Ang Ginoong Jesucristo Magabalik Liwat

Mga pinalangga ko nga mga utod, nagapasalamat ako nga ginbugayan ako sang Ginuo nga makapakighambal sa inyo.

Sa sini nga komperensya, ang Ginuo naghambal sa aton paagi sa Iya mga alagad. Ginahangyo ko kamo nga tun-an ang ila mga mensahe. Gamita ini bilang isa ka litmus test [pag-testing] kon ano ang matuod kag kon ano ang indi sa masunod nga anom ka bulan.

Ang pagpreserbar kag pagkay-o sang Salt Lake Temple kag iban pa nga mga lugar sa Temple Square nagapadayon sa sulod sang halos lima na ka tuig. Ang karon nga mga pagbulubanta nagapakita nga ini nga buluhaton matapos sa katapusan sang 2026. Nagapasalamat kita sa tanan nga nagatrabaho sa sining dako kaayo nga proyekto.

Sa sulod sang nagligad nga anum ka bulan, gindedikar ukon liwat nga gindedikar naton ang siyam ka templo sa lima ka pungsod. Halin karon kag sa katapusan sang tuig, magadedikar kita sang lima pa.

Sini nga adlaw malipayon kami nga mag-anunsyo sang plano nga magpatindog sing 17 pa ka dugang nga mga templo. Palihog pamatii sing matinahuron samtang ginahambal ko ang mga lokasyon.

• Juchitán de Zaragoza, Mexico

• Santa Ana, El Salvador

• Medellín, Colombia

• Santiago, Dominican Republic

• Puerto Montt, Chile

• Dublin, Ireland

• Milan, Italy

• Abuja, Nigeria

• Kampala, Uganda

• Maputo, Mozambique

• Coeur d’Alene, Idaho

• Queen Creek, Arizona

• El Paso, Texas

• Huntsville, Alabama

• Milwaukee, Wisconsin

• Summit, New Jersey

• Price, Utah

Pinalangga ko nga mga kauturan, nakita bala ninyo ang nagakatabo sa atubang mismo sang aton mga mata? Ginapangamuyo ko nga indi naton pag-ibalewala ang pagkahalangdon sini nga tion! Ginapadali gid sang Ginuo ang Iya buluhaton.

Ngaa nagapatindog kita sang mga templo sa tuman nga kadasigon? Ngaa? Bangod ginsugo kita sang Ginuo nga himuon ini. Ang mga bugay sang templo nagabulig sa pagtipon sang Israel para sa mga buhi kag mga patay. Ining mga bugay nagabulig man sa paghanda sang katawhan nga magabulig sa paghanda sang kalibutan para sa Ikaduha nga Pagkari sang Ginuo!

Sa ginpropesiya ni propeta Isaias, kag sa ginasaulog sang musika ni Handel nga Mesias, kon magbalik si Jesucristo, “ang himaya sang Ginuo igapahayag, kag ang tanan nga unod makakita sini sing tingob.”

Sa sina nga adlaw “ang pagbulut-an manginsa iya abaga: kag tawgon ang iya ngalan Makatilingala, Manuglaygay, Ang Dios nga gamhanan, Ang Amay nga nagapadayon, Ang Prinsipe sang Paghidaet.”

Si Jesucristo magagahum gikan sa daan nga Jerusalem kag sa Bag-ong Jerusalem nga “gintukod sa kontinente sang Amerika.” Sa sining duha ka sentro, Iya dumalahan ang mga hilikuton sang Iya Simbahan.

Sa sina nga adlaw ang Ginuo kilalahon bilang “Hari sang mga Hari, kag Ginuo sang mga Ginuo.” Ang mga kaupod Niya mangin “gintawag, kag pinili, kag matutom.”

Mga kauturan, karon na ang tion para sa inyo kag para sa akon nga maghanda para sa Ikaduha nga Pagkari sang aton Ginuo kag Manluluwas, si Jesus nga Cristo. Karon na ang tion nga himuon naton ang aton pagkadisipulo nga aton pinakamataas nga prayoridad. Sa kalibutan nga puno sang mabaskog nga mga tublag, paano naton ini mahimo?

