Ol Toktok mo Ol Storian: Elda mo Sista Kearon wetem ol Yang Adalt
Divosen blong ol Yang Adalt Raon Long Wol
Sandei, Febware 1, 2026
Elda Patrick Kearon: I gud tumas blong stap long ples ia wetem yufala evriwan long naet ia blong selebretem ol 100 yia blong institiut mo blong tingbaot ol laef we oli jenis tru long seminari mo institiut truaot long ol yia we i pas. I gud tumas blong luk yufala i kam long naet ia. Mo mi wantem talem se hem i olsem wan filing we i wom long wan wei we i bigwan. Mi hop yu luksave se yumi karem ol laet we oli hang long rop blong mekem wom filing taon long ples ia i kam strong moa
I gud tumas blong stap wetem yu, mo mitufala i stap wet long taem ia blong gat wetem yu mo tangkyu blong kam. Mitufala i andastanem se sam long yufala i stak long trafik, be wetem strong tingting, yufala i stap ia.
Sista Jennifer C. Kearon: yes, mitufala i hapi tumas from glad we mitufala i filim long naet ia, mo mitufala i laekem blong luk ol fes blong olgeta we oli joenem mitufala long naet ia. Be mitufala i traem tu blong pikjarem yufala we i kam tugeta long ol japel, long ol hom o long wan praevet ples yufalawan blong wajem naet ia-taem yufala i lukaotem blong kam moa kolosap long Sevya blong yufala. Mitufala i lavem yufala evriwan, mo mitufala i glad blong stap wetem yufala.
Sam wik i pas, mitufala i bin gat naes janis ia blong mit wetem tu defren grup blong ol yang adalt-sam long olgeta oli stap long naet ia-mo mitufala i bin sidaon mo storian wetem olgeta. Mifala i bin storian blong wan aoa wetem tufala defren grup ia. Oli kam wetem sam kwestin, mo mitufala i givim sam ansa long olgeta. Oli ripresenten faef defren kantri: ol yang adalt blong Amerika, Meksiko, Norwei, Karibien aelan blong Curacao, mo Ripablik blong Kongko.
Elda Kearon: Nao wanem we bae yumi mekem naoia i blong luklukbak faef long ol kwestin ia we oli yangfala ia oli bin askem, long vidio. Mo afta maet bae mitufala i givim wan o tu komen long wanwan vidio. Naoia bae yumi wajem fas vidio.
Luksave mo Winim ol Samting We i Blokem Rod
Yang Adalt: ?Wanem i sam long ol bigfala samting we i blokem rod, we yutufala i luk se mifala ol YSA i stap putum long rod blong mifalawan mo i blokem mifala long lav blong God o ating i blokem mifala blong kam wanem we God i wantem mifala blong kam olsem?
Elda Kearon: Taem mi stap tingting long ol had samting we ol yang adalt oli gat, mi luk i olsem wan tes we yu gat taem yu stap stadi—wan tes we i had smol blong andastanem. Mi no save. Be mi ting se kaen tingting ia nao i save blokem yumi long laef long wol ia blong kasem laef we i no save finis.
Bae mi givim yu wan feveret toktok blong mi we i kam long Presiden Henry B. Eyring: “Lod i no mekem yumi gotru tes ia … blong i givim yumi wan mak; Hem i mekem olsem from se proses ia bae i jenisim yumi.”
Hem i no testem yumi olsem ol studen—Hem i givim ol janis long yumi blong lanem samting mo gro. I no from se wan i gat hae mak blong taem we i no save finis, be from se yumi nid blong gro mo kam antap mo andastanem mo kasem wan save blong huia yumi. I no abaot ol samting we i blokem rod. Hem i abaot rod we oli mekem blong yumi, samtaem bae yumi wokbaot long rod ia wetem ol naes eksperiens, mo samtaem wetem ol eksperiens we i had tumas mo i stap longtaem.
