44:17

អ្នកត្រួតត្រាដ៏សុចរិត—សិស្សរបស់ព្រះយេស៊ូវគ្រីស្ទ

ការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យ

ប្រធាន ខាំមៀល អិន ចនសុន

ប្រធានសមាគមសង្គ្រោះទូទៅ

ថ្ងៃទី៤ ខែឧសភា ឆ្នាំ២០២៥

សូមស្វាគមន៍ មិត្តសម្លាញ់វ័យក្មេងនៅទូទាំងពិភពលោក ! ខ្ញុំរំភើបចិត្តដែលមានឱកាសនេះដើម្បីនៅជាមួយក្មួយៗ—ដើម្បីចែកចាយសេចក្តីស្រឡាញ់របស់ខ្ញុំចំពោះក្មួយៗ និងបំណងប្រាថ្នារបស់ខ្ញុំសម្រាប់ក្មួយៗ ។ សំខាន់បំផុត ខ្ញុំសង្ឃឹមថាក្មួយៗនឹងទទួលបានបទពិសោធន៍មួយនៅល្ងាចនេះ—ជាបទពិសោធន៍មួយដែលក្មួយៗទទួលអារម្មណ៍នៃក្តីស្រឡាញ់របស់ព្រះ ហើយត្រូវបានបំផុសគំនិតឲ្យសម្រេចបាននូវសេចក្តីប្រាថ្នាដ៏ខ្ពស់បំផុតរបស់ទ្រង់សម្រាប់ក្មួយៗ !

យើងនៅទីនេះនៅក្នុងរោងឧបោសថប្រវត្តិសាស្ត្រនេះនៅវិសាលដ្ឋានព្រះវិហារបរិសុទ្ធក្នុងទីក្រុងសលត៍លេក ។ ការសាងសង់បានចាប់ផ្ដើមនៅលើអគារដ៏ធំនេះមួយរយឆ្នាំមុនពេលខ្ញុំកើត ។ វាជាពេលមួយដែលសម្ភារសំណង់មានតម្លៃថ្លៃនៅលើទឹកដីរដ្ឋយូថាហ៍ គ្មានផ្លូវដែកដើម្បីដឹកជញ្ជូនគ្រឿងបរិក្ខារនោះទេ ហើយបើទោះជាមានក៏ដោយ ក៏ខ្វះខាតលុយដែរ ។ ប៉ុន្តែអស់អ្នកដែលធ្វើការជាមួយអគារដ៏ធំនេះគឺប្រសប់លៃលក និងចេះកែច្នៃសម្ភារដែលមានមកប្រើប្រាស់ឡើងវិញ ។ ឈើដែលបានប្រើប្រាស់ខ្លះ គឺជាឈើដែលធ្លាប់បានប្រើដើម្បីសង់លំនៅដ្ឋានរួចម្តងទៅហើយ ។ ដែកគោល និងទ្រនាប់ខ្ចៅធ្វើឡើងពីស្បែកជើងស្បែកគោចាស់ៗ ។ ហើយថ្នាំបៀកត្រូវបានលាយជាមួយរោមសត្វដើម្បីជួយឲ្យថ្នាំបៀកកាន់តែរឹងមាំ ។ « ប្រើក្នុងគោលបំណងផ្សេង » « ប្រើឡើងវិញ » និង « កែច្នៃឡើងវិញ » គឺជាពាក្យដ៏មានប្រជាប្រិយភាព និងមានសារៈសំខាន់របស់ពួកគេជាយូរមកហើយ មុនពេលពាក្យទាំងនេះក្លាយជាផ្នែកនៃភាសារបស់យើង ។

ជីតាទួតជំនាន់ទីពីរ និងទីបីរបស់ខ្ញុំ ជាជនអន្តោប្រវេសន៍មកពីប្រទេសអង់គ្លេស បានធ្វើការសាងសង់ទ្វារធំៗនៅក្នុងរោងឧបោសថនេះ ។ តើពួកគាត់អាចស្រមៃថាកូនចៅជំនាន់ក្រោយ ចៅស្រីរបស់ពួកគាត់ កំពុងនិយាយចេញពីទីតាំងប្រវតិ្តសាស្រ្តនេះដែរឬទេ ?

ក្មួយៗប្រុសស្រី តើក្មួយយល់ពីឥទ្ធិពលដែល ក្មួយៗ បានធ្វើដែរឬទេ ?

ពិភពលោកដែលយើងរស់នៅនេះគឺពោរពេញទៅដោយឧបសគ្គ ។ ហើយក្មួយៗគឺជាជំនាន់នៃស្ត្រី និងបុរសដែលបានបម្រុងទុកសម្រាប់ថ្ងៃនេះ—ក្មួយៗមានសមត្ថភាព គុណលក្ខណៈ បំណងប្រាថ្នា និងឱកាសដើម្បីទាញយកព្រះចេស្ដារបស់ព្រះដើម្បីឆ្លងកាត់ការប្រឈមទាំងនេះ និងដោះស្រាយវា ។ សក្តានុពលរបស់ក្មួយៗគឺទេវភាព ។

ខ្ញុំជឿជាក់លើក្មួយៗ ។ ព្យាការី អ្នកមើលឆុត និងអ្នកទទួលវិវរណៈទាំងឡាយមានទំនុកចិត្តលើក្មួយៗ ។ ពួកលោកមានប្រសាសន៍ ក៏ដូចជាព្រះអម្ចាស់ទ្រង់ផ្ទាល់មានព្រះបន្ទូលដែរ ។

សូមកុំចុះចាញ់ក្នុងការខិតខំដោះស្រាយបញ្ហាស្មុគស្មាញក្នុងសម័យនេះឡើយ។ ពួកយើងត្រូវការក្មួយៗ !

ខ្ញុំយល់ថាវាងាយក្នុងការជាប់នៅក្នុងភាពអវិជ្ជមាន ជាប់នៅក្នុងឧបសគ្គឥតឈប់ឈរនៃបញ្ហា ដែលបានរាយការណ៍នៅក្នុងពិភពលោកនេះ ។ ជម្លោះប្រដាប់អាវុធ នយោបាយដ៏ចម្រូងចម្រាស ការគាបសង្កត់ គ្រោះធម្មជាតិ ការរងទុក្ខរបស់មនុស្សជាតិ—ដែលពិបាកនឹងយកឈ្នះ ។ ក្មួយៗប្រហែលជាមានអារម្មណ៍ថាគ្មានអំណាចក្នុងការមានឥទ្ធិពលលើដំណោះស្រាយដ៏យូរអង្វែងនេះទេ ។

ដោយទំនុកចិត្ត ខ្ញុំសូមប្រកាសថា ដោយបានប្រទានពរឲ្យមាននូវកម្លាំង និងព្រះចេស្ដានៃព្រះដែលមានសម្រាប់ក្មួយៗ នៅពេលក្មួយៗធ្វើ និងរក្សាសេចក្ដីសញ្ញាជាមួយនឹងទ្រង់ នោះក្មួយៗអាចប្រឆាំងនឹងភាពអវិជ្ជមាន និងបញ្ចេញពន្លឺនៅគ្រប់ជ្រុងនៃភាពងងឹតបាន ។

ព្រះអង្គសង្រ្គោះបានប្រកាសថា « [ យើង ] ជាពន្លឺនៃលោកីយ៍ » ។ ហើយ « ពន្លឺនៅជាប់នឹងពន្លឺ » ។ ការអនុញ្ញាតឲ្យពន្លឺនៃភាពជាសិស្សរបស់យើងនៅក្នុងព្រះយេស៊ូវគ្រីស្ទចែងចាំងឡើង គឺជាទម្រង់ដ៏ពិសេសនៃថាមពលដែលអាចទទួលបានឡើងវិញ—ថាមពលចេញពីប្រភពមួយដែលត្រូវបានបំពេញជាដរាប ។ ខ្ញុំសូមថ្លែងទីបន្ទាល់ថា នៅក្នុងការនាំយកការសង្គ្រោះ និងពន្លឺរបស់ទ្រង់ដល់អ្នកដទៃ នោះយើងរកឃើញការធូរស្រាលរបស់យើងផ្ទាល់នៅក្នុងទ្រង់ ។

ដូច្នេះចូរធ្វើជាអ្នកផ្សះផ្សារគេនៅក្នុងផ្ទះ សហគមន៍ផ្ទាល់ខ្លួនរបស់យើង និងនៅក្នុងវត្តមានអនឡាញរបស់ក្មួយៗ ។ ចូរជួយសម្រាលទុក្ខលំបាកដល់អ្នកនៅជិតខាងផ្ទាល់របស់ក្មួយៗ ។

គោលបំណងរបស់សាតាំងគឺថាយើងត្រូវទទួលរងសកម្មភាព ។ ផ្ទុយទៅវិញ ផែនការនៃសុភមង្គលរបស់ព្រះវរបិតាផ្តល់ឱកាសឲ្យយើងដើម្បីធ្វើសកម្មភាព ដើម្បីធ្វើជាភ្នាក់ងារសម្រាប់សេចក្តីល្អ ដើម្បីសេចក្តីសុខសាន្ត និងក្តីសង្ឃឹម ។

យើងអាចប្រឆាំងនឹងព័ត៌មានមិនពិតដោយការចែកចាយព័ត៌មានដែលលើកស្ទួយ ពេញដោយក្តីសង្ឃឹម និងត្រឹមត្រូវ—ធ្វើជាអ្នកគាំទ្រសេចក្តីពិត ជាជាងគ្រាន់តែជាអ្នកប្រើប្រាស់ព័ត៌មាន ។ យើងអាចឆ្លើយទៅនឹងភាពអវិជ្ជមានដោយធ្វើឲ្យពិភពលោកជោរជន់ទៅដោយពន្លឺ និងដំណឹងល្អនៃដំណឹងល្អនៃព្រះយេស៊ូវគ្រីស្ទ ។

ដូចជាព្យាការីជាទីស្រឡាញ់របស់យើង ប្រធាន រ័សុល អិម ណិលសុន បានពន្យល់ថា « ចម្លើយគឺព្រះយេស៊ូវគ្រីស្ទជានិច្ច » ។ « មិនថាបងប្អូនមានសំណួរ ឬបញ្ហាអ្វីនោះទេ ចម្លើយត្រូវបានរកឃើញនៅក្នុងព្រះជន្ម និងការបង្រៀនរបស់ព្រះយេស៊ូវគ្រីស្ទជានិច្ច » ។

ប្រធាន ណិលសុន បានអញ្ជើញយើងឲ្យដាក់ភាពជាសិស្សរបស់ទ្រង់ជា « អាទិភាពខ្ពស់បំផុត » របស់យើង ។ យើងពង្រឹងភាពជាសិស្សរបស់យើង នៅពេលយើងរៀនពីព្រះយេស៊ូវគ្រីស្ទ និងអំពីព្រះយេស៊ូវគ្រីស្ទ ។ ដូច្នេះ ចូរយើងស្វែងរកការបង្រៀនរបស់ព្រះអង្គសង្គ្រោះ ។

ម៉ាថាយ ជំពូកទី ២៥ មានរឿងប្រៀបប្រដូចចំនួនបី ដែលជារឿងប្រៀបប្រដូចចុងក្រោយដែលម៉ាថាយកត់ត្រាថា ព្រះអង្គសង្គ្រោះបានបង្រៀននៅក្នុងការបម្រើក្នុងព្រះជន្មរមែងស្លាប់របស់ទ្រង់ ។ នៅពេលរៀបចំសុន្ទរកថាសន្និសីទទូទៅថ្មីៗនេះរបស់ខ្ញុំ ហើយនៅពេលរៀបចំសម្រាប់ការប្រជុំធម្មនិដ្ឋាននេះ ព្រះវិញ្ញាណបានបំផុសគំនិតខ្ញុំឲ្យត្រឡប់ទៅ ហើយរៀនពីដំណើររឿងទាំងនេះ ។

