Ngor er a Omengelechel

A profet Esekiel a milechell er a lluich el rak er a uchei er a Lehi ma telungalek er ngii ra lolukll el mo eroid er a Jerusalem. Sera 597 BC, er a le lluich ma eim a rekil, a Ezekiel a mle ta er tirkel kelbus el mlo er a Babylon lokiu a Nebuchadnezzar, me sel dodengelii a kmo, sel rokir el klengar er ngii eng mle kiei er sei. Ngka ngar sel telcheroll el loba ngerchelel a Aaronic priest, me sera okedei a rekil, eng mlo profet.

Mesel mlokedong el profet Esekiel, ea Jehovah a ulusbech er sel cheldechedechal a mengkar.

“ Me [mengkar] sel lesa cherarou el merael el mei, e ng melebusech el mengelechel er a re bek el chad;

“ E a le ngar ngii a rongesii e lak loruul a ikel ledung, e a le me cherarou el mekodir, e ng di ngii a uchul a kodellel.”

Ea klekakerous er ngii, “Ngdi lsekum a mengkar a mesa cherarou el merael mei e diak lolebusech, ma cherarou a mei el mo mekodir a ngidil chad ra delongelir, isei ak mo omekngerachel er a mengkar el kirel a kodelel.”

Sera Jehovah longedecheduch el mo er a Esekiel, eng dilu el kmo, “Mada kau el ngelekel a chad, ngak a meruul er kau el mo mengkar er a renged er a Israel el rokir; Ke remenges s ikel kdung e mo mengelechel er tir.” Ngomengelechel me bol cheroid er a klengit.

“A lsekum ak mesubed el kmo Kau el mekngit el chad a mo mad, e ngdi kau a diak mongelechel er ngii me lolodech a rolel, isei e ng mo mad el dirk mengkit el chad, e ak mo ker er kau el kirel a kodellel.

“E a lsekum ke cholechlii a mekngit el chad e ngii a diak bo lak le ngar a klengit, eng mo mad el dirk mengkit el chad, e ngdi klengar er kau a ngelbatel. …

“E a lsekum ak mengelechel er a mekngti el chad el kmo ng mo mad, me ng mo diak e le bor a klengit e meruul a melemalt ma ungil tekoi; …

“Ak mo ousubes aikel klengit el le riruul. Ng mo ngar ele uchul e ng mla remuul a melemalt ma ungil tekoi.”

Ngutebengal, el tial lomengelechel a dirrek el mo er tirkel mekedung. “Ma lsekum ak tibir a mo omsa klengar a melemalt el chad, e ngii a di omes el kirel, e meruul a mekngit, e ng diak a er a ikel ungil el le riruul el bok debedebek. Ng di mo mad el kengtil a uchul.”

Meng ngulengit er a Rengelekel, a Dios a dilu er a Esekiel, “Msbedeterir el kmo ngak el Rubak el Dios a di ngar el Dios, me ng diak e ledeu a renguk el mesa tal mekngit el chad el mad. Ng bai soak el mesang el mo diak e le ngar a klengit me ngdiak e le mad. Ngera uchul me ng somiu el mad?”

Meng diak el soal melebeakl er kid, a Demad er a Babeluades me a Osobel e sorir a lebo lungil a rengud e olengit er kid me bo douchel a kengtid, el kmal ungil medengei el kmo a “mekngit a diak el deureng.” Ma Esekiel ma rebek el profet ra uchei, el melekoi a tekingel a Dios e blak a rengrir, a mla mengelechel er a rokui el tir a ngar ngii a rengrir el mo cheroid er a Diablong, el cheroel a delebengir, e “ngiltii a budech me a diak a ulebengelel klengar e lokiu ngkel klou el Mesebechakl ra rokui el chad.”

Malta eng ngerechelir a re profet el mengelechel ra rebebil, eng di ng dirrek el ngerchelir a rebebil el chad el dirrek. Meng merang, ngerechelir a re bkel el chad el mengelechel er a re tonari er tir.” Kid el chad er a Ikelesia el medengelii sel moktek a ungil reng—ma llechul tial moktek—a kired el melchesiu ra klemeriar reng el mo ouchais er tial klaumedengei el ngii a ngar ngii a lebo le rellii er tiang el morsel diak a ulebengelel klengar. Mesel doker, “Ng techal tonari er ngak a kirek el mengelechel er ngii?” ea nger a debetik er sel cheldecheduch el lomuchel ua tiang, “A tal chad a merrael ra Jerusalem, me ngara melengel a rael elmo metengel ra Jeriko, e osiueklterir a re bekeu el merechorech,” e melemolem ngil cheldecheduch.

