Ol Las Toktok

Mi sua se yufala i harem promes ia: "Pis, lav, mo tabu lav blong Sevya." Letem ol samting ia i blong yu tu. Yufala i go mo laef long ol wei we bae i givim yufala—givim ol blesing ya i kam long yu long wan bigfala wei.

Mi bin lanj wetem Presiden Oaks long Fraedei, mo mitufala i bin stap tokbaot miting blong naet ia. Mo mi talem—from mi save promes we bae hem i givim long yufala—nao mi askem hem wanem ol nara samting we bae hem i talem long yufala. Mo hem i talem se hem i wantem yufala blong tingbaot wanem kaen wol yufala i wantem pasem i go daon long ol pikinini blong yufala. !Wan gudfala kwestin! Mi no save hamas long yufala i tingting long hemia naoia, be hemia i wan kwestin we i kam long profet. Mo mi prea se ol samting we yumi tokbaot long naet ia i helpem yufala blong rere gud long wol ia blong ol pikinini blong yufala, we hem i talem se bae oli jenisim wol ia.

Taem mi stap tingbaot promes blong Presiden Oaks long yufala, mi tingbaot ol nara profet. Mo mi tingbaot yang Alma, we i gat bigfala fet. Yes, hem i bin laef long wan rabis laef mo i stap go agensem Jos, kasem taem wan dei hemia i kam wan long ol bigfala jenis insaed long skripja. Mo wetem ol nara samting we hem i talem long taem ia, hem i talem tu se, “O, glad ia we mi gat, mo gudfala laet ia we mi bin luk; yes, sol blong mi i bin fulap long glad, i bigfala [bifo mo tedei] olsem soa blong bodi blong mi.” I naes tumas blong tingbaot hemia. Mo blong tingbaot jenis blong hem afta wanem we hem i mekem, hao hem i mekem samting mo huia hem i blesem.

Hem i tokbaot olgeta we sol blong olgeta—hemia i hapen afta—hem i tokbaot olgeta we oli gro long saed blong spirit mo “singsing long lav blong pemaot man.” Mi laekem toktok ia. "Singim singsing blong lav blong pemaot man." Mo hem i wantem ol pipol blong hem oli andastanem hemia mo andastanem wanem we oli nogat sapos oli no singim singsing blong pemaot man. I mekem se hem i traem bakegen mo bakegen afta i wok bakegen mo bakegen blong helpem olgeta i andastanem hemia. Hem i askem olgeta ol kwestin we bae i lidim mo helpem olgeta blong oli andastanem. Hem i askem, “?[yufala] i bin bon long God long saed blong spirit?” Pikjarem se yufala i stap long kongrekesen ia. “Yufala i lukluk i go fored wetem wan ae blong fet?” hem i askem. I naes tumas blong pikjarem sapos yufala i stap long taem ia. Mo afta hem i askem gud, "sapos yufala i bin gotru long wan jenis long hat, mo sapos yufala i bin filim blong singim singsing blong lav blong pemaot man, bae mi askem: ?yufala i save filim samting ia naoia?" Wao. "?Yufala i save filim hemia naoia?"

Mi no save wanem we yufala i stap tingting long hem, be mi askem mi wan se bae i filim olsem wanem blong stap long wan long ol kongrekesen ia, wan long ol grup ia, we hem i stap askem ol kwestin ia blong tijim mo wantem blong helpem olgeta i andastanem wanem we hem i bin andastanem long naes jenis ia mo fasin blong hem blong jenisim laef blong hem. Mi pikjarem hem we i stap long wan ples mo i stap toktok i go long wan bigfala grup. Sam long ol pipol we hem i save—mo ating hem i save plante long olgeta—mo i talem, “?Yufala i save filim hemia naoia?” Plante pikja blong ol situesen i kam long maen blong mi. Mi gat wan situesen we wan yangfala i leftemap han blong hem mo talem wan samting olsem, "Alma, mi no save filim from win i flu aot long tent blong mi las naet." Hemia i sud mekem yufala i laf. Hem i nogud. Yes, tent blong hem i kamaot.

Naoia yumi gobak long nara situesen we maet bae i gud lelpet. Wan defren kongrekesen, wan defren dei, Alma i askem kwestin ia, "?Yu save filim hemia naoia? Mo mi tingbaot wan nara situesen. Mi pikjarem wan yang man, hem i gat samples 20 yia, mo mi pikjarem se hem i leftemap han blong hem. Mo i talem long Alma, "Mi stap fesem hadtaem". Ol kakae blong mi oli no gro gud." Afta, hem i talem, "Yu save Rebecca. Yu save hao mi filim abaot Rebecca. Be mi no sua hao hem i filim abaot mi." Mo hem i kasem atensen blong Alma. Mo afta hem i talem, "Mo ol Man blong Laman oli stap kam kolosap."

