Kakarabakau ao Marooro: Unimwaane ao Titita Kearon ao Kairake n Ikawai
Bootaki n Taromauri ni Kabuta te Aonaaba ibukia Kairake n Ikawai
Tabati, Beberuare 1, 2026
Unimwaane Patrick Kearon: E tamaroa raonakimi ikai n te tairiki aei ni bukamarua ana ka-100 n ririki te intitute, ao n iangoia naake a onikaki man te tieminari ao intitute rinanon ririki akanne. E rangi n tamaroa norakimi n roko n te tairiki aei. Ao N a kona n taekinna bwa iai namakinan te mweraoi n te aro ae bubura. Au kantaninga bwa kam noria ae iai taura aika bebete otaia ae a karekea namakina te mweraoi ikai.
E kakukurei menara ibuakomi, ao ti inganginga nakon te tai aio ao kam rabwa ibukin rokomi. Ti ataia bwa iai ibuakomi aika kam ooaki ma onraken te kawai, ma ibukin nanomi ae rine, kam bon roko naba.
Titita Jennifer C. Kearon: Eng, ti rangi ni kukurei n ongo maningoongoo mai roumi n te tairiki aei, ao ti tarai moami ngkami ake kam raoniira ikai n te tairiki aei. Ma ti kataia naba ni iangoi ngkami ake kam bootaki inanon umantabu ke ni mweenga ke ni bon ti ngkoe ni mataku n te tairiki aei—ngkai ko ukora kaaniam ma te Tia Kamaiu. Ti bane n tangiri ngkami, ao ni kakaitau ngkai ti mena ibuakomi.
Uoua te wiiki n nako, e reke ara tai ae tamaroa ni kaitibo ma uoua kurubu aika kakaokoro aika roromi—ao tao bon iai, tabeman mai ibuakoia aika a roko n te tairiki aei—ao ti tekateka ao ni marooro ma ngaiia. Ti kakaraki ma ngaiia inanoni teuana te aoa ke nako riki ma uoua kurubu aika kakaokoro. A roko ma aia titiraki, ao ti anga tabeua kaekaaia. A tei man aaba aika kakaokoro: kairake n ikawai man te United States, mai Mexico, mai Norway, mai Curacao n aban te Caribbean, ao man te Republic of the Congo.
Unimwaane Kearon: Ngaia are te bwai ae ti na karaoia ngkai ti na rinanon nimaua titiraki ake ti anga iaon te witeo. Ao imwina ti na anga taeka tabeua imarenaia Ngaia are ti a mataku n te moan witeo.
Ata Raoi ao Tokanikai i aon Baika a Tukiko
Kairake n Ikawai: Tera tabeua bwaai aika tutukiira aika a rangi ni korakora ae ko noria ae ngaira YSA ti katikui i aon kawaira are e tukiira man Ana tangira te Atua ke toa n riki nakon are E tangiria te Atua bwa ti na riki nako iai?
Unimwaane Kearon: Ngkana I iangoi bwaai ake a tutukii ngkami kairake n ikawai, e roko te iango ae aio bon te bwai ae tei bwa te kakatai kanga aiaron te taneiai n am kamatebwaia—te kakatai ae kanga e tara ni kangaanga arona I aki ataia. Ma I taku bwa kanga te iango ae matoa are e kona ni karinaki nakon arora ni waaki n te maiu aei ao te maiu ae akea tokina.
Na anganiko te kibu n taeka ae tatangiraki mai iroun Beretitenti Henry B. Eyring: “Te Uea e aki katikuira rinanon te kataaki aei … bwa e na nora ara bwii; E karaoia ibukina bwa te bwai are ti rinanona e na bitiira.”
Ti aki kataaki n aron ae ataein te reirei—ti bon anganaki ara tai n ukeuke nako ao n reiakinaki. Tiaki ibukina ae iai temanna ae kawakin mwiin bwii aika akea tokiia, ma ibukina bwa ti kainanoia n rikirake ao n ewenako ao n ataibwai ao ni mataata raoi bwa antai ngaira. Ngaia are bon tiaki taekan te bwai ae tutukiira. Bon taekan raoi te kawai ae e kaweneaki ibukira, ae n tabetai bon taneiai aika a rangi n tatangiraki aika tamaroa, ao n tabetai bon taneiai aika kangaanga man korakora mwiia.