Sista Kearon: ?Olsem wanem long ol hadtaem olsem fraet mo fasin blong daot long yuwan we i blokem yu? ?Olsem wanem long smol voes ia insaed long maen blong yu? Hemia tu i save blokem yu. Ol voes we i putumdaon tingting. Ol voes we oli talem se yu nogud. Ol voes we oli talem se yu no gud olsem ol narawan. Mo i gat plante risen blong hemia: Ating yu no bin kasem wok ia we yu wantem. Ating yu no winim tes. Ating yu wantem mared be yu no mared yet. Ating yu divos. Ating yu stap traehad blong winim wan semmak hadtaem ia, semmak sin ia, semmak problem ia we yu gat blong longtaem. I mekem se ol voes ia oli talem long yu se, "mi no gud inaf, bae mi neva gud inaf, bae mi neva gud olsem ol narawan, mo bae mi no save kam wanem we God i wantem mi blong kam olsem. Mi ting se hemia i wan samting we i blokem yu. Mo samtaem mi tu mi harem ol voes ia.
?Voes blong Sevya i saon olsem wanem long hed blong yu? Saon blong voes ia i defren long wanem we mi stap diskraebem, i defren long ol voes we i mekem yu lusum tras, i putum yu daon, i mekem yu sem, ol voes we i mekem yu lusum hop. Lisin long wanem we Sevya i talem long yumi long Jon japta 10. Mi laekem hemia.
"Tru mi talem long yufala. Man we i no pas long get, blong go insaed long yad blong sipsip, be hem i klaem long fenis blong go insaed, hem i man blong stil mo blong kilim man.
"Be man we i pas long get, hem i man blong lukaot long sipsip.
“… Ol sipsip oli haremsave voes blong hem: Oltaem hem i stap singaotem ol sipsip blong hem wanwan long nem blong olgeta, nao i lidim olgeta i go afsaed.
“… hem i stap go fastaem mo ol sipsip ia oli stap folem hem: from we oli save voes blong hem.
“Be oli no save folem man we oli no save hem, oli mas ronwe long hem, from we oli no save voes blong hem.”
Samtaem yu gat voes blong wan man we yu no save insaed long hed blong yu, voes blong wan stilman, mo mi tu. I semmak tu long mi. Voes blong wan we i no save yu, i no kea long yu, mo i stap traehad blong spolem yu. Yumi no mas lisin long ol voes ia, ol voes blong olgeta we yumi no save, ol stilman, be lisin long voes ia blong Gudfala Man blong Lukaot long Sipsip, Hem we i leftemap tingting oltaem, i gat lav oltaem, mo i gat hop oltaem. Yes, Hem i singaotem yumi blong kam moa gud. Yes, Hem i singaotem yumi blong sakem sin sapos i nid blong mekem. Be voes blong Hem oltaem i wan voes ia nomo—blong wan Sevya we i lavem yumi, we i pemaot bigfala praes blong yumi, mo we i fasem Hemwan wetem wanwan long yumi tru long kavenan. From hemia, kakae gud long ol toktok blong Kraes, be i no long ol toktok blong wan we yumi no save.
Okei, naoia bae yumi wajem nekis vidio.
Helpem Olgeta We Oli Go Aot long Jos
Yang Adalt: I gat plante defren taem long laef we mi kipim ol komanmen folem hao mi filim se God i wantem mi blong mekem, be ?hao nao yu save helpem wan fren we yu luk se i stap aot sloslo long Jos aktiviti o i aot long fasin blong filim spirit evri dei? ?Hao nao yu helpem olgeta mo no talem long olgeta, se oli rong long wan wei?
Sista Kearon: I had from yu no wantem se bae i luk olsem yu stap jajem olgeta. Yu no wantem saon olsem, "O, wei we mi laef folem gospel i moa gud o hem i raet wei." Oltaem hem i abaot lav mo taem, folem tingting blong mi. Ol fren blong yu oli nid blong filim lav blong yu mo oli nid blong save se yu redi blong givim olgeta taem ia we oli nidim.
Mo maet ol fren blong yu oli stap long wan taem we oli nid blong stori abaot wanem we i stap hapen insaed long maen mo hat blong olgeta. Mo yu save givim mesej ia long olgeta—klia mesej ia—se yu wan sef ples, yu yu wan we bae i lavem olgeta mo respektem olgeta mo kea long olgeta mo helpem olgeta nomata long wanem we oli stap gotru long hem. Maet bae yu no aggri wetem olgeta, maet bae yu no jusum wanem we olgeta i jusum, be i mekem wan jenis long ol fren we oli gotru long hadtaem blong gat wan sef ples blong go long hem mo blong gat wan we oli trastem se i kea long olgeta.