Mo Alma i tingting mo mi sua se i lukluk hem wetem bigfala lav mo i talem long Samuel, "Nao hemia oli ol bigfala problem, Samuel. Mo oli hevi long solda blong yu. Be Samuel, yu save huia yu. Yu save huia yu. Yu save huia i Sevya blong yu. Yu save se Papa blong yu long Heven we i gat lav bae i sendem Sevya blong Hem blong sevem yu. Mo bae Sevya i kavremap yu wetem ol han blong Hem. Samuel, yu save hao hemia i wok." Mo afta i putum moa paoa long toktok blong hem. "Samuel, hemia hem i fet. Samuel, hemia hem i fet." Mo yes, insaed long kongrekesen ia i gat sam narawan we oli "naoia oli filim nao" Be i gat ol narawan olsem Samuel—ating plante, mi no save. "Samuel, hemia hem i fet. Samuel, plis singim singsing blong lav blong pemaot man." Mo wetem hemia, mi luk Alma i smael long hem olsem se i wantem daonlodem hemia blong Samuel, mo mi sua se hemia i wanem we hem i wantem mekem. "Samuel singim singsing blong lav blong pemaot man."

Nao, ol dia fren, hemia i wan nara samting we yumi evriwan i save praktisim. Yufala evriwan—plante long yufala—i save ol stamba trutok ia we Alma i stap tijim long Samuel mo ol narawan. Yufala i save ol trutok ia. Mo yufala i save moa, from se hemia i no plante handred yia bifo Sevya i kam, hemia i plante handred yia, taosen yia, afta we Sevya i kam. Mo yumi gat wan profet we i laef iet, mo yufala i gat wan profet we i laef tedei we i promesem yufala abaot pis, glad, mo tabu paoa blong Sevya, mo yufala i save weaples blong faenem. Be yufala i mas—mekem andastaning blong trutok—i kam nambawan samting. I mas kam nambawan samting long hat mo maen blong yufala. Mekem i kam nambawan long ol wari from kakae we i no gro gud, swithat blong yu we i no stap long semmak pej olsem yu iet, mo ol Man Laman we oli stap kam kolosap. Yumi gat fet blong yumi we i nambawan samting. I no olsem Samuel we long taem ia hem i putum i kam las samting. Yumi nid blong mekem i kam nambawan samting. Mo yumi nid blong praktisim. Yumi nid blong praktisim hemia evri dei—wei we yufala i lanem, plante long yufala we oli sevem misin o plante long yufala we oli traehad blong lan long ol nara wei. Yumi nidim fet blong yumi blong i kam nambawan samting, nao ?wanem nao bae yumi mekem? Bae yumi sinsing tugeta long wan singsing blong pemaot man.

Las hym blong tedei hem i “Letem Yumi Evriwan I Go Fored”folem hao Richard Elliott, we yumi glad blong gat hem tedei, i oganaesem mo Marshall McDonald bae i kondaktem naes hym ia, wetem kwaea. Be bae yumi komperem singsing blong yumi wetem tingting ia fastaem bifo oli singsing long en blong mekem se yumi save andastanem ol trutok ia. Sapos yu wantem singim singsing blong lav blong pemaot man, mo aksepetm fulwan se yumi no stret evriwan be bae yumi kasem ples ia iet mo wanem we yumi nidim hem i blong mekem fet blong yumi i kam nambawan samting bifo evri nara samting. Naoia bae yumi singim tufala fas laen blong hym ia fastaem tugeta. Yufala wetem kwaea. Mo taem yufala i stap singsing, i oraet sapos yufala i mestem singsing, o sapos nara samting i karem atensen blong yufala, sapos yufala i wantem. Bae yumi askem yufala blong pulum singsing smol olsem samtaem yu harem taem yumi go long ol kongrekesen we oli no singsing strong tumas.

Mi neva stap long wan kongrekesen olsem bifo. ?Be yufala i save mekem hemia? Long fas taem nomo, bae yumi mekem wan we ating bae i nogud bitim evriwan we yufala i eksperiensem. Bae yumi mekem hemia—long tufala fas laen nomo. Mo ating bae ol toktok blong singsing i kamaot long ples ia. Bae i no longtaem.

[Wantaem nomo kongrekesen mo kwaea i singsim “Letem Evriwan I Yumi Go Fored.”]