Titita Kearon: Tera aron bwaai n tutuki aika te raraoma ma te maaku? Tera aron te bwanaa are n am iango? A kona naba n riki bwa bwaai aika tutukiko. Bwanaa aika kabara nanom. Bwanaa aika a tuangko bwa ko kabwaka Bwanaa aika a tuangko bwa ko aki tau. Ao a bon mwaiti bukin ae riki anne: Tao e aki reke am mwakuri. Tao ko aki baati n te ukeuke. Tao iai nanom ni kan mareaki ma ae ko bon tiku naba n aki mareaki. Ke tao ko raure. Ao tao ko korakai n aekain korakai akanne, buure aika ti tearona, kangaanga aika ti tearona, aika a reke iroum n te tai ae maan. Ngaia are bwanaa aikai a taku, “E aki tau tamaroau, N a aki kona n tamaroa, N a aki roko n are e kantaningaaki, ao N a aki riki nakon are E kantaningaia te Atua bwa N a riki nako iai.” Ngai irou bwa akanne bon bwaai aika tukiko. Ao n tabetai I bon ongo naba bwanaa akanne.
Aekakira aron bwanaan te Tia Kamaiu n am iango? Te bwanaa ae kaokoro nakon are I a tia ni kabwarabwarai, bwanaa ni kakaniko ao ni kakaitara ao ni kamaamaa, bwanaa n akea te kantaninga. Ongora nakon te bwai are e taekinna nakoira te Tia Kamaiu ni Ioane te mwakoro 10. I tangira aei.
“E bon koaua ae I a tuangngkami bwa ane aki rin i nanon nen te tibu man te mataroa, ma e tamwarake n te tabo teuana, ao bon te tia ira ao te tia kamarua.
“Ma ane rin n te mataroa ao te tia kawaki tiibu.
“… Ao a ongo bwanaana tibu: ao e weteiia ana tibu n araia nako, ao e kairiia nako.
“… Ao e ri moaia, ao tibu a iria: bwa a kina bwanaana.
“Ao a rawa n ira te ianena, ma a biri nako mai rouna: bwa a aki kinai bwanaaia ianena.”
N tabetai ao e roko bwanaan te ianena n am iango, bwanaan te tia ira ao te tia kamarua, ao ngai naba. E riki naba Nakoiu. Bwanaan temanna ae e aki kinako, ae aki tabe ibukim, ao ni koauana, temanna ae e kataia ni kamaunako. Ti riai n aki ongo nakon bwanaa akanne, bwanaia ianena, taan iraa, ao kamwarua, ma irarikina ongo nakon banaan ara Tia Kawakin Tiibu ao Raoiroi, are e aki toki ni kaungako, n tangiriki, ao e on n te kantaninga ni katoa tai. Eng, E weteira bwa ti tamaroa. Eng, E weteira bwa ti na rairi nanora ngkana e riai. Ma Bwanaana bon mai iroun temanna—mairoun te Tia Kamaiu are e tangiriira, are e a tia ni kabwakaa kaboakira, ao ni koauana, temanna are e kabaeaki n te berita ae tabu nakoira n tatabemaniira nako. Ngaia are kanuai ngkami n Ana taeka Kristo, tiaki n aia taeka ianena.
Ngaia, tia mataku n te witeo are imwina.
Buokiia Naake a Taonnako
Kairake n Ikawai: Iai mwakoron te maiu aika kakaokoro ike I kawakin tuua ni kaineti nakon ake E kantaningai te Atua bwa na kawakin, ma ko na kanga ni buoka raoraom are ko noria bwa e a manna n taonako man ana waaki ni kakukurei te Ekaretia ke man namakinan te Tamnei n te bong teuana ma teuana? Ko na kanga ni buokiia ao n aki taekinna, ae ni koauana, a bon kairua?
Titita Kearon: E matoatoa ibukina bwa ko aki tangiria n noraki bwa ko motikii taekaia. Ko aki tangiria n noraki, n aron ae ko ataia, ae ko kangai, “O, eng, arou ni maiuakina te euangkerio bon te kawai ae tamaroa riki ke te kawai ae eti.” E bon oki rikaaki nakon te tangira ao te tai, anne au iango. Raoraom a kainanoa namakinan am tangira ao ni kan ataia bwa ko tauraoi n anganiia te tai are a kainanoia.