Mi ting se hemia i help, blong tokbaot ol taem we, maet oli bin filim Spirit moa bitim naoia o ol taem we oli bin stap laef folem gospel moa bitim naoia. Mo toktok long olgeta abaot lukluk blong olgeta long laef bifo, mo ol jenis we oli luksave.
Ol storian we i ones mo i kam long hat mo spirit, ol storian we bae i no saon olsem se yu stap talem se, "O, no yu no talem wanem we me stap wet blong yu talem o yu no givim mi ansa we mi wantem harem, bae mi stopem storian ia nomo." Mi ting se hemia i impoten tumas.
Hemia i wan prinsipol we i wok long evri rilesensip blong yumi. Hem i wan prinsipol we i wok blong ol paren. Hem i wan prinsipol we i wok taem yumi toktok wetem olgeta we yumi lavem long eni situesen.
Elda Kearon: Yes. Mo mi ting se i dipen long weaples oli stap long hem—Carl i stap tokbaot ol fren we oli stap aot sloslo long gospel—nomata long weaples oli stap long hem, yumi mas traem blolng kipim olgeta i stap insaed—yumi stap tokbaot Jos aktiviti. Yumi stap tokbaot fasin blong stap aktiv insaed long Jos. Hem i intresting tumas long wan konvet blong harem toktok ia. Be mi ting se yumi wantem mekem evri samtig we yumi save mekem blong mekem oli tekpat, blong kipim olgeta i stap aktiv, blong helpem olgeta blong helpem ol narawan. Sapos oli gat wan koling, mekem blong oli ansa long kol ia mo wok long hem. Blong tijim, givhan, mo lukaot long ol narawan ia we maet oli stap traehad blong winim hadtaem blong olgeta. Mi ting se i stret gud wantaem we Buk blong Momon i stat wetem Lihae mo famli blong hem—wetem Nifae we i stap go mo mekem samting—mo yumi ol pipol we yumi go mo mekem samting. Mo mi ting se i gat bigfala paoa long hemia. Hemia i kipim fet blong yumi i laef. Mo sapos fet blong yumi i lus smol, hemia i save mekem yumi kambak. Mi lavem wanem we Presiden Monson i talem abaot Sevya. Hem i talem se Sevya i aktiv oltaem. Mi ting se yumi save folem gud eksampol ia.
Letem yumi wajem nekis vidio.
Filim Pis Nomata long Wari
Yang Adalt: Mi jes—olsem wan we i stap wari, samtaem i had long mi blong glad taem mi wari evritaem. Mo mi stap tingting sapos yutufala i gat sam tingting abaot ?hao blong filim moa pis long Sevya blong mekem se glad ia i save kam bigwan moa?
Elda Kearon:Hemia i wan naefala kwestin from yumi evriwan i fraet mo wari samtaem. Sam long yumi oli fraet mo wari moa bitim ol narawan. Sam long yumi i nidim help blong handelem ol fraet mo wari blong yumi. Blong sam long yumi, i go kasem ol problem long saed blong helt, yumi stap kam moa gud blong helpem yumi wanwan blong kasem help blong helt wetem fraet mo wari.
Mo sapos yu lukluk long skripja, i gat wan man long skripja we i tokbaot se hem i wari mo "bigfala wari" blong mi bitim eni narawan hem i Jekob. Mo hem i intresting, from wari blong hem i defren bigwan long hemia blong mi, long plante wei. Wari blong hem i from ol narawan. Hem i wari from ol pipol blong hem mo gud blong olgeta. Wari blong mi, plante taem i abaot mi mo hao mi filim mo sapos mi mekem samting i nogud mo ol kaen samting olslem. Wan samting we mi lanem bakegen mo bakegen—mo mi mas lanem mo lanem bakegen—i we sapos mi tingting long wan narawan, wari blong mi i kamaot. I blong mi tingting long gud blong wan narawan nomo, mo wari blong mi i stat blong lus. Wari ia i lus. Plante taem, i lus nating nomo. Mo sapos mi mekem gud long wan narawan, i gat bigfala paoa long hemia. Mi wantem blong kam moa olsem Jekob mo wari moa abaot ol narawan. Mo mi save se i gat bigfala—Mi save se i gat bigfala hiling long hemia.