Sel dolatk er sel cheldechedechal ngkel ungil chad ra Samaria el ngar tial cheldecheduch e kede mo dobedebekii sel nger “Ng techang a tonari er ngak?” a di uai aikel teblong el meklou el llechul a Dios: “Bo le betik a rengum ra Rubak el Dios er kau, er a rengum el rokir, ma omeltkem el rokir, ma kllisichem el rokir, ma omelebedebekem el rokir, e dirrek el bo le betik a rengum era ngar bita er kau el ua le betik a rengum er kau.” Sel mengelechel a omekereu. A Rubak a ulisechakl el kmo a dongelechel a mo meruul loba delmedemk ma kle ngariou el reng” “lokiu a orimel, kemanget el ringel, ungil blekeradel… , ma meral beltik el reng.” Ng sebechel lorechudel, el di uai a dongelechel er a ngalek melak e loba chimal el mo ra ngau. Ng kirel bleketakl e mesisiich. Bebil ra taem, ea omengelechel a mo omelach, ng sel Chedaol Reng lorimel er kau,” engdi ng blechoel el lokiiu a beltik el reng. Momes, leng ngokesiu, ersel beltik el reng el lomeksemeriar ra urerir mesel lolenget a re misionariis er kid.

Maleuaisei ea beltik el reng a ruleterir a roungalk el mo mengelechel er tirkel kmeed el “tonari” er tir, el rengelkir. A belkul tiang a kmo molisechakl e mouchais el kirel aikel klemerang er a ebangkelio. A belkul tiang a kmo molisechakl er a rengelkem er a osisecheklel a Kristo: klaumerang, ouchel er a klengit, techolbchelid, ma sengk er a Chedaol Reng.”

Sel klou a ututelel el ngerchelir a roungalk sel mengelechel el louchais a diak el dil ikel mekngit el teletael el uchul a klengit ng dirrek el kirel a deureng sel doltirakl a llechul a Dios. Molatk aikel tekingel a Enos el kirel meng milchitikaik el mo osiik er a Dios, meng milengubet a kengtil, e obult a rengul:

“Elecha ak mirrael momalech a charm er a chelsel oreomel, ea tekoi el blek blechoel lorrenges er a demak el melekoi el kirel a diak a ulebengelel klengar, me a deureng er a re santo, a mle soiseb el mor er a elsel a renguk.

“Me a delebengek a mlo lolsengerenger; me ak mlo outibaruach er medal a Milebak, e lilangel mor ngii lokiu a mesisiich el nglunguuch me a ongit.”

Eleng tial cherrungel el beltkil a rengul e bekikl el kirir a rebebil ma deureng er tir, mengdimlak a torebengii a Jesus mengelechel. Sera uchelel a Urelel, ea “Jesus a mocha omuchel lomerek er a chosisechakl el kmo, Mobult: e a rengedel a eanged a kmedang.” Eleng Ngii a medengei el kmo ngdiak el ngidil rael a mo ra babeluades, Ngii a milelach:

“Bo msiseb er a melmalt el siseball: leng meteu el siseball, e oberberek a rael, el bedul a kereor, e te betok a re chad el merael er ngii a mo soiseb er ngii e melemolm:

“Leng melmalt a siseball, e ibutek a rael,, el bedul a klengar, me te mekesai a re chad el metik er ngii.”

Ng ulbengterir a re medengerenger, e dilu el kmo, “Ngak a mlei el diak be kumekedong er a re melemalt, ak bai mlei el lomekedong er a re mekngit me lobult.”