Ao tao raoraom a roko n te karinan are a kainanoia ni maroroakin tabeua bwaai ake a mena n aia iango ao i nanoia. Ao ko kona n anganiia te rongorongo—ae te aomata ngkoe ae ko onimakinaki, temanna ae e kona n tangiriia ao n tabe ibukiia ao ni buokiia n aki tabe ma te bwai are a rinanona. Ko na bae n aki titebo ni iango ma ngaiia, ko na bae n aki rinea are a rineia, ma e karika te bitaki ae korakora nakon raoraom are e inimaki ni karekea te tabo ae rau ae na mena iai ao a na iai temanna ae a koaua irouna bwa e tabe ibukiia.
E ibuobuoki, I taku, n taekinii taai ngke, tao, e korakora namakinan te Tamnei nakon ae ngkai ke inanon taai ngke a a rangi ni maiuakina te euangkerio ma te onimaki nakon ae ngkai. Ao marooro ma ngaiia bwa aekakira aron te maiu ngkoa ao te kaokoro ae a noria ngkai.
Ao ma te kokoaua, te marooro n reitaki ae nako mai nanomi, ao ma tamneimi ike ko aki ti anganiia te rongorongo ae, “O, eng, ko aki taekina ae I kantaningaia bwa ko na taekinna ke ko aki anganai te kaeka ae I tangiria n ongo ngaia ae N a katoka te marooro aei.” I taku bwa e rangi ni kakawaki anne.
Ao aio oin te reirei are e kaineti inanon nako ara reitaki. Bon te tua ae kaineti nakon waakin te nakoa ni karo. Bon te tua ae kaineti, n aron ae ko ataia, n ara mamarooro nakoia ake ti tangiriia ni waaki nako.
Unimwaane Kearon: Eti anne. Ao I taku bwa e nakon ae a mena iaa—e taetae Carl i aon raoraona are tao e a bobonako—bwa tao a mena iaa, ti na riai ni kataia ni buokiia n teimatoa ni ira te waaki—ti taetae i aon ana waaki ni kakukurei te Ekaretia. Ti taetae i aon te rangi n roroko nakon te Ekaretia. Bon te kibu n taeka ae nano nanona nakon are e rairaki bwa e na ongo te taeka anne. Ma I taku bwa ti tangiria ni karaoi bwaai ni kabane ake ti konaa ni katabetabeia bwa a na ira te iwawaaki, ni kateimatoaia n roroko, ni buokiia bwa a na buokiia tabeman. Ngkana iai nakoaia, ni kaeka nakon te wewete anne ao ni kabanea nanoia iai. N reirei, n ibuobuoki, ao n tabeakiniia naake a rinanon te korakai. I taku bwa e bon tau ae Ana Boki Moomon e moanaki ma Riaai ao ana utu—ma aron Nibwaai ni karaoa te mwakuri—ao bon ngaira aomata aika ti waaki ao ni mwakuri. Ao I taku bwa iai te korakora n anne. E karika ara onimaki ni maiu. Ao ngkana e a kekerikaaki ara onimaki teutana, e kona ni katikira n oki. I tangira are e taekinna Beretitenti Monson i aon te Tia Kamaiu. E taekinna bwa e aki toki te Tia Kamaiu ni waaki nako ao ni mwakuri. I taku bwa ti kona ni iriira te banna ae kakukurei anne.
Tia nora te witeo are imwiina.
Namakina te Rau n Aki Tabe ma te Raraoma
Kairake n Ikawai: I a bon tia—ngkai te aomata ngai ae I raraoma, bwa n tabetai e kangaanga irou bwa N a kukurei ngkana I rararaoma ni katoa tai. Ao I bae ni iangoia ngkana iai ami nonori iaona bwa N a kanga n namakina te rau ae korakora iroun te Tia Kamaiu bwa e aonga te kimwareirei anne n roko n ae korakora?