Ang regular nga pagsimba sa templo makabulig sa aton. Sa balay sang Ginoo, nagatutok kita kay Jesucristo. Nagatuon kita parte sa Iya. Nagahimo kita sang mga kasugtanan sa pagsunod sa Iya. Amat-amat naton nga makilala Sia. Kon ginatuman naton ang aton mga kasugtanan sa templo, mas dako ang aton tsansa nga maangkon ang nagapabaskog nga gahum sang Ginuo. Sa templo, nagabaton kita sang proteksyon gikan sa mga pagpamintas sang kalibutan. Maeksperiyensyahan naton ang putli nga gugma ni Jesucristo kag sang aton Amay nga Langitnon sa dako nga kabuganaan! Mabatyagan naton ang paghidaet kag espiritwal nga pasalig, kabaliskaran sa kagamo sang kalibutan.

Ari ang akon promisa sa inyo: Ang tagsa ka sinsero nga nagapangita kay Jesucristo makakita sa Iya sa templo. Inyo mabatyagan ang Iya kaluoy. Inyo makita ang mga sabat sa makatulublag ninyo nga mga pamangkot. Mas mahangpan ninyo ang kalipay sang Iya ebanghelyo.

Natun-an ko nga ang pinakaimportante nga pamangkot nga dapat sabton sang tagsa sa aton amo ini: Kay sin-o ukon ano ang hatagan ko sang akon kabuhi?

Ang akon desisyon nga sundon si Jesucristo amo ang pinakaimportante nga desisyon nga akon nahimo. Sang nagaeskwela ako sang medisina, nakaangkon ako sang panaksihon sang pagkadiosnon sang Dios nga Amay kag sang Iya Anak nga si Jesucristo. Sugod sadto ang aton Manluluwas amo ang bato nga gintukuran ko sang akon kabuhi. Ina nga pagpili naghimo sang tanan nga kinalain! Ina nga desisyon nagpahapos sang madamo nga iban pa nga mga desisyon. Ina nga desisyon naghatag sa akon sing katuyuan kag direksyon. Nakabulig man ini sa akon sa pag-atubang sa mga bagyo sang kabuhi. Tuguti ako nga mag-istorya sang duha ka halimbawa:

Una, sang ang akon asawa nga si Dantzel wala ginapaabot nga nagtaliwan, indi ko makontak ang bisan sin-o sa amon kabataan. Didto ako, nagaisahanon, napung-awan, kag nagapangayo sing bulig. Nagapasalamat ako, nga paagi sa Iya Espiritu, gintudluan ako sang Ginuo kon ngaa gindala na pauli ang akon pinalangga nga si Dantzel. Sa sina nga paghangop, nalugpayan ako. Sa pagligad sang tion, mas nalampuwasan ko ang akon kasubo. Sang ulihi, ginpangasawa ko ang akon pinalangga nga asawa nga si Wendy. Isa sia ka importante nga bahin sang akon ikaduha nga halimbawa.

Sang ako kag si Wendy ara sa asaynment sa malayo nga pungsod, gintutokan sing pusil ang akon ulo sang armado nga mga kawatan kag ginpitik ang gatilyo. Apang wala naglupok ang pusil. Sa sina nga eksperiyensya, ang kabuhi namon nga duha yara sa katalagman. Apang nakabatyag kami ni Wendy sing indi mapanghiwala nga paghidaet. Amo yadto ang paghidaet “nga nagalabaw sa tanan nga paghangop.”

Mga kauturan, lugpayan man kamo sang Ginuo! Pabakuron kamo Niya. Bugayan kamo Niya sing paghidaet, bisan sa tunga sang kagamo.

Palihog pamatii ining promisa ni Jesucristo sa inyo: “Mangin yara ako sa inyo tuo nga kamot kag sa inyo wala, kag ang akon Espiritu mangin yara sa inyo mga tagipusuon, kag ang akon mga anghel sa palibot ninyo, sa pagtatap sa inyo.”

