E Ootamwaaka ao n Ootamwaaka ni karokoa te Tawanou
E ngae ngke inanon taai aika kaangaanga ao n rootongitong, iai te oota ao te tamaroa ae katobibira ni kabane.
Bauro e tibwaua te rongorongo ibukin te kantaninga ma I-Korinto:
“Ti karib’aki n itera nako, ma ti aki reke; ti m’aninga, ma a aki toki nanora.
“Ti kaeaki, ma ti aki kitanaki; ti kab’akaki, ma ti aki kamateaki.”
Tera te buoka n ana kantaninga Bauro? Ongora n ana kabwarabwara: “Ba bon te Atua, are kangai, E na ota te ota mai buakon te ro, are ota i nanora, ba E na kaota otan atakini mimitongin te Atua i matan Iesu Kristo.”
E ngae ngke inanon taai aika kaangaanga ao n rootongitong, iai te ota ao te tamaroa ae katobibira ni kabane. N Okitobwa ae nako, e kauringiira Beretitenti Dieter F. Uchtdorf “Ti katobibiaki n aron te kaubwai n te ota ao te koaua are I miimi ngkana ti butimwaai raoi baike ti karekei.”
E ngae n anne, teuare buakaka e na bae kairiira ni katarui ara taratara iaon “taian roo … aika kamataki taian mata, , …kamatoai … nanoia … ,ao… ni kairia … nako.”
E ngae n anne, ma te atatai ae kororaoi ni kakaewenakoara n ara bong, e berita te Uea: Bwa are mairoun te Atua bon te oota; ao ane e karekea te oota, ao n reitinako inanon te Atua, e karekea riki te oota; ao te oota anne e rikirake n ootamwaaka ao n ootamwaaka ni karokoa te tawanou.”
Ngaira natin te Atua. Karekean te ota, n reitinako inanon te Atua, ao ni karekea riki te ota bon karikara bwa ti na karaoia. Man moan karikan bwaai, ti iriira te ota, ti iriira Tamara are i Karawa ao Ana babaire. Ukoukoran te ota e mena inanon TAMNEIRA.
I ongo te koaua ae akea tokina ae tamaroa aei n te tabo ae aki kantaningaaki. Inanon mwakuriu ibukin te bangke ae bubura, I kaoaki nakon ana burokuraem te Iuniwetiri ae Michigan ibukiia ataein te reirei ake a aki anaa te bitineti. N tain te burokuraem, Burobeetia Kim Cameron e reirei iaon te nakoa ni kairiiri ae raoiroi ao mwiina ae raoiroi. E kamataata: “Aei e kaineti ma karaoan bwaai ni kabane nakon korakoran te raoiroi [te ota] ao ni kararoako man korakoran te buakaka [te roo]. Man mwakoron taian okanitim ni kaka teuana nakon rabwatan te aomata ae kakaokoro, bwaai ni kabane a maiu iai kan karaoan te raoiroi ao ni kararoaaki man te buakaka.”
Te boutokaaki man te kamatebwai ae mwaiti, e katuruturui naba iaon bwai aika teniua aika kakawaki n nakoraoin katein te tabo ni mwakuri: te nanoanga, kabwarabure, ao te kakaitau. Iai riaina bwa ngkai a rairaki aomata nakon te raoiroi (te ota), anua aika kororaoi a kaotaki man Otan te Aonaaba, Iesu Kristo, bon iai!
Tariu ao mwaaneu, taiaoka kamweengaraoi ngkami bwa iai te ota ae tauraoi nakoira. N na kamataatai teniua taabo ike n taainako ti na kunea iai te oota:
1. Ootan te Ekaretia
Te Ekaretia bon kairan te aonaaba ae rikirake ni buakaka. Aei te tai ae kakateke n riki bwa kaain ana Ekaretia Iesu Kristo ibukiia Aika Itiaki ni Boong aika Kaitira! E korakora te Ekaretia n aron teina ao e rikirake ni korakora ni katoa bong ngkai kaain te aro aika boou a raoniira, a reke riki kaain te bootaki n taromauri aika boou, a weteaki mitinare aika boou, ao a kaukaki aaba aika boou nakon te euangkerio. Ti nooria naake a aikoa iriira ana waaki ni kakukurei te Ekaretia inanon te tai a riki bwa taan kamaiuaki man ana kaotioti Beretitenti Thomas S. Monson are e uoti kakai ni katoa bong.
I kawaria kairake n te tai ae nako i Paraguay, Uruguay, Chile, ao Argentina n tain aia maungatabu ibukin Kakorakorakiia Kairake. Tengaa ma tengaa ataeinimwaane ao ataeinaine a kabanea teuana te wiiki ni kakorakora aia tangira ibukin te Tia Kamaiu ao ngkanne a okiri mweengaia nakoia aia utu ao raoraoia ni kaotaa ootan ao ana tangira Kristo.
Taraia, n taainako a na iai aomata aika a na tiriburea te Ekaretia. Bon kaman arona anne man te moan ni karokoa te toki. Ma tiaki kona ni kariaia te tiribure n namakinan te oota are e tauraoi nakoira ni kabane. N ataakin te oota ao ukoukorana ti na kona n anganaki riki te oota.
N te aonaaba ae roo, Ootan te Ekaretia e na kia n ootamwaaka ao n ootamwaaka ni karokoa te tawanou.
2. Ootan te Euangkerio
Ootan te euangkerio bon te kawai ae e “karaka ootana ni karokoa te tawanou,” ao e ootamwaaka inanon ara utu ao inanon te tembora ni kabuta te aonaaba.
