Dmiich el Dmiich el di mo uaia le Sueleb a Sils
Paul a uluuchais er a meang el chaise el kirel a klaumerang er a re Korinth:
“Kid a outekangel er a bek el rael, e ng di ng diak de mesaul a rengud; kede rrau a rengud, e ng di diak de uriid;
“Chuarm, e ng di diak de mechoit; cheloit, e ng di ng diak de telemall.”
Ngera a mle uchul e a Paul a uluureng? Mrengesii a nger er ngii: “E le Dios, el ngii a millekoi er a llomes me ng mo omekllomes er a ilkolk, a dmiich er a chelsel a rengud, el meskid a klaumedengei er a klebkellel a Dios er a medal a Jesus Kristo.”
E dirrek el ngara ikel el kot el meringel e milkolk el taem, ngar er ngii a llomes me a klungiaol el meliuekl er kid. Tia el dirk mlo merek el Ongeteruich el Buil, a President Dieter F. Uchtdorf a ulmeklatk er kid, “Kid a iliuekl er a … kmal mechas a rengud er ngii el obdois el llomes me a klemerang el ngak a mo melebedebek el kmo kid kede mereng a saul el kirel aike el kid a olab.”
El uaisei, a cherarou a bai soal sel sekum kid a uldalem er a “belengel a ilkolk … el ngii a omeuikou a medad, … omekringel a … rengud… , e dirrek … el omekrael … el mo er cheroid.”
Osisiu el taem, lobang a cherrungel el klaumedengei er a ringel er a sils er kid, a Rubak a yaksok: “El kmo ngii el mlara Dios a llomes; e ngikel el mo nguu a llomes, e melemolem er a Dios, a mo ngmai a betok llomes; e a ngii el llomes a mo klou e dmiich e medidiich el mo lmuut er sel el cherrungel el sils.”
Kid a rengelekel a Dios. Monguu a llomes, e melemolem el ngara Dios, e melai a betok el llomes a ngii a dulbeob el meruul. Molmuut er a sera kmal uchelel, kede ultirakl er a llomes; kede ultirakl er a Demad er Babeluades me a Telbilel. Osiik er a llomes a ngara chedaol el reseched.
Ak orrenges el kmo tia el diak a ulebengelel el klemerang a ulsisechakl el klebokel el ngara diak el delebedebek el basio. Sera kuureor er a klou el bangk, e ak mle siotai el mo ngara er a executive program er a University er a Michigan. Chelsel tia el program, Professor Kim Cameron a ulsischakl er a osisecheklel a ungil omengedereder me a heliotropic effecter ngii.Ng milsaod: “Tia a mo mesaod el kirel a techellel a rokui el ngar el mo chemau a ungil el klisiich [llomes] e mo cheroid er a mekngit el klisiich [ilkolk]. Ngara ike el el di ta a cells er ngii el ngar el mo lmuut er betok el telengtengir a rechad, a rokui el ngar a ngar er ngii a inherent inclination10 el kirel a ungil e mo cheroid er a mekngit.”
Okiu a betook el ngesou er a omesuub, e ngii a dirrek el ulemdalm er a edei el komakai el telengtengil a ungil el siukang er a blil a ureor: klechubechub, klausubes, me a omereng el saul. Ng ungil uldasu el kmo a rechad a mo chemau a klungial [llomes], ike el blekeradel el ngii a cheruungel el mengai er a Llomes er a Beluulechad, Jesus Kristo, a ngar ngii!
Rodam me a rodos, kulengit memngai a ongelaod el kmo ngar er ngii a llomes el ngii a merkid. Me kulengite kuuchais a edei el bingel el kid a mo blechoel el sebeched el metik er a llomes:
1. Llemesel a Ikelesia
A Ikelesia a ngii a uchul a llomes el mora milkolk el beluulechad. Tia a kmal ungil taem el bo de chad er a ikelesia er a Ikelesia er a Jesus Kristo er a Uriul-klebesei Santo! A Ikelesia a lmuut el mesisiich er a mla memong e mla mukeroul er a bek el sils se el sekum e a rebeches el rechad er a ikelesia a me obengked, beches el chelechad a mekdubech, beches el misionai a mokedong, me a beches el basio a mo mengai a chesmerel el kirel a ebangkelio. Kede mesterir tirke el tir a mla mo diak el teloi er a tekoi er a Ikelesia er a merael mei el taem e a olsobel el ngii a lomes er ngii a President Thomas S. Monson a ngmai a betok el klengeltengat.