សម្រាប់គោលបំណងរបស់យើង ខ្ញុំចង់សង្កត់ធ្ងន់ទៅលើការរៀបចំ និងទិដ្ឋភាពនៃការទទួលខុសត្រូវនៃរឿងប្រៀបប្រដូចទាំងនេះ ។ ប្រធាន ណិលសុន បានអញ្ជើញយើងឲ្យ « ឥឡូវនេះ … ជាពេល…ដើម្បី រៀបចំខ្លួន សម្រាប់ការយាងមកជាលើកទីពីររបស់ … ព្រះយេស៊ូវគ្រីស្ទ ។ ការត្រួតត្រាគឺជាការគ្រប់គ្រងដ៏ប្រុងប្រយ័ត្ន និងដោយទំនួលខុសត្រូវនៃអ្វីមួយ ដែលត្រូវបានផ្ដល់ឲ្យមនុស្សម្នាក់ថែទាំ ។ នៅក្នុងកិច្ចខិតខំត្រួតត្រារបស់យើង យើងធ្វើតាមព្រះយេស៊ូវគ្រីស្ទ ។ ដូច្នេះ សូមស្តាប់មេរៀនក្នុងការរៀបចំខ្លួន និងកិច្ចត្រួតត្រា ដែលយើងអាចរៀនចេញពីដំណើររឿងនេះ ។

ទីមួយ រឿងប្រៀបប្រដូចអំពីស្ត្រីព្រហ្មចារីដប់នាក់—ប្រាំនាក់ដែលមានប្រាជ្ញា និងប្រាំនាក់ដែលត្រូវបានពិពណ៌នាថាជាមនុស្សល្ងង់ ។

នៅក្នុងរឿងប្រៀបប្រដូចនេះ ស្រ្តីព្រហ្មចារីទាំងដប់នាក់កំពុងរង់ចាំកូនកំលោះនៅទីតាំងដែលត្រឹមត្រូវ ។ ពួកនាងម្នាក់ៗបានមកដោយមានចង្កៀងម្នាក់មួយ ។ នោះគឺដូចជាក្មួយៗរាល់គ្នាដែរ ។ ក្មួយៗនៅទីនេះ ដោយអនុវត្តសេចក្តីជំនឿរបស់ក្មួយៗ ហើយស្ថាបនាទីបន្ទាល់របស់ក្មួយៗ ។

នៅពេលដែលកូនកំលោះ—តំណាងឲ្យព្រះអង្គសង្រ្គោះ—យាងមកនៅពេលដែលមិនបានរំពឹងទុក ស្រ្តីព្រហ្មចារីប្រាំនាក់មិនមានប្រេងគ្រប់គ្រាន់នៅក្នុងចង្កៀងរបស់ពួកនាងទេ ។ ប្រហែលជាពួកនាងមិនបានគិតថាវាសំខាន់ ឬចាំបាច់ដើម្បីមានប្រេងបន្ថែមទេ ។ ឬពួកនាងមិនបានត្រួតត្រាប្រេងដែលពួកនាងមានឡើយ ។ ប្រហែលជាមានការរំខាន ពួកនាងមិនបានរៀបចំឲ្យបានគ្រប់គ្រាន់ដើម្បីរក្សាចង្កៀងរបស់ពួកនាងឲ្យឆេះនោះទេ ។

ដូច្នេះហើយជាការឆ្លើយតបទៅនឹងការតវ៉ារបស់ពួកគេ ដើម្បីឲ្យបានចូលក្នុងពិធីទទួលទានអាហារពេលល្ងាចនៃពិធីរៀបអាពាហ៍ពិពាហ៍ នោះប្ដីថ្មោងថ្មីបានឆ្លើយតបថា « ខ្ញុំមិនស្គាល់នាងទេ » ។ ការបង្ហាញឲ្យឃើញតាមរយៈការរៀបចំ និងការទទួលខុសត្រូវដ៏ឈ្លាសវៃរបស់ពួកនាង នាងព្រហ្មចារីដ៏ឈ្លាសវៃទាំងប្រាំនាក់ បាន ស្គាល់ទ្រង់ ។

ប្រេងដ៏មានតម្លៃដែលតំណាងឲ្យការប្រែចិត្តជឿផ្ទាល់ខ្លួន បានអនុញ្ញាតឲ្យស្ត្រីព្រហ្មចារីដែលមានប្រាជ្ញាបំភ្លឺចង្កៀងរបស់ពួកនាង ហើយចូលរួមក្នុងពិធីមង្គលការជាមួយកូនកំលោះ ។ ប្រេងមិនអាចចែកចាយជាមួយមិត្តភក្តិរបស់ពួកនាងបានទេ ដោយសារការប្រែចិត្តជឿផ្ទាល់ខ្លួនគឺ—មានលក្ខណៈផ្ទាល់ខ្លួនខ្លាំងណាស់ ។ យើងអាច និងគួរតែកាន់ពន្លឺចង្កៀងរបស់យើងឲ្យខ្ពស់ឡើងដើម្បីលើកស្ទួយ និងពង្រឹងអ្នកដទៃ ប៉ុន្តែយើងម្នាក់ៗគឺជាអ្នកទទួលខុសត្រូវការប្រែចិត្តជឿរបស់យើងផ្ទាល់ ។

ដូចដែលព្រះអង្គសង្គ្រោះបានបញ្ជាក់ថា « ចូរមានចិត្តស្មោះត្រង់ ដោយអធិស្ឋានជានិច្ច ដោយមានចង្កៀងបង្កាត់ ហើយឆេះ ហើយមានប្រេងនៅជាមួយអ្នកផង ដើម្បីឲ្យអ្នកអាចបានប្រុងប្រៀបជាស្រេច ក្នុងកាលការយាងមកនៃប្ដីថ្មោងថ្មី » ។

យើងក៏ចាប់ផ្ដើមស្គាល់ព្រះអង្គសង្រ្គោះ ហើយមាន « ទំនុកចិត្តដើម្បីចូលទៅកាន់ព្រះ ឥឡូវនេះ » នៅពេលយើងរៀបចំខ្លួនដើម្បីរក្សាចង្កៀងរបស់យើងពេញដោយប្រេងនៃការប្រែចិត្តជឿ ហើយបន្ទាប់មកចូរឲ្យពន្លឺនៃការប្រែចិត្តជឿនោះភ្លឺឡើង ។ ហើយដូចជារូបចម្លាក់ដ៏អស្ចារ្យដែលពិពណ៌នានៅលើវិសាលដ្ឋានព្រះវិហារបរិសុទ្ធដែរ យើងអាច ហើយគួរតែគាំទ្រ និងពង្រឹងអ្នកដទៃឲ្យធ្វើដូចយើង—ធ្វើជាសញ្ញាឲ្យអ្នកដទៃមករកពន្លឺ—ពន្លឺលោកីយ៍គឺជាព្រះយេស៊ូវគ្រីស្ទ ។

រឿងប្រៀបប្រដូចទីពីរដែលម៉ាថាយប្រាប់គឺអំពីប្រាក់ ។ នៅក្នុងរឿងនោះ ចៅហ្វាយរំពឹងថានឹងធ្វើដំណើរទៅឆ្ងាយ បានផ្ដល់ប្រាក់ដល់អ្នកបម្រើបីនាក់ ។ នៅសម័យព្រះគម្ពីរសញ្ញាថ្មី ប្រាក់តំណាងឲ្យលុយ ។ ប៉ុន្តែខ្ញុំសង្ឃឹមថាក្មួយៗនឹងគិតអំពីប្រាក់ជាអំណោយទាន សមត្ថភាព និងពរជ័យដែលព្រះវរបិតាសួគ៌បានប្រទានមកយើង ។ ចៅហ្វាយបានឲ្យទៅអ្នកបម្រើម្នាក់ប្រាក់ប្រាំពាន់ថ្លឹង ម្នាក់ទៀតពីរពាន់ថ្លឹង និងម្នាក់ទៀតមួយពាន់ថ្លឹង ។ ហើយបន្ទាប់មកចៅហ្វាយបានធ្វើដំណើរចេញទៅ ។

នៅពេលគាត់ត្រឡប់មកវិញ គាត់បានឃើញថាអ្នកបម្រើដែលគាត់បានឲ្យប្រាក់ប្រាំពាន់ និងពីរពាន់ ជាអ្នកបម្រើដ៏ស្មោះត្រង់ និងបានត្រួតត្រាឲ្យចំណេញ ហើយបានប្រើប្រាក់នោះយ៉ាងល្អ ។ ម្នាក់ៗបានបង្កើនប្រាក់ចំណេញទ្វេដងដែលពួកគេបានប្រគល់ឲ្យ ។ ហើយដោយមានចិត្តស្មោះត្រង់បន្តិចហើយនោះ ចៅហ្វាយក៏ឲ្យពួកគេថែមទៀត ដោយថ្លែងថា « ប្រពៃហើយ បាវល្អស្មោះត្រង់អើយ ឯងមានចិត្តស្មោះនឹងត្រួតរបស់បន្តិចនេះ ដូច្នេះ យើងនឹងតាំងឲ្យឯងត្រួតលើរបស់ជាច្រើនទៅទៀត ចូរឲ្យឯងប្រកបដោយអំណររបស់ចៅហ្វាយឯងចុះ » ។

ផ្ទុយទៅវិញ អ្នកបម្រើដែលបានទទួលប្រាក់មួយពាន់បានកប់ប្រាក់របស់គាត់—ប្រហែលជាដោយសារគាត់មានការរំខាន ហើយពន្យារពេលក្នុងការប្រើប្រាក់របស់គាត់ឲ្យបានល្អ ។ ឬប្រហែលជាគាត់ស្មុគស្មាញដើម្បីដឹងពីរបៀបចាប់ផ្តើម ឬខ្លាចបរាជ័យ ។ ប្រហែលជាគាត់បានប្រៀបធៀបខ្លួនគាត់ទៅនឹងអ្នកបម្រើឯទៀត ហើយការសង្ស័យរបស់គាត់អំពីសមត្ថភាពរបស់គាត់បានរារាំងគាត់ពីការព្យាយាម ។ គាត់មិនបានត្រៀមខ្លួនសម្រាប់ការត្រឡប់មកវិញរបស់ចៅហ្វាយទេ គាត់មិនបានទទួលអារម្មណ៍រីករាយនៃការបម្រើដ៏ស្មោះត្រង់ ហើយគាត់បានបាត់បង់ប្រាក់របស់គាត់ ។

រឿងប្រៀបប្រដូចពីស្ត្រីព្រហ្មចារីទាំងដប់ និងរឿងប្រៀបប្រដូចពីប្រាក់គឺជារឿងប្រៀបប្រដូចដែលផ្ដោតលើគំនិតដូចគ្នា ។ រឿងប្រៀបប្រដូចទាំងពីរសង្កត់ធ្ងន់ថា យើងមានទំនួលខុសត្រូវផ្ទាល់ខ្លួនសម្រាប់ការប្រែចិត្តរបស់យើង ហើយត្រូវតែរៀបចំខ្លួនយើងដើម្បីទទួលអំណោយទាននៃភាពតម្កើងឡើងរបស់ព្រះអម្ចាស់—ហើយថាយើងមានការត្រួតត្រា និងការទទួលខុសត្រូវផ្ទាល់ខ្លួនចំពោះអ្វីដែលយើងបានទទួលពរ ។

នៅទីបំផុត ម៉ាថាយ ២៥ ប្រាប់រឿងនៃអ្នកដែលមាន « ទំនុកចិត្តនៅចំពោះព្រះ » ។ ដោយពិពណ៌នាថាជាចៀមរបស់អ្នកគង្វាលល្អ ដែលនៅខាងស្ដាំរបស់ទ្រង់ រីករាយក្នុងពិធីមង្គលការជាមួយនឹងទ្រង់ ហើយបានប្រទានពរឲ្យធ្វើជាអ្នកគ្រប់គ្រងលើកិច្ចការជាច្រើន ទ្រង់មានបន្ទូលថា ៖

