Dagiti Nadiosan a Tulong para iti Mortalidad

Babaen ken ni Propeta Joseph Smith, impalgak ti Apo ti sumagmamano a banag maipapan iti biagtayo sakbay daytoy a biag. Addatayo sadiay idin kas espiritu nga annak ti Dios. Gapu ta tinarigagayan ti Dios a tulongan dagiti annakna a dumur-as, inkeddengna ti mangparsua iti daga a mabalintayo a pangawatan iti bagi, masursuruan babaen iti padas, mangpadur-as kadagiti nadiosan a kababalin, ken masubok a mangkita no tungpalentayo dagiti bilin ti Dios. Dagiti maikari “addanto gloria a mainayon iti uloda iti agnanayon nga awan inggana (Abraham 3:26).

Tapno maipasdek dagiti kasasaad daytoy nadiosan a plano, pinili ti Dios ti Bugbugtong nga Anakna nga agbalin a Mangisalakantayo. Ni Lucifer, a ti naisingasing nga alternatibona ket mangdadael iti kinawaya a panagpili ti tao, nagbalin a Satanas ket “napagtalaw.” Gapu ta napapanaw ditoy daga ken napagkedkedan iti pribilehio ti mortal a biag, napalubosan ni Satanas a mangpadas, a mangallilaw ken mangbulsek kadagiti tao, ken mangitunda kadakuada a balud iti pagayatanna, a kas iti kaadu dagiti saan a dumngeg iti timek ti [Dios]” (Moises 4:4).

Napateg iti naindaklan a plano ti Dios para iti mortal a panagdur-as dagiti annakna ket ti pannakapadasda iti “pagsusupadian iti amin a banag” (2 Nephi 2:11). No kasano a saan a mapadakkel wenno mapagtalinaed dagiti pisikal a piskeltayo a saan a bumusor iti linteg ti grabidad (law of gravity), kasta met nga agkasapulan ti mortal a panagdur-as a sarangtentayo dagiti pannulisog ni Satanas ken ti dadduma pay a pagsusupadian ditoy a biag. Ti kapatgan para iti naespirituan a panagdur-as ket ti panagkasapulan a mangpili iti nagbaetan ti naimbag ken dakes. Dagidiay agpili iti naimbag ket dumur-asda nga agturong iti agnanayon a pagtungpalanda. Dagidiay mangpili iti dakes—kas iti aramiden ti amin iti nadumaduma a sulisog ti mortalidad—ket kasapulanda ti pangisalakan a tulong, a pinanggep nga ipaay ti naayat a Dios.

No kaskasano, ti kapigsaan a tulong ti Dios ditoy a biag ket ti panangipaayna iti maysa a Mangisalakan, ni Jesucristo, nga isu ti agsagaba tapno mangsubbot ken mangipaay iti pammakawan kadagiti napagbabawyan a basol. Dayta naasi ken nadayag a Pannubbot ti mangilawlawag no apay a ti pammati ken ni Apo Jesucristo ti umuna a pagbatayan ti ebanghelio. Ti Pannubbotna ti “mangipatungpal iti panagungar dagiti natay” (Alma 42:23), ken daytoy ti “mangsubbot iti basbasol ti lubong” (Alma 34:8), a mangpumpunas kadagiti amin a napagbabawyan a basoltayo ken mangmangted iti pannakabalin iti Mangisalakantayo a tumulong kadatayo kadagiti kinakapuytayo ditoy a biag.

Iti labes dayta nadayag a panangpunas kadagiti basol a naaramid ken pannakapakawan, ti plano ti naayat nga Ama idiay Langit ti mangipaay iti adu a dadduma pay a sagut a mangsalaknib kadatayo, agraman ti panangsalaknibna kadatayo manipud panagbasol iti umuna a gundaway. Ti biagtayo ditoy daga ket kanayon a mangrugi iti maysa nga ama ken maysa nga ina. Kasayaatanna, agpada nga addada, nga addaan iti nagduduma a sagut a mangiwanwan iti panagdur-astayo. No saan, ti kaawanda ket paset ti pagsusupadian a masapul a parmekentayo.

Ipaay ti plano ti Nailangitan nga Amatayo dagiti dadduma pay a tulong a mangiwanwan kadatayo kadagiti panagdaliasattayo ditoy a biag. Saritaek ti uppat kadagitoy. Dakamatekto saan laeng nga uppat, gapu ta agkakadua dagitoy a tulong. Kasta met, nga adda dagiti dadduma pay a proteksion a napnuan iti asi kas pangnayon kadagitoy.

