a ngodech el rael ng di tal ouchel reng me a klaumerang er aRubak el Jesus Kristo.”²⁵

Tiang a dirrek el ungil klumech er a osischeklel a Kristo. A Osobel a diak lomekungil er tirkel medengei eng di te ruebet er a klengit ng dirrek, el tirkel, mo omtok er a llomes, el Osobel a omekungil er tir alsekum te mo ouchel a rengrir e oumerang er Ngii.²⁶

A Alma a locha “mlo urrekodel” aikang leruul klemerang. A Alma ng locha meral mlomelchesuar sel losaod er ngii el “ngaruchei … el deureng”²⁷ omko ng mle omdasou el uase a Kristo di osebelii e diak lolsobel er tirkel tir a ngii a uchul ete mlo cheroid er a klemrang? Ng kmal diak. Sel rulii a Alma elmo melchesuar a cherrungel el budech, a tirkel ngii a millemall er tir bol nguu a techall el mo suobel.

Eng di kmal uangerang tirkei—a lechub e tirkel dolemall er tir—a bol sobel? Ng diak desal mui el medengelii a chedaol teletelel a tngakireng er a Osobel a lomekungil e lolluut, ng di kid a medengei el uase a melemalt el kerkeril, el Osobel a mo rulii a rael er tirkel mle medengei e mlora ringel el bebil er a rechad a uchul.²⁸ Tiaikid a rolel er Ngii e a rokui el ngelekel a Dios a nguu a techall, lokiu a bleketakl el ues, el melilt el mo oltirakl er Ngii e kongei er a uldesuel kirel a deureng.²⁹

Ng kai kid el klemerang a mle uchul a deureng el mo er a Alma. E dirrek el kaikid el klemerang a mo meskid a ungil el budech el direkl. Kid el chad el sechal me a redil, a rokui el ruebet, a lechub e kede mo kakngit, e tomelii a rengul a tang. Ngii dil chad loungalk a sebechel ouchais, er a ringel ra ikel telitur er kid a diak el belkul a kmo ng kired el medakt er a kelebsenged ng bai dakt el merrob er a rengeleked er a deureng a lechub eng merrob er tir meng diak lesang e diak lodengelii a klemrang. A klebokel yaksok er a tngakireng er a Osobel a kmo aikel telitur kid a roungalek, e Ngii a diak loltelechakl er a rengeleked e bai yaksok el mo omekungil er tir.³⁰ Nguldimukl alsekum tir a ruebet er a klengit e omtok er a llomes—el kid el rokui a uaisei—eng di Chimal er a chubechub a berrokel, ³¹ e Ngii a mo mesebechakl er tir alsekum e te obult el mo er Ngii.³²

A Osobel a ngar ngii a klisichel remuul aikel diak el sebeched el remuul, eng di Ngii a mla dmu er kid el mo meruul aikel rokui el sebeched el mo el telengtengil a ouchel reng.³³ A kengtid me a telitur kid a diak dilcheridid er a Dios ng dirrek el tomelii a delongeled lobengterir a rebebil er a rechad. Bebil er a taem eng blak a rengud el sumechokl a beot el ouchel reng, eng di bebil er a taem eng kemanget el taem a dousbech er ngii.³⁴ Ng di, betok er a kngtid me a telitur kid, eng diak el sal sebeched el meral remuul a rengrir tirkel bla detemall a rengrir. A klebokel, el meskid a buched-meskii el yaksok el ngara Babier er a Mormon me a mla moluut el ebangkelio a kmo a Osobel sumechokl aikel rokui el bla detemall.³⁵ E dirrek el Ngii a sumecheklid alskeum e kid obult el mo er Ngii e ouchel a rengud er a mekngit el bla deruul.³⁶ Ngii a meskid aikal erul sengk le Ngii el betik a rengul er kid el rokui loba cherrungel el beltikereng³⁷e Ngii a blak a rengul loldubech er a melemalt el kerkeriil loltirakl er a llemalt me a chubechub. A kuuchais aika el klemerang el ngara ngklel a Jesus Kristo, amen.