Unimwaane Kearon:Te titiraki ae tamaroa ibukina bwa ti bane n rotaki n te maaku ao te raraoma n te tai teuana ma teuana. Tabeman i buakora a korakora riki rawawataia i aon akanne nakoia tabeman. Iai ibuakora ae ti kainanoa te buoka ni kaitarai maakura ao raraomara. Tabeman mai i buakora e a uotiira nakon kabonganaan bwainaoraki, ao n tokina, ti a rangi ni baati ni ibuobuoki ke ni karekea te buoka man te kuakua ibukin te maaku ao te raraoma.
Ngkana ko nori koroboki aika tabu, n ae I kona n taekinna, rongorongon temanna ni koroboki aika tabu are e taekina arona n raraoma ao “raraomau ae korakora” nakon riki temanna bon Iakobwa. Ao e kakaongora, ibukina bwa kanga e kaokoro raraomana nakon raraomau, ni iterana aika mwaiti. Raraomana e rairaki nakoia tabeman. Raraomana bon ibukiia ana aomata ao aron maiuiia. Raraomau e korakora riki bon ti ibukiu ao tera ae I karaoia ao tao I karaoa ae aki raoiroi n aio ke ni bwaai tabeua. Te bwai ae I reiakinna ae okioki—n a riai n reitinako n reiakinaki ao ni manga reiakinaki—bwa ngkana I iango ibukiia tabeman, e nako te raraoma are irou. N a bon riai ni iango ibukin aron marurungiia tabeman, ao e moanna ni bua raraomau. Ni koauana, ai bon akea. N angiin te tai, e a bon bua naba. Ao ngkana I karaoa ae tamaroa ibukin temanna, e bon korakora te mwaaka ni karaon anne. Ngaia are I tangiria n riki n aiaron Iakobwa ao ni karika raraomau ni iango ibukiia tabeman. Ao I taku bwa iai te bwai ae korakora—I ataia bwa e korakora te kamaoaki.
Titita Kearon: I iango bwa tia a mena—inanon taai aika boou, ti taneiai n namakina te aki rau ke te maraki ao n te tai ae waekoa ti tangira bwa e na akea. Ti bon rinanon te rauaki ae tawe. Iangoia ae ko tei iaan te tiawa ao kanga e rangi ni mwaitoro te ran, ma I ti kaminoa teutana bwain katiana nakon te atai, ao ea abuee naba, n aron ae ko ataia. Ke tao tera riki. Ao tia rangi ni kantaningaa ae ti na mweraoi. Ti tangiria ni mweraoi. Aomata a tangiria n namakina te mweraoi—ti aki tangiria n namakina te aki rau.
Ngkana ti namakinna te raraoma ibukin taai aika a na roko ibukina bwa ti aki koaua raoi iai ao aki ataaki kanoaia, anne e bon ririki. Ao I taku bwa ti riai ni butimwaea te mwakoro anne ngkai ngaira aomata, mwakoron te maiu n te aonaaba aei, bon butimwaean taai n aki rau ao ni kariaia bwa te aki rau e na bae n rangi ni maan ao n nakoraoi ma bwaai aika aki ataaki. Ko na bae ni kariaa inanon tabeua boong ke wiiki ke tao bon tabeua namwakaina ae ko rinanon te aki koaua ke tao teutana, te nanokawaki. Ti kainanoa te kukurei ao te nanokawaki. Ti kainanoa te kimwareirei ao te rawawata n nano. Ao taneiai akanne, namakin akanne, bon ngaia ae e karika te maiu bwa e na kakaongora ao n tamaroa.