Umuna, saritaek ti Lawag wenno Espiritu ni Cristo. Iti naindaklan a pannursurona iti libro ni Moroni, inadaw ni Moroni ti amana a “naited ti Espiritu ni Cristo iti tunggal tao, tapno maammuanna ti nasayaat manipud iti dakes” (Moroni 7:16). Mabasatayo daytoy met laeng a pannursuro kadagiti agdama a paltiing:

“Ket ikkan ti Espiritu iti silaw ti tunggal tao nga umay iti lubong; ket lawlawagan ti Espiritu ti tunggal tao babaen ti lubong, a dumngeg iti timek ti Espiritu” (Doktrina ken Katulagan 84:46).

Manen: “Ta naibaon ti Espirituk iti lubong a mangliwliwa kadagiti napakumbaba ken napnuan babawi, ken ti pannakadusa dagiti saan a nadiosan” (Doktrina ken Katulagan 136:33).

Inlawlawag ni Presidente Joseph Fielding Smith dagitoy a nasantuan a kasuratan: “Saan a binaybay-an ti Apo dagiti tao (no mayanakda iti daytoy a lubong) nga awan gawayda, a mangsapsaplit a mangsapul iti lawag ken kinapudno, ngem tunggal tao … ket nayanak nga addaan karbengan nga umawat iti pannarabay, ti pannursuro, ti balakad ti Espiritu ni Cristo, wenno Silaw ti Kinapudno.”

Ti maikadua kadagiti naindaklan a tulong nga inted ti Apo tapno matulongannatayo a mangpili no ania ti umno ket maysa a bunggoy dagiti nadiosan a direksion kadagiti nasantuan a kasuratan kas paset ti plano ti pannakaisalakan (plano ti ragsak). Dagitoy a panangiturong ket dagiti bilin, ordinansa, ken katulagan.

Dagiti bilin ti mangilawlawag iti kapapanan ti dalan nga inlasin ti Nailangitan nga Amatayo para kadatayo tapno dumur-as nga agturong iti biag nga agnanayon. Dagiti tao a mangiladawan kadagiti bilin kas wagas a panangikeddeng ti Dios no siasino ti dusaenda ket mapaay a makaawat iti daytoy a panggep ti naayat a plano ti Dios iti ragsak. Iti dayta a dana, in-inut a maragpattayo ti kasapulan a relasion iti Mangisalakantayo ken kualipikado para iti panagadu ti pannakabalinna a tumulong kadatayo iti dalantayo nga agturong iti pagtungpalan a tarigagayanna para kadatayo amin. Tarigagayan ti Nailangitan nga Amatayo nga agsubli amin dagiti annakna iti celestial a pagarian, a pagnanaedan ti Dios ken ti Mangisalakantayo, ken maaddaan iti kita ti biag dagidiay nga agnanaed iti dayta celestial a dayag.

Dagiti ordinansa ken katulagan ket paset ti linteg a mangilawlawag iti kaipapanan ti dana nga agturong iti biag nga agnanayon. Dagiti ordinansa, ken dagiti sagrado a katulagan nga aramidentayo iti Dios babaen kadagitoy, ket kasapulan nga addang ken nasken a guardrail iti dayta a dana. Kayatko a panunoten ti akem dagiti katulagan a kas mangipakita nga iti babaen ti plano ti Dios, maited dagiti kangatuan a bendisionna kadagidiay mangikari a nasaksakbay a mangtungpal iti sumagmamano a bilin ken mangtungpal kadagita a kari.

Dagiti dadduma pay a tulong nga inted ti Dios para iti panangaramid kadagiti umno a pili ket dagiti pannakaiparangarang ti Espiritu Santo. Ti Espiritu Santo ti maikatlo a miembro ti Kinadios. Ti trabahona, a nailawlawag iti nasantuan a kasuratan, ket ti mangpaneknek iti Ama ken Anak, mangisuro kadatayo, mangyeg iti amin a banag iti pakalaglagipantayo, ken mangiwanwan kadatayo iti amin a kinapudno. Iraman dagiti nasantuan a kasuratan ti adu a panangiladawan kadagiti pannakaiparangarang ti Espiritu Santo, kas iti naespirituan a saksi a kas sungbat iti panagsaludsod maipapan iti kinapudno ti Libro ni Mormon. Ti maysa a pannakaiparangarang ket saan a pannakatikaw iti sagut ti Espiritu Santo, a maited kalpasan ti panagbuniag.

Maysa kadagiti kapatgan a tulong ti Dios para kadagiti napudno nga annakna ket ti sagut ti Espiritu Santo. Nabatad ti kinapateg daytoy a sagut iti kinapudno a pormal a maited kalpasan ti panagbabawi ken panagbuniag babaen ti danum, “ket kalpasanna [ilawlawag dagiti nasantuan a kasuratan] umay ti pannakapakawan dagiti basolyo babaen ti apuy ken babaen ti Espiritu Santo” (2 Nephi 31:17). Dagiti tao nga addaan iti daytoy a pannakapakawan dagiti basol—ket kalpasanna regular a mangpabaro iti pannakadalusda babaen ti inaldaw a panagbabawi ken panagbiag a maibatay kadagiti katulagan nga aramidenda babaen ti ordinansa ti sakramento—ket kualipikado para iti kari a ti Espiritu Santo, ti Espiritu ti Apo, “kanayon koma … a kaduada” .(Doktrina ken Katulagan 20:77).

