Diosnon nga Bulig para sa Sini nga Kabuhi

Paagi sa Propeta nga si Joseph Smith, ang Ginuo nagpahayag sang pila ka butang parte sa kabuhi antes sa duta. Didto nagkabuhi kita bilang espiritu nga mga anak sang Dios. Tungod gusto sang Dios nga buligan ang Iya mga anak nga mag-uswag, nagdesisyon Sia nga magtuga sang kalibutan sa diin makabaton kita sang lawas, makatuon paagi sa inagihan, makapatubo sang diosnon nga mga kinaiya, kag matilawan para mahibal-an kon tumanon naton ang mga kasugoan sang Dios. Ang mga kalipikado “pagadugangan sang himaya sa ila mga ulo tubtob sa wala’y katapusan” (Abraham 3:26).

Para ipahamtang ang mga kondisyon sining diosnon nga plano, ginpili sang Dios ang Iya Bugtong nga Anak nga mangin aton Manluluwas. Si Lucifer, nga ang gintanyag nga alternatibo magaguba sang kahilwayan sang tawo sa pagpili, nangin si Satanas kag “gintabog.” Gintapok sa duta kag wala ginhatagan sang prebilihiyo sang mortal nga kabuhi, si Satanas gintugotan nga tilawan nga “[patalangon] kag [bulagon] ang mga tawo, kag dal-on sila sa pagkaulipon sa iya pagbuot, bisan pa ang tanan nga indi magpamati sa tingug [sang Dios]” (Moises 4:4).

Importante sa daku nga plano sang Dios para sa pag-uswag sang Iya mga anak sa sini nga kabuhi amo nga maeksperiyensiahan nila ang “pamatok sa tanan nga butang” (2 Nefi 2:11). Pareho nga ang aton pisikal nga mga maskulo indi magtubo ukon mamentinar nga wala nagapamuwersa batok sa law of gravity, sa amo man ang pagtubo sa sini nga kabuhi nagapangayo nga magpamuwersa kita batok sa mga tentasyon ni Satanas kag iban pa nga mga pamatok sa kabuhi. Labing importante para sa espirituhanon nga pag-uswag amo ang kakinahanglanon nga magpili sa maayo kag malain. Ang mga nagapili sang maayo nagauswag pakadto sa ila wala katapusan nga kapalaran. Ang mga nagapili sang malain—nga amo ang himuon sang kada isa sa lainlain nga mga tentasyon sa sini nga kabuhi—magakinahanglan sang nagaluwas nga bulig, nga ang mapinalanggaon nga Dios nagdisenyo nga ihatag.

Wala sing duda, ang pinakadaku nga bulig sang Dios sa sini nga kabuhi amo ang Iya pag-aman sang Manluluwas, si Jesucristo nga nag-antos para bayaran ang bili kag maghatag sang kapatawaran sa ginhinulsulan nga mga sala. Inang maluluy-on kag mahimayaon nga Pagbayad-Sala nagapaathag kon ngaa ang pagtuo kay Jesucristo amo ang una nga prinsipyo sang ebanghelyo. Ang Iya Pagbayad-Sala “nagapahanabo sang pagkabanhaw sang mga minatay” (Alma 42:23), kag ini “nagabayad para sa mga sala sang kalibutan” (Alma 34:8), nga nagapanas sang tanan nga nahinulsulan naton nga mga sala kag nagahatag sa aton Manluluwas sang gahum nga buligan kita sa aton mga kahuyangan sa sini nga kabuhi.

Dugang pa sa mahimayaon nga paagi sa diin ang nahimo naton nga mga sala ginapanas kag ginapatawad, ang plano sang mapinalanggaon nga Amay sa Langit nagahatag sang madamo nga iban pa nga mga regalo nga nagaamlig sa aton, lakip na ang pagprotekta sa aton batok sa pagpakasala. Ang aton mortal nga kabuhi pirme gid nagasugod sa isa ka amay kag isa ka iloy. Nagakaigo gid nga ara ang duha, nga may lainlain nga mga talento kag ikasarang para giyahan ang aton pagdaku. Kon indi amo sini ang sitwasyon kag kon wala ang ginikanan, bahin ina sang pamatok nga dapat naton lampuwasan.

Ang plano sang aton Amay nga Langitnon nagaaman sang iban pa nga mga bulig para giyahan kita sa aton mga pagpanglakaton sa sini nga kabuhi. Magahambal ako parte sa apat sining mga bulig. Palihog indi pag-isipa nga apat gid ang akon hambalan tungod ining mga bulig nagasampawanay. Dugang pa, may iban nga maluluy-on nga mga proteksyon wala labot sa mga ini.