« យើងបាន [ ឃ្លាន ] ហើយអ្នករាល់គ្នាបានឲ្យបរិភោគ ៖ យើងបានស្រេក ហើយអ្នករាល់គ្នាបានឲ្យផឹក ៖ យើងជាអ្នកដទៃ ហើយ [ អ្នករាល់គ្នា ] បានទទួលយើង ៖ [ យើង ] នៅអាក្រាត ហើយអ្នករាល់គ្នាបានស្លៀកពាក់ឲ្យយើង ៖ [យើង ] បានឈឺ ហើយ [ អ្នករាល់គ្នា ] បានមកសួរយើង ៖ ក៏ជាប់គុក ហើយ[ អ្នករាល់គ្នា ] បានមកឯយើង » ។

វីដេអូនេះបង្ហាញពីការណ៍នេះយ៉ាងស្រស់ស្អាត ។

[ វីដេអូ ( អក្សររត់ចំណងជើង ) ]

« ព្រះយេស៊ូវបានបង្ហាញយើងអំពីរបៀបស្រឡាញ់អ្នកជិតខាងរបស់យើង ។ យើងធ្វើតាមគំរូរបស់ទ្រង់នៅពេល [ យើងលើក ]អ្នកដែលនឿយហត់ ចិញ្ចឹមបីបាច់កុមារ លួងលោមអ្នកដែលនៅជុំវិញខ្លួនយើង ឲ្យអាហារអ្នកដែលស្រេកឃ្លាន ស្វែករកអ្នកដែលខ្វះខាត ។ ឱកាសដើម្បីប្រែក្លាយដូចជាទ្រង់គឺមានជារៀងរាល់ថ្ងៃ បម្រើដូចជាទ្រង់ ខ្វល់ខ្វាយដូចជាទ្រង់ ។ ការខ្វល់ខ្វាយចាប់ផ្ដើមពីអ្នក ជារៀងរាល់ថ្ងៃ ។ សូមចូលទៅកាន់ CaringSummary.ChurchofJesusChrist.org ។

[ ចប់វីដេអូ ]

នេះគឺជាអ្វីដែលបានសុំពីយើង ។ ក្នុងនាមជាសិស្សរបស់ទ្រង់ យើងរៀបចំខ្លួនរបស់យើងសម្រាប់ការយាងមកជាលើកទីពីរ ហើយ យើងអនុវត្តការត្រួតត្រាដោយស្មោះត្រង់ និងមានផលចំណេញលើអ្វីដែលយើងបានទទួលពរ ។ ការអាណិតអាសូរ សេចក្ដីសប្បុរស គុណធម៌ និងការត្រួតត្រាដ៏ស្មោះត្រង់ ធ្វើឲ្យយើងមានលក្ខណសម្បត្តិគ្រប់គ្រាន់ដើម្បីរស់នៅជាមួយនឹងទ្រង់ ហើយមានទំនុកចិត្តនៅចំពោះព្រះ ឥឡូវនេះ ។ ដូចជាមរមនបានបង្រៀនថា អស់អ្នកដែលពោរពេញទៅដោយសេចក្ដីសប្បុរស—ជាសេចក្ដីស្រឡាញ់ដ៏សុទ្ធសាធរបស់ព្រះគ្រីស្ទ—« នៅក្នុងថ្ងៃចុងក្រោយបង្អស់នឹងបានស្រួលដល់ [ ពួកគេ ] នោះហើយ » ។ ពួកគេនឹងបានដូចជាព្រះអង្គសង្គ្រោះ ដោយឃើញទ្រង់ជាទ្រង់ ហើយពោរពេញទៅដោយសេចក្តីសង្ឃឹម ហើយបានបរិសុទ្ធដូចទ្រង់បរិសុទ្ធដែរ ។ ប្រធាន ណិលសុន បានប្រកាសថា « សេចក្ដីសប្បុរស និងគុណធម៌បើកច្រកផ្លូវទៅកាន់ការមានទំនុកចិត្តនៅចំពោះព្រះ ! »

រឿងប្រៀបប្រដូចទាំងបីនេះបង្រៀនពីរបៀបដែលពួកសិស្សរបស់ទ្រង់—របៀបដែលយើង—គួរតែរៀបចំខ្លួនសម្រាប់គ្រាលំបាក ដែលមានមុនការយាងមកជាលើកទីពីររបស់ព្រះអង្គសង្គ្រោះ ។ ទាំងនេះគឺជាពេលវេលាដែលយើងរស់នៅ ! យើងត្រូវរក្សាចង្កៀងនៃការប្រែចិត្តជឿរបស់យើងឲ្យភ្លឺចាំងដោយទុកឲ្យពន្លឺរបស់យើងចែងចាំងឡើង ដោយប្រើប្រាស់ និងពង្រីកទេពកោសល្យរបស់យើង ដោយការថែរក្សាអ្នកដែលខ្វះខាត—នោះគឺការមានសេចក្ដីសប្បុរស—ជាសេចក្ដីស្រឡាញ់ដ៏សុទ្ធសាធរបស់ព្រះគ្រីស្ទ ។

រឿងប្រៀបប្រដូចទាំងបីនេះបង្រៀនយើងអំពីការត្រួតត្រា ៖

ការត្រួតត្រាសម្រាប់ការប្រែចិត្តជឿរបស់យើងផ្ទាល់ ។

ការត្រួតត្រាសម្រាប់អំណោយទាន ទេពកោសល្យ ទ្រព្យសម្បត្តិ និងជំនួយដែលយើងបានប្រទានឲ្យ រួមទាំងផែនដីផងដែរ ។

ការត្រួតត្រាឲ្យមើលថែអ្នកជិតខាងយើងដែលស្រេកឃ្លាន គ្មានផ្ទះសម្បែង ឈឺចាប់ និងនឿយហត់ ។

ក្នុងនាមជាសិស្សរបស់ព្រះយេស៊ូវគ្រីស្ទ តើយើងអនុវត្តការត្រួត្រាដ៏ល្អដោយរបៀបណា ?

ប្រហែលជាការពិភាក្សាស៊ីជម្រៅជាងនេះអំពីការត្រួតត្រាមានប្រយោជន៍ ។ ដំបូង ចូរយើងកំណត់និយមន័យនៃការត្រួតត្រាជាមុនសិន ។ ហើយអ្នកត្រួតត្រាម្នាក់គឺជាអ្វី ?

អ្នកត្រួតត្រាម្នាក់គ្រប់គ្រងទ្រព្យសម្បត្តិនៃគ្រួសារ ឬដីមរតកដ៏ធំមួយ ។ អ្នកត្រួតត្រាពុំមែនជាម្ចាស់ទ្រព្យសម្បត្តិទេ ប៉ុន្តែត្រូវបានទុកចិត្តឲ្យគ្រប់គ្រងវាជំនួសឲ្យម្ចាស់ ។ ការត្រួតត្រាដែលមានផលចំណេញគឺស្មោះត្រង់ចំពោះម្ចាស់ទ្រព្យ ដោយយកចិត្តទុកដាក់លើធនធានប្រកបដោយប្រាជ្ញា និងដោយសប្បុរស ។ ដូច្នេះ ការត្រួតត្រាគឺគ្រប់គ្រងយ៉ាងប្រុងប្រយ័ត្ន និងប្រកបដោយទំនួលខុសត្រូវលើរឿងទាំងនោះ ដែលប្រគល់ឲ្យយើងមើលថែរ ។

ប៊ីស្សព ហ្គែរ៉ល កូសសែ នៃគណៈប្រធានប៊ីស្សព បានបង្រៀនថា តើការត្រួត្រាខាងលោកិយមានអត្ថន័យដូចម្តេច ។ លោកបានមានប្រសាសន៍ថា « នៅក្នុងវាក្យសព្ទនៃដំណឹងល្អ ពាក្យ ការកាន់កាប់ត្រួតត្រា បានកំណត់នូវការទទួលខុសត្រូវខាងវិញ្ញាណ ឬខាងសាច់ឈាមដ៏ពិសិដ្ឋ ដើម្បីថែរក្សាអ្វីមួយដែលជាកម្មសិទ្ធិរបស់ព្រះ ដែលយើងមានទំនួលខុសត្រូវ » ។

សូមពិចារណាទៅមើលថា តើគំនិតនេះអស្ចារ្យប៉ុនណា ! យើងជាអ្នកត្រួតត្រាទ្រព្យសម្បត្តិដែលព្រះវរបិតាសួគ៌បានប្រទានឲ្យយើង ។ នោះគឺជាការទុកចិត្តដ៏ពិសិដ្ឋសម្រាប់ផែនដី ធនធានរបស់ផែនដី បុត្រាបុត្រីរបស់ទ្រង់ អំណោយទានរបស់យើង ទេពកោសល្យ និងពរជ័យទាំងឡាយ ។ ហើយ វាគឺជាការទទួលខុសត្រូវដ៏ពិសិដ្ឋដើម្បីមើលថែទ្រព្យសម្បត្តិរបស់ទ្រង់ដោយការយកចិត្តទុកដាក់ ។

តើ ក្មួយៗ មានការត្រួតត្រាលើអ្វី និងនរណា ?

គឺការបង្កើតទាំងអស់របស់ព្រះនៅលើផែនដីនេះ ។ អ្នកមានការត្រួតត្រាលើរាងកាយ និងចិត្តរបស់អ្នកផ្ទាល់ ។ អ្នកមានការត្រួតត្រាលើសមត្ថភាព ទេពកោសល្យ អំណោយទានខាងវិញ្ញាណ និងជំនួយដែលបានប្រទានពរមកដល់អ្នក ។ អ្នកមានការត្រួតត្រាលើផែនដី ។ ហើយ អ្នកមានការត្រួតត្រាលើគ្នាទៅវិញទៅមក ។

ប៊ីស្សព ឃូសេ បានពន្យល់ថា ៖ « ការកាន់កាប់ត្រួតត្រារបស់យើងលើការបង្កបង្កើតរបស់ព្រះក៏រួមបញ្ចូលនូវកាតព្វកិច្ចដ៏ខ្ពង់ខ្ពស់ដ៏ពិសិដ្ឋក្នុងការស្រឡាញ់ គោរព និងថែរក្សាមនុស្សទាំងអស់ដែលរស់នៅលើផែនដីនេះជាមួយនឹងយើង ។ ពួកគេ គឺជាបុត្រា និងបុត្រីរបស់ព្រះ ជាបងប្អូន ស្រី និងប្រុសរបស់យើង ហើយសុភមង្គលដ៏អស់កល្បរបស់ពួកគេ គឺជាគោលបំណងនៃការបង្កបង្កើតនោះឯង » ។

តើអ្នកនឹងធ្វើការត្រួតត្រាឲ្យមានផលចំណេញដែរឬទេ ? នោះគឺថា តើអ្នកនឹងយកចិត្តទុកដាក់ចំពោះការបង្កបង្កើតរបស់ព្រះដោយឈ្លាសវៃ និងសប្បុរសឬទេ ?