Me tirkel kuk chad ra omeluches, ma re Pharises, ma Sadducces, e a Jesus a mle mesisiich el merob a teletelir. Aikel longelechel ma llechul a mle melemalt: “Kom chebuul, kemiu el cheblad el chellimosk ra llach mar Farisee! Ko melenget a ta ra truich el bliongel ra mint, ma dill, ma kummin, e olechib a medemiu e imikr a lmuut el meklou a blkul ra chelsel a llach, el ta klngesngelel, ma klechubechub, ma kloumerang; ngkiriu el meruul a ikang, ma ikel bebil me ngdirrek el mekngit cho molechib a medemiu er ngii.” Maluaisei eng diak a chad el loltelechakl era Osobel el kmong diak el betik a rengul er tirkal elimosk ma Farisee—el Ngii a mlo chuarm e mo mad el mo olsobel er tir el dirrek. Engdi ng betik a rengul er tir, e dimlak el soal tir a lolemolm el ngara klengit elak losemechokl er tir. A tara chad ra omeluches a miluches, “A Jesus a ulsisechakl er a mesiungel el mo meruul aikel luruul: el mo mengedaol er a rokui el chad engdi ng dirrek lulsisechakl el kirel a klengit, e le beltik el reng a uldimukl er a mengelechel er a rechad el kirel a omeruul el tomelterir.”

Bebil ra taem e tirkel loldars a ngeril el mengelechel a bai diak a orenges er tir e le rechad omdasu el kmo te sorir kuk di melekoi er a rechad. Tirkel melekoi el kmo a klemerang ma teletael er a klechad a di uldesuir a rechad a bai blechoel tirkel chad el mesaod er a rechad el diak el loltirakl er a ngarngii e klebechel “el rolel a domdasu.” A ta ra chad er a omeluches, a milsaod er tiang el kmo “ngsiukang el rechad a melililt lokiu a sebekreng ma terached”.

Me tiakid el siukang e lomtelub el reng e ke mo medengi el kmo kungil malechub e ke mekngit e lokiu sel molchesiu er ngii. Tiakid el siukange e ke mo medengei el kmo kungil malechub e ke mekngit lultuill er a uldesuel a buai el kirem, alta te mengull er kau malechub eng diak kom ngara belsachel. …[Chelsel tial siukang,] e a tekoi er a klechad a diak el lultuill ra melemalt me a chelbirukl, ngbai ultuill er a uldesuir a rechad el kmong techa sorir ma diak. …

“…Rokui el chad a diak el sal tabesul a uldesuir el kirel tial ngara belsachel ma diak. Ng diak a ulterkokl el teletelel, ngdi uldesuir a rechad el mong e mei. Ng teletael el di telkib el ngerang eng masech a rengum e mo rau a rengum er a tekoi er a lemalt ma chelbirukl, el ruleterir a rechad el mo oltirakl. …

“Sel siukang e lomtelub a kmal meringel, engdi ng sebechem el chetim a klengit e bai ou beltik el reng el mo er a chad el meruul a klengit. Sel beches el siukang e lomtelub a di tekoi ra ngor el mengelechel omerodel ma kelou el reng, engdi diak el bol chebteterir tirkel diak el kengei a tekingir metirkel ngodech er tir.”

Ka momes er tiang el mo er sel “bedul a Osobeled,” el klebechel e ultebechel el dodai ra lemalt ma keldung. Ng bai kmal ungil sel ngar ngii aikel llechul a Dios el diak el mongodech e kid a mo melilt e omeksebech ra klengar er kid ra bai de ua de kelbus el loltirakl ra llach el mengedengodech ma ngesechel a rengrir a oruret a tekingel a chisel a beluu. Ng bai ungil a dodengelii a klemerang ra bai domitech el mong e mei e oberius el mechetakl ra bek el eltel chosisechakl.” Ng bai ungil sel douchel a kengtid e dolasm loltirakl ra teletael er a ebangkelio ra bai mongebelung el kmong diak a melemalt ma chelebirukl e molemolm el ngar a klengit ma ouchul el reng.

A Rubak a milekoi, “A ngor el mengelechel a mo er a rokui el chad, lokiu a ngerel a remesiungek, el Ngak a mla melilt er tir er tial klengar.” Me kid el mengkar ma mesiungel , a diak el kired eldi lmuk er tial "kot el ngarbab el rael.” Di uai a Esekiel, ngdiak el sebeched el mesang a mekemad el mera beluu e lak domekedong.”Tiang a diak kede dul kmo ngkired el mo er a tonari er kid me kede dechor melngod a chesmerir malechub kede dochor er buai el loldiu, Molubet a Kengtim! Merang, sel momdasu el kirel , e kede oba l a olutel a ebangkelio el ngarngii ra elsel el rechad, a meral el sorir. Me tial ngor elmengelechel a diak el dil ungil el nglemuu , le sel tekoi el ngara Psalm a uasei, “ng cherodech er a deurreng.”