Diak el meketeket e ak mle oldingel lobengterir a rengeasek er a Paraguay, Uruguay, Chile me a Argentina er a temel a ongdibel er a For the Strength of Youther tir. Bekord el telael el rengeasek el sechal me a redil a chiloit a ta el sandei el melisiich a beltkil a rengrir er a Osobel e milrael mo remei er a telungalek er tir me a resechelirir el melidiich er a llemeselme a beltikelreng er a Kristo.
Momes, a Ikelesia a di blechoel el mo er ngii a remelaes el kirel. Ng mla uaisei er sera uchelel e muut el melemolem el mo er a ulebongel. Ng diak el sebeched el mecherei a ta el daes el mo tomellii se el ngii a reng er kid el kirel a llomes el ngii a ngar er ngii el kired. Omtab er a llomes e osiik er ngii a mo rullid meng sebechel el mo nguu a muut el klou el llomes.
Chelsel tia el milkolk el beluulechad, a llemesel a Ikelesia a mo dmiich e medidiich el mo lmuut er sel el chrrungel el sils.
2. Llemesel a Ebangkelio
A llemesel a ebangkelio a rael el ngii a “dmiich el muut el klou er a se el cherrungel el sils,” e ngii a dmiich el kot el medidiich er a telungalek er kid me a templo er a beluulechad el meliuekl.
APreach My Gospelouchais: “Ng okiu a llemesel a ebangkelio, a telungalek a sebechel el sumechokl a rrau el reng, klautok, me a ringel. A telungalek el medort el okiu a klaumongdaia sebechel el mo omkungil el okiu a ouchel el reng er a klengit, klausubes, me a klaumerang er a klisichel a Tngakireng er a Jesus Kristo.” Oumesingd er chelechang, a telungalek a kirel el mo uchul a klou el llomesel mo er a rokui el chad el meliuekl er kid. A telungalek a menglou er a llomes a lsekum te omdois el okiu a beltikelreng me a blekokuii. Se el lemeteketek a telungalek er a “klaumerang, … ouchel el reng er a klengit, klausubes, omengull, beltikelreng, [me a] klechubechub,” kede mo melechesuar a klou el beltikelreng el kirel a Osobel me a dirrek el tang ma tang. A telungalek a mo mesisiich, e a llomes er kid a mo muut el mellomes.
Kede menguiu er a Bible Dictionary, “Ng di ta el blid a sebeched el mengaisisiu er ngii er a templo el ngii a chedaol.” Chelechang e ngar er ngii a 155 el usbechall el templo e betok a dirk merael mei. Betok el telungalek a mla merenged er a taem me a el mo er a diak aulebengelel. Rechechedal a ikelesia a melemolem el meradel a ngklir a rebladek el mera templo el mo mengedmokl aike el chedaol ruoll el kirel a mo osobelir. Kid a melechesuar a klou el deureng e outkeu er aika el teblo el bitang er a kateng!
Chelsel tia el milkolk el beluulecahd, a llemesel a ebangkelio a mo omekllomes el dmiich el medidiich el mo lmuut er se el cherrungel el sils.
3. Llemesel a Kristo
Ng diak el sebechem el mengedecheduch el kirel a llome er a chelsel a beluulechad el diak mosaod er a Llemesel a Beluulechad, Jesus Kristo. A olechotel a oubeltikelreng el Chedam er a Babeluades a kmo rokui el tir a mei er tia el klengar a ngeltengat el oba a Llemesel a Kristo el ngosuterir el lemuut el mo er a blirir. President Boyd K. Packer ulsisechakl: “A Chedaol Reng er a Kristo a di blechoel el ngar er ngii. … A Llemesel a Kristo a mo er a rokui el di uaia dichel a sils. Ngidi el ker el ngar er ngii a ngar, e ng ngar er ngii a Chedaol Reng er a Kristo.” A Llemesel a Kristo “siotai e mengesuseu el melemolem el meruul a ungil” e olengeseu er tirke el osiik er a ungil me a klemerang el mo nguu a Chedaol Reng.
