Kompiansa sa Presensya sang Dios

Mahal kong mga kauturan, nagapasalamat ako nga makahambal sa inyo karon nga adlaw sa sining importante nga pangkabilogan nga komperensya. Ang akon mga mata padayon nga nagatigulang. Salamat sa inyo pag-intiendi samtang ginahatag ko ang akon mensahe.

Nagakabuhi kita sa panahon sang daku kaayo nga buylo sa Ang Simbahan ni Jesucristo sang mga Santos sa Ulihing mga Adlaw. Puno ako sang kalipay nga makita ang pag-uswag sa tuman kadamo nga bahin.

Labi gid ako nga nainspirar sang aton mga lamharon. Nagaserbisyo sila sa daku nga kadamuon. Ginapangita nila ang ila mga katigulangan kag nagahikot sang mga ordinansa sa templo. Pinakataas sa karon ang ginasumite nga mga aplikasyon para sa pangmisyonero nga pagserbisyo sang aton lamharon nga mga lalaki kag mga babayi. Ang mga ulihing tubo nagatindog bilang mabakod nga mga sumulunod ni Jesucristo.

Sang sini lang nakita ko ang akon bag-o nga apo-sa-tuhod. Kon pamensaron ko ang mga hangkat nga iya maagyan sa iya kabuhi, gusto ko gid nga buligan sia nga pabakuron ang iya pagtuo kay Jesucristo. Ang pagpangabuhi sang Iya ebanghelyo importante gid para sa iya palaabuton nga kalipayan.

Pareho sa kada isa sa aton, magapangatubang sia sang mga kabudlayan. Maagyan naton tanan ang balatian, kapaslawan, tentasyon kag kawad-an. Ining mga kabudlayan makapaluya sang aton kompiansa-sa-kaugalingon. Pero, ang mga disipulo ni Jesucristo makabaton sang lain nga klase sang kompiansa.

Kon nagahimo kag nagatuman kita sang mga kasugtanan sa Dios, may kompiansa kita nga gin-inspirar sang Espiritu. Ginhambalan sang Ginuo si Joseph Smith nga ang aton kompiansa sarang “[magbakod] sa presensya sang Dios.” Pamensara ang kasulhay sang pag-angkon sang kompiansa sa presensya sang Dios!

Kon maghambal ako parte sa pag-angkon sang kompiansa sa atubang sang Dios, nagatumod ako sa pag-angkon sang kompiansa nga magpalapit sa Dios subong mismo! Nagatumod ako sa pagpangamuyo nga may kompiansa nga ang Amay nga Langitnon makabati sa aton, nga maintiendihan Niya ang aton mga panginahanglan sing labi pa sangsa aton. Nagatumod ako sa kompiansa nga palangga Niya kita sing labaw pa sangsa aton mahangpan, nga nagapadala Sia sang mga anghel nga mag-upod sa aton kag sa aton mga pinalangga. Nagatumod ako sa pag-angkon sang kompiansa nga luyag Niya nga buligan ang tagsa sa aton nga malab-ot ang aton pinakadaku nga potensyal.

Karon, paano naton maangkon inang kompiansa? Ginasabat sang Ginuo ining pamangkot sa sining mga pulong: “Pun-a ang imo tagipusuon … sang putli nga paghigugma para sa tanan nga tawo, … kag adornohi sang pagkamatarong ang imo mga panghunahuna sing wala’y untat; dayon ang imo pagsalig magabakod sa presensya sang Dios.”

Ina ang yabi! Sa pulong mismo sang Ginuo, ang putli nga paghigugma kag pagkamatarong nagabukas sang alagyan sa pag-angkon sang kompiansa sa atubang sang Dios! Mga kauturan, sarang naton ini mahimo! Ang aton kompiansa matuod gid nga magabakod sa presensya sang Dios, subong mismo!

Binagbinagon naton ang putli nga paghigugma kag pagkamatarong.

Una, putli nga paghigugma. Duha ka tuig ang nagligad, nanawagan ako sa aton, bilang mga sumulunod sa kasugtanan ni Jesucristo, nga mangin mga makigdaeton. Ginasulit ko ang ginsiling ko sadto: “Ang kaakig wala gid nagakumbinsi. Ang kaawayon wala nagabulig sa bisan kay sin-o. Ang pagbinaisay wala nagadala sang inspirado nga mga solusyon.”

Ang tunay nga putli nga paghigugma sa tanan nga tawo tanda sang mga makigdaeton! Importante gid nga may putli kita nga paghigugma sa aton mga pagpakigsugilanon kag sa aton paghambal parte sa iban nga tawo, pareho sa publiko kag pribado. Nagapasalamat ako sa inyo nga nagsunod sang akon laygay sang nagligad. Pero sarang kita maghimo sing mas maayo.

