O Le A Fesootai Togitogi

Ou uso e ma tuafafine pele, uo pele, ou te momoli atu alofaaga ma faamanuiaga a le au Peresitene Sili ma le Korama a Aposetolo e Toasefululua.

Ua ou fiafia tatou te mafuta ma ua matua faafetai ua maua so tatou avanoa e faalogo atu ai i si o’u toalua.

O Harriet o le lasusulu o lo’u olaga. O tagata uma e iloa o ia e alolofa ia te ia. Na te faaleleia ma faafiafiaina atili i latou e siomia o ia. Na ia faia foi lena tosinaga ia te au.

Pei ona outou faalogo atu ia Sister Uchtdorf, na ma faaipoipo laiti lava. O lenei, i le mavae o le tele o tausaga, ou te faafetai mo taimi uma faatasi ma Harriet.

I le aluga o tausaga, ua ou iloa ai o i matou o le tupulaga matutua e i ai le tele o fesili lava e tasi na e ia te outou i le olaga—pau le mea e fai si umi o matou fesili ai. Fesili e pei o le:

Pe o o’u i ai i le ala sa’o?

Pe matauina moni a’u e le Atua? E popole ea o Ia?

Aisea ou te lagona ai i nisi taimi le leai o se faamoemoe, lofituina, lē amanaiaina, po o le tuuatoatasi?

Aisea na le saunia ai e le Atua le vavega na ou matua moomia vave?

Aisea na Ia faataga ai au ia oo i lenei faanoanoa, ma’i, po o se mala?

O fesili faigata nei i soo se vaitausaga.

O fesili faapea e mafai ona matua’i gaulemalie pe a tatou le maua tali vave. I nei vaitaimi e mafai ona tatou fesili i le Google toetoe o mea uma ma maua ai tali i nai sekone.

Ae e le vave pea ona oo mai tali i a tatou fesili sili ona patino, taua, ma o’oo’o. E tele taimi, tatou te faaeaea a’e ai i le lagi, ae o mea uma e foliga e taavilivili ai le faailo faatalitali [cursor] o le uepi.

Tatou te le fia faatalitali, a ea?

A tatou faatalitali e sili atu ma ni nai sekone mo se sailiga i le initoneti e tali mai, tatou te ono manatu ua faaletonu pe ua motusia foi le sootaga. I lo tatou le fiafia, e ono tatou lafoaia ai lava le sailiga. Ae a oo mai i fesili e faavavau, o mataupu tau i le agaga, e tatau ona tatou onosai atili.

E le o tali uma e tutusa le taua. O tali mai le poto faalelalolagi po o manatu taatele e faigofie ona oo mai, ae e vave ona mou atu lo latou taua pe a oso mai ni teori po o ni faiga fou. O tali faalelagi—tali e faavavau—e le mafaatauina. O le mauaina o nei tali e tele ina manaomia ai le ositaulaga, galue, ma le faifaipea

Ae ou te tautino atu ia te outou, o nei tali e aoga ai le faatalitali.

Afai o i ai ni au fesili e le’i taliina, ou te tuu atu la’u molimau patino e faafofogaina oe e lou Tama o i le Lagi, Na Te silafia oe, ma Na Te le tuulafoaia lava oe. O lea aua lava e te fiu. Tauivi pea e mulimuli i Lona ala ma o le a Ia “taita’ia oe” e sue tali ma se taitaiga ua lava e agai ai pea i le itu sa’o—e aunoa ma le faatapulaaina o lou tuputupua’e po o avanoa e faaaoga le faatuatua po o lou faitalia.

Fai mai Steve Jobs, se tasi na faavaeina le Apple: “E [le] mafai ona faafesoota’ia togitogi ao tilotilo i luma. Na o le tilotilo i tua e mafai ai ona faafesoota’i, o lea e tatau ai ona talitonu o le a fesootai togitogi i lou lumanai.”

O le a le uiga o lana tala? Atonu na e vaai i ni atavali na faia i le tuu o togitogi iti o vali i luga o le tapoleni. I le tulaga lata mai, e foliga mai ai nei togitogi e le fesootai ma salalau solo. Ae a e tagai i le atavali atoa, e mafai ona e vaai i togitogi ua taatitia lelei i ni lanu ma le auala o le a fatu mulimuli ane ai ia lanu ma faaali mai ai se mamanu matagofie. O le mea sa foliga muamua mai sa salalau solo ma fenumiai ua amata ona malamalama i ai.

