Panagtalek iti Imatang ti Dios

Patpatgek a kakabsatko, agyamanak a makasaritaak kadakayo ita iti daytoy napateg a sapasap a komperensia. Agtultuloy a kumudrepen dagiti matak. Agyamanak kadakayo iti pannakaawatyo bayat ti panangtedko iti mensahek.

Agbibiagtayo iti aldaw nga adda napintas a momentum iti Ti Simbaan ni Jesucristo dagiti Santo iti Ud-udina nga Aldaw. Maragsakanak unay ti pannakakitak iti panagdur-as iti nakaad-adu a lugar.

Nangnangruna a naparegtaak kadagiti agtutubo. Nakaad-adu kadakuada ti mangmangted iti serbisio. Sapsapulenda dagiti kapuonanda ken ar-aramidenda dagiti ordinansa iti templo. Adu kadagiti agtutubotayo a lallaki ken babbai ti agisumsumite kadagiti aplikasion para iti serbisio kas misionario. Ti tumantanor a kaputotan ket agbalinen a natitibker a pasurot ni Jesucristo.

Itay nabiit nakitak ti maysa a baro nga apokok iti tumeng. No panunotek dagiti karit a mapasaranna iti biagna, mariknak ti dakkel a tarigagay a tumulong kenkuana a maaddaan iti pammati ken ni Jesucristo. Napateg ti panagbiagna iti ebanghelio iti masakbayan a ragsakna.

Kas kadatayo, maipasango isuna kadagiti karit. Mapasarantayto ti amin ti sakit, pannakaupay, pannulisog, ken pannakapukaw. Mabalin a parmeken dagitoy a karit ti panagtalek iti bagitayo. Nupay kasta, addaan dagiti disipulo ni Jesucristo iti sabali a kita ti panagtalek.

No agaramid ken agtungpaltayo kadagiti katulagan iti Dios, mabalintayo ti maaddaan iti panagtalek a naggapu iti Espiritu. Imbaga ti Apo ken ni Propeta Joseph Smith a ti panagtalektayo ket mabalin a “mapapigsa iti imatang ti Dios.” Panunoten ti liwliwa ti kaadda ti panagtalek iti imatang ti Dios!

No isaritak ti kaadda ti panagtalek iti sanguanan ti Dios, ibasbasarko ti kaadda ti panagtalek nga umasideg iti Dios ita met laeng! Ibasbasarko ti panagkararag nga addaan iti panagtalek a denggennatayo ti Nailangitan nga Ama, nga ad-adda a maawatanna dagiti kasapulantayo ngem datayo. Ibasbasarko ti kaadda ti panagtalek nga ay-ayatennatayo nga ad-adda ngem iti maawatantayo, nga ibaonna dagiti anghel a makikadua kadatayo ken kadagiti ay-ayatentayo. Ibasbasarko ti kaadda ti panagtalek a tarigagayanna a tulongan ti tunggal maysa kadatayo a mangragpat iti kangatuan a potensialtayo.

Ita, kasano a magun-odtayo ti kasta a panagtalek? Sungbatan ti Apo daytoy a saludsod babaen kadagitoy a balikas: “Mapno koma met ti lalaemmo iti kinamanangngaasi kadagiti amin a tao, … taraonan koma ti saguday ti pampanunotmo nga awan ressatna; sa kalpasanna mapapigsa ti panagtalekmo iti imatang ti Dios.”

Adda dita ti tulbek! Iti bukod a balikas ti Apo, ti kinamanangngaasi ken kinasaguday ti manglukat iti dalan tapno maaddaan iti panagtalek iti imatang ti Dios! Kakabsat, maaramidtayo daytoy! Mapapigsa ti panagtalektayo iti imatang ti Dios, ita met laeng!

Ibilangtayo koma ti agpada a kinamanangngaasi ken kinasaguday.

Umuna, kinamanangngaasi. Dua a tawenen ti napalabas, inawagannakami, kas natulagan a pasurot ni Jesucristo, tapno agbalin a mamagkappia. Ulitek ti insaok idi: “Saan iti kaano man a mangallukoy ti pungtot. Saan a mangpapigsa iti asino man ti ibubusor. Di kaano man mangiturong ti panagsusupiat kadagiti naparegta a pangrisut.”

Ti pudno a kinamanangngaasi iti amin a tattao ti pakabigbigan dagiti mamagkappia! Nasken unay nga addaantayo iti panangngaasi iti panagsaritatayo, agpadpada iti publiko ken pribado. Agyamanak kadakayo a nangipapuso iti immun-una a balakadko. Ngem makaaramidtayo pay laeng iti nasaysayaat.

Makapadanag ti agdama nga ibubusor iti public dialogue ken iti social media. Dagiti makapagura a balikas ket makapapatay nga igam. Ti panagsusupanget ti manglapped iti Espiritu Santo a kanayon a mangkadkadua kadatayo.