ខ្ញុំចង់សម្រិតសម្រាំងការផ្តោតអារម្មណ៍របស់យើងទៅលើការត្រួតត្រាសម្រាប់អំណោយទាន និងទេពកោសល្យដែលយើងបានទទួលពរជ័យ ការត្រួតត្រារបស់យើងសម្រាប់ផែនដី និងការត្រួតត្រាដល់អ្នកជិតខាងរបស់យើង ។ សូមចាំថា ការត្រួតត្រាដោយសុចរិតគឺជាភស្ដុតាងនៃភាពជាសិស្សរបស់យើង ។

ទីមួយ ការត្រួតត្រាលើអំណោយទាន និងទេពកោសល្យរបស់យើង ។

ចេញពី គោលលទ្ធិ និងសេចក្តីសញ្ញា ៤៦:១១–១២ យើងរៀនពីសេចក្តីពិតនេះ ៖

« ដ្បិតមនុស្សទាំងអស់ពុំបានគ្រប់អំណោយទាន ដែលបានប្រទានដល់ពួកគេឡើយ ដ្បិតមានអំណោយទានជាច្រើន ហើយមនុស្សរាល់គ្នាត្រូវបានប្រទានមួយ ដោយព្រះវិញ្ញាណនៃព្រះ ។

« ចំពោះមនុស្សខ្លះត្រូវប្រទានឲ្យមួយរីឯចំពោះមនុស្សខ្លះត្រូវបានប្រទានឲ្យមួយផ្សេងទៀតដើម្បីឲ្យមនុស្សទាំងអស់អាចបានប្រយោជន៍ដោយសាររបៀបនេះ » ។

អំណោយទានខាងវិញ្ញាណរបស់យើងគឺជាសមត្ថភាពដែលព្រះបានប្រទានដល់យើងម្នាក់ៗ ។ វាត្រូវបានប្រទានឲ្យយើងតាមឆន្ទៈ និងពេលវេលារបស់ទ្រង់ តាមរយៈព្រះចេស្ដានៃព្រះវិញ្ញាណបរិសុទ្ធ ហើយត្រូវបានបម្រុងទុកសម្រាប់ពរជ័យ និងអត្ថប្រយោជន៍នៃបុត្រាបុត្រីរបស់ព្រះទាំងអស់ ។

អ្នកត្រួតត្រាដ៏ស្មោះត្រង់ស្វែងរក និងអញ្ជើញអំណោយទានខាងវិញ្ញាណឲ្យចូលក្នុងជីវិតរបស់ពួកគេ ហើយប្រើអ្វីដែលពួកគេបានប្រទានឲ្យដើម្បីលើកស្ទួយ និងបម្រើអ្នកដទៃ ។ ក្មួយៗរាល់គ្នាជាបុត្រាបុត្រីរបស់ព្រះ ត្រូវបានប្រទានឲ្យនូវអំណោយទាន និងទេពកោសល្យពិសេសៗ ។

អែលឌើរ ម៉ាវីន ជេ អាស្តុន ដែលជាសមាជិកក្នុងកូរ៉ុមនៃពួកដប់ពីរនាក់ បានរៀបរាប់អំពីអំណោយទាន គុណលក្ខណៈ និងសមត្ថភាពដែលមិនសូវច្បាស់ជាច្រើនដែលក្មួយៗប្រហែលជាមិនបានពិចារណា ។ ដូចដែលខ្ញុំបានរៀបរាប់ តើក្មួយៗនឹងធ្វើការគិតពិចារណាពីខ្លួនឯងខ្លះៗ ហើយស្វែងរកអំំណោយទានមួយ ឬពីរដែលក្មួយៗបានទទួលពរដែរឬទេ ? បន្ទាប់មក ពេលរកឃើញអំណោយទាននោះហើយ សូមពិចារណាពីរបៀបដែលក្មួយៗនឹងប្រើវាក្នុងនាមជាអ្នកបម្រើដ៏ស្មោះត្រង់ ដើម្បីប្រទានពរដល់អ្នកដទៃ ។

« អំណោយទាននៃការសូម អំណោយទាននៃការចេះស្ដាប់ អំណោយទាននៃការប្រុងស្ដាប់ ហើយប្រើសំឡេងតូចរហៀង អំណោយទាននៃការអាចយំ អំណោយទាននៃការចៀសវាងពីការឈ្លោះប្រកែក អំណោយទាននៃការព្រមព្រៀង អំណោយទាននៃការចៀសវាងពីភាពច្រំដែលៗឥតប្រយោជន៍ អំណោយទាននៃការស្វែងរកអ្វីដែលសុចរិត អំណោយទាននៃការពុំវិនិច្ឆ័យលឿនពេក អំណោយទាននៃការមើលទៅព្រះសម្រាប់ការដឹកនាំ អំណោយទាននៃការធ្វើជាសិស្ស [ អំណោយទាននៃភាពស្ងប់ស្ងាត់ ] អំណោយទាននៃការមើលថែអ្នកដទៃ អំណោយទាននៃការចេះពិចារណា អំណោយទាននៃការអធិស្ឋាន អំណោយទាន … នៃការថ្លែងទីបន្ទាល់ដ៏អស្ចារ្យ និងអំណោយទាននៃការទទួលព្រះវិញ្ញាណបរិសុទ្ធ » ។

នៅពេលដែលក្មួយៗបន្តជញ្ជឹងគិតអំពីអំណោយទានរបស់ក្មួយៗ តើខ្ញុំអាចផ្តល់ការដាស់តឿនមួយបានដែរឬទេ ? សូមកុំប្រៀបធៀប ឬវាស់វែងអំណោយទានរបស់ក្មួយៗធៀបនឹងអំណោយទានរបស់អ្នកដទៃឡើយ ។ សូមកុំចូលរួមក្នុង « ការវាយតម្លៃខ្លួនឯងទាបពេក » ។ « ការប្រៀបធៀបគឺជាចោរប្លន់សេចក្ដីអំណរ » ។ សូមធ្វើជាម្ចាស់អំណោយទានរបស់ក្មួយៗ និងអបអរដល់អំណោយទានដែលអ្នកដទៃមាន ។ សូមចងចាំថា អំណោយទានខាងវិញ្ញាណ គឺព្រះប្រទានឲ្យតាមរយៈព្រះវិញ្ញាណសម្រាប់គោលបំណងឲ្យ មនុស្សទាំងអស់ អាចទទួលបានអត្ថប្រយោជន៍ ។

ជីដូនជាទីស្រឡាញ់របស់ខ្ញុំគឺជាគ្រូបង្រៀនភាសាអង់គ្លេស ហើយជ្រើសរើសពាក្យរបស់គាត់ដោយប្រុងប្រយ័ត្ន ។ គាត់ចូលចិត្តមានប្រសាសន៍ថា « ការប្រៀបធៀបគឺអាក្រក់ណាស់ » ។ អាក្រក់ គឺជាពាក្យធ្ងន់ធ្ងរ ។ វាមានន័យថា « គួរឲ្យស្អប់ខ្ពើម និងមានការជំទាស់យ៉ាងខ្លាំង » ។ ហេតុអ្វីបានជាជីដូនខ្ញុំប្រើពាក្យខ្លាំងបែបនេះ ពេលផ្តល់ដំបូន្មានដល់ខ្ញុំអំពីហានិភ័យក្នុងការប្រៀបធៀប ? វាគឺដោយសារតែការប្រៀបធៀបខ្លួនយើងទៅនឹងអ្នកដទៃគឺកម្រទទួលបានផលល្អណាស់ ។ ក្នុងការប្រៀបធៀបខ្លួនយើងទៅនឹងអ្នកដទៃ យើងញែកខ្លួនយើងចេញពីពួកគេ ។ ជំនួសឲ្យការមានអារម្មណ៍ថាជាផ្នែកមួយនៃរូបកាយទាំងមូលរបស់ព្រះគ្រីស្ទ ខ្ញុំធ្វើជាកូនម្រាមដៃ ហើយវាស់តម្លៃរបស់ខ្ញុំទាស់នឹងនរណាម្នាក់ដែលខ្ញុំគិតថាជាស្មា ដៃ និងដងខ្លួន ។ ជាទូទៅ នៅពេលដែលយើងប្រៀបធៀបខ្លួនយើងទៅនឹងអ្នកដទៃ យើងមានអារម្មណ៍ថាអន់ជាង ឬល្អជាង ហើយទាំងនោះ គឺមិនត្រឹមត្រូវទេ ។ យើងទាំងអស់គ្នាគឺជាបុត្រាបុត្រីជាទីស្រឡាញ់របស់ព្រះមាតាបិតាសួគ៌ ដែលបានទទួលពរនៃអំណោយទានខាងវិញ្ញាណ គុណលក្ខណៈ ទេពកោសល្យ និងកម្លាំងផ្ទាល់ខ្លួនរៀងៗខ្លួន ។

ដូច្នេះ ខ្ញុំសូមអញ្ជើញក្មួយៗឲ្យបណ្តុះអំណោយទាននៃការបោះបង់ចោលការប្រៀបធៀប ។ ទូលសុំព្រះវរបិតាសួគ៌ឲ្យជួយក្មួយៗរកឃើញអំណោយទាន និងទេពកោសល្យខាងវិញ្ញាណរបស់ក្មួយៗ និងរបៀបដែលក្មួយៗអាចប្រើវាក្នុងនាមជាអ្នកបម្រើដ៏ស្មោះត្រង់ ។

នេះគឺជាឧទាហរណ៍មួយ ។

កាលពីប៉ុន្មានឆ្នាំមុន ជីន ជាយុវមជ្ឈិមវ័យម្នាក់ដែលរស់នៅក្នុងប្រទេសហូឡង់ កំពុងជញ្ជឹងគិតអំពីបញ្ញត្តិដែលផ្តល់ដំបូងដល់លោកអ័ដាម និងនាងអេវ៉ាឲ្យបង្កើតកូនចៅឲ្យចម្រើនជាច្រើនឡើងឲ្យមានពាសពេញលើផែនដី ។ នៅពេលនាង និងស្វាមីកំពុងឆ្លងកាត់នឹងការគ្មានកូន នោះពួកគេបានស្វែងយល់ពីរបៀបដែលបញ្ញត្តិនោះបានអនុវត្តចំពោះពួកគេ ។ នាងបានដឹងថា ក្នុងកំឡុងពេលដែលលោកអ័ដាម និងនាងអេវ៉ាមិនមានកូន នោះពួកលោកបានដាំដុះ និងមើលថែទាំសួនច្បារដែលព្រះបានប្រទានឲ្យពួកលោកជាអ្នកមើលខុសត្រូវ ។ ពេលនាងពិចារណាពីស្ថានភាពរបស់នាង នោះនាងបានគិតអំពីសួនច្បារដែលនាងរស់នៅ—សួនច្បារនៃផែនដី សួនច្បារនៃប្រទេសនាង សួនច្បារនៃគ្រួសារនាង និងសួនច្បារនៃវួដរបស់នាង ។

នាងបានដឹងថា ខណៈដែលនាងមិនបានរស់នៅក្នុងសួនច្បារអេដែន សួនច្បារទាំងនោះហើយជាសួនច្បារដែលព្រះអម្ចាស់បានដាក់ឲ្យនាងរស់នៅ ។ នាងអាចខិតខំចម្រើនជាច្រើនឡើងឲ្យមានពាសពេញលើផែនដីនូវអ្វីដែលទ្រង់បានប្រទានឲ្យនាងត្រួតត្រា ។ ជីន បានឆ្លើយតប ៖

« តើខ្ញុំអាច ចម្រើនជាច្រើនឡើង នូវអំណោយដែលព្រះអម្ចាស់បានប្រទានឲ្យខ្ញុំ និងអ្នកដទៃដោយរបៀបណាទៅ ?
តើខ្ញុំអាច ចម្រើនជាច្រើនឡើង នូវសេចក្តីស្រឡាញ់ចំពោះបុត្រាបុត្រីរបស់ព្រះដោយរបៀបណាទៅ ?
តើខ្ញុំអាច ចម្រើនជាច្រើនឡើង នូវពេលវេលា និងកិច្ចខិតខំរបស់ខ្ញុំដើម្បីបម្រើដល់អ្នកដទៃដោយរបៀបណាទៅ ?
តើខ្ញុំអាច ឲ្យមានពាសពេញ នូវសុខុមាលភាពខាងវិញ្ញាណរបស់ខ្ញុំដោយរបៀបណាទៅ ?
តើខ្ញុំអាច ឲ្យមានពាសពេញ នូវអ្វីដែលអ្នកដទៃបានបាត់បង់ ទាំងខាងសាច់ឈាម និងខាងវិញ្ញាណដោយរបៀបណាទៅ ?
តើខ្ញុំអាច ឲ្យមានពាសពេញ នូវសេចក្តីសង្ឃឹម និងសេចក្តីជំនឿដែលមនុស្សជាច្រើនហាក់ដូចជាបាត់បង់នៅក្នុងពិភពលោកនេះដោយរបៀបណាទៅ ? »