Sista Kearon: Mi ting se yumi stap—long taem ia, i nomol blong yumi harem nogud o no hapi mo yumi wantem blong i lus wantaem nomo. Yumi lan blong wantem samting i folem tingting blong yumi hariap nomo. Mi tingbaot sapos mi stap swim long batrum mo wota i kolkol tumas, mi tanem smol nomo i go long lefsaed, mo afta i hot smol. O wan samting olsem. Mo yumi lan blong filim gud oltaem. Yumi wantem blong filim gud. Ol man oli wantem blong filim gud—yumi no wantem stap long wan situesen we yumi no filim gud.
Taem yumi wari abaot fiuja from se yumi no sua long hem mo yumi no save, hemia i nomol. Mo mi ting se yumi mas akseptem pat ia we i nomol long yumi, wan pat blong laef long wol ia, i blong akseptem ol taem blong harem nogud mo ating akspetem ol longfala taem blong harem nogud o filim se i ORAET blong no sua abaot ol samting. Maet bae yu gat sam dei o sam wik o iven sam manis we bae tingting blong yu i fasfas o bae yu filim nogud. Yumi nidim hapi mo harem nogud. Yumi nidim glad mo sore. Evri eksperiens ia, ol filling ia, hem i wanem we i mekem laef i naes mo i fulap long glad.
Elda Kearon: Mi wantem ademap wan eksampol blong Jekob. Mi stap tokbaot Jekob long ples ia, mo Jekob 4 long ves 2 kasem 4, yumi save ridim:
"Be mifala i save raetem smol toktok long ol buk, we bae i givim ol pikinini blong mifala, mo tu, ol brata blong mifala we mifala i lavem olgeta tumas, wan smol pat blong save long saed blong mifala, o long saed blong ol papa blong olgeta—
Nao long samting ia mifala i stap glad; mo mifala i wok strong wetem strong tingting blong raetem ol toktok ia long buk, wetem hop ia se ol brata blong mifala we mifala i lavem tumas mo ol pikinini blong mifala bae oli kasem olgeta toktok ia wetem hat blong tangkyu, mo bae oli lukluk long olgeta blong mekem se oli save lanem samting wetem glad, be i no wetem harem nogud. …
“Nao, from plan ia, mifala i bin raetem ol samting ia, blong mekem se bae oli save se mifala i bin save long Kraes, mo mifala i bin gat wan hop blolng glori blong hem plante handred yia bifo hem i kam.”
Wanem we mi laekem abaot hemia hem i, bakegen, Jekob i tingting oltaem abaot ol narawan. Hem i oltaem tingbaot olgeta raon long hem, mo long ples ia hem i stap tingting abaot ol nara jeneresen we i stap kam. Hem i tekem kasem level ia. ?Wanem nao hemia i mekem blong hem? Hemia i stopem hem blong wari, i givim hem bigfala glad, mo i givim ol jeneresen—i kam kasem tede—bigfala glad taem yumi ridim abaot hem.
Sista Kearon: Mi ting se wan bigfala samting we i mekem yumi wari bigwan hem i taem yumi lukluk raon long wol mo yumi luk ol problem, yumi luk wanem we i stap hapen long nius raon long wol, mo hemia i mekem yumi wari. Mo wetem bigfala sore, sam long yumi oli stap laef long ol taem ia mo tru long ol taem ia blong nogatt spel mo nogud fasin. ?Mo from wanem hemia i mekem yumi wari? From se spirit blong yumi i no spirit blong raorao. Jisas i tijim se "spirit blong raorao i no kam long [Hem].” Spirit blong yumi i blong gat kaen fasin, tingting we i stap daon, lav, fasin blong fogiv mo pis. I mekem se taem yumi luk olgeta we oli go tru long ol problem mo rabis fasin blong laef we i raonem yumi, hemia i had tumas long spirit blong yumi. Yumi no wantem luk hemia.
