“Diin nga Siyudad Ikaw Nagpuyo?,” Alang sa Kalig-on sa mga Kabatan-onan, Hunyo 2024.
Dali, Sunod Kanako
Diin nga Siyudad Ikaw Nagpuyo?
Nagpakita si Alma kanato nga, bisan hain kita sa espirituwal nga paagi, ang Ginoo naghatag kanato sa mga mensahe nga atong gikinahanglan.
Mga Paghulagway ni Albert Espi
Sulod sa kapin sa walo ka tuig, si propeta Alma dihay duha ka trabaho: halangdon nga pari ug labaw nga maghuhukom. Apan sa dihang iyang nakita nga daghang miyembro sa Simbahan nahimong daotan, iyang gibiyaan ang iyang katungdanan isip labaw nga maghuhukom aron siya makagahin og mas daghang panahon sa pagsangyaw ngadto sa katawhan.
Ang unang siyudad nga iyang gisangyawan mao ang Zarahemla (tan-awa diha sa Alma 5). Ang ikaduha mao ang Gideon (tan-awa diha sa Alma 7).
Ang iyang mga mensahe niining duha ka siyudad dihay pipila ka pagkasusama, apan kini usab dihay dagko nga mga kalainan.
Ang mga tawo sa Zarahemla gikinahanglang mahigmata aron lamang mahibalo kon unsa ka lay-on sila nahulog sa espirituwal nga paagi ug unsa ka gikinahanglan sila nga maghinulsol. Apan ang mga tawo sa Gideon andam sa espirituwal nga paagi alang sa usa ka lahi nga matang sa mensahe.
Kita makakat-on gikan sa nagkalainlaing mga mensahe nga gitudlo ni Alma sa mga tawo niining duha ka siyudad. Aniay pipila ka tema nga kining mga mensahe aduna nga managsama ug ang lain nga mga paagi nga siya mitudlo kanila.
Hinumdomi
Zarahemla: Giawhag ni Alma ang katawhan nga molingi ug hinumdoman “ang pagkabihag sa inyong mga amahan ug ang kalooy og pagkamainantuson [sa Dios] ngadto kanila” (Alma 5:6). Sa piho, siya namulong mahitungod sa daotang impluwensiya ni Hari Noah diha kanila, giunsa niini sa paggiya ngadto sa ilang pagkaulipon, ug giunsa sa Ginoo pagluwas kanila sa milagrosong paagi human sila mihinulsol. Agi og dugang, mihangyo siya kanila sa paghunahuna sa ilang kaugalingong nangagi nga espirituwal nga mga kasinatian ug sa paghunahuna kon ila bang mabati ang samang paagi karon (tan-awa diha sa Alma 5:26). Uban niini nga panumdoman, mihangyo siya kanila sa pagtan-aw sa unahan ug sa paghanduraw kon sila magbarog na nga pagahukman sa Ginoo (tan-awa sa Alma 5:15–24).
Gideon: Giawhag ni Alma ang katawhan sa pagtan-aw sa unahan ug hinumdoman ang saad sa mahangturong kinabuhi ngadto niadtong kinsa naghinulsol, nagpabunyag, nagsulod og pakigsaad uban Dios, ug nagsunod sa mga sugo sa Dios (tan-awa sa Alma 7:16).
Paghinulsol
Zarahemla: Nadawat sa katawhan ang pipila ka mahagitong pakigpulong gikan ni Alma mahitungod sa ilang panginahanglan sa paghinulsol. Sama pananglitan: “Alaot ngadto sa tanan kaninyo kinsa tigbuhat og mga kadaotan; paghinulsol, paghinulsol, kay ang Ginoong Dios ang namulong niini!” (Alma 5:32). Nagsangyaw siya ngadto kanila sa dugay nga panahon mahitungod sa ilang piho nga mga sala ug ang mga sangpotanan niini.