នៅពេលដែល ជីន បានផ្តោតលើសំណួរទាំងនោះ នាងទទួលបានពរក្នុងការដឹងពីឱកាសដើម្បីចម្រើនជាច្រើនឡើងឲ្យមានពាសពេញ ដោយប្រើអំណោយ និងទេពកោសល្យរបស់នាង ។ នាងបានបង្រៀនការសម្តែងដល់ក្មេងៗនៅជុំវិញពិភពលោក ។ នាងបានបម្រើយុវនារី ។ នាងបានឆ្លៀតយកប្រយោជន៍ពីភាពបត់បែនក្នុងជីវិតអាជីពរបស់នាងផ្ទាល់ ដើម្បីជួយមើលថែកូនៗរបស់មិត្តភក្ដិ ។ នាងបានចំណាយពេលសិក្សាដំណឹងល្អបន្ថែមទៀត ហើយមានអារម្មណ៍ថាមានពរដើម្បីយល់កាន់តែច្បាស់ពីរបៀបទទួលបន្ទុករបស់អ្នកដទៃ និងលួងលោមអ្នកដែលត្រូវការការលួងលោម ។ ការណ៍នោះបានបង្កើនទីបន្ទាល់ និងសេចក្តីជំនឿរបស់នាងលើព្រះយេស៊ូវគ្រីស្ទ និងដំណឹងល្អរបស់ទ្រង់ ។ សំខាន់បំផុតនោះ នាងបានទទួលការយល់ដឹងផ្ទាល់ខ្លួនអំពីផែនការរបស់ព្រះសម្រាប់នាង ។

អ្នកត្រួតត្រាល្អតែងតែបង្កើត និងចម្រើនឡើងនូវទ្រព្យសម្បត្តិរបស់អង្គជាចៅហ្វាយ ។

ទោះបីជាមិនដូចដែលនាងបានស្រមៃពីដំបូងក៏ដោយ ក៏បទពិសោធន៍របស់ ជីន គឺជាភស្ដុតាងដ៏ប្រពៃនៃការសន្យាពីព្យាការីយេរេមា ដែលបានថ្លែងថា ៖

« តែមានពរហើយ អ្នកណាដែលទីពឹងដល់ព្រះយេហូវ៉ា ហើយដែលទុកចិត្តនឹងទ្រង់ ។

« អ្នកនោះនឹងបានដូចជាដើមឈើដាំនៅមាត់ទឹក ដែលចាក់ឫសទៅក្បែរទន្លេ ។ ឥតដឹងរដូវក្តៅទេ គឺស្លឹកនៅតែខៀវខ្ចីវិញ ។ ហើយមិនរឹតត្បិតនៅឆ្នាំដែលរាំងរឹះឡើយ ក៏មិនដែលខាននឹងកើតផលដែរ ។

ទីពីរ ការត្រួតត្រាផែនដី និងបុត្រាបុត្រីទាំងអស់របស់ព្រះ ។

ប្រធាន រ័សុល អិម ណិលសុន បានបង្រៀនថា ៖ « ក្នុងនាមជាអ្នកទទួលអត្ថប្រយោជន៍ពីការបង្កបង្កើតដ៏ទេវភាព តើយើងគួរតែធ្វើអ្វីខ្លះ ? យើងគួរតែថែរក្សាផែនដី ធ្វើជាអ្នកកាន់កាប់ត្រួតត្រាដ៏ឈ្លាសវៃនៅលើផែនដី ហើយរក្សាផែនដីនេះសម្រាប់មនុស្សជំនាន់ក្រោយ » ។

ខ្ញុំដឹងថានេះជាប្រធានបទដែលមនុស្សជំនាន់របស់ក្មួយៗយកចិត្តទុកដាក់យ៉ាងខ្លាំង ។ ក្មួយៗមានការប្តេជ្ញាចិត្តដ៏អស្ចារ្យ ហើយអ្នកខ្លះមានការថប់បារម្ភ ។ ខ្ញុំសូមធានាដល់ក្មួយៗថា ព្រះបានរៀបចំផ្លូវសម្រាប់ការរស់នៅប្រកបដោយសុខភាពល្អសម្រាប់មនុស្សគ្រប់គ្នានៅលើភពផែនដីនេះ ប្រសិនបើយើងស្ម័គ្រចិត្តប្រើប្រាស់អំណោយទាន និងទេពកោសល្យរបស់យើងសម្រាប់ការល្អនេះ រក្សាភាពស័ក្ដិសមក្នុងការទទួលវិវរណៈ និងប្រើប្រាស់ធនធានដ៏បរិបូរណ៍នៃផែនដីដើម្បីថែទាំគ្នាទៅវិញទៅមក ។

ព្រះអម្ចាស់បានមានព្រះបន្ទូលថា ៖

« យើង … បានលាតផ្ទៃមេឃ ហើយបានស្ថាបនាផែនដី គឺជាការដែលព្រះហស្តយើងធ្វើ ហើយគ្រប់ទាំងអស់នៅទីនោះសុទ្ធតែជារបស់ផងយើង ។

« ដ្បិតផែនដីបានពោរពេញ ហើយមានបរិបូរគ្រប់គ្រាន់ និងនៅសល់ទៀតផង មែនហើយ យើងបានរៀបចំគ្រប់ទាំងអស់ ហើយបានប្រទានដល់កូនចៅមនុស្សឲ្យធ្វើជាភ្នាក់ងារដល់ខ្លួន » ។

តើអ្នកនឹងប្រើសិទ្ធិជ្រើសរើសដែលអ្នកបានទទួល ការត្រួតត្រារបស់អ្នក សម្រាប់ពរជ័យដ៏រុងរឿងនៃផែនដីនេះដោយរបៀបណា ?

ព្រះអម្ចាស់បានបញ្ជាក់នៅក្នុងខគម្ពីរបន្ទាប់ថា យើងត្រូវតែ « យកពីរបស់បរិបូរដែល [ ទ្រង់បាន ] បង្កើតមក ហើយចែកចំណែក [ របស់យើង ] តាមក្រឹត្យវិន័យនៃដំណឹងល្អ [ របស់ទ្រង់ ] ដល់មនុស្សទាល់ក្រ និងមនុស្សកម្សត់ទុគ៌ត » ។ ហើយមានបរិបូរគ្រប់គ្រាន់និងនៅសល់ទៀតផងប្រសិនបើយើងចែកចាយពរជ័យដ៏បរិបូររបស់យើង ហើយប្រើសិទ្ធិជ្រើសរើសរបស់យើងជាអ្នកត្រួតត្រាដូចជាព្រះគ្រីស្ទនៅលើផែនដី ។

ចូរយើងត្រឡប់ទៅការដកស្រង់ពីប្រធាន ណិលសុន អំពីការត្រួតត្រារបស់យើងសម្រាប់ផែនដីនេះវិញ ។ លោកបានមានប្រសាសន៍ថា ៖ « ក្នុងនាមជាអ្នកទទួលអត្ថប្រយោជន៍ពីការបង្កបង្កើតដ៏ទេវភាព តើយើងគួរតែធ្វើអ្វីខ្លះ ? យើងគួរតែថែរក្សាផែនដីនេះ ធ្វើជាអ្នកកាន់កាប់ត្រួតត្រាដ៏ឈ្លាសវៃនៅលើផែនដី ហើយថែរក្សាផែនដីសម្រាប់មនុស្សជំនាន់ក្រោយ » ។

បន្ទាប់មក ប្រធាន ណិលសុន បានបន្តថា « ហើយយើងត្រូវស្រឡាញ់ និងមើលថែគ្នាទៅវិញទៅមក » ។

វាជាការសំខាន់ណាស់ដែលយើងត្រូវស្គាល់ទំនាក់ទំនងរវាងការថែរក្សាផែនដី និងមើលថែអ្នកជិតខាងរបស់យើង ។ ក្នុងការថែរក្សាផែនដី ធ្វើឲ្យបរិស្ថានក្នុងតំបន់របស់យើងស្រស់ស្អាត និងជួយសហគមន៍របស់យើងឲ្យកាន់តែមាននិរន្តរភាព យើងកំពុងដើរតួជាអ្នកត្រួតត្រាផែនដីដ៏ឈ្លាសវៃ ដើម្បីផ្ដល់ពរដល់ជីវិតរបស់អ្នកជិតខាងរបស់យើង ។ ពួកគេគឺជាអ្នកដែលយើងត្រូវបានបង្គាប់ឲ្យស្រឡាញ់ ។ ដូចជាចៀមក្នុងរឿងប្រៀបប្រដូច យើងផ្ដល់អាហារដល់អ្នកស្រេកឃ្លាន ឲ្យទឹកដល់អ្នកស្រេក ស្លៀកពាក់ឲ្យអ្នកអាក្រាត ហើយទៅសួរសុខទុក្ខអ្នកឈឺ និងអ្នកនឿយហត់ ។ យើង « ជួយអ្នកទន់ខ្សោយ លើកដៃដែលរោយ ហើយចម្រើនកម្លាំងដល់ក្បាលជង្គង់ដែលញ័រផង » ។

បងប្អូនប្រុសស្រីរបស់ក្មួយៗនៅទូទាំងពិភពលោកកំពុងធ្វើការណ៍នេះ ។ អេរីតាបានធំធាត់នៅលើកោះដាច់ស្រយាលមួយនៃ ម៉ារ៉ាគី គីរីបាទី ។ បន្ទាប់ពីត្រឡប់មកពីបេសកកម្មរបស់គាត់វិញ គាត់បានចូលរៀននៅ BYU-Hawaii ជាកន្លែងដែលគាត់បានចូលរួមក្នុង SWAT ដែលជា Sustainable World Action Technology Team ( ក្រុមបច្ចេកវិទ្យាសកម្មភាពពិភពលោកប្រកបដោយនិរន្តរភាព ) និងបានសិក្សាអំពីអ៊ីដ្រូប៉ូនិច ដែលជាវិធីសាស្រ្តនៃការដាំរុក្ខជាតិដោយគ្មានដីដោយប្រើសារធាតុរ៉ែនៅក្នុងទឹក ។ នៅពេលបញ្ចប់ការសិក្សា អេរីតាបានត្រឡប់ទៅគីរីបាទី ដើម្បីជួយដល់ប្រជាជនរបស់គាត់វិញ ។

គីរីបាទីជាប្រទេសកោះមួយដែលមានកោះផ្កាថ្មរាងជារង្វង់ចំនួន៣២ ដែលមានបឹងកណ្តាលហៅថា អាតូល និងកោះផ្កាថ្មមួយ ។ ដោយសារតែទីតាំងរបស់វានៅតាមបណ្តោយខ្សែអេក្វាទ័រ នោះលក្ខខណ្ឌអាកាសធាតុគឺមិនល្អទេ ។ ខ្យល់សមុទ្រក្តៅ ប្រៃ និងការទន្ទ្រាននៃទឹកសមុទ្របំផ្លាញដំណាំ និងបំពុលទឹក ។ ដូច្នេះមានការខ្វះខាតដី និងកន្លែងដើម្បីដាំគ្រឿងបរិភោគដែលមានជីវជាតិ ។ កង្វះអាហារូបត្ថម្ភ និងជំងឺបានរីករាលដាលយ៉ាងទូលំទូលាយសម្រាប់អ្នកកោះគីរីបាទី ដោយសារតែពួកគេពឹងផ្អែកស្ទើរតែទាំងស្រុងលើអាហារនាំចូល និងកែច្នៃ ។

