Mahsen en Peneu (de mpeng)

Soukohp Esikiel ipwidi sounpar rieisek mwohn Lihahi oh ah peneinei arail mweselsang Serusalem. Nan pahr 597 [limopwiki duweisek isuh] mwohn ipwidi en Krais ni Esikiel ah sounpar 25 e iang pwihn en aramas akan me selahng Babylon sang nahnmwarki Nebuchadnezzar, dahme kitail ese me e mihmi mwo erein ah mour.E wia priest men ansouo, oh ni ansou me e sounpar 30 e ahpw wiahla soukohp.

Pwukoah me kohieng Esikiel, Siohwa doadoahngki pwe en wia soun silasil.

“Ma [sounsilasilo] pahn kin kilangada pwihn suwed, ah e pahn kin pouk koronihda pwe en kin kaparki aramas akan me mie pwihn suwed pohn sapwarailo;

“Eri irail kan me kin rong ngilen koronidahu, ahpw sohte katapaniki; eri pwihn suwedko pahn kohdo, oh wahsang, pein ih me karehda e pahn kamakamala.”

Pil duwehte, “ ma sounsilasilo kilangada pwihn suwedo ahpw sohte pouk nah souwio, eri aramas akan sohte pahn ese me mie mehkot keper; ma pwihn suwedo kohdo oh kemehla emen irail, … o I koasoanehdi me sounsilasilo me pahn pwukoahki.”

Siohwa ahpw masaniong, Esikiel, “Eri kowe, nein aramas, I koasoanedier pwe ken wiahla silepen nei seri en Ireal kan; eri ke udahn pahn rong mahsen kan me kohsang nan dawasei, oh kaparkin irail.” Dahme ke pahn kaparkin irail mehn wekid irail sang nan diparail kan.

“Ansou me I poangoakihong me dipan akan, me aramas suwed kan udahn pahn mehla, ke ahpw sohte kaparkin irail pwe irail en weksang arail suwed kan, aramas suwedo udahn pahn mehkihla dipehu; ahpw ke pahn iang pwukoahki ah sapwungo.

“Eri, ma ke kaparkin irail en weksang arail sapwung kan ahpw irail sohte wekila, e pahn mehla nan dipehu; ahpw pali ngenomw pahn saledek. …

“I pahn kapwurehieng, ansou me I pahn poahngoakiong me suwed kan, Me irail udahn pahn mehla; irail ahpw weksang nan diparail kan, oh wia met pwe ihme kosonedo koasoanehdi oh ihme pwung; …

“Sohte dihp ieu me e pahn dipaniki oh sohte me pahn koasoaiaiong: e kapwaiada dahme kosonedo koasoanehdi oh dahme pwung; oh e udahn pahn komourla.”

Udahn mehlel, met pil ong irail me pwung kan. “Ansou me I pahn poangaokiong me pwung kan, me irail udahn pahn momour; ma e pahn kamehlele me e pwung, ahpw wiahda dihp, soahng koaros me e wiahda me mwahu pahn manoknokla; ahpw dihp me e wiadahu me e pahn uhd mekihla.”

Koht ketin poakehla Sapwelime aramas akan, E ahpw poangoakiong Esikiel, ndahng irail me Ngehi Koht Ieias, oh I sohte kupwurki melahn irail me dipan akan, ahpw ma irail pahn weksang arail sapwung kan oh sohpeidohng ie, eri dahme nei seri en Isreal kan pahn mekihla?”

Pwe Ira en dehr sapwungki dahme kitail wiwia, Samatail Nanleng oh Sounkomouro raparapakiong kitail dahme kital pahn pereniki oh peki kitail en koluhla, kitail ese mehlel me irail me “suwed kan sohte douluhl pahn ahniki peren.” Eri Esikiel oh soukohp akan en mahs leledo met, irail kin pousehiong kitail mahsen en Koht sang nan arail mohngiong unsek, Kaparkin kitail en sohpeisang sehdan, imwin tihti en pali ngenitail, oh “pilada saledek oh mour soutuk, sang rehn Ih me ketin tomwkihla aramas koaros.”