Gideon: Sila wala diha sa samang makasasala nga kahimtang sama sa katawhan sa Zarahemla. Gitudloan sila ni Alma sa paghinulsol isip usa ka paagi sa pagpakita og hugot nga pagtuo diha sa Manluluwas, pagdawat sa Iyang gahom, pag-andam alang sa Iyang pag-anhi, ug sa pag-andam sa paghimo og mga pakigsaad (tan-awa sa Alma 7:9–16).
Dangop ngadto sa Manluluwas
Zarahemla: Gitudlo ni Alma ang mahitungod ni Jesukristo isip “ang maayo nga magbalantay [kinsa] nagtawag kaninyo … sa iyang kaugalingon nga ngalan” (Alma 5:38). Gitudlo usab Niya ang mahitungod sa pag-anhi ni Jesukristo “sa pagkuha sa mga sala sa kalibotan, oo, ang mga sala sa matag tawo kinsa sa makanunayon mituo diha sa iyang ngalan” (Alma 5:48).
Gideon: Gipunting ni Alma ang “usa ka butang nga labaw ka mahinungdanon” kay sa bisan unsa pa: ang Manluluwas nga si Jesukristo ug ang Iyang misyon sa pagtubos sa katawhan (Alma 7:7).
Gitudlo ni Alma ang mahitungod sa daghang mga butang nga antuson sa Manluluwas alang kanato: “mga sakit ug mga kasakit ug mga pagtintal,” “mga balatian,” “kamatayon,” “mga kahuyang” (Alma 7:11–12). Ug gitudlo ni Alma ngano ang Manluluwas moantos niini nga mga butanga: “nga ang iyang kasingkasing mahimo nga mapuno uban sa kalooy, sumala sa unod, nga siya mahimo nga masayod sumala sa unod unsaon pagtabang [pag-abag o paghatag og kahupayan ngadto sa] iyang mga katawhan sumala sa ilang mga kahuyang,” ug “nga siya unta modala diha kaniya sa mga sala sa iyang mga katawhan, nga siya unta mopapas sa ilang mga kalapasan” (Alma 7:12–13).
Kini usa ka bililhon nga pagtulon-an. Giantos sa Manluluwas ang daghan kaayo nga mga butang aron Siya makabaton og hingpit nga kalooy alang kanato ug masayod kon unsaon sa pagtabang.
Makabaton Kita og Hingpit nga Kalipay
Kita makapakiglabot sa pagsangyaw ni Alma sa Zarahemla ug sa Gideon ngari kanato. Sama pananglitan:
-
Mahimo nga kita nanginahanglan nga makadungog og lainlaing mga mensahe sa lainlaing mga kahimtang sa atong mga kinabuhi.
-
Dili igsapayan hain kita karon sa espirituhanong paagi, kita sa kanunay makahimo sa pagduol pa ngadto sa Manluluwas, paghinulsol, ug pagkaplag og hingpit nga kalipay.
-
Kon kita andam sa espirituhanong paagi, makadawat kita og dugang pa sa pulong sa Dios, lakip ang bililhong mga kamatuoran nga nagtabang kanato sa pagpaduol pa ngadto sa Manluluwas.
Sa kataposan, si Alma adunay hingpit nga kalipay sa duha ka grupo nga mga tawo. Sa Zarahemla, “human makasinati sa daghan nga kasakit ug kasubo” (Alma 7:5), siya dihay hingpit nga kalipay tungod kay sila mihinulsol. Sa Gideon, siya dihay hingpit nga kalipay tungod kay nahibalo siya nga sila diha nay dakong hugot nga pagtuo sa mga pulong nga iyang gikatudlo kanila mahitungod sa Manluluwas (tan-awa sa Alma 7:17) ug mihatag og “hilabihan nga kakugi ug pagpaminaw” ngadto sa iyang mga pulong (Alma 7:26).
Sa sunod nga panahon nga ang mga sulugoon sa Ginoo mamulong nganha kaninyo, tingali kamo maghunahuna kabahin sa unsa nga matang sa mensahe kamo nagkinahanglan ug andam sa pagdawat.