Wala sing limitasyon ang kapasidad sang Manluluwas sa pagbulig sa inyo. Ang Iya indi matungkad nga pag-antos sa Getsemani kag sa Kalbaryo para sa inyo! Ang Iya walay katapusan nga Pagbayad-Sala para sa inyo!

Ginahangyo ko kamo nga maghatag sing oras kada semana—sa nabilin ninyo nga kabuhi—nga dugangan ang inyo paghangop sang Pagbayad-Sala ni Jesucristo. Nagasakit ng akon tagipusuon para sa mga nalumos sa sala kag indi makahibalo kon paano magbutwa. Nagahibi ako para sa mga ginabudlayan sa espirituhanon ukon nagakarga sang mabug-at nga mga palas-anon sing nagaisahanon bangod wala nila mahangpi kon ano ang ginhimo ni Jesucristo para sa ila.

Gindala ni Jesucristo sa Iya kaugalingon ang inyo mga sala, ang inyo mga kasakit, ang inyo mga kalisod, kag ang inyo kaluyahon. Indi ninyo kinahanglan nga pas-anon ini nga nagaisahanon! Patawaron Niya kamo kon maghinulsol kamo. Bugayan Niya kamo sang inyo kinahanglanon. Ayuhon Niya ang inyo napilasan nga kalag. Kon itakod ninyo ang inyo gota upod sa Iya, ang inyo mga palas-anon magamag-an. Kon maghimo kamo kag magtuman sang mga kasugtanan nga sundon si Jesucristo, masalapoan ninyo nga ang masakit nga mga tinion sang inyo kabuhi temporaryo lamang. Ang inyo mga pag-antos “daugon sa kalipay kay Cristo.”

Indi temprano ukon ulihi na para sa inyo nga mangin debotado nga disipulo ni Jesucristo. Dayon lubos ninyo nga maeksperiyensyahan ang mga bugay sang Iya Pagbayad-Sala. Mangin mas epektibo man kamo sa pagbulig sa pagtipon sang Israel.

Pinalangga kong mga kauturan, sa isa ka palaabuton nga adlaw, si Jesucristo magabalik sa duta bilang Mesias sa milenyo. Gani subong nga adlaw nagapanawagan ako sa inyo nga idedikar liwat ang inyo kabuhi kay Jesucristo. Nagapanawagan ako sa inyo nga magbulig sa pagtipon sang naglinapta nga Israel kag sa paghanda sang kalibutan para sa Ikaduha nga Pagkari sang Ginuo. Nagapanawagan ako sa inyo nga maghambal parte kay Cristo, magpamatuod parte kay Cristo, magtuo kay Cristo, kag magkasadya kay Cristo!

Magkari kay Cristo kag “ihalad ang inyo bug-os nga [kalag]” sa Iya. Amo ini ang sekreto sa kabuhi nga may kalipay!

Ang pinakamaayo magaabot pa, mga pinalangga ko nga mga kauturan, kay ang Manluluwas magaabot liwat! Ang pinakamaayo magaabot pa tungod kay ginapadasig sang Ginuo ang Iya buluhaton. Ang pinakamaayo magaabot pa samtang lubos naton nga ginaliso ang aton mga tagipusuon kag ang aton mga kabuhi kay Jesucristo.

Nagahatag ako sang akon maligdong nga panaksihon nga si Jesucristo amo ang Anak sang Dios. Iya ako disipulo. Dungog ko nga mangin alagad Niya. Sa Iya Ikaduha nga Pagkari, “ang himaya sang Ginuo igapahayag, kag ang tanan nga unod makakita sini sing tingob.” Ina nga adlaw mangin puno sang kalipay para sa mga matarong!

Paagi sa gahum sang sagrado nga mga yabi sang priesthood nga akon ginauyatan, ginapahayag ko ining kamatuoran sa inyo kag sa bug-os nga kalibutan! Sa ngalan ni Jesucristo, amen.