?Nao, wanem ansa nao Jisas bae i givim? Yumi save se Hem i talem se, "Long wol ia", yes, "bae yufala i harem nogud." Bae i gat haedtaem mo rabis fasin. Bae i gat wo, mo bae i gat ol problem. Be nomata long hemia, Jisas i talem, "bambae tingting blong yufala i save stap kwaet." ?From wanem? From se “Mi mi winim wol ia finis.” Yumi nidim blong mekem sua se yumi offem koneksen blong yumi wetem ol sosol media nius blong mekem se yumi save konek wetem Sevya mo kasem paoa long Hem tru long pis blong Hem ia we i kam from Hem i winim wol finis mo i pemaot praes blong evri nogud fasin we yumi luk raon long yumi. Tekemaot hevi samting ia we i stap mekem yu wari mo givim long Hem. Hem i strong inaf blong karem.
Letem yumi wajem nekis vidio.
Faenem Glad taem Yumi No Sua
Yang Adalt: ?Hao nao yumi faenem glad olsem wan yang adalt taem yumi no save tumas abaot wanem we bae i hapen long fiuja blong yumi?
Sista Kearon: Ansa blong hemia hem i—semmak olsem ol nara samting—i stap long fet mo tras long Jisas Kraes mo hat blong Hem we i gat plante lav. Hem i gat fiuja ia we i stret evriwan blong yu—blong wanwan long yumi. Sapos yumi save trastem hemia moa, yumi save letem yumiwan i sarenda moa long Hem mo foldaon long ol han blong Hem mo laef folem tingting blong Hem mo yumi save trastem moa ol gudfala samting we i stap kam. Mi ting se hemia i helpem yumi bigwan blong faenem glad. Hem i mekem yumi filim gud mo i putum pis long hat blong yumi-blong gat tras long fored blong Lod. Yumi glad oltaem taem we yumi mekem fet mo tras blong yumi long Kraes mo long plan blong Hem i kam antap. Hemia i eksperiens blong mi. Mo taem ol had situesen oli kam, mo hemia bae i neva stop, yumi no nid blong sapraes from hemia, yumi no nid blong foldaon evriwan. Yumi save tanem ol hat blong yumi moa fulwan i go long Hem mo askem, "OKEI, long situesen ia, ?Yu wantem mi lanem wanem? Wanem nao bae mi mekem naoia?" wetem wan tras we i stret evriwan se bae Hem i lidim yu.
Elda Kearon:Mi laekem hemia tu. Samtaem taem yumi wari abaot fiuja, bae i save help blong lukluk i gobak bihaen. Laef blong yu i wan miks blong ol gudfala taem mo ol hadtaem long ol defren level blong laef. Mi harem ol man i talem se, "Yumi no save se hil we yumi klaem long hem i bigwan kasem taem we yumi lukluk i kambak daon." Hemia i soem wan klia pikja long mi. Mo yes, samtaem yumi fraet long hil ia we yumi mas klaem long hem, be taem yumi luklukbak i kam daon yumi talem, "Wao, mi klaem long wan bigfala hil ia," hemia i save givim yumi tras from fiuja.
Sista Kearon:I help bigwan blong tingbaot se "Spirit ia we God [i] givim long yumi, hem i no blong mekem yumi fraet, nogat. Spirit ia i blong mekem yumi gat paoa, i blong mekem yumi lavem ol man, mo i blong mekem yumi naf blong blokem ol samting we yumi nomo i wantem .” Yu stap long wan taem long laef we yu gat plante desisen long fored blong yu—bae i gat plante fokrod—mo bae i mekem yu no sua long ol samting. Yes yumi no sua, be i help blong tingbaot se yufala, wanwan long yufala, oli odenem yufala finis. Bifo yu kam long wol ia, taem yu bin laef yet wetem famli blong yu long heven, oli odenem yu finis from ol stret misin blong yu mo ol stret wok blong yu, mo oli odenem yu blong winim ol misin ia, oli odenem yu blong kasem bigfala paoa, blong helpem Lod long bigfala wok ia blong Hem. Taem Jehova i stap toktok long Josef, Hem i talem. “Mi gat wan wok blong yu, Moses, … boe blong mi.” Mo hemia i tru tu blong wanwan long yumi. Hem i gat wan wok blong yu mo blong mi, mo oli odenem yumi blong mekem ol bigfala wok.