Tataekina Au Euangkerio e taku: “Rinanon ootan te euangkerio, a kona utu n raoiakin baika aki mataata, kakauntaeka, ao kakaewenako. Utu ake a rootaki man te kakauntaeka imarenaia aomata a kona ni kamaiuaki rinanon te rairannano, kabwarabure, ao te onimaki ni mwaakan ana Mwakuri ni Kamaiu Iesu Kristo.” Ngkai n ae mwaiti riki, ara utu a riki bwa buokan te oota nakoia aomata ni kabane ake irarikira. Utu a rikirake inanon te oota ngkai a rikirake inanon te tangira ao te akoi. Ngkai ti barongaia utu n te “onimaki, … rairannano, kabwarabure, karinerine, tangira, [ao] te nanoanga,” ti na namakina rikiraken ara tangira nakon te Tia Kamaiu ao bon nakoira imarenara. E na rikirake ni korakora te utu, ao te oota are inanora n tatabemaniira nako e na raka ootamwaakana.
Ti warekia n te Baibara Rikitionari bwa “bon tii te mweenga ae e kona ni kabotauaki ma tabun te tembora.” Iai ngkai 155 ara tembora aika mwakuri ao iai riki aika a na kaoti imwiina. Angiina riki utu aika a na kabaeaki ibukin te tai aei ao n aki toki. A mwaiti kurikuri araia aia bakatibu kaain te aro aika a anga nakon te tembora ni karaoaki aia otenanti ibukin kamaiuakiia. Ti rinanon raoi te kimwareirei ae moan te bati ao te bukamaru n iteran te roki aika uaitera!
N te aonaaba ae roo, ootan te euangkerio e na ootamwaaka ao ootamwaaka ni karokoa te tawanou.
3. Ootan Kristo
Ko aki kona n taekina te ootan te aonaaba n aki taekina Ootan te Aba, Iesu Kristo. Kaotan ana tangira te Tama are i Karawa bwa aomata ni kabane ake a roko n te maiu aei a kakabwaiaaki ma Ootan Kristo ni buokiia n oki nakon mweengaia. E reirei Beretitenti Boyd K. Packer: “Tamnein Kristo e memena ikanne n taainako. … Ootan Kristo e bon kabuta n ai aron ootantaai i bon irouna. N te tabo are e mena iai maiun te aomata, iai Tamnein Kristo iai.” Ootan Kristo “e kakao ao n anainano ni karaoan te raoiroi ae reitinako” ao ni katauraoia ni kabane ake a ukoukora te raoiroi ao te koaua ni karekea te Tamnei ae Raoiroi.
Te Tia Kamaiu e reirei bwa Ngaia bon te oota are e “kaotai matara,” “e kawaekoai ara atatai,” ao n “anga te maiu nakon bwaai ni kabane.” Ootan Kristo e na buokiira n iangoiia tabeman n aron are e iangoiia te Tia Kamaiu. Ti na tatangiriia riki ao n atai korakaia tabeman. E na buokiira n taotaonakinnano riki ma naake a aki taromauri n aron ae ti karaoia ke ni beku n aron ae ti konaa. E na buokiira ni kabwanina riki ara atatai n te babaire ni kakukurei ae korakora ao n nooria ti na kanga n riki bwa mwakoron te babaire anne. E anga te maiu, ae iai nanona, ao iai bukina ni baike ti karaoi ni kabane. Ngkai, ma te kukurei are e reke nakoira ngkai e bwanin ataakin Ootan Kristo, e na booraoi ma te kimwareirei are ti namakinna ngkana ti noora Ootan Kristo ni mwakuri inanoia tabeman—utu, raao, aao riki iruwa aika aki kinaaki.
I namakinna te kimwareirei anne ngke I ongo taekan aia konabwai kurubu n tiriai aika ninikoria ake a buokia ni katoka uraraken te titeiki tienta i California Maiaki n 2015. N tain te urarake, te kamwaanta n tiriai e tareboonia raoraona ae kaain te LDS n titirakinna bwa a kawakinaki iaara bwain ma mwangkon te toa bwa a aonga n rang, ni mano raoi. E kakoaua raoraona nakoina bwa akea nikiraia ao mwangko n toa bon bwaai aika a kai oneaki. Ma e namakinna te kamwaanta bwa iai te bwai ae riai riki ni karaoia, ngaia are e a kamwanangaiia taan tiriai ni kaokiia nakon te kateitei are e urarake ni koutii tamnein Kristo ake iaon te oo bwa a aonga ni kamanoaki. A katokaa teuana iaon te kaa n tiriai n te kantaninga are a na tararuaia raoi taan tiriai. I rootaki n ana akoi te kamwaanta, tamaroana, ao ana kanamakin nakon te oota, n tain te kabuanibwai ao te kaangaanga.
N te aonaaba ae roo, Ootan Kristo e na ootamwaaka ao n otamwaaka ni karokoa te tawanou!
I kaokioka ana taeka Bauro: “Ti na karini b’ain buaka aika b’ain te ngaina.” I kakoaua Kristo. Bon Ngaia Ootan te Aba. Ti bia kakorakoraaki man te oota are e tauraoi nakoira rinanon iriirakin ana waaki te ekaretia ao te kakaitau ae moan te bati ibukin reirein te euangkerio inanon ara utu. Ti bia noora ootan Kristo inanoia tabeman n ae reitinako ao ni buokiia n nooria i bon irouia. Ngkai ti karekea te oota anne, ti na kakabwaiaaki riki ma te oota, riki ni karokoa te tawanou ngkana ti a manga noora “Tamaia taian oota,” Tamara are i Karawa. I kakoaua n arana ae tabu ae Ootan te Aba, Iesu Kristo, amen.