Unimwaane Kearon: I tangiria ni karina te katooto ae onoti mairoun Iakobwa. I taetae iaon Iakobwa ikai, ao Iakobwa 4 n kiibu 2 nakon 4, ao ti warekia:
“Ma ti kona ni koroi taeka tabeua i aon taian bwaatua, are a na kona iai natira ma tarira aika a tangiraki ni karekea mai iai ataan taekara teutana, ke taekaia aia bakatibu —
"Ao ti kimwareirei ni karaoan te bwai aio; te botumwaaka ni beku ni koroi taeka iaon taian bwaatua, ma te kaantaninga bwa a na butimwaei tarira aika a tangiraki ma natia ma te kaitau inanoia, ao a na reiakin n te kimwareirei n tiaki te rawawata, ke n te aki rau n nano. …
“Bwa, bon aio bukin korean bwaai aikai, bwa a na ataia ae ti ataa taekan Kristo, ao ti kariaria rokon mimitongina bubua n ririki i mwain rokona”
Te bwai ae I tangiria n aio bwa, teuana riki, e aki toki Iakobwa ni iangoia aomata tabeman. Ngkai, e aki toki nni iagoia aomata ake a mena irarikina, ao ikai e iangoia aomata ake n rooro ake a na roko rimwi. E rangi ni karimoaa ana taratara. Ao tera raoiroin anne ibukina? Eng, e kanakoa te rawawata mai iaona, e anganna te kimwareirei ae korakora, ao e angan te roro nako—ni karokoa boong aikai—te kimwareirei ae korakora ni wareka are e koreia.
Titita Kearon: I taku bwa teuana oin te raraoma ae ti bane n rinanoa bon ngkana ti tara te aonaaba ao n nora te aki rau, ti nori baika a riki n rinanon rongorongon te aonaaba ni kabutaa, ao anne ae e karika te raraoma. Ao ae e urua riki te nano, tabeman mai ibuakora a maiu ao n rinanon tai n aki rau, babakanikawai ao te inanonano. Ao eaera bwa a anganiira akanne te raraoma? Ibukina bwa tamneira a bon aki katauaki ibukin te itabaraaraa. E reirei ni kamataata Iesu bwa “tamnein te kakauntaeka bon tiaki mai [Irouna].” Tamneira a bon katauaki ibukin te atataiaomata ao te nimamanei ao n tangira ao ni kakabwarabure ao n rau. Ngaia are ngkana ti noria aomata bwa a rinanon te aki rau ao te babakanikawaiaki n te maiu are a katobibiira, e na bon rangi ni kangaanga ibukin tamneira. Ti aki tangiria n noora anne.
Ao, tera ae e na taekinna te Tia Kamaiu ni kaekaan anne? Ti atai bwa E kangai, “N te aonaaba," eng, "ko na rinanon taian rawawata.” E na iai te aki rau ao te babakanikawai. E na iai te bubuaka, ao e na iai te kabuanibwai. Ma irarikin akanne, e taku Iesu, “Kam na kukurei.” Bukin tera? Ibukina bwa “I atia n tokanikai i aon te aonaaba..” Ti riai ni kakoauaa raoi bwa ti a katoka moa kanakoan rongorongo i aon bwaai n reitaki n te aro bwa ti na kanimwiira ma ara Tia Kamaiu ao ni karekea Ana rau are e na roko ibukina bwa e a tia n tokanikai i aon te aonaaba ao n tia ni kabwaka boon waaki ni inanonano ao babakanikawai ni kabane ake ti nori aika a katobibira. Kanakoa te tataninga ao te raraoma mai iaon bwabwaam ao katokai Iaona. E bon tau korakorana n uouotii.
Ngaia, tia mataku n te witeo are imwina.
Kunea te Kimwareirei i Nanon taai Aika Tiaki Koaua Raoi Iai
Kairake n Ikawai: Ko na kanga ni kunea te kimwareirei ngkai te kairake n ikawai ngkana ko a bon aki ataia bwa tera ae e na riki nakoim n taai aika a na roko?
Titita Kearon: Te kaeka nakon anne e na rangi ni boboto iaon—n aron ake tabeua—te onimaki ao te kakoaua iaon Iesu Kristo ao Nanona n tatangira, ae moan te korakora. Bon iai Irouna te bwai ae moan te tamaroa ibukim nakon taai aika a na roko—ibukira n tatabemaniira nako. Mwaitin ae ti kakoaua iaon anne, mwaitin ae ti kariaia bwa ti na taenikai ao ni mena i nanon Baina ao ni maeka ni kaineti n nakon Nanona ao mwaitin ae ti kona ni kakoaua ni bwaai aika a tamaroa n roko. I taku bwa e na rangi ni buokiira ni kunea te kimwareirei. E anganiira namakinan te kamatoaaki ao te rau i nanora—te mwiokoaki raoi imatan te Uea. Akea te bwai ae ti kona ni karaoia ma ti te kimwareirei ngkana ti karikirakea te onimaki iaon Kristo ao Ana babaire ibukira. Anne bon te bwai ae I rinanona. Ao ngkana a roko bwaai aika a kangaanga, aika a bon riki ao n aki toki n ririki, are ti bon aki kubanako iai, ti aki kainanoia ni kamwaingaki nako man kawaira. Ti ti kona ni kaetii nanora ni kabane Nakoina ao n Titirakinna, “E Tamaroa, ma n te bwai ae riki aio, tera ae Ko tangiria bwa N a reiakinna man aio? Tera ae N a bon riai ni karaoia ngkai?” ma te onimaki ae kororaoi bwa E na kairiko i aon kawaim.