A Deseret News e ngkel loltobed a chais el Hal Boyd a ulechotii chimo el okesiu ra telemelel sel di deluk .Ng miltebengar el kmo sel luldasu er a chelebechiil a direke “souadel el tekoi” er a delongelir a re ngelitel el chad er a Merikel, engdi sel le bora ngerchelel a chelebechiil eng diak el souadel el tekoi. “A re ngarbab el chad a mo bechiil e melemolm el bechiil e sorir a rengelkir a lebol ngai a ikel klungiaol ra ungil chelebechiil. … A mondai, a uasei ngdiak el loliseschakl aikel loruul.” Ng diak el sorir “mengesang” er tirkel tir a meral lousbech er tir ra ngeseu ra ungil omengedereder, engdi ng locha mlamo temir tirkel ngar ngii a skulir ma re mesisiich el telungalek er tir mel lolenguul eldi lmuk e lomuchel el lolisechakl aikel loruul el kirel a chelebechiil ma klechedam me a klchedil e lolngeseu ra rebebil ra rechad ra Merikel el mo oltirakl er ngii el tekoi.”

Aki oumerang tokunii kau el ngar tial telecheroll, a rengeasek el Dios a kirel lultuil er kemiu el kirel a Urellel ra ngar medad el taem, el lodubech a osisecheklel a ebangkelio ma ikel lolkail ra Ikelesia ra buai mesel om ngarngii. Lak kom mechetakl er a klebelung el luldasu malechub e kom medakt— dakt ra sebekreng, diak el lorenges, malechub eng ringel. Molatk er sel yaksok er a Osobel:

“Kom ngeltengat a re chad a loltuub er kemiu, el oldechelakl er kemiu, el lolekoi a betok el kelsuul e mekngit el kiriu, el kirek.

“Moldangs, e moldeu a rengmiu, leng ngklou chomeksuliu el bo mnguu era eanged:le tuldechelakl e ra re profet el lu leak kuchei er kemiu.”

Meng uaisei, kid a mo onger ra Dios e raikel dulilt ma teletelel a klengar er kid. A Osobel a milekoi: “Ea Demak a ulderchak me ak mo mekider el mo er bebul a kerus; me a uriul er a blak mekider el mo er bebul a kerus, e bol sebechek el mengedibel er a rokui el chad el mer Ngak, meng uai ngak el mlekider er a rechad el mo er bab, me a rechad a kirir el mo mekider el mo er bab ra Demad, el mo dechor er a medak, e mo mukerrekeriil el kirel a urerir, el kmo ngmle ungil me a lechub eng mle mekngit.”

Bo modengelii tiang, leng klisichel a Rubak, e ak mo mengesimer lolab aikel tekingel a Alma:

“Chelechang, e rodam [ma rodos], ak kuureng er tial ngara chelsel a renguk, choi, e bekikl el ua ringel, el kmo … mcheroid a kengtemiu, e lak ke momekioud er a sils ra ouchul el reng;

Engdi ke bai mo ngariou a rengum ra medala Rubak, e momkedong er sel chedaol ngklel, e momes e molemolem el meluluuch, melak ke bom mechetikaik er a ikel diak el sebechem, ea Chedaol Reng bo longetikaik er kau… ;

“Bo moumerang er a Rubak; e bo moureng el kmo kemo nguu a diak a ulebengelel klengar; loba beltkil a rengul a Rubak eldi blechoel ngara rengum, mebo mekider er sel luriur sils el mora Rubak.”

Bo de bekl el chad el sebeched el melekoi el mora Rubak e lobengkel a David: “ Ng dimlak bertii a melemalt el lomerelem ra elsel a renguk; Ak mla mechisii a telibilem me kau e losobel: Ng dimlak bertau ma beltik el reng ma tekingem er a klou longdibel. Lak ke morers er a klubechub er kau er ngak, E Rubak.” Loba ngkel a Jesus Kristo, amen.