Una, magahambal ako parte sa Kasanag ukon Espiritu ni Cristo. Sa iya dakung panudlo sa libro ni Moroni, ginasambit ni Moroni ang [ginsiling sang] iya amay nga “ang Espiritu ni Cristo ginahatag sa tagsa ka tawo, agud mahibal-an nila ang maayo sa malain” (Moroni 7:16). Mabasa naton ining amo man nga panudlo sa moderno nga mga rebelasyon:

“Kag ang Espiritu nagahatag sang kasanag sa tagsa ka tawo nga mabun-ag sa kalibutan; kag ang Espiritu nagapasanag sa tagsa ka tawo sa bilog nga kalibutan nga nagapamati sa tingug sang Espiritu” (Doktrina kag mga Kasugtanan 84:46).

Kag sa liwat: “Kay ang akon Espiritu ginpadala sa kalibutan agud hatagan sang kasanag ang mapainubuson kag mahinulsulon, kag sa pagkondenar sang indi diosnon” (Doktrina kag mga Kasugtanan 136:33).

Ginpaathag ni Pangulong Joseph Fielding Smith ining balaan nga mga kasulatan: “Wala ginpabay-an sang Ginuo ang mga tawo (kon mabun-ag sila sa sining kalibutan) nga wala sing mahimo, kag nagapangapkap para makita ang kasanag kag kamatuoran, kundi ang tagsa ka tawo … ginabun-ag nga may kinamatarong nga magbaton sang paggiya, pagtudlo, kag laygay sang Espiritu ni Cristo, ukon ang Kasanag sang Kamatuoran.”

Ang ika-duha sa dalagku nga mga bulig nga ginahatag sang Ginuo para buligan kita nga magpili sang husto amo ang pila ka diosnon nga direksyon sa balaan nga mga kasulatan bilang bahin sang plano sang kaluwasan (plano sang kalipayan). Ining mga direksyon mga kasugoan, mga ordinansa, kag mga kasugtanan.

Ang mga kasugoan nagapahamtang sang alagyan nga ginmarkahan sang aton Amay nga Langitnon para sa aton pag-uswag pakadto sa kabuhi nga wala katapusan. Ang mga tawo nga nagahunahuna nga ang mga kasugoan paagi sang Dios nga mapat-od kon sin-o ang pinahan wala nakaintiendi sining katuyoan sang mapinalanggaon nga plano sang Dios sa kalipayan. Sa sinang alagyan, amat-amat naton nga matigayon ang kinahanglanon nga relasyon sa aton Manluluwas kag mangin kalipikado sa Iya mas daku nga gahum para mabuligan kita sa aton pagkadto sa destinasyon nga gusto Niya para sa aton tanan. Luyag sang aton Amay nga Langitnon nga makabalik sa selestiyal nga ginharian ang tanan Niya nga mga anak, sa diin ang Dios kag aton Manluluwas nagaistar, kag para maagum ang klase sang kabuhi sang mga nagaistar sa selestiyal nga himaya.

Ang mga ordinansa kag mga kasugtanan kabahin sang layi nga nagapahamtang sang alagyan pakadto sa kabuhi nga wala katapusan. Ang mga ordinansa, kag ang sagrado nga mga kasugtanan nga ginahimo naton upod sa Dios paagi sa mga ini, kinahanglanon nga mga tikang kag importante nga pangamlig sa sinang alagyan. Luyag ko panumdumon ang papel sang mga kasugtanan bilang pagpakita nga suno sa plano sang Dios, ang pinakamalahalon Niya nga mga bugay ginahatag sa mga nagapromisa sing abanse nga tumanon ang pat-od nga mga kasugoan kag nagatuman sinang mga promisa.

Ang iban nga ginhatag-sang-Dios nga mga bulig sa paghimo sang husto nga mga pagpili mga pagpabatyag sang Balaan nga Espiritu. Ang Balaan nga Espiritu ang ikatatlo nga miyembro sang Pangulohan sang Dios. Ang Iya buluhaton, suno sa ginalaragway sa balaan nga kasulatan, amo ang magpamatuod sa Amay kag sa Anak, magtudlo sa aton, magpahanumdum sa aton sang tanan nga butang, kag magtuytuy sa aton sa tanan nga kamatuoran. Ang balaan nga mga kasulatan nagalakip sang madamo nga mga paglaragway sang mga pagpabatyag sang Balaan nga Espiritu, pareho sang espirituhanon nga pagpamatuod bilang sabat sa pamangkot parte sa kamatuoran sang Libro ni Mormon. Ang pagpabatyag indi dapat masal-an nga dulot sang Balaan nga Espiritu, nga ginahatag pagkatapos sang bunyag.

Isa sang pinakadako nga bulig sang Dios para sa Iya matutom nga mga anak amo ang dulot sang Balaan nga Espiritu. Ang kaimportante sining dulot maathag sa kamatuoran nga pormal ini nga ginahatag pagkatapos sang paghinulsol kag bunyag paagi sa tubig, “kag dayon [paathag sang balaan nga mga kasulatan] magaabot ang kapatawaran sang inyo mga sala paagi sa kalayo kag paagi sa Balaan nga Espiritu” (2 Nefi 31:17). Ang mga tawo nga nakaangkon sining kapatawaran sang mga sala—kag dayon regular nga ginabag-o ang pagtinlo sa ila paagi sa adlaw-adlaw nga paghinulsol kag pagpangabuhi suno sa mga kasugtanan nga ila ginahimo paagi sa ordinansa sang sakramento—kalipikado sa promisa nga ang Balaan nga Espiritu, ang Espiritu sang Ginuo, “dalayon … sa pag-upod sa ila” (Doktrina kag mga Kasugtanan 20:77).