Ang sa karon nga kaawayon sa publiko nga mga paghinambalanay kag sa social media makapahangawa. Ang paghambal sang malain seryoso nga makasakit sa tawo sa emosyonal kag sa kaisipan. Ang pagbinaisay nagapugong sa Balaan nga Espiritu nga mangin dalayon naton nga kaupod.

Bilang mga sumulunod ni Jesucristo, dapat kita magpanguna bilang mga makigdaeton. Kon ang putli nga paghigugma kabahin sang aton kinaiya, madula naton ang huyog nga pakanubuon ang iban. Mauntat kita sa paghusga sa iban. Makaangkon kita sang putli nga paghigugma para sa tanan ano man ang estado nila sa kabuhi. Ang putli nga paghigugma para sa tanan nga tawo kinahanglanon para sa aton pag-uswag. Ang putli nga paghigugma pundasyon sang diosnon nga kinaugali.

Pangabayon naton ang aton Amay nga Langitnon nga pun-on ang aton mga tagipusuon sing mas daku pa gid nga putli nga paghigugma—labi na gid para sa mga mabudlay palanggaon—kay ang putli nga paghigugma regalo halin sa aton Amay nga Langitnon para sa tunay nga mga sumulunod ni Jesucristo. Ang Manluluwas Prinsipe sang Paghidaet. Dapat kita mangin Iya mga instrumento para sa paghidaet.

Karon, hambalan naton ang pagkamatarong. Ginahambalan kita sang Ginuo nga adornohan ang aton mga panghunahuna sang pagkamatarong sing wala untat. Pensara ang kusog nga imo mabaton sa bisan ano nga positibo nga panghunahuna kon mas panamion mo ini paagi sa pagkamatarong. Ang pagkamatarong nagahimo sang tanan nga mas manami kag mas makalilipay! Sa pihak nga bahin, pensara kon ano ang matabo kon idugang mo ang kaayo sa mahigko nga panghunahuna, mapintas nga panghunahuna, ukon masubo nga panghunahuna. Ang pagkamatarong magatabog sinang mga panghunahuna. Ang pagkamatarong magahilway sa inyo sa mahinadlokon, magamo nga mga hunahuna.

Mga kauturan, samtang ang kalibutan nagadugang sa kalainan, kinahanglan naton nga mangin mas matinlo. Ang aton mga hunahuna, mga buhat, kag mga ginahimo kinahanglan padayon nga mangin matarong kag puno sang putli nga gugma ni Jesucristo para sa tanan nga tawo. Ang daku nga oportunidad sa atubang naton amo nga mangin ang katawhan nga kinahanglan sang Dios nga dapat kita mangin.

Ang regular nga pagsimba sa balay sang Ginuo nagapadugang sang aton kapasidad para sa pagkamatarong kag putli nga paghigugma. Gani, ang tion sa templo nagapadugang sang aton kompiansa sa atubang sang Ginuo. Ang mas daku nga tion sa templo magabulig sa aton nga maghanda para sa Ika-duha nga Pagkari sang aton Manluluwas, si Jesucristo. Wala kita kahibalo sang adlaw ukon oras sang Iya pag-abot. Pero kahibalo ako nga ang Ginuo nagatulod sa akon nga kumbinsihon kamo nga maghanda para sinang “daku kag makahaladlok nga adlaw.”

Sa aton matutom nga pagtinguha nga pun-on ang aton mga kabuhi sang putli nga gugma kag pagkamatarong, ang aton kompiansa nga magpalapit sa Dios magadugang. Ginaagda ko kamo nga maghimo sang hungod nga mga tikang para magtubo ang inyo kompiansa sa atubang sang Ginuo. Dayon, sa pagpalapit naton sa Amay nga Langitnon nga may mas daku nga kompiansa, mapuno kita sang kalipay, kag ang inyo pagtuo kay Jesucristo magadugang. Magasugod nga matilawan naton ang espirituhanon nga gahum nga masobra sangsa aton pinakadaku nga mga handum.

Nagapasalamat kita sa Ginuo sa pagpadasig sang pagpatindog sang mga templo sa sining nagligad lang nga tinuig. Sa Iya direksyon, ginaanunsyo namon subong ang mga plano nga magpatindog sang templo sa tagsa sining 15 ka lokasyon:

• Reynosa, Mexico

• Chorrillos, Peru

• Rivera, Uruguay

• Campo Grande, Brazil

• Porto, Portugal

• Uyo, Nigeria

• San Jose del Monte, Philippines

• Nouméa, New Caledonia

• Liverpool, Australia

• Caldwell, Idaho

• Flagstaff, Arizona

• Rapid City, South Dakota

• Greenville, South Carolina

• Norfolk, Virginia

• Spanish Fork, Utah

Nagapamatuod ako nga si Jesucristo, ang Manunubos sang Israel, nagapanguna sa sini, ang Iya Simbahan. Nagapreparar Sia nga magkari liwat. Kabay nga kita man magpreparar nga batunon Sia. Nagapangamuyo ako para sini sa ngalan ni Jesucristo, amen.