Kas pasurot ni Jesucristo, nasken a datayo ti mangiturong iti dalan kas mamagkappia. Bayat ti panagbalin a paset ti kinataotayo ti kinamanangngaasi, mapukawtayo ti tarigagay a mangtagibassit kadagiti dadduma. Isardengtayo ti pananghusga kadagiti dadduma. Addaantayo iti kinamanangngaasi kadagidiay naggapu iti amin a benneg ti panagbiag. Kasapulan iti panagdur-astayo ti kinamanangngaasi iti amin a tattao. Ti kinamanangngaasi ti pundasion ti maysa a nadiosan a kababalin.

Agpakaasitayo iti Nailangitan nga Amatayo a mangpunno iti puspusotayo iti dakdakkel a kinamanangngaasi—nangruna kadagiti narigat nga ayaten—ta ti kinamanangngaasi ket sagut manipud iti Nailangitan nga Amatayo para kadagiti pudno a pasurot ni Jesucristo. Ti Mangisalakan ti Prinsipe ti Kappia. Nasken a datayo ti agbalin a ramit para iti kappia.

Ita, agsaritatayo maipapan iti saguday. Ibaga ti Apo kadatayo a taraonan koma ti saguday ti pampanunottayo a di agressat . Panunotenyo ti pannakapadur-as a maawatyo iti aniaman a positibo a panunot no pasayaatenyo daytoy iti saguday. Ti saguday pagbalinenna a nasaysayaat ken naragragsak ti amin a banag! Iti sabali a bangir, panunotenyo no anianto ti mapasamak no inayonyo ti saguday iti saan a natarnaw a kapanunotan, naulpit a kapanunotan, wenno makapaupay a kapanunotan. Ti saguday ti mangpatalaw kadagita a pampanunot. Ti saguday ti mangwayawaya kadakayo manipud kadagiti madandanagan ken mariribukan a pampanunot.

Kakabsat, bayat ti panagadu ti kinadangkes iti lubong, kasapulan nga ad-adda ti pannakapatarnawtayo. Kasapulan a dagiti pampanunot, balikas, ken tignaytayo nga agtultuloy a nasagudayan ken napnuan iti natarnaw nga ayat ni Jesucristo iti amin a tattao. Ti dakkel a gundaway iti sanguanantayo ket agbalintayo a tattao a kasapulan ti Dios a pagbalinantayo.

Ti masansan a panagdayaw iti balay ti Apo ti mangpadakkel iti kabaelantayo para iti agpada a saguday ken kinamanangngaasi. Gapuna, ti orastayo iti templo ti mangpadakkel iti panagtalektayo iti sanguanan ti Apo. Ti ad-adu nga oras iti templo ti mangtulongto kadatayo nga agsagana para iti Maikadua a Yaay ti Mangisalakantayo, ni Jesucristo. Ditayo ammo ti aldaw wenno oras ti yaayna. Ngem ammok a gutugotennak ti Apo a mangidagadag kadatayo nga agsagana para iti dayta “naindaklan ken nakabutbuteng nga aldaw.”

Bayat ti sipapasnek a panagkalikagumtayo a maaddaan iti kinamanangngaasi ken kinaimbag a mangpunno iti biagtayo, dumakkel ti panagtalektayo nga umasideg iti Dios. Awisenkayo nga agaramid kadagiti naipanggep nga addang a mangpadur-as iti panagtalekyo iti sanguanan ti Apo. Kalpasanna, bayat ti panagturongtayo iti Nailangitan nga Amatayo nga addaan iti umad-adu a panagtalek, mapnotayo iti ad-adu a rag-o, ket dumakkel ti pammatiyo ken ni Jesucristo. Mangrugin a mapasarantayo ti naespirituan a bileg a mangrimbaw kadagiti kadakkelan a namnamatayo.

Agyamantayo iti Apo gapu iti napartak a panagbangon iti templo kadagiti napalabas a tawen. Iti babaen ti panangiturongna, ipakaammomi itan dagiti plano a mangipatakder iti templo iti tunggal maysa kadagitoy a 15 a lokasion:

• Reynosa, Mexico

• Chorrillos, Peru

• Rivera, Uruguay

• Campo Grande, Brazil

• Porto, Portugal

• Uyo, Nigeria

• San Jose del Monte, Philippines

• Nouméa, New Caledonia

• Liverpool, Australia

• Caldwell, Idaho

• Flagstaff, Arizona

• Rapid City, South Dakota

• Greenville, South Carolina

• Norfolk, Virginia

• Spanish Fork, Utah

Paneknekak a ni Jesucristo, ti Mannubbot ti Israel, ti mangidaulo iti daytoy, ti Simbaanna. Agsagsagana nga umayto Isuna manen. Kasta met a mabalintayo ti agsagana nga umawat Kenkuana. Ikararagko daytoy iti nagan ni Jesucristo, amen.