Gani, si Pangulong Joseph F. Smith nagtudlo nga ang Balaan nga Espiritu “magapasanag sa mga hunahuna sang katawhan parte sa mga butang sang Dios, para kumbinsihon sila sa tion sang ila pagkahaylo nga gintuman nila ang pagbuot sang Amay, kag magapabilin upod sa ila para magsaksi kag mangin kaupod sa bilog nila nga kabuhi, nga nagaserbe bilang sigurado kag luwas nga giya padulong sa tanan nga kamatuoran kag nagabulig sa ila nga mabatyagan ang daku nga kalipay kag kasadya adlaw-adlaw, upod ang panimuot nga maghimo sang maayo sa tanan nga tawo, magbatas sang kahalitan sangsa magpanghalit, mangin maayo kag maluluy-on, mainantuson kag mabinuligon. Ang tanan nga may ari sining wala tupong nga regalo, ining perlas nga malahalon, wala untat nga nagahandum sang pagkamatarong. Kon wala ang bulig sang Balaan nga Espiritu,” paghingapos ni Pangulong Smith, “wala sang tawo nga makalakat sa mapiot kag makitid nga dalan.”

Nga may tama kadamo nga mabaskog nga mga bulig para maggiya sa aton sa aton pagpanglakaton sa sini nga kabuhi, makadismaya nga tama kadamo ang indi gihapon preparado sa ila natalana nga pag-atubang sa aton Manluluwas kag Manunubos nga si Jesucristo. Ang Iya paanggid sang napulo ka dalaga, nga ginamitlang pirme sa sini nga komperensya nagapakita nga sa sinang mga gin-imbitar nga magsugata sa Iya, tunga lang ang mangin preparado.

Tanan kita may nahibal-an nga mga halimbawa sang mga indi preparado: returned missionaries nga nasapar ang espirituhanon nga pagtubo tungod sa mga tinion sang pagkadi-aktibo; mga lamharon nga ginabutang sa peligro ang ila espirituhanon nga pagtubo paagi sa pagpalayo sa mga panudlo kag mga aktibidades sang Simbahan, mga lalaki nga ginapaiway ang ila ordinasyon sa Melchizedek Priesthood, mga lalaki kag mga babayi—kon kis-a mga kaliwat sang dungganon nga mga pionero ukon halangdon nga mga ginikanan—nga nagbiya sa dalan sang kasugtanan antes lang gid sila makahimo sang mga kasugtanan sa balaan nga templo.

Madamo sining mga paglisa nagakatabo kon ang mga miyembro wala nagatuman sang panguna nga mga hilikoton nga kon himuon adlaw-adlaw nagabulig mentinar sang espirituhanon nga estado sang isa ka tawo pareho sang pagpangamuyo, regular nga pagtuon sang balaan nga mga kasulatan, kag pirme nga paghinulsol. Sa kabaliskaran, ginapatumbayaan sang iban ang semanal nga pagbag-o sang mga kasugtanan paagi sa pag-ambit sang sakramento. Ang iban nagasiling nga ang Simbahan kabus sa ila ginapaabot; ginahimo sini nila ang ila palaabuton nga mga panginahanglan nga prayoridad imbes nga kabigon ang mga panudlo kag mga oportunidad nga ginahatag sang Ginuo bilang aton kahigayonan nga magserbisyo sa iban.

Ang pagpaubos kag pagsalig sa Ginuo amo ang solusyon para sa sinang mga paglisa. Suno sa ginatudlo sang Libro ni Mormon, ang Ginuo “nagapakamaayo kag nagapauswag sinang mga nagabutang sang ila pagsalig sa iya” (Helaman 12:1). Ang pagsalig sa Ginuo labi nga kinahanglanon sang tanan nga sayop nga ginakumparar ang mga kasugoan sang Dios kag mga panudlo sang Iya mga propeta sa pinakaulihi nga resulta sang mga pagtuon kag kinaalam sang tawo.

Nakahambal na ako sang madamo nga mga bulig sa sini nga kabuhi nga ginahatag sang mapinalanggaon nga Amay nga Langitnon para buligan ang Iya mga anak nga makabalik sa Iya. Ang aton bahin sa sining diosnon nga plano amo ang magsalig sa Dios kag tinguhaan nga gamiton ining diosnon nga mga bulig, labi na gid ang Pagbayad-Sala sang Iya Pinalangga nga Anak, ang aton Manluluwas kag Manunubos nga si Jesucristo. Pangamuyo ko nga itudlo kag ipangabuhi naton ining mga prinsipyo, sa ngalan ni Jesucristo, amen.