Simple ang Doktrina ni Jesucristo

Ang pulong sang Dios amo ang doktrina nga gintudlo ni Jesucristo kag sang Iya mga propeta. …

… Ini nga doktrina amo nga ang pagtuo sa Ginuong Jesucristo, paghinulsol, bunyag, pagbaton sang dulot sang Balaan nga Espiritu, kag pagbatas tubtob sa katapusan nagapakamaayo sa tanan nga mga anak sang Dios.

Sa aton pagtudlo sining mga prinsipyo sa aton mga pinalangga, ang Balaan nga Espiritu magabulig sa aton nga mahibal-an ang kamatuoran. Bangod kinahanglan naton ang mga pagpabatyag sang Balaan nga Espiritu, dapat naton likawan ang mga espekulasyon ukon personal nga interpretasyon nga nagasobra sa pagtudlo sang matuod nga doktrina.

… Isa sang pinakasigurado nga mga paagi sa paglikaw bisan magpalapit lang sa sala nga doktrina amo ang magpili nga mangin simple sa aton pagtudlo. …

Ang pagtudlo sing simple nagatugot sa aton nga ipakigbahin ang nagaluwas nga doktrina temprano pa, samtang ang kabataan wala pa matandog sang mga pagsulay sang panulay nga ila maatubang sa ulihi, antes pa matabunan ang mga kamatuoran nga kinahanglan nila tun-an sang pagtublag sang social media, mga kaedad, kag sang ila kaugalingon nga personal nga mga paghimakas. …

Samtang ginahimo naton ang aton masarangan sa pagtudlo sa aton mga hinigugma parte sa doktrina ni Jesucristo, ang iban mahimo nga indi gihapon magpati. Ang mga pagpangduhaduha mahimo nga magsulod sa imo hunahuna. … Indi magpadala sa sina nga mga pangduhaduha. Magdangop sa Dios para sa bulig. …

… Mangin mapisan ka kag mapinasensiahon. Kag dayon mahibaloan mo nga nahimo mo ang tanan mo nga masarangan agud buligan ang imo mga ginapalangga kag inang imo mga ginapangamuyoan nga mabatoan nila ang pagtinguha ni Satanas nga paslawon sila.