Unimwaane Kearon: I tangira naba anne. N tabetai ngkai ti raraoma ibukin taai aika a na roko, e na bon aki ibuobuoki ngkana ti tanrikaaki. Ao maium e na riki bwa kanga ikotakin taai aika tamaroa ao taai ni kakaewenako ni mwakoro aika kakaokoro. I a tia n ongo ae a kangai aomata, “Ti aki ataia bwa ai rietara ngaira n tamwarakera ni karokoa ti a tanrikaaki man te maunga." Anne kanga bon katamneiana ae tamaroa ibukiu. Ao eng, te maunga are ti na tamwarakeia e tara ni matoatoa, ma ngkana ti tanrikaaki ao ti na kangai, “Ai kamimira ngaia I a roko ikai,” anne e kona n anganiira te onimaki ibukin taai aika a na roko.
Titita Kearon: E rangi ni ibuobuoki n uringnga bwa “E aki anganiira te Atua te nano ae mamaku; ma E anganiira te nano ae korakora, ae tatangira te aba, ae kawanawana te aba.” Ko a mena n te tai inanon maium ae a mwaiti rinerine aika a tei imatam—a rangi ni mwaiti kanga kateketeke inanon te kawai—ao ko aki rangi ni koaua iai. Ko bon aki koaua iai, ma e ibuobuoki uringakina bwa ngkoe, ngkami n tatabemani ngkami, kam a tia ni kaman katabuaki. Imwain rokom n te aonaaba aio, ngke ko maeka ma am utu ake i karawa, ko katabuaki ibukin te kantaninga ao mition aika onoti, ao ko katabuaki bwa ko na tokanikai, katabuaki ibukin bwaai aika korakora, ni buoka te Uea n Ana mwakuri ae korakora. Ngke e taetae Iehova nakon Mote, E kangai nakon Mote,, “Iai te mwakuri ibukim, … natiu..” Ao e koaua anne nakoira n tatabemaniira. Iai Ana mwakuri ibukim ao ibukiu, ao ti a tia ni katabuaki ibukin bwaai aika korakora.
Unimwaane Kearon: Bon te iango ae tamaroa. Ao I taku bwa teuana ara kakao n te tairiki aei bwa ti na kananoa iangoakin bwaai akanne. Bwa tao irouia tabeman ake a tia ni karikirakeaki ma te iango n te atatai aio n tia ni katabuaki ibukin bwaai aika korakora bon te bwai ae koaua. Ma tao e a bua kakawakina ibukina bwa e a tia n riki n tainako bwa ti te mwakoro n taeka n aron rikira? Ma bon te bwai ae koaua.
N taekana ae bebete, ngkana ti kairekerekea, temanna ae wanawana ni kairakira inanon maiura—nakon kakaean te kukurei ngkai n taai aika e aki koaua te aba iai n taai aika imwaira—e na kangai nakoira, “E roko te kimwareirei n ae korakora.” Ni koauana, e taku, “teutana imwin teutana.” Ao anne tamneina ae tamaroa ae tiku iroura. E nanonna n ae, n aron ae ko ataia, te kimwareirei bon te ingabong ae tamaroa. Te kimwareirei kanga bon katoongan te bwai teuana ae uarereke. Te kimwareirei bon te tai ma raoraom. Ke tao te bwai teuana riki. Ma e roko te kimwareirei n ae korakora. Anne teuana.
