Boits´epo Ponts´eng ea Molimo

Bana beso ba ratehang, ke motlotlo ho bua le lona kajeno sebokeng sena se akaretsang sa bohlokoa. Mahlo a ka a tsoelapele ho tsofala. Kea leboha ka kutloisiso ea lona ha ke fetisa molaetsa oa ka.

Re phela nakong ea mokoka o moholo ka Kerekeng ea Jesu Kreste ea Bahalaleli ba Mehla ea Kajeno. Ke tletse ka nyakallo ha ke bona tsoelopele libakeng tse ngata.

Ke khothatsoa hoholo ke bacha ba rona. Ba fana ka bosebeletsi ka lipalo tse holimo. Ba batlana le baholo-holo ba bona le ho etsa lits´ebeletso ka har´a tempele. Bahlankana le baroetsana ba rona ba kenya likopo tsa borumuoa lichabeng ka lipalo tse ngata. Moloko o holang o hola e le bats´ehetsi ba tiileng ba Jesu Kreste.

Haufinyane ke kopane le setloho-tloholoana se secha. Ha ke nahana ka hloko liqholotso tseo a tlang ho kopana le tsona bophelong ba hae, ke utloa ke na le takatso e kholo ea ho mo thusa ho aha tumelo ea hae ho Jesu Kreste Ho phela evangeli ea Hae ho bohlokoa bakeng sa thabo ea bokamoso ba hae.

Eena, joaloka e mong le e mong oa rona o tla kopana le liqholotso. Bohle re tla fihleloa ke bokuli, masoabi, teko, le tahlehelo. Liqholotso tsena li ka senya boits´epo ba rona. Leha ho le joalo, barutuoa ba Jesu Kreste ba na le phihlello ho boits´epo ba mofuta o fapaneng.

Ha re etsa le ho boloka lilekane le Molimo, re ka ba le boits´epo bo tlisoang ke Moea. Morena o boleletse Moporofeta Joseph Smith hore boits´epo ba rona bo ka “matlafala ponts´eng ea Molimo.” Nahana ka boiketlo ba ho ba le boits´epo ponts´eng ea Molimo!

Ha ke bua ka ho ba le boits´epo kapel´a Molimo, ke bua ka ho ba le boits´epo ba ho atamela Molimo hona joale! Ke bua ka ho rapela ka boits´epo hore Ntate ea Maholimong oa re utloa, hore o utloisisa litlhoko tsa rona ka tsela e molemo ho feta ea rona. Ke bua ka ho ba le boits´epo ba hore o re rata ho feta ka moo re ka utloisisang ka teng, hore o romella mangeloi a hae ho ba le rona le bao re ba ratang. Ke bua ka ho ba le boits´epo ba hore o labalabela ho thusa e mong le e mong oa rona hore re fihlele bokhoni ba rona bo phahameng.

Joale, re fumana boits´epo boo joang? Morena o araba potso ena ka mantsoe ana: “Etsang hore lipelo tsa lona … li tlale ka lerato le sebele ho batho bohle, … ´me etsang hore bokhabane bo khabise mehopolo ea lona kamehla; joale boits´epo ba lona bo tla matlafala ponts´eng ea Molimo.”

Senotlolo ke seo! Ka mantsoe a Morena ka bo eena, lerato la sebele le bokhabane li bula tsela ea ho ba le boits´epo kapel´a Molimo! Baena le likhaitseli, re ka etsa sena! Boits´epo ba rona ruri bo ka matlafala ponts´eng ea Molimo, hona joale!

Ha re nahaneng ka lerato la sebele le bokhabane.

Ea pele, lerato la sebele. Lilemo tse peli tse fetileng,ke ile ka bitsa ho rona, joaloka balateli ba selekane ba Jesu Kreste, ho ba babopi ba khotso. Ke pheta seo ke ileng sa se bolela nakong eo: “Bohale ha bo ahe. Bora ha bo ahe mang kapa mang. Khohlano ha e tlise tharollo e ahang.”

Lerato la sebele la ´nete ho batho bohle ke sehlohlolo sa ho ba babopii ba khotso! Ho bohlokoa hore re be le lerato la sebele lipuisanong tsa rona, ka bobeli sechabeng le lekunutung. Ke leboha ba ileng ba nkela keletso ea ka pelong. Empa re ntse re ka etsa ho feta.

Bora bo teng lipuisanong tsa sechaba le ho marang-rang a sechaba bo ea ts´osa. Mantsoe a lehloeo ke libetsa tse bolaeang. Khohlano e thibela Moea o Halalelang ho ba motsoalle oa rona oa kamehla.