Ansouo pwukoah wet kohiengete irail soukohp ko, irailte me pahn kin wia pwukoahu, ahpw rahn pwukat e kohiengehr sohte lipilipil, “mehlel irail kan me kin iang alehdi mahsen en peneu pwukat pil kin panawih mehn imparail kan,”Kitail koaros me Kauno ketin ketkiongehr marain en esehla duwen koasoandien komouro—oh wiepen kosonedo—pahn kehn ineng en ehukiong mehteikan maraino me kahreiong arail mour kak wekila, met oh pil nan moursoutuk. Eri ma kitail pahn idek, “Ihs mehn impatail me kitail pahn kapar?” mehlel me pasapeng pahn dierek nan karasaras me tepkihda, “Ohl emen me kohsang Serusalem kohla Seriko, oh aramas suwed kei ahpw poakiedi,” oh eri.

Koasokosoia karasaras mwahu en ohl en Sameria mwahuo nan soaipwoatet katamanehng kitail peideko “Ihs me mehn impatail? e pahn duwehte kosoned laud riauo: “Kumwail pahn poakong Kauno amwail Koht sang nan amwail mohngiong, palingenimwail, amwail kehl oh madamadau unsek; oh poakong mehn impamwail duwehte pein kumwail.”Wiepen kalaudehla oh pousewei mahsen en peneu wet iei limpoak, limpoak en Koht oh limpoak en riatail kan. Kapar mehteikan kasalepen nsenoh. Kauno poahngoakih me soahng pwukat pahn pweida sangete ni atail pahn “karakahrakala oh aktikitikla”“sang ni wiewia, kanengamah, kadek … , oh sang ni limpoak mehlel.”E kak wia ngihl karwaru iou, duwehte ahmw kaparki kisin serih kis en dehr kiong pehu nan kisinieio. E udahn pahn wehwe mwahu oh ekei pak pahn ngil laud. Ekei ansou, peneu kin kak wia mehn kamwahuiala ma kitail pahn idawehn kaweid en Ngehn Sarawi,” ahpw udahn mehlel e pahn poasoankihda limpoak. Kadedehpe, ni karasaras, limpoak me kin kiong kitail ineng en papah oh tonmetei en neitail misnerih kan.

Mehlel limpoak me pahn kangoange irail nohno oh pahpa en kapar mehn “imparail me keren kan,” iei pein neirail serih kan. Met wewehki padahki oh kadedehiong irail rongamwahu mehlelo. Met wewehki padahkiong serih kan padahk mehlel en Krais: pwoson, koluhla, oh kisakai en ngehn sarawi. Kauno katamaniki nohno oh pahpa kan,, “I koasoanediong kumwail en kakairada noumwail serih kan nan marain oh mehlel.”

Ehu pwukoah kesemwpwal ong nohno pahpa iei kaparki mehkot kaidehn en ndahte kansensuwed de kasuwed pen wiahda dihp ahpw en nda kaperen pen peik oh kapwaiada kosonned kan. Ien kapwurehieng mahsen en Enos kaweid me kohieng en kohla oh kapakap ong Koht, me karehda e kak ale mahkepen dipehkan oh ih wekila.

“Kilang, I kolahn pwok mahn nanwelo; oh koasoai me I kalapw rongasang ahi pahpao me pid mour soutuk , oh popohl en irail souleng kan, inenen sairada nan ahi mohngiong.

“Oh pali ngeni dupekla; oh I ahpw kelepwidi mwohn me ketin kapikiehdahu, oh I ahpw sengiseng dalahng Ih ni ahi aktiktitkla oh kapakap ni ngidingid.”

Pwehki Eh ketin unsek limpoak oh pil nsenohki mehtei kan en iang peren, Sises sohte kin peikasalki dahme e kin kaparkin kitail. Sangete ni tepin Ah wia Sawpellime doadoahk, pohn sampah, “E kin padahngki, Koluhla: pwe wein Koht kerendohr.”Pwehki E mwangih me sohte ehu ahl kitail kak pwurekihla nanleng, E masanih:

“Keid nan ahl me ineno: ewen kehl tehlap, oh ahl tehlapo kin kahlwai kitail lahng nan dihp, oh tohto me pahn keid loale:

“Ewen kehl tehtiko, oh al tehtiko, pahn kalwai kitail lahng mour, oh malaulau me pahn diarada.”

E ketin poakong me dipan akan, E masanih, “Kaidehn me pwung kan me I kokihdo, ahpw me dipan akan pwe irail en koluhla.”