Elda Kearon: Hemia i wan gudfala tingting. Mi ting se wan long ol invitesen blong yumi long naet ia i we yumi tingting moa abaot hemia. Ating blong sam we oli gro i kam antap wetem save ia se oli bin odenem yumi blong mekem ol bigfala wok i wan samting we i nomol long olgeta. ?Be save ia i lusum valiu blong hem from i stap oltaem olsem pat blong laef blong yumi? Be hemia i tru.
Long simpol toktok, taem mi askem [waef blong mi] blong maredem mi, wan waes woman long laef blong mitufala—long saed blong faenem glad naoia long taem we yumi no sua—i talem long mitufala se, “Hapines i kam long ol smol spun.” No hem i talem se, "hapines i kam long ol smolsmol spun blong ti." Mo hemia i wan naes pikja we i stak long hed blong mitufala. Hem i stap minim se glad i wan naesfala moning. Hapines i wan smol naes tes blong wan samting. Hapines i wan taem we yumi spendem wetem wan fren. O eni nara samting. Be hapines i kam long ol smol spun. Hemia i wan.
Mo nara samting we mi wantem tokbaot hem i we blong faenem hapines i nidim praktis. Evri samting ia i nidim praktis, i nidim blong yumi wok had mo traehad. Mo naoia bae mi invaetem yufala—bae mitufala i invaetem yufala blong faenem hapines wan aoa long wan wik: sakramen aoa ia long Sandei. Letem yumi mekem sakramen i kam wan taem blong bigfala glad blong wik we yumi save eksperiensem. Mo afta yumi save gat hop ia se hapines ia bae i kam bigwan moa stat long ples ia i go. Be traem pikjarem sapos yumi no tekem aoa ia olsem wan bigfala taem blong hapines long wik. !Hemia bae i blong nating nomo. Mo naoia wan invitesen i kam long yufala blong mekem sakramen blong yufala wan taem blong bigfala glad. Mo yes, bae yu krae taem yu tingbaot presen blong Sevya we i safa from sin, be yu mas glad taem yu tingbaot Hem se Hem i openem tumb mo evri samting we hemia i ripresentem mo evri harem nogud we Hem i karemaot long yu.
Okei, ating bae yumi wajem wan moa vidio.
Andastanem mo Folem Atonmen blong Jisas Kraes
Yang Adalt: ?Hao nao yumi save andastanem gud Atonmen? ?Hao nao yumi save folem Atonmen long laef blong yumi?
Elda Kearon: Mi bin joen taem mi gat 26 yia. Mi gobak long hemia mo olsem wanem i bin had long mi blong andastanem Atonmen long taem ia. Mi bin sapraes mo mi no save bilivim. I mekem se, taem mi stap tingbaot hemia naoia, long saed blong plan ia: Papa long Heven, wan Papa long Heven we i gat lav, we i lavem yumi, ol pikinini blong Hem. Mo stamba tingting blong yumi blong kam long ples ia—i blong lan, blong gro, blong toktok wetem ol narawan mo lavem olgeta, blong wokbaot wetem fet. Mo Atonmen ia.
Hem i save se bae yumi mekem mistek, i mekem se Hem i sendem Pikinini blong Hem we Hem i lavem—yu save samtaem yumi talem, “Yumi luk ol rabis samting raon long yumi, yumi krae; yumi tingbaot ol mistek blong yumi, yumi krae”—blong i karem ol sin blong yumi long Hemwan. ?Olsem wanem hemia bae i hapen? Bae Hem i eksplenem hemia wan dei, be yumi save se Hem i bin mekem. I mekem se taem mi lukluk Atonmen olsem, mi tingbaot stamba tingting blong plan ia blong hapines blong Papa long Heven blong yu mo blong mi. Mo afta wetem tingting ia, mi save stat blong andastanem. Be mi ting se i nogat wan long yumi long ples ia we i kasem gud save ia blong Atonmen we i stret evriwan.