ប៉ុន្តែ អេរីតាមានកម្លាំង និងចក្ខុវិស័យ ទេពកោសល្យដែលគាត់បានប្រើដើម្បីបង្កើតកម្មវិធីប្រកបដោយនិរន្តរភាព ដើម្បីបង្រៀនដល់គ្រួសារទាំងឡាយក្នុងមូលដ្ឋានអំពីរបៀបដាំបន្លែ និងផ្លែឈើដែលមានសុខភាពល្អដោយប្រើអ៊ីដ្រូប៉ូនិច ។ សួនច្បារអ៊ីដ្រូប៉ូនិចអាចចល័តបាន ដាំដោយខ្លួនឯង ហើយលូតលាស់យ៉ាងឆាប់រហ័ស បង្កើតផលក្នុងរយៈពេល ៣០ថ្ងៃ ។

សម្រាប់ការងារប្រកបដោយភាពច្នៃប្រឌិត និងជួយសង្គ្រោះជីវិតរបស់គាត់ អេរីតាទទួលបានពានរង្វាន់ ជើងឯករបស់អង្គការសហប្រជាជាតិនៃផែនដីសម្រាប់តំបន់អាស៊ីប៉ាស៊ីហ្វិក ។

អេរីតាគឺជាគំរូដ៏អស្ចារ្យនៃការប្រើប្រាស់អំណោយទាន និងទេពកោសល្យក្នុងការត្រួតត្រាផែនដី និងអ្នកជិតខាងរបស់គាត់ ។ ដោយការផ្តល់អាហារដល់អ្នកដែលស្រេកឃ្លាន នោះយើងត្រូវបានរាប់ក្នុងចំណោមចៀមដែលនៅខាងស្តាំព្រះហស្តរបស់ព្រះ ។

ហើយយើងត្រូវផ្តល់ទឹកដល់អ្នកដែលស្រេក ។ ការផ្តល់ពរដល់អ្នកជិតខាងយើងនូវការទទួលបានទឹកស្អាតជាកត្តាសំខាន់សម្រាប់ការរីកចម្រើនរបស់មនុស្ស ។ ដើម្បីសម្រេចកិច្ចការនេះ សាសនាចក្រសហការជាមួយអង្គការ និងសហគមន៍មូលដ្ឋាននៅជុំវិញពិភពលោក ដើម្បីកែលម្អលទ្ធភាពទទួលបានសេវាទាំងនេះ និងពង្រឹងប្រព័ន្ធទាំងមូល ដោយធានាថាដំណោះស្រាយមានរយៈពេលយូរ និងលើកកម្ពស់ភាពខ្លួនទីពឹងខ្លួន ។ នេះគឺជាកិច្ចការដ៏សំខាន់ ! ហើយវាមានសារៈសំខាន់កាន់តែខ្លាំងឡើងៗ នៅពេលដែលគ្រោះរាំងស្ងួតរីករាលដាលពាសពេញផែនដី ហើយចំនួនប្រជាជននៅតែមានកំណើនកើនឡើង ។

អាឡិចហ្សានដ្រាជាយុវមជ្ឈិមវ័យនៅកាស្កា ប្រទេសប៉េរូ បានសួរខ្លួនឯងថា « តើយើងខ្វះអ្វីនៅទីនេះ ? » អាឡិចហ្សានដ្រាដឹងថាយ៉ាងហោចណាស់ ២០ ភាគរយនៃគ្រួសារនៅក្នុងសហគមន៍របស់នាងខ្វះសេវាអនាម័យដែលមានសុវត្ថិភាព ដែលនាំឲ្យមានការកើនឡើងហានិភ័យនៃជំងឺដែលបណ្តាលមកពីទឹកដូចជាជំងឺអាសន្នរោគ ។ ដើម្បីដោះស្រាយបញ្ហាប្រឈមមុខនេះ អាឡិចហ្សានដ្រាបានចូលរួមវគ្គបណ្តុះបណ្តាលអាជីវកម្មផ្នែកអនាម័យដែលរៀបចំដោយក្រុម Water for People ( ទឹកសម្រាប់ប្រជាជន ) ក្នុងមូលដ្ឋាននៅក្នុងប្រទេសប៉េរូ ។

នាងបានចាប់ផ្តើមអាជីវកម្មមួយ ហើយបានស្តុកទុកក្នុងហាងតូចមួយរបស់នាងនូវសម្ភារដូចជា ឡាបូលាងដៃ ក្បាលម៉ាស៊ីនទឹក បង្គន់ ការ៉ូ និងសម្ភារផ្សេងៗទៀតដែលគ្រួសារត្រូវការដើម្បីធ្វើបន្ទប់ទឹករបស់ពួកគេឲ្យហើយ ។ ឥឡូវនេះ ក្រុមគ្រួសារនៅកាស្កា មានលទ្ធភាពប្រើប្រាស់សម្ភារដែលពួកគេត្រូវការសម្រាប់ធ្វើបន្ទប់ទឹកក្នុងផ្ទះហើយ ។

ក្មួយៗអាចរកមើលតម្រូវការទឹកស្អាតនៅក្នុងសហគមន៍របស់ក្មួយៗ និងរបៀបដែលក្មួយៗអាចចូលរួមបានផងដែរ ។

ព្យាការីអេសាយបានថ្លែងឡើងវិញពីព្យាការីយេរេម៉ា ជាមិត្តរួមសម័យរបស់លោក នៅពេលលោកប្រាប់យើងថា ៖

« បើឯងផ្តល់សេចក្តីសប្បុរសដល់មនុស្សស្រេកឃ្លានទាំងចំអែតចិត្តនៃអ្នកដែលមានទុក្ខវេទនា នោះពន្លឺរបស់ឯងនឹងភ្លឺឡើងក្នុងទីងងឹត ។ …

« ព្រះយេហូវ៉ាទ្រង់នឹងនាំផ្លូវឯងជានិច្ច ហើយនឹងចំអែតព្រលឹងឯងនៅក្នុងទីហួតហែង … ឯងនឹងបានដូចជាសួនច្បារ ដែលគេស្រោចទឹក ហើយដូចជាក្បាលទឹក ដែលមិនខានហូរឡើយ » ។

ជាការពិតណាស់ ព្រះយេស៊ូវគ្រីស្ទគឺជាប្រភពនៃទឹកដែលមានជីវិតទាំងអស់ ។ ខ្ញុំសូមថ្លែងថា នៅពេលយើងផ្ដល់ទឹកដល់អ្នកដែលស្រេក នោះយើងទទួលបានពរដើម្បីផឹកទឹករស់របស់ទ្រង់ — « រន្ធទឹកដែលផុសឡើងទៅដល់ជីវិតអស់កល្បជានិច្ច » ។ នៅពេលយើងយកចិត្តទុកដាក់ចំពោះផែនដី និងអ្នកជិតខាងយើង នោះយើងខិតកាន់តែជិតព្រះអង្គសង្គ្រោះ ហើយប្រាថ្នាចង់បានទំនាក់ទំនងនៃសេចក្តីសញ្ញាជាមួយនឹងទ្រង់ ដែលអនុញ្ញាតឲ្យយើងក្លាយកាន់តែដូចទ្រង់ ។ យើងនឹងមានទំនួលខុសត្រូវជាអ្នកត្រួតត្រា— ហើយជាអ្នកត្រួតត្រាដែលរីករាយផងដែរ ។ យើងនឹង បានចម្រើន ហើយសំកាំងស្លាបដូចជាឥន្ទ្រី និងឥតដែលហត់ឡើយ ។

កាលពីឆ្នាំមុន គណៈប្រធានសមាគមសង្គ្រោះទូទៅបានប្រកាសពីការពង្រីកគំនិតផ្ដួចផ្ដើមជាសកលដើម្បីលើកកម្ពស់សុខភាព និងសុខុមាលភាពរបស់ស្ត្រី និងកុមារ ។ តាមសំណើរបស់គណៈប្រធានទីមួយ សមាគមសង្គ្រោះកំពុងដឹកនាំកិច្ចខិតខំប្រឹងប្រែងនេះ ។

យើងចង់លើកកម្ពស់ដល់ស្ត្រី និងក្រុមគ្រួសារជាមួយនឹងការយល់ដឹង និងធនធានកាន់តែច្រើន ដើម្បីពួកគេធ្វើការផ្លាស់ប្តូរដែលអាចមានឥទ្ធិពលយូរអង្វែងនៅក្នុងផ្ទះ សហគមន៍ និងប្រទេសជាតិរបស់ពួកគេកាន់តែប្រសើរឡើង ។ នៅពេលដែលស្ត្រីត្រូវបានលើកម្ពស់ ដោយសារតែនាងមានសុខភាពល្អ និងទទួលបានការអប់រំ នោះគ្រួសារត្រូវបានផ្ដល់ពរ សហគមន៍ត្រូវបានលើកតម្កើង និងប្រទេសជាតិត្រូវបានពង្រឹង ។ នៅពេលដែលបងប្អូនផ្ដល់ពរដល់កុមារ នោះបងប្អូនវិនិយោគនៅលើអនាគត ។ ដូច្នេះការងាររបស់យើងផ្តោតលើអាហារូបត្ថម្ភសម្រាប់កុមារអាយុក្រោម ៥ ឆ្នាំ ការថែទាំមាតា និងទារក ការចាក់ថ្នាំបង្ការ និងការអប់រំ ។

អាឡិនណាគឺជាយុវមជ្ឈិមវ័យម្នាក់រស់នៅក្នុងរដ្ឋចចចារ សហរដ្ឋអាមេរិក ។ នាងកំពុងបន្តការសិក្សាថ្នាក់បណ្ឌិតផ្នែកព្យាបាលអ្នកជំងឺដោយធ្វើសកម្មភាពផ្សេងៗ ដោយមានគោលដៅធ្វើការនៅក្នុងអង្គភាពថែទាំទារកទើបនឹងកើតក្នុងមន្ទីរពេទ្យ ( NICU ) សម្រាប់ទារកដែលត្រូវការការថែទាំបន្ថែមក្រោយពេលកើត ជាពិសេសអ្នកដែលកើតមិនគ្រប់ខែ ។ គំនិតផ្តួចផ្តើមជាសកលរបស់សមាគមសង្គ្រោះសម្រាប់ស្ត្រី និងកុមារ ដក់ជាប់ជាមួយនឹងអាឡិនណា ។ ដោយបានទទួលការបំផុសគំនិតពីការអញ្ជើញឲ្យចូលរួមក្នុងគំនិតផ្តួចផ្តើមជាសកលនេះ អាឡិនណាកំពុងបង្កើត « ការថែទាំដោយការដាក់កូននៅលើដើមទ្រូង » ឬការទំនាក់ទំនងស្បែកប៉ះនឹងស្បែកសម្រាប់ទារកដែលកើតមិនគ្រប់ខែ ដែលជាប្រធានបទនៃគម្រោងបញ្ចប់ការសិក្សារបស់នាង ។

មានទារកជិត ១៥ លាននាក់កើតមិនគ្រប់ខែជារៀងរាល់ឆ្នាំនៅទូទាំងពិភពលោក ។ ហើយនៅទីក្រុងអាត្លង់តា រដ្ឋចចចារ ជាកន្លែងដែលអាឡិនណារស់នៅ អត្រាកំណើតមិនគ្រប់ខែ និងអត្រាមរណៈរបស់ទារកគឺខ្ពស់ជាងមធ្យមភាគជាតិរបស់សហរដ្ឋអាមេរិក។

អាឡិនណាកំពុងបង្កើតកម្មវិធីអប់រំ ដើម្បីឲ្យមនុស្សយល់ដឹងកាន់តែច្រើនអំពីអត្ថប្រយោជន៍នៃទំនាក់ទំនងស្បែករវាងទារកមិនគ្រប់ខែ និងម្តាយរបស់ពួកគេ ។ ទារកស្លៀកតែកន្ទប ត្រូវបានដាក់លើទ្រូងរបស់ម្តាយឲ្យប៉ះនឹងស្បែក ដោយដាក់ក្រណាត់គ្រប់លើពួកគេទាំងពីរ ។ ទំនាក់ទំនងនេះរក្សាសីតុណ្ហភាព បន្ថយភាពតានតឹង គ្រប់គ្រងអរម៉ូន បង្កើនទំនាក់ទំនង ជំរុញការបំបៅកូន ធ្វើឲ្យគេងលក់ស្រួល និងអត្ថប្រយោជន៍ជាច្រើនទៀត ។ ប៉ុន្តែវាមិនតែងតែត្រូវបានអនុវត្តនៅក្នុង NICUs ជាស្តង់ដារនៃការថែទាំនោះទេ ។ គម្រោងរបស់អាឡិនណា មានគោលបំណងកែលម្អការអនុវត្ត ។