Duwehte sounkou kosonned, oh parisi ko, oh sadusi ko, Sises sohte ketin kupwurki arail kin kalapw liksansalamwahu. E ketin kainenehieng irail sapwellime peneu oh kosonned akan: “Suwediong kumwail sounkou kosonned oh parisih ko, pwehki amwail liksansalamwahu! Pwe kumwail kin pwainki amwail meiroang kan mwohni sapwung pweinen anise oh cumin oh manokehla me mie kahrepen kosonnedo, kopwung, mahk, oh pwoson: soahng pwukat koaros kumwail pahn wia sohte ehu me kumwail sohte pahn wia.” Mehlel sohte me pahn kosoaiahki Sises ah sohte poakpoake sounkou kosonnedohko oh parisihko—pwe mwurin mwo Eh ketin lokolok oh pwoula pwe en doreiraila. Pwehki Ah poakong irail, E kapwungong irail ni sansal pwe irail en dehr wiwiadahte dihp. Emen sounkadedeh ntingihdi met, Sises ketin masaniong Sapwellime werengko, irail en alasang dahme e ketin wia, kasamwoh aramas koaros oh pil padahkiong irail dahkot dihp, sang ni limpoak kitail kak kaparki aramas akan dahme pahn kamedekei raila.”

Ekei pak sohte me kin men rong irail kan me kin kihda Mahsen en Peneu. re kin medewe me irail kin kadeik. ahpw, irail kan me kin nda me mehlel kisehn kosonned me wiawihdahsang aramas mepwukat me kin karehieng irail pilada dahme pein nsenarail met duwehte irail kan me pil kin idingehng aramas pein arail “madamadau pwung” Emen soun nting karasa me met duwehte “uwong tiahk”:

Nan dipadahn tiahk ke ese me ke mwahu de suwed sang ni ahmw pepehm, Nan uwong tiahk ke ese me ke mwahu de suwed sang dahme tohn ahmw kousoano kin ndahkinuhk, sang ni arail pahn waunikinuhk de mwamwahlkinuhk. … [Nan uwong tiahk,] pwung en aramas sohte kokouda pohn sapwung de pwung, ahpw e kokouda sang pein emen emen. …

“… Kitail koaros sohte kak wekila ma kitail pahn mihmi nan kosonned me pein emen emen me wiwia. Sohte kosonned me poadada, ihte irail me pein wiwia, eri met dahme emen emen men wia ihme pahn wiawi. …

“Dipadahn tiahk kakete suwed, pwe ke pahn kailongki dihp ahpw ke pahn poakpoake me kin wiahda dihp. Uwong tiahk mahs pwe irail kin kapatahieng dahme irail mwahuki, e suwed iong irail kan me sapwungki oh sohte pwungkihla.”

Me pahn pahrekiong met iei “Sounkomouro iei atail paipalap,”me kehlail oh poasoanda pohn kosonned oh mwakelekel. Ia uwen mwahu en atail pahn pilada kosonned en Koht me sohte kak wekila me pahn kak kaweid kitail ong mour soutik sang ni atail pahn pilada en wia soahng kan me irail aramas suwed kan wiwia nan rahnpwukat. Ia uwen mwahu en ese me mehlelo sang ahmw pahn wekiwekidengkiseli engin padahk likamw akan.”Ia uwen mwahula ni atail pahn koluhla oh nantiong momourki kosonned en rongamwahuo sang ni ahmw pahn mwomwehda me ke sehse dahme pwung oh sapwung oh nanantihlahte nan dihp oh nsensuwed.

Kauno poahngoakiher, “Mahsen en kapehm pahn lelong aramas koaros, sang rehn sapwellimei tohn padahk kan, me I pilirail dahr ni imwin imwin rahn akan.” iei soun silasil oh tohn padahk kan, me duwehte kitail, kitail sohte kak sohte tehk soahng wet “ni wiepe keneinei.” Me duwehte Esikiel, kitail sohte kak kilang pwihn suwed kan nan sapwatail kan kitail ahpw sohte pouk souwih.” Met kaidehh kitail en kohla suk wenihmw en mehn mpatail kan de keskesinen pohnial akan oh luklukwerki seli, “Koluhla!” Ni mehlel, ma kumwail pahn medewe met, mie nan rongamwahu kopwurpwurdohu dahme aramas akan, udahn, anahne. Eri met wewehki me mahsen en peneu de mpeng wet kaidehn ongete aramas akan ahpw nan ire ieu sang nan Melkakah kan, dene e pil wia “ngihl en kaperenda.”