Mi wantem tumas. Hemia i wan long ol feveret hym blong mi, mo long plante wei, hem i wan hym, wan antem, blong lav blong pemaot man. Be iet, samtaem yumi mo i tru se yumi singim olsem. Mi bin traem blong winim tingting blong Richard Elliot, askem strong, long hem blong plei long singsing ia olsem. Hem i talem, "?Wanem nao bae olgeta we oli stap oganaesem kwaea raon long wol bae oli tingting long hem? Bae oli no talem se mi—” Mi talem, “No, mifala i wantem tumas blong yu mekem i olsem. Hemia i no abaot man we i oganaesem kwaea. I no abaot se i saon nogud. Hem i abaot hao yumi jenis taem yumi lanem blong singsing wetem lav blong pemaot man. Taem yumi mekem fet blong yumi i kam antap, bigfala laet blong hem i save kavremap evri nara samting."

Okei, soem long mifala hao hemia i save hapen, mo bae yumi traem bakegen, bae kwaea i singim—wanem, ?tu laen blong kores? Tangkyu Marshall.

[Wantaem nomo kwaea i singim “Letem Yumi Evriwan I Go Fored.”]

?I oraet? Okei, hemia nomo wanem blong mekem. Nao bakegen, tingbaot. Ol hym oli gat ol toktok, yumi singsing mo minim ol toktok ia, naoia bae yumi putum paoa, laet mo eneji long ol toktok we i mata. Mo yufala i mekem i laef. I nomata sapos yufala i gat wan rabis voes, plis yufala i, singsing nomo. Mo hemia i wan wei blong yufala i putum paoa blong voes blong yufala folem ol toktok blong testemoni blong yufala. Putum paoa long voes long weaples we yu ting se Alma i minim mo folem wei we Presiden Oaks i minim taem hem i promes pis, glad mo tabu lav blong Sevya sapos yufala i atendem institiut mo sapos yufala i atendem—bae yumi talem tu—sakramen miting mo evri samting we i naes mmo tabu. Be yumi mas wok blong putum eneji long ol pat ia.

Ating naoia bae yumi singsing tugeta long nambatri laen afta kores tu wantaem. ?Yufal i redi blong mekem hemia? Okei, naoia bae yufala i mekem hemia wetem ful paoa blong yufala.

[Kongrekesen mo kwaea i singim “Letem Yumi Evriwan I Go Fored.”]

Naoia i naes we i naes moa. I naes tumas. Be tingbaot wanem we yumi ripresentem long ples ia. Bae yumi putum fet blong yumi i kam nambawan samting. Mo bae yufala i putum paoa blong voes long ol toktok we i mata. Mo mi ting se yumi faenem sam, be yufala i save putum paoa blong voes long eni toktok we yufala i luk se i mata. ?I stret? Hemia bae i hao yumi nid blong singsing mo hao mifala i askem storng long yufala blong singsing long ples we voes i no laod tumas, iven sapos yu wan nomo yu singsing. Be tingbaot se hemia i stap soem fet blong yufala we i stap gro. Mo minim blong stap putum fet blong yufala i kam nambawan samting nomata long ol wari, problem, mo fraet blong yufala wetem hop ia se bae yufala i winim evriwan.

Okei, bae yumi traem hemia wan las taem tugeta.

[Wantaem nomo kongrekesen mo kwaea i singim “Letem Yumi Evriwan I Go Fored.”]

?I filim olsem wanem? Okei. I tekem aksen, visen, i tekem fasin blong selektem samting blong minim blong putum ol samting we yumi nidim i kam nambawan long saed blong spirit, blong mekem se yumi save winim ol fraet mo ol wari ia we plante long olgeta oli hapen tru. Be mi askem strong long yufala blong praktisim hemia. Sakramen miting i wan long ol invitesen we yufala i save praktisim hemia blong mekem i naes. Narawan i blong singsing eni taem. Be hemia hem i weaples mo hao yumi putum paoa long voes blong singsing, mo hemia i hao yumi mekem fet blong yumi i kam nambawan samting mo wei ia we Alma mo Presiden Dallin H. Oaks tufala i invaetem yumi blong mekem.

Ol dia fren, tangkyu long gudfala wok blong yufala. Bae yufala i kasem blesing taem yufala i traehad blong putum paoa long laef blong yufala long weaples we yufala i wantem. Tangkyu long gudfala wok blong yufala. Mi glad tumas long taem ia we mi gat wetem yufala. Mi glad tumas se mi faenem fet blong mi taem mi gat kolosap 30 yia mo mi save stap ia wetem yufala tedei long naesfala miting ia blong tokbaot fet, laet, glad mo tu promes blong Sevya abaot pis, glad, mo tabu lav. Mi testifae long ol samting ia wetem lav mo wetem wan hat blong tangkyu long nem blong Jisas Kraes, amen.