ការស្រាវជ្រាវរបស់នាងមានអារម្មណ៍ខាងវិញ្ញាណយ៉ាងខ្លាំងចំពោះនាង ។ « ការអានអំពីវិទ្យាសាស្ត្រ … និង … ការរៀនសូត្រអំពីរូបកាយរបស់យើងត្រូវបានបង្កើតឡើងដើម្បីធ្វើរឿងទាំងនេះ » មានន័យសម្រាប់នាង ដោយសារអ្វីដែលនាងដឹងអំពីផែនការនៃសេចក្តីសង្គ្រោះ ។

ការថែទាំដោយស្បែកប៉ះស្បែកសម្រាប់ទារកដែលកើតមិនគ្រប់ខែគឺពិតជាពិសេសណាស់សម្រាប់ខ្ញុំ ដោយសារខ្ញុំមានចៅប្រុសម្នាក់កើតមុនជិតប្រាំពីរសប្ដាហ៍ក្នុងខែកុម្ភៈ ។ ដោយមានទម្ងន់ត្រឹមតែ បី ផោន ប្រាំ អោន ចៅតូចរបស់យើងនៅក្នុង NICU ជិតមួយខែ ។ ហើយរៀងរាល់ថ្ងៃទាំងនោះ កូនប្រសាស្រីរបស់ខ្ញុំ និងកូនប្រុសរបស់ខ្ញុំបានយកគាត់ដាក់នៅលើទ្រូងរបស់ពួកគេ ឲ្យស្បែកប៉ះស្បែក ។ ក្មួយៗឃើញហើយ « ការថែទាំដោយការដាក់កូននៅលើដើមទ្រូង »ក៏សម្រាប់ឪពុកផងដែរ ។ ភាពតក់ស្លុតនៃការកើតភ្លាមៗរបស់ចៅប្រុសយើង និងការឈឺចាប់ក្នុងការបែកគ្នាដោយសារតែត្រូវឲ្យគាត់នៅក្នុងមន្ទីរពេទ្យ ត្រូវបានធូរស្រាលក្នុងគ្រានោះ ។

អាឡិនណាកំពុងអនុញ្ញាតឲ្យពន្លឺនៃការប្រែចិត្តជឿរបស់នាងជះឡើង ។ នាងកំពុងប្រើទេពកោសល្យដែលនាងត្រូវបានប្រទានឲ្យ ហើយនាងកំពុងមើលថែដល់អ្នកដែលត្រូវការតាមរយៈការសិក្សា និងបង្កើនការយល់ដឹងអំពីការអនុវត្តដ៏សំខាន់នេះ ។ ការខិតខំប្រឹងប្រែងរបស់នាងឆ្លើយតបទៅនឹងការអំពាវនាវរបស់ព្រះអង្គសង្គ្រោះ—« យើងបានឈឺ ហើយអ្នករាល់គ្នាបានមកសួរយើង » ។

អេរីតា, អាឡិចហ្សានដ្រា និងអាឡិនណា គឺជាសិស្សរបស់ព្រះយេស៊ូវគ្រីស្ទ ដែលរៀបចំខ្លួនសម្រាប់ការយាងមកជាលើកទីពីររបស់ទ្រង់ នៅពេលពួកគេអនុវត្តការត្រួតត្រាដោយស្មោះត្រង់ និងទទួលបានផលចំណេញលើអ្វីដែលព្រះអម្ចាស់បានប្រទានពរដល់ពួកគេ ។

ព្រះអង្គសង្រ្គោះមានព្រះបន្ទូលថា ៖ « ដែលអ្នករាល់គ្នាបានធ្វើការទាំងនោះ ដល់អ្នកតូចបំផុតក្នុងពួកបងប្អូនយើងនេះ នោះឈ្មោះថា បានធ្វើដល់យើងដែរ » ។ ប្រាកដណាស់ យុវមជ្ឈិមវ័យទាំងនេះគឺជាតំណាងនៃអ្នកដែលព្រះអង្គសង្គ្រោះពិពណ៌នាថា ជាចៀមរបស់ទ្រង់ ដែលនឹងនៅខាងស្ដាំទ្រង់ ដែលមានលក្ខណៈគ្រប់គ្រាន់ដើម្បីរីករាយនឹងវត្តមានរបស់ទ្រង់ ។

យើងជាសមាជិកនៃសាសនាចក្រដែលធ្វើអំពើល្អដ៏អស្ចារ្យនៅទូទាំងពិភពលោក ដែលផ្ដល់ពរដល់ជីវិតរបស់អ្នកជិតខាងយើង មិនត្រឹមតែសមាជិករបស់យើងប៉ុណ្ណោះនោះទេ ។ នៅឆ្នាំ ២០២៤ មាន ៦.៦ លានម៉ោងត្រូវបានផ្ដល់ឲ្យដោយស្ម័គ្រចិត្ត ។ ចំណាយទឹកប្រាក់ចំនួន ១.៤៥ ពាន់លានដុល្លារអាមេរិក ។ បានបម្រើដល់ប្រទេស និងដែនដីចំនួន ១៩២ ។ គំនិតផ្តួចផ្តើមមនុស្សធម៌ជាសកលរបស់សាសនាចក្ររួមមានគម្រោងទឹកស្អាត អនាម័យផ្ទាល់ខ្លួន និងអនាម័យសាធារណៈ ជំនួយសង្គ្រោះបន្ទាន់ ការថែទាំសុខភាព និងគម្រោងសន្តិសុខស្បៀង ។ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ និងសមាជិករបស់សាសនាចក្រនេះកំពុងបង្ហាញពន្លឺរបស់ពួកគេដើម្បីលើកតម្កើងព្រះវរបិតាសួគ៌របស់យើង ។

ខណៈដែលសាសនាចក្រ និងសមាគមសង្គ្រោះអាច ហើយនឹងប្រើប្រាស់លទ្ធភាពជាសកលរបស់ខ្លួន ដើម្បីពង្រីកកិច្ចខិតខំប្រឹងប្រែងដែលបានបំផុសគំនិតដើម្បីផ្តល់អាហារដល់អ្នកស្រេកឃ្លាន ផ្តល់ទឹកដល់អ្នកស្រេក ស្លៀកពាក់ដល់អ្នកអាក្រាត និងថែទាំអ្នកជំងឺ ការងារដ៏សំខាន់ និងមានឥទ្ធិពលបំផុតនៅតែបន្តធ្វើម្តងមួយៗ ។

ក្នុងការព្យាយាមធ្វើតាមព្រះយេស៊ូវគ្រីស្ទ យើងខិតខំដើម្បីស្គាល់នូវតម្រូវការភ្លាមៗដែលនៅជុំវិញខ្លួនយើង ហើយឆ្លើយតបដោយក្ដីស្រឡាញ់ ។ យើងព្យាយាមធ្វើជាអ្នកត្រួតត្រាដ៏ស្មោះត្រង់នៃទ្រព្យសម្បត្តិរបស់ទ្រង់—ដែលរួមបញ្ចូលទាំងទេពកោសល្យ និងឱកាសដែលយើងបានទទួលពរ ផែនដីនៅក្នុងភាពរុងរឿងរបស់ខ្លួន និងអ្នកដែលយើងមានឥទ្ធិពលលើដោយផ្ទាល់ ។

ដូចជាណាម៉ាន់ពីព្រះគម្ពីរសញ្ញាចាស់ដែរ ក្មួយៗប្រហែលជាកំពុងរង់ចាំគេប្រាប់ឲ្យ « ធ្វើការអ្វីយ៉ាងធំ »—ដោយឆ្ងល់ថា តើក្មួយៗនឹងទៅដល់កន្លែងដាច់ស្រយាលនៃទ្វីបអាហ្រ្វិក ឬកោះមួយក្នុងសមុទ្រដើម្បីថែទាំអ្នកជិតខាងក្នុងពិភពលោករបស់ក្មួយៗដោយរបៀបណា ។

ក្មួយៗប្រុសស្រី ខ្ញុំសូមអញ្ជើញក្មួយៗឲ្យប្រើអំណោយទាន និងទេពកោសល្យរបស់ក្មួយៗដើម្បីធ្វើរឿងតូចតាច និងសាមញ្ញមួយចំនួននៅក្នុងផ្នែកនៃការត្រួតត្រារបស់ក្មួយៗ ។ មិនថាក្មួយៗរស់នៅទីណាទេ តែងតែមានកុមារខ្វះអាហារូបត្ថម្ភ ។ មិនថាក្មួយៗរស់នៅទីណាទេ តែងតែមានអ្នកដែលមិនចេះអានអក្សរ ។ មិនថាក្មួយៗរស់នៅទីណាទេ តែងតែមានឧបសគ្គចំពោះការថែទាំសុខភាព ។ មិនថាក្មួយៗរស់នៅទីណាទេ តែងតែមានអ្នកស្រេកឃ្លាន ស្រេកទឹក អាក្រាត ឈឺ ហើយជាប់គុក តាមន័យត្រង់ ឬក្នុងន័យធៀប ។

មិត្តសម្លាញ់អើយ យើងត្រូវការក្មួយៗ ! ខ្ញុំសង្ឃឹមថាក្មួយៗនឹងស្វែងរកវិវរណៈដោយអស់ពីចិត្ត ហើយប្រើអំណោយទាន និងទេពកោសល្យរបស់ក្មួយៗ ដើម្បីស្វែងរកដំណោះស្រាយប្រកបដោយភាពច្នៃប្រឌិត ដើម្បីជួយផ្ដល់ពរដល់អនាគតបុត្រាបុត្រីរបស់ព្រះទាំងអស់ ។ នេះពិតជាផ្នែកនៃការត្រួតត្រាដ៏ទេវភាពរបស់ក្មួយៗ ។

[ វីដេអូ ( អក្សររត់ចំណងជើង ) ]

« សកលលោកនេះធំណាស់ ។ កាឡាក់ស៊ីរាប់កោដិដែលមានផ្កាយរាប់លាន ដី ទឹក រុក្ខជាតិ និងសត្វ ។ ប៉ុន្តែ … ព្រះទ្រង់ជ្រាប និងស្រឡាញ់ការបង្កបង្កើតទាំងអស់របស់ទ្រង់តាមឈ្មោះ ។ រួមទាំងក្មួយៗផងដែរ » ។

[ ចប់វីដេអូ ]

ខ្ញុំបញ្ចប់ជាមួយនឹងរឿងផ្ទាល់ខ្លួនមួយ មិត្តសម្លាញ់របស់ខ្ញុំម្នាក់ដែលមានឈ្មោះថាលីឌា ដែលបានអធិស្ឋានបើកនៅល្ងាចនេះ ។ ខ្ញុំបានស្គាល់លីឌា ពេលនាងកំពុងបម្រើក្នុងអគារសមាគមសង្គ្រោះក្នុងនាមជាអ្នកផ្សព្វផ្សាយសាសនាផ្នែកសេវាកម្មជាច្រើនឆ្នាំមុន ។ លីឌាតែងតែស្លៀកពាក់ពណ៌ស្វាយ ពីព្រោះស្ត្រីដែលត្រូវបានពិពណ៌នាថាជាអ្នកប្រែចិត្តជឿដំបូងរបស់ប៉ុល គឺលីឌា ដែលជាអ្នកលក់ក្រណាត់ពណ៌ស្វាយ ។