A Osobel a ulsisechakl el kmo Ngii a llomes el ngii a “omekllomes a medam,” “mereched a klemedengei er kau,” e “omsa ngar el mo er a rokui el tekoi.” A Llemesel a Kristo a mo ngosukid el meseterir a rebebil el okiu a osengel a Osobel. Kede mo lmuut el mo klou el oubeltikelreng e mon gar er ngii a klaumedengei er kid er a ringelir a rebebil. Ng mo ngosukid el mo oba klloureng el kirir tirke el locha diak el ngara omengull me a lechub e te ngara omesiou eluaikid. Ng mo ngosukid el mo medengelii a klou el telbiil er a deurreng el mo ungil e mesa el kmo kede mekera e mo ulsiseb er a chelsel ngii el klou el telbiil er a deurreng. Ng msang a ngar, belkul, me a moktek er a rokui el doruul. Aike el rokui el deurreng el ngii a me er kid a lsekum kede mo ungil el medengelii a Llemesel a Kristo, ng diak el bo el osisiuer a deurreng el ngii a bodolechesuar se el desa a Llemesel a Kristo el oureor er a rebebil: telungalek, resechelei, me a dirrek el diak dodengelterir el chad.
Ak mlo melechesuar er sel el deureng er a krenges el kirel a blakerreng er a rebekeu el rechad er a seseb el tir a mle olengeseu el omekouad er a milseseb el stake center el ngara Southern California sera July 2015. Tia er a bolak el metebechel tia el ngau, a battalion commander a ulemekedong er a sechelil el mle LDS el oker el kmo ngar er ker a chedaol el klalou me a kob er a sakrament meng sebechir el ngmai meng diak el metemall er a seseseb. A sechelil a milekoi er ngii el kmo ng dimlak a chedaol el klalou e a ike el kob er a sakrament a sebechel el mutechei. E ngdi ngika el commander a milechesuar el kmo ng kirel meruul a muut el betok, meng nguldorokl er a rebebil er a rechad er a seseb el mo tmuu er tia el ultaut a ngau er ngii el ikelesia el mo ngmai a rokui el siasing er a Kristo er a kboub meng sebechir el osobel. Te dirrek el ngiluu a ta er ngii el siasing el loia er a medal a tara ika el mlai er a seseb meng sebechel omes er tirka el chad er a seseb. Ak kmal mlo melechesuar er a blekokuii, klungiolel, me a rengul ngika el commander el kirel a Llomes, tokubets er tia el kmal kengaol e meringel el taem.
Chelsel tia el milkolk el beluulechad, a Llemesel a Kristo a mo omekllomes el dmiich el medidiich el mo lmuut er se el cherrungel el sils!
Ak lmuut el melekl a tekingel a Paulus: “Mede loia se el sebecheklel a llomes.” Ak olecholt er a klaumerang er a Kristo. Ngii a Llemesel a Beluulechad. Mei mede bode mesisiich el okiu a llomes el ngii a ngar er ngii el me er kid el okiu a klou el teloi er a ikelesia me a dirrek el oltirakl e meruul aike el ngii a osisechakl er a ebangkelio er a telungalek er kid. Me bo desa Llemesel a Kristo er a rebebil e de blechoel el olengeseu er tir el mesang er a chelsir el dirrek. Se el de bo denguu tia el llomes, e kede mo ngeltengat er a muut el betok el llomes, el mo lmuut er sel el cherrungel el sils se el deluut el mo mesang “a Chedam er a llomes,” Demad er Babeluades. Ak dirrek el olecholt er a klaumerang el oba ngklel a Llemesel a Beluulechad, el dirrek el Jesus Kristo, amen.