O nisi taimi e pei ai o tatou olaga o nei atavali. O togitogi o loo fauina ai o tatou aafiaga i le olaga e mafai ona alia’e mai e le o fesootai ma lavelave i nisi taimi. E le mafai ona tatou vaaia se faatulagaga i na mea. Ua le mafai ai ona tatou mafaufauina o loo i ai so latou faamoemoega.

Peitai, pe a e vaai i lou olaga mai lau vaaiga faavavau o le talalelei a Keriso, e te amata vaaia le auala e fesootai ai togitogi i le atamamanu tele a le Atua mo oe.

Ma a o e tauivi e faalagolago i le Atua ma mulimuli i Lona Alo, o Iesu Keriso, o le a i ai se aso o le a e vaaia ai le fua faaiu, ma o le a e iloa ai sa i ai pea i le Matai Faatufugaga se fuafuaga mo na togitogi. O le a e iloa ai na Ia tapenaina oe mo avanoa e sili atu le mamalu nai lo mea sa tatou mafaufauina pe ausiaina e oe lava ia. Ua ou vaaia moni lea mea i lo’u lava ia olaga.

Atonu ua outou iloa i le taimi a o o’u laitiiti tele, na faalua ona avea lo’u aiga ma tagata sulufa’i. I tulaga uma e lua, sa iloa manino ai o tagata sa i o matou nofoaga fou sa manatu ia i matou o ni tagata “faatauvaa i lo i latou.” I tamaiti o la’u tupulaga, o la’u gagana tautala sa faailogaina ai au o se tagata mai fafo, ma o se mea tele lea mo latou e faatauemu ma toē i ai.

Sa faigata i o’u matua ona tausi lo matou aiga. O lea sa amata ai e lo’u tina se pisinisi faitagamea, sa taufai fesoasoani uma, ma sa avea a’u, faatasi ma la’u uila vilivae ma le taavaletoso, sa fai ma “tagata tiliva faapitoa” mo lena pisinisi pe a tuua le a’oga.

O le le fiafia ma le atuatuvale ona o feoaiga i nofoaga fou na mafua ai ona faaletonu la’u aoga ma maumau ai le tausaga a’oga atoa e tasi.

I Siamani i Sasae, sa ou aoao ai le FaaRusia o se gagana lona lua. Sa faigata, ae sa gafataulimaina lava. Ae, i Siamani Sisifo, sa manaomia ona ou aoaoina le Igilisi.

Sa foliga faigata lea mea ia te au. Sa ou talitonu sa le’i faia tonu lo’u gutu mo le gagana Igilisi.

I le vaitaimi o o’u tausaga talavou, sa ou faananau ai lava i se teineitiiti ofoofogia ma ona mata eena lapopoa aulelei. Ae paga lea, sa foliga mai sa leai ma sina naunau mai o Harriet ia te a’u. Po o le a lava sa’u taumafaiga, sa lei foliga mai sa maua sina ou avanoa. Ia, ua outou faafofoga i lana itu o le tala.

O lea la, o au o se alii talavou sa le taua ma tauivi sa ola i Siamani i le mavae o le taua ma o le sa lei foliga mai sa tele se avanoa e faamanuiaina ai i le olaga.

Peitai, sa i ai ni nai mea lelei sa i ai mo au.

Sa ou iloa sa alolofa lo’u aiga ia te a’u. I le aoga ma le lotu sa i ai ni faiaoga sa uunaia au ia seti pea ni a’u sini maualuluga ma aua le faavaivai. Ou te manatua pea le taimi na aoao mai ai e se faifeautalai talavou Amerika, “Afai o le Atua e mo [oe], o ai la e faasagatau atu ia te [oe]?” Ma “e mafai mea uma e le Atua.”

Sa i ai se mea e uiga i nei mau na taia ai a’u i le mana tele. Ma afai o le tulaga lena, sa ou manatu ai, aisea ea la ou te fefe ai?

O lea sa ou talitonu ai. Ma sa ou faatuatuaina le Atua.

Mo se taimi, sa ou i ai i se polokalama aperenitisi. Sa lu’iina au e se tasi o a’u faiaoga ou te auai i le aoga po e suesue le faaenisinia o afi taavale. O lea mea na ta’ita’i ai au e maua lo’u naunauga e avevaalele!