លីឌាត្រូវបានធ្វើរោគវិនិច្ឆ័យថាមានជំងឺរលាកសន្លាក់ឆ្អឹងនៅពេលនាងមានអាយុទើបតែបួនឆ្នាំប៉ុណ្ណោះ ។ ហើយខណៈដែលនាងប្រឈមនឹងការឈឺចាប់ជារៀងរាល់ថ្ងៃ នាងបានអនុញ្ញាតឲ្យពន្លឺនៃការប្រែចិត្តជឿរបស់នាងចំពោះព្រះយេស៊ូវគ្រីស្ទបំភ្លឺដោយរីករាយ ។ ហើយបើសិនជាមានអ្វីណាមួយ ដែលប្រកបដោយគុណធម៌ គួរឲ្យស្រឡាញ់ ឬឈ្មោះល្អ ឬក៏គួរឲ្យសរសើរ—នោះគឺជានាងហើយ ។

ជាផ្នែកនៃកិច្ចការនេះ ដែលត្រូវថ្លែងទៅកាន់ក្មួយៗទាំងអស់គ្នា ខ្ញុំត្រូវបានអញ្ជើញឲ្យជ្រើសរើសអស់អ្នកដែលនឹងអធិស្ឋាននៅយប់នេះ ។ លីឌាត្រូវបាននឹកឃើញមុនគេភ្លាម ។ នាងបានបញ្ចប់បេសកកម្មរបស់នាង បានចូលរួមសាលានៅ BYU ហើយត្រូវបានទទួលឲ្យចូលរៀននៅមហាវិទ្យាល័យគិលានុបដ្ឋាយិកា ។ ហើយដោយសារនាងជាមិត្តសម្លាញ់របស់ខ្ញុំ យើងបន្តរក្សាទំនាក់ទំនងជាមួយនឹងគ្នា ។ ខ្ញុំស្រឡាញ់លីឌា ។

នោះគឺជាភារកិច្ចរបស់ខ្ញុំក្នុងការសុំនាងឲ្យអធិស្ឋាន ប៉ុន្តែខ្ញុំមិនបានមានឱកាសទូរសព្ទទៅសោះ ។ បន្ទាប់មកនៅថ្ងៃទី ៣១ ខែមីនា ខ្ញុំបានទទួលសារនេះពីលីឌា ។

« អរុណសួស្តី ប្រធាន ចនសុន !!!

« ខ្ញុំស្រឡាញ់ប្រធានខ្លាំងណាស់ !

« យប់មិញខ្ញុំបានសុបិនឃើញប្រធាន ។ ខ្ញុំពិតជាមានអារម្មណ៍ភ័យខ្លាច និងតានតឹងចំពោះអ្វីមួយដែលខ្ញុំត្រូវធ្វើ ហើយប្រធានបានសង្កេតឃើញ ។ ប្រធានបានឱបខ្ញុំ ប្រធានបានដាក់ក្បាល [ ចុះ ] ជិតក្បាលរបស់ខ្ញុំ ហើយបានខ្សឹបប្រាប់ខ្ញុំថា ‹ មិនថ្វីទេ លីឌា ប្អូនអាចធ្វើកិច្ចការនេះបាន ។ គ្រាន់តែធ្វើវាសន្សឹមៗទៅ › ។ ការលើកទឹកចិត្ត និងការរំឭកដ៏ទន់ភ្លន់របស់ប្រធានឲ្យធ្វើវាសន្សឹមៗ គឺជាអ្វីដែលខ្ញុំពិតជាចង់ឮបំផុតនៅថ្ងៃនេះ ។ ខ្ញុំពិតជាត្រូវការការឱបរបស់ប្រធាន ចនសុន ណាស់ ! ខ្ញុំគិតថា ព្រះវរបិតាសួគ៌ផ្ញើសារលិខិតតូចៗមកយើងពេលខ្លះតាមរយៈមនុស្សដែលយើងស្រឡាញ់ និងទុកចិត្ត ដូចជាប្រធានចឹង ។

« ខ្ញុំសង្ឃឹមថា ប្រធាននឹងមានអារម្មណ៍ថា ពួកទេវតាលើកប្រធានឡើងនៅសប្តាហ៍នេះ ។ មិត្តជាទីស្រឡាញ់ នេះគឺជាការឱបដ៏កក់ក្ដៅសម្រាប់ប្រធាន » ។

ខ្ញុំបានផ្ញើសារតបវិញភ្លាមថា « ខ្ញុំមិនអាចរង់ចាំបានទេដើម្បីប្រាប់ប្អូនថា ហេតុអ្វីប្អូនបានមានសុបិននោះ ! »

ខ្ញុំបានទូរសព្ទទៅលីឌានៅល្ងាចនោះ ដើម្បីសួរថាតើនាងស្ម័គ្រចិត្តអធិស្ឋាននៅក្នុងការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យនេះដែរឬទេ ។ ពិតណាស់ នាងបាននិយាយថា ចាស—ហើយបានបន្តប្រាប់ខ្ញុំពីអ្វីដែលនាងមិនបានចែកចាយក្នុងសារជាអក្សររបស់នាង ។ វាជាព័ត៌មានលម្អិតដែលនាងគិតថា មិនសំខាន់នៅពេលនាងសរសេរមកខ្ញុំ ។ ក្នុងសុបិនរបស់នាង នាងមានការភ័យខ្លាចក្នុងការអធិស្ឋាននៅចំពោះមុខមនុស្សច្រើន ។

ឱ ព្រះអង្គម្ចាស់ពិតជាមានព្រះហឫទ័យមេត្តាករុណាណាស់ ! ខ្ញុំបានពន្យារពេលសុំលីឌាឲ្យអធិស្ឋាន—ដោយគ្មានហេតុផលល្អសោះ—លើកលែងតែ លីឌាត្រូវការសុបិនរបស់នាងប៉ុណ្ណោះ ។ ការធានាថាព្រះអម្ចាស់ជ្រាបអំពីនាង ហើយចង់ឲ្យនាងមានឱកាសនេះ ។

មែនហើយ សកលលោកគឺធំធេងណាស់ ។ កាឡាក់ស៊ីរាប់កោដិ ។ មានផ្កាយរាប់លាន ។ ដី ទឹក រុក្ខជាតិ សត្វ ដែលទ្រង់បានប្រទានឲ្យយើងនូវការត្រួតត្រា ។ ហើយ ព្រះជ្រាបដឹង និងស្រឡាញ់ការបង្កបង្កើតរបស់ទ្រង់ទាំងអស់ តាមឈ្មោះ ។ រួមទាំងក្មួយៗផងដែរ ។

ព្រះអង្គសង្រ្គោះបានណែនាំពីការងារបម្រើក្នុងព្រះជន្មរមែងស្លាប់របស់ទ្រង់ ដោយការមានព្រះបន្ទូលថា ទ្រង់ត្រូវបានចាត់ឲ្យមក « ផ្សាយដំណឹងល្អដល់មនុស្សទ័លក្រ … ដើម្បីនឹងប្រោសមនុស្ស ដែលមានចិត្តសង្រេង ហើយប្រកាសប្រាប់ពីសេចក្តីប្រោសលោះដល់ពួកឈ្លើយ និងសេចក្តីភ្លឺឡើងវិញដល់មនុស្សខ្វាក់ ហើយឲ្យដោះមនុស្សដែលត្រូវគេជិះជាន់ឲ្យរួច » ។ ប្រសិនបើនោះជាបេសកកម្មរបស់ទ្រង់ ហើយយើងជាសិស្សរបស់ទ្រង់ នោះយើងក៏មានចំណែកក្នុងព្រះរាជបំណងរបស់ទ្រង់ដែរ ។

ក្មួយៗគឺត្រូវបានរៀបចំយ៉ាងពិសេស ហើយបានតែងតាំងជាមុនដើម្បីជួយទ្រង់ ។ ក្មួយៗគឺជាបុត្រា និងបុត្រីរបស់ព្រះ ។ ទ្រង់ស្គាល់ក្មួយៗ ។ ក្មួយៗគឺនៅក្នុងទំនាក់ទំនងនៃសេចក្ដីសញ្ញាជាមួយនឹងទ្រង់ ។ ក្មួយៗនឹងមិនដែលហត់នឿយនូវសេចក្តីអត់ធ្មត់ដ៏មេត្តារបស់ទ្រង់សម្រាប់ក្មួយៗឡើយ ។ ហើយនៅពេលដែលក្មួយៗរក្សាសេចក្តីសញ្ញាដែលក្មួយៗបានធ្វើជាមួយនឹងទ្រង់ នោះក្មួយៗនឹងទទួលព្រះពរនូវ « ព្រះចេស្ដានៃការព្យាបាល ព្រះចេស្ដានៃការពង្រឹងរបស់ទ្រង់ ។ » ព្រះចេស្ដារបស់ព្រះនឹងពង្រឹងសមត្ថភាពរបស់ក្មួយៗ ពង្រីកទេពកោសល្យដែលក្មួយៗបានទទួលពរ ហើយជួយឲ្យក្មួយៗមើលឃើញទ្រង់នៅក្នុងអ្នកស្រេកឃ្លាន អ្នកស្រេកទឹក អ្នកឃ្លាតឆ្ងាយ និងអ្នកជំងឺ ។

ក្នុងនាមជាសិស្សរបស់ទ្រង់ សូមឲ្យយើងរៀបចំខ្លួនយើងសម្រាប់ការយាងមកជាលើកទីពីររបស់ទ្រង់ ដោយអនុវត្តការត្រួតត្រាដោយស្មោះត្រង់ និងមានផលចំណេញលើអ្វីដែលយើងបានផ្ដល់ពរ ។ ខ្ញុំសូមថ្លែងទីបន្ទាល់ថា នៅពេលដែលក្មួយៗនាំយកការសង្រ្គោះរបស់ព្រះយេស៊ូវគ្រីស្ទទៅកាន់អ្នកដទៃ នោះក្មួយៗនឹងទទួលបានពរដើម្បីរកឃើញការសង្រ្គោះរបស់ក្មួយៗនៅក្នុងទ្រង់ ។

ខ្ញុំប្រាកដថា ព្រះយេស៊ូវគ្រីស្ទមានព្រះជន្មរស់ ។ ទ្រង់ដឹកនាំសាសនាចក្ររបស់ទ្រង់តាមរយៈពួកព្យាការី អ្នកមើលឆុត និងអ្នកទទួលវិវរណៈដែលនៅរស់ ។ ខ្ញុំប្រាកដថា រ័សុល អិម ណិលសុន គឺជាអ្នកតំណាងដ៏មានអានុភាពរបស់ទ្រង់នៅលើផែនដីនេះ ។

កិច្ចការ និងសិរីល្អនៃព្រះវរបិតាសួគ៌ និងព្រះយេស៊ូវគ្រីស្ទរបស់យើង គឺដើម្បីមើលឃើញយើងទៅផ្ទះ រៀបចំ និងមានលក្ខណៈគ្រប់គ្រាន់ដើម្បីនៅក្នុងទីវត្តមានរបស់ទ្រង់ទាំងទ្វេ ដែលជាកន្លែងដែលគ្មានអ្នកស្រេកឃ្លាន អ្នកស្រេកទឹក អ្នកឃ្លាតឆ្ងាយពីគ្នា អ្នកឈឺ ឬអ្នកខ្វិនឡើយ—ដ្បិតពួកគេនឹងត្រូវបានព្យាបាល ហើយ បានសង្រ្គោះ ។ ក្មួយៗគឺជាសហការីដ៏សំខាន់របស់ទ្រង់ទាំងទ្វេ ។ ខ្ញុំស្រឡាញ់ក្មួយៗ ។ ទ្រង់ទាំងទ្វេស្រឡាញ់ក្មួយៗ ។

ក្នុងព្រះនាមដ៏ពិសិដ្ឋនៃព្រះប្រោសលោះយើង ព្រះយេស៊ូវគ្រីស្ទ អាម៉ែន ៕