Joaloka balateli ba Jesu Kreste, re lokela ho supa tsela re le bathehi ba khotso. Ha lerato la sebele e ba karolo ea tlhaho ea rona, re tla lahleheloa ke ts´usumetso ea ho nyenyefatsa ba bang. Re tla emisa ho ahlola ba bang. Re tla ba le lerato la sebele ho bohle ka mahlakore ´ohle a bophelo. Lerato la sebele ho batho bohle lea hlokahala ho tsoelopele ea rona. Lerato la sebele ke motheo oa sebopeho sa rona sa bomolimo.

Ha re kopeng Ntate ea Maholimong ho tlatsa lipelo tsa rona ka lerato la sebele le le ngata—haholo-holo bakeng sa bao ho leng thata ho ba rata—hobane lerato la sebele ke mpho e tsoang ho Ntate ea Maholimong bakeng sa balateli ba nete ba Jesu Kreste. Mopholosi ke Khosana ea Khotso. Re lokela ho ba lisebelisoa tsa Hae bakeng sa khotso.

Joale, ha re bueng ka bokhabane. Morena o re bolella ho khabisa mehopolo ea rona kamehla ka bokhabane. Nahana ka matla ao u tlang ho a fumana mohopolong o mong le o mong o motle ha u o matlafatsa ka bokhabane. Bokhabane bo etsa ntho e ´ngoe le e ´ngoe e be molemo ´me e thabe haholoanyane! Ka letsohong le leng, nahana ka se tlang ho etsahala ha u eketsa bokhabane mohopolong o sa hloekang, mohopolong o khopo, kapa mohopolong o nyahamisang. Bokhabane bo tla leleka eona meholopo eo. Bokhabane bo tla u lokolla mehopolong e ts´oenyang, e khathatsang.

Baena le likhaitseli, ha lefats´e le eketsa bokhopo haholo, re lokela ho eketsa ho hloeka haholo. Mehopolo ea rona, mantsoe, le liketso li hloka ho se fose ho ba bokhabane le ho tlala ka lerato la sebele la Jesu Kreste ho batho bohle. Monyetla o moholo kapel´a rona ke ho ba batho bao Molimo a hlokang hore re be bona.

Ho khumamela khafetsa ka tlung ea Morena ho eketsa bokhoni ba rona bakeng sa bokhabane le lerato la sebele. Ke joana, nako ka tempeleng e eketsang boits´epo ba rona kapel´a Morena. Nako e eketsehileng ka tempeleng e tla re lokisetsa Ho Tla Lekhetlo la Bobeli ha Morena le Mopholosi, Jesu Kreste. Ha re tsebe letsatsi kapa hora ea ho tla ha Hae. Empa kea tseba hore Morena o nts´usumetsa ho le kopa hore re itokisetse “letsatsi leo le leholo ´me le ts´abehang.”

Ha re batla ka mafolofolo ho ba le lerato la sebele le bokhabane li tlatse bophelong ba rona, boits´epo ba rona ba ho atamela Molimo bo tla eketseha. Ke le memela ho nka mehato e ikemiselitseng ho hola boits´epong ba lona ka pele ho Morena. Joale, ha re ea ho Ntat´a rona ea Maholimong ka boits´epo bo eketsehileng, re tla tlala ka nyakallo e ngata, ´me tumelo ea lona ho Jesu Kreste e tla eketseha. Re tla qala ho ba le matla a moea a fetang ts´epo ea rona e kholo.

Re lehoba Morena ka ho akofisa khaho ea litempele lilemong tsena. Ka tlas´a tataiso ea hae, kajeno re phatlalatsa merero ea ho aha tempele libakeng tsena tse 15 tse latelang:

• Reynosa, Mexico

• Chorrillos, Peru

• Rivera, Uruguay

• Campo Grande, Brazil

• Porto, Portugal

• Uyo, Nigeria

• San Jose del Monte, Philippines

• Nouméa, New Caledonia

• Liverpool, Australia

• Caldwell, Idaho

• Flagstaff, Arizona

• Rapid City, South Dakota

• Greenville, South Carolina

• Norfolk, Virginia

• Spanish Fork, Utah

Ke paka hore Jesu Kreste, Molopolli oa Iseraele, o eteletse pele ena, kereke ea hae. O ntse a itokisetsa ho tla hape. A re ke re itokisetseng ka ho ts´oana ho mo amohela. Ka tsena ke rapela ka lebitso la Jesu Kreste, amen.