Gapuna, insuro ni Presidente Joseph F. Smith a ti Espiritu Santo ket “lawlawagannanto ti pampanunot dagiti tao maipanggep kadagiti banag ti Dios, tapno kombinsirenna ida iti panawen ti kombersionda nga inaramidda ti pagayatan ti Ama, ken agbalinda kadakuada a manayon a pammaneknek iti panagbiag, nga agtignay a kas ti sigurado ken natalged a mangiwanwan iti amin a kinapudno ken punnuenna ida iti inaldaw iti rag-o ken ragsak, nga addaan iti disposision nga agaramid iti naimbag iti amin a tattao, nga agsagaba iti biddut imbes nga agaramid iti biddut, nga agbalin a naasi ken manangngaasi, naunday ti panagsagaba ken managparabur. Amin nga addaan iti daytoy di mabilang a sagut, daytoy a perlas a kapatgan, addaan iti agtultuloy a pannakawaw iti kinalinteg. No awan ti tulong ti Espiritu Santo,” inggibus ni Presidente Smith, “awan ti mortal a makapagna iti nalinteg ken akikid a dalan.”

Gapu iti adu a nabileg a tulong a mangiwanwan kadatayo kadagiti mortal a panagdaliasattayo, makapaupay ta nakaad-adu ti agtalinaed a saan pay a nakasagana para iti naituding a panagkitada iti Mangisalakan ken Mannubbottayo, ni Jesucristo. Ti pangngarigna maipapan kadagiti sangapulo a babbalasang, a masansan unay a naisarita iti daytoy a komperensia, isingasingna a kadagidiay naawis a mangsabat Kenkuana, kaguduanto laeng ti maisagana.

Ammotayo amin dagiti pagarigan dagiti saan a nakasagana: dagiti nagsubli a misionario a nangipawil iti naespirituan a panagdur-asda babaen kadagiti panawen ti saan a panagaktibo, dagiti agtutubo a nangpapeggad iti naespirituan a panagdur-asda babaen ti panangisina iti bagbagida manipud kadagiti pannursuro ken aktibidad ti Simbaan, dagiti lallaki a nangitantan iti pannakaordenda iti Melchizedek Priesthood, lallaki ken babbai—no dadduma ti kaputotan pay dagiti natan-ok a pioneer wenno maikari a nagannak—a pimmanaw iti dana ti katulagan a saan nga agar-aramid ken agtungtungpal kadagiti katulagan iti nasantuan a templo.

Adu kadagiti kasta a panagsisina ti mapasamak no mapaay dagiti miembro a mangsurot iti kangrunaan a naespirituan a plano ti panangpatalinaed iti bukod a kararag, regular a panagadal iti nasantuan a kasuratan, ken masansan a panagbabawi. Iti kasupadina, baybay-an ti dadduma ti linawas a pannakapabaro dagiti katulagan babaen ti saan a pannakiranud iti sakramento. Kuna ti dadduma a saan a mapennek ti Simbaan dagiti kasapulanda; dagidiay mangisukat no ania ti madlawda a kasapulanda iti masakbayan nga umun-una ngem iti no ania ti impaay ti Apo iti adu a pannursurona ken gundaway para iti napateg a panagserbitayo kadagiti dadduma.

Ti kinapakumbaba ken panagtalek iti Apo ti remedio kadagiti kasta a pannakaisina. Kas iti isuro ti Libro ni Mormon, “bendisionan ken pagrang-ayen ti Apo dagiti agtalek kenkuana” (Helaman 12:1). Ti panagtalek iti Apo ket maysa a partikular a kasapulan para kadagiti amin a di umisu a mangrukod kadagiti bilin ti Dios ken dagiti pannursuro dagiti propetana a maisuppiat kadagiti kaudian a takuat ken sirib ti tao.

Insaritak maipapan iti adu a tulong ditoy a biag nga inted ti managayat nga Amatayo idiay Langit a mangtulong kadagiti annakna nga agsubli Kenkuana. Ti pasettayo iti daytoy nadiosan a plano ket agtalek ken agkalikagum a manggun-od ken mangusar kadagitoy nadiosan a tulong, nangnangruna unay ti Pannubbot ti Patpatgenna nga Anak, ti Mangisalakan ken Mannubbottayo, ni Jesucristo. Ikararagko nga isurotayo ken agbiagtayonto kadagitoy a pagbatayan, iti nagan ni Jesucristo, amen.