Taem yumi andastanem se plan ia mo Atonmen i save helpem yumi blong gotru ol hadatem, eni hadtaem, yumi andastanem pis, andastanem lav mo gad, mo tu andastanem se ol sin mo rabis fasin blong ol narawan, evri samting i oraet long saed blong mi. Mo long mi, afta long ol krae, i gat bigfala glad. Hat blong mi i fulap long tangkyu blong save se Hem i bin tekemaot evri samting ia. Mo hemia i wan naesfala save afta long ol krae, afta long harem nogud, afta long eni soa long bodi-hapines ia. Bakegen hemia i bitim save blong mi. Be i stap ia, hem i tru mo i naes. Mo naoia mi filim hemia.
Sista Kearon:Eni taem we mi kasem paoa blong wet longtaem smol moa bitim ol nara taem o blong holem taet miwan smol moa bitim fastaem o blong mekem wan joes we i moa gud —evri taem we mi kasem paoa mo daereksen o wan smol rimaenda blog kam moa gud—hemia long mi i paoa blong Jisas Kraes we i kam tru long sakrifaes blong atonmen blong Hem. Se Hem i gat ol raet blong sore. Hem i kasem ol raet blong sore mo paoa we i kam long Papa blong mekem se Hem i save givim paoa blong Hem long yumi tru long klin fasin we i kam, from Hem i bin safa from yu mo mi long garen ia mo long kros. Mo from se Hem i wantem mekem hemia i go kasem en, Hem i gat raet mo paoa ia blong givim paoa blong Hem long yu, blong givim lav blong Hem long yu mo blong givim hop blong Hem long yu.
Sista Kearon: Long Moses, yumi ridim se ol kriesen blong God i plante tumas. Yumi no save kaontem evrriwan. Be yet Hem i talem long Moses Moses 1, “man i no save kaontem olgeta; be mi mi kaontem olgeta, from se oli blong mi.” Long naet ia yu yu wan long ol milian man, be long wol , yu yu wan aot long ol eit milian man, mo iet God i kaontem yu. Hem i save yu. Hem i save yu, i lavem yu, mo i save evri smol infomesen abaot laef blong yu. Hem i save nem blong yu mo bae Hem i “livim ol naenti naen” blong go lukaotem wan ia. Sapos wan ia hem i yu, sapos wan ia i wan we yu lavem, ol 99 ia oli no gud inaf long Sevya. Hem i wantem wanwan long yumi; mo wok blong Hem bae i no save finis kasem taem we yumi evriwan i sef insaed.
Elda Kearon: Mo sapos yumi andastanem wan moa impoten samting abaot Atonmen blong Sevya, maet i stap long 2 Nifae japta 9: “Taswe, i mas nid blong i gat wan atonmen we i no gat en—sapos i no wan atonmen we i no gat en, bodi ia we i save ded i no save jenis i kam wan bodi we i nomo save ded samtaem .” Mi hapi tumas from Atonmen blong Jisas Kraes we i no save finis mo from se yumi save kam tugeta long naet ia wetem fet, paoa, mo save we i kam tru long Atonmen.
Naoia yumi gat wan mesej—yufala i gat wan mesej we i kam long Presiden Dallin H. Oaks. Hem i wan sot mesje nomo. Hem i no bitim tu minit. Be taem yufala i stap lesin long hem, plis lesin long promes hem i givim long yufala.
Presiden Dallin H. Oaks: Ol dia fren blong mi, wan long ol bigfala janis blong lan, kam tugeta, mo leftemap ol narawan i stap long taem blong institiut.
Yumi laef long wan taem we i gat plante noes mo man i konfius. Be long institiut, bae yufala i lanem trutok aot long rong, bildimap rilesensip blong yufala wetem Papa long Heven mo Pikinini blong Hem Jisas Kraes, faenem daereksen mo ol ansa blong sam bigfala kwestin abaot laef, mitim ol narawan blong helpem yufala long kavenan rod blong yufala, mitim olgeta we yufala i jusum blong deitem o maredem olgeta, mo stap rere blong lavem mo lidim ol narawan olsem we Sevya i mekem.
Ol dia yang yut blong mi, mi invaetem yufala blong atendem institiut oltaem. Mi leftemap tingting blong yufala blong invaetem ol fren mo serem ol blesing ia wetem olgeta. Mi promes se taem blong yufala long institiut bae i tekem pis, glad, mo tabu lav blong Sevya i kam. Long nem blong Jisas Kraes, amen.