Ao are teuana ae I tangiria n taetae iaona bon kunean te kimwareirei e anaa te kataneiai. Ni kabane bwaai aikai a anaa te kataneiai, e anaa tabeua te tai ni mwakuri ao te kekeiaki. Ao I kaoi ngkami—ti kaoi ngkami bwa kam na karaoa teuana te aoa n te wiiki bwa te tai ae boboto iaon kuneakin te kimwarei: teuana te aoa n tain te toa n te Tabati Tia karika anne bwa te tai ae moan te kakimwareirei n te wiiki are ti kona n rinanona. Ao imwiina ti kona ni kantaningaia bwa e butanako te kimwareirei mai ikanne. Ma iangoia ngkana ti aki karika te aoa anne inanon te wiiki bwa e na rangi ni kakukurei. Ao iai te bua man anne! Ngaia are te kakao nakoim bwa ko na karaoa te aoa n am bootaki n toa bwa e na tamaroa, ae rangi ni kakukurei. Ao eng, a na iai ranimata ngkai ko iangoa aron ana bwai n tangira ni kamaiu te Tia Kamaiu, ma a na iai te kimwareirei ngkai ko iangoa otinakona man te ruanimate ao bwaai ni kabane ake a tei ibukina ao baike E a tia n anai mai iroum ni kaineti ma te rawawata.
Eng, I taku, bwa ai ti teuana riki te witeo.
Ataakin ao Kamwakuran Ana Mwakuri ni Kamaiu Iesu Kristo
Kairake n Ikawai: Ti na kanga ni kona n rangi ni mataata raoi n te Mwakuri ni Kamaiu? Ti na kanga ni kamwakura te Mwakuri ni Kamaiu inanon maiura.
Unimwaane Kearon: I kaaina ngke 26 au ririki. I okira te tai anne ao e rangi ni matoatoa irou te mataata iaon te Mwakuri ni Kamaiu n te tai anne. I bon miimii ao n aki kakoauaa. Ngaia are, ngkai I a iangoa anne ngkai, ni kaineti ma te babaire: Tamara are i Karawa, Tamara ae tatangira, ae e karineira, ngaira Natina. Ao te kantaninga ibukin rokora ikai—n reirei, n rikirake, ni kaitibo imarenara, n tangira, ni karaoa ae raoiroi n te onimaki. Ao te Mwakuri ni Kamaiu.
E ataia ae ti karaoi kairua, ngaia are E kanakoa Natina ae tangiraki—n aron ae ko ataia, ko taku, “Ko noria ao ko tang; ko iangoia ao ko tang”—bwa e anai burera ni katoka Iaona. N te aro raa? Eng, E kabwarabwaraa n te tai teuana, ma ti bon ataia ae E karaoi Ngaia are ngkana I iangoa te Mwakuri ni Kamaiu, I iangoa aron te kantaninga n Ana babaire ni kakukurei Tamara are i Karawa ibukim ao ibukiu. Ao man taekana akanne, I a kona ni moanna ni mataata. Ma I aki ataia ae iai mai ibuakora ae e a roko mataatana n ae kororaoi n ataakin te Mwakuri ni Kamaiu ikai.
Ma ngkana ti mataata bwa te babaire ao te Mwakuri ni Kamaiu a kona ni buokiira rinanon nako kataakira, taian kakaewenako, ni mataata n te rau, ni mataata n te tangira ao te kimwareirei, irarikin naba bwaai aika aki raraoi ao aia kairuaia tabeman, eng, ae I bon keiaki iaon kawaiu. Ao imwiin te ranimata, e roko te kimwareirei ae bati. E taonai nako te nano ni kakaitau bwa E uoti nako ni kabane. Ao anne bon te atatai ae rangi n tamaroa imwin te ranimata, imwin te nanokawaki, imwin maraki ni bane—te kakukurei. Bwa aio, e bon, riaon ae I kona ni iangoia. Bwa e riki, ao e koaua, ao e rangi n tamaroa. Ao I namakinna ngkai.