Deseret News Opinion Editor Hal Boyd ntingiada karasaras en kahpwal en sohte men sewesehki mehteikan dahme irail ese. E ntingihdi me madamadau en pwopwoud wiwiahte mehn akamai nan pwungen irail aramas pwopwoud kan nan wein America, kaidehn pwopwoudte me wia mehn akamai ni wiewia. “Me kepwehpweh kan kin pwopwoudida oh pil kin nantiong pwe neirail serih kan en keirda oh pil paieki arail pai kan en arail wie pwopwoudte. … Ahpw ih kahpwalo pwe irail sohte padahkiong mehtei kan dahme irail wia.” Irail sohte men “soakone” irail kan me kak doadoahngki pein arail mehn kaweid oh dahme irail keieu kesemwpwaliki, “ahpw met. … iei ansou en irail me skuhl kan oh ahniki peneinei kehlail en udihsang dahme irail wiwia oh tepda padahngki dahme irail esehier me pid pwopwoud oh pwukoahn nohno pahpa. … Met ong mehn Amerika tohto me mihmi nan kahpwal, se anahne kumwail me kepwehpweh kan en dehr kamelelehte met, ahpw en pil sewesei riamwail mehn Amerika kan en pil idawehn met.”

Se likih mehlel kumwail dih en ansouwet, kumwail me pwulopwul kan koaros, me Kauno ketin kaskasik me kumwail me pahn kapwaiada Sapwellime doadoahk nan ansou kan me kokohdo, oh pil utung padahk kan en rongamwahuo oh kosoned en Mwowmwohdiso me sansal ong koaros oh ekei me sohte sansalohng mehteikan. Ke dehr pohnsehse irail kan me kin men kasamwoh me mehlelo ahpw kin pweieksang pwehki me suwedo. Dehr pwupwidiong nan dahme sohte mehlel de masakada—masakada kahpwal, mehkot sapwung, de pil kalokolok kan. Tamataman Sapwellimen Sounkomouro inouo:

“Meid pai kumwail kan, me aramas akan pahn wiakawe, oh kaloke, oh pil ndahkin kumwail mehkot likamw, me pid ngehi.

“Kasalehda amwail peren, oh kalaudehla amwail peren: pwe ketingpamwail me inenen laud nanleng: pwe irail kemelahr soukohp akan me kohdo mwomwail ko.”

Padahk en peneu me keieu kaselel me kohieng kitail iei emen emen kitail en ese me atail pilipil oh ia mwomwen atail wie momour koaros pahn wiawiong Koht. Sounkomouro masanih: “Semeio kaderiehdo pwe I en langada ni lopwuo; oh mwurin Ahi pahn langahda nin lopwuo, I pahn wahdo aramas koaros rehi, duwehte aramas akan ahr pwokiehda I pil duwehn Semeio ah pahn pwokirailda, irail en uh mwohi, pwe irail en kadeikihda arail doadoahk kan, ma arail doadoahk kan mwahu de suwed.”

Pohnese, Sapwellimen Kauno manaman, I peki nin duwen mahsen en Alma:

“Oh met riei ko, I inangih mehlel sang nan ahi mohngiong unsek, mehlel, I peki sang met lau lel ahi mehla, me kumwail pahn … kumwail pahn koluhkihla dipamwail kan, oh sohte kasakasauala amwail rahn en koluhla;

“Ahpw kumwail pahn aktikitikla mwohn Kauno, oh lukwerlahng mware sarawi, mwasamwasahn oh poaden kapakap, eri ke sohte pahn ale kasongsong me ke sohte kakong, ahpw Ngehn Sarawio pahn kaweid uhk. … ;

“Pwoson Kauno; ahniki koapwoaroapwoar me kitail kak ale mour soutuk; limpoak en Koht en ketket nan atail mohngiong kan ansou koaros, E ahpw pahn ketin pwok kitailda ni imwin rahno oh kitail koamoaldi reh.”

I men kitail koaros en iangih David oh ndahiong Kauno: “I sohte ekihla sapwellimomwi pwungo nan ahi mohngiong; I kasalehda sapwellimomwi pwoson oh komouro: I sohte ekihla sapwellimomwi limpoak kadek oh mehlelo sang pokon kalaimwun wet. Komw dehr ketkihwei sangie sapwellimomwi mahko, O ei Kaun.” Ni mwaren Sises Krais, amen.