Titita Kearon: N taai ake I anganaki te korakora bwa n a taotaona nanou teutana irarikin are e na bon riai n riki ke ni kaota teutana te rau irarikin are e na bon riki ke ni karaoi rinerine aika tamaroa—ni katoa tai are I anganaki te korakora ke te kairiiri ke kauringakiu ikai ke ikekei bwa na tamaroa teutana—anne irou bon mwaakan ao korakoran Iesu Kristo are e raanga man Ana anga karea ni kamaiu. Bwa bon iai Irouna, n aron ae ko ataia, te kona n anga te nanoanga. E a tia n anganaki te kona n anga te nanoanga ao te mwaaka mairoun te Tama bwa E aonga ni kona n anganiira Korakorana ao Mwaakana ibukina bwa ni koauana E korakai ibukim ao ibukiu n te onaroka ao i aon te kai. Ao ibukina bwa E kukurei ni karaoa anne ao n rinanona ni karokoa e bwanin karaoana, bon iai irouna te konaa ao te mwaaka n anganiko Korakorana ao n anganiko Ana tangira ao n anganiko Ana kantaninga.
Titita Kearon: Ni Moote , ti warekia bwa Ana karikibwai te Atua aki kona ni warekaki. Akea te anga ae ti na kona ni warekii. Ma E taku ni Mote 1, “Aki kona ni warekaki iroun te aomata; ma a kona ni warekaki irou, bwa bon au bwai.” N te tairiki aei ngkoe mai ibuakon 1 n te 1,000,000, ma n etina n te aonaaba, ngkoe 1 n te 8,000,000,000, ma ko bon warekaki iroun te Atua. Ko kinaaki Irouna. Ko kinaaki ao n tangiraki, ao E ataa rongorongon maium ni kabane. E kinako n aram, ao E na “katikuia ake ruangaun ma ruaman” n nako n rimwiia are temanna. Ngkana are temanna anne bon ngkoe, ngkana are temanna ane bon temanna ae ko tangiria, 99 te betiente e aki tau tamaroana ibukin te Tia kamaiu. E tangiriia ni kabane, ao ena aki bwanin Ana mwakuri ni karokoa a bane ni mano ni ikotaki.
Unimwaane Kearon: Ao ngkana ti mataata n teuana te bwai ae kakawaki ni kaineti nakon Ana Mwakuri ni Kamaiu te Tia Kamaiu, bon aei man te ka-2 Nibwaai mwakoro 9: “Mangaia, ae e riai n akea tokin te mwakuri ni kamaiu—ma ngkana iai tokin te mwakuri ni kamaiu ao te rabwata ae mka aio e aki kona ni katoka te aki mka.” I rangi ni kakaitau ibukin Ana Mwakuri ni Kamaiu Iesu Kristo ae akea tokina ao ngkai ti kona ni uaia ni bootaki n te tairiki aei ma te onimaki, te mwaaka, ao te mataata are e reke mai iai.
Ngkai iai ara rongorongo—iai te rongorongo ibukim mairoun Beretitenti Dallin H. Oaks. Ao e rangi ni uarereke. Bon ti teuana ao teiterana te miniti maana. Ma ngkai ko ongora nako iai, taiaoka ongora nakon berita ake e kanakoi nakoimi.
Beretitenti Dallin H. Oaks: Raora aika kam tangiraki, teuana mai ibuskin taai aika korakora n reiakinaki, ni bootaki, ao n tabekirarake imarenara e bon kuneaki n te intitute.
Ti maeka ni boong ike karongoa ao kamangaongao a rangi n taotira. Ni kaitarana, n te intitute ko na reiakina aron atakin kaokoron te koaua man te kairua, karikirakea am reitaki ma Tamara are i Karawa ao Natina, Iesu Kristo, karekea kairam ao kunei kaeka nakon titiraki iaon te maiu, kaitibo ma tabeman ake a na buokiko i aon kawain te berita ae tabu, kaitibo ma temanna are ko na rineia ni marooro ao ni mareaki nakoina, ao ni katauraoi n tangira ao ni kairiiri n aron te Tia Kamaiu.
Kairake n ikawai aika kam tangiraki, I kaoi ngkami bwa kam na reitinako ni kaea te intitute. I kaungai naba ngkami bwa kam na kaoia raoraomi bwa a na katongii kakabwaia aikai. I berita bwa ami tai inanon te intitute e na uota ana rau te Tia Kamaiu, te kimwareirei, ao te tangira ae mairoun te Atua. N aran Iesu Kristo, amen.