Sa faateia a’u ina ua ou iloa o le avea ma se pailate, e tatau ona ou iloa le Igilisi. Sa ou matuai manao e avea o se pailate, ma sa pei o se vavega le suia o lo’u gutu, ma sa lei toe avea ai le Igilisi ma se gagana faigata.

Ioe, sa lei faapea la na sologa lelei ai pea mea i taimi uma.

A o 19 ou tausaga, sa ou malaga atu ai i San Antonio, Texas, e amata la’u a’oga faapailate i le Ea Fosi. I luga o le vaalele, sa ou saofai ai i autafa o se alii sa tautala i se gagana malosi Faa-Texas. Sa ou iloa ai ma lo’u fefe o le Igilisi lea sa ou matua galue malosi e aoao sa le i tutusa ma le Igilisi sa latou tautatala ai i Texas.

I le a’oga faapailate, sa faigata foi. O se polokalama na matua fefeu, faatasi ma tagata uma sa tauva mo le tulaga sili i le faauuga. Sa ou iloaina vave ua ou i ai i se tulaga le lelei ona o le toatele o tagata o la’u vasega o le latou gagana tautala le Igilisi.

Sa lapataia au e a’u faiaoga faapailate e uiga i se isi tulaga le lelei e ono tupu—sa ou faaaluina le tele naua o le taimi i le lotu. Sa talileleia a’u e tagata o le ekalesia i le lotoifale i le latou paranesi ma i o latou aiga, ma sa matou fausiaina faatasi foi se falesa i lo’u taimi i Big Spring, Texas. Sa popole o’u faiaoga i na gaoioiga ina nei faaletonu ai lo’u avanoa i se tulaga maualuga. Sa ou lei manatu i ai. O lea sa ou faatuatuaina ai le Atua ma faia le mea sili na ou mafaia.

Mulimuli ane, sa ou aoaoina le Igilisi (e ui o loo ou galue ai pea). Sa faaiuina manuia la’u aoaoga faapailate. Sa avea a’u ma se pailate o vaalele tau ma mulimuli ane o se kapeteni o vaalele. Ma o lena teineitiiti aulelei mata enaena o a’u miti? O loo i ai iinei ma a’u.

Se’ia oo la ina faaali mai le ata atoa, aua ne’i lofituina oe i galuega tetele, faigata o le olaga. Manatua, o mea tetele e faia mai mea iti. Afai e te tuuto atu e fai ni “mea iti ma le faigofie,” ua talosagaina oe e le Atua e fai—ma e faia ma le filiga e te mafaia ai, o le a mulimuli mai mea tetele.

O nisi o nei “mea iti ma faatauvaa” e aofia ai le tatalo ma le loto i ai i aso taitasi, suesue tusitusiga paia, avea le Sau Mulimuli Mai ia te A’u ma le Mo Le Malosi o le Autalavou o se vaega o au aga masani, tausia o le Upu o le Poto, alu i le lotu, totogi sefuluai ma taulaga, ma ia faamautinoa o loo i ai sau pepa faataga o le malumalu o loo aoga.

Fai nei mea tusa lava pe e te le mana’o ai, e oo foi pe a moomia ai le ositaulaga. O le ositaulaga e mafai ai ona pa’ia na mea, ma o “taulaga e aumaia ai faamanuiaga a le lagi.”

I se lagona, o au osigataulaga “itiiti ma faatauvaa” o togitogi ia o le olaga o aso taitasi ia e maua ai le faatufugaga silisili o lou olaga. Atonu e te le vaaia le auala e fesootai ai togitogi i le taimi nei, ma e te le manaomia ona vaai i ai i le taimi nei. Tau lava ina ia i ai le faatuatua ia lava mo le taimi patino o loo e ola ai i le taimi nei. Faalagolago i le Atua, ma “o mea iti [o le a] tutupu mai ai mea tetele.”

A o ou pei o outou, sa leai ma so’u iloa i mea o le a ave i ai a’u e lo’u olaga. Sa ou lei vaaia le fesootaiina o togitogi i o’u luma.

Ae sa ou faalagolago i le Atua. Sa ou talitonu afai ou te faia le mea sili i le taimi, o le a taulima e le Atua le ata tele.

Ma sa Ia faia.

Sa Ia silafia le taunuuga mai le amataga i le taimi sa ou le iloaina ai.

Sa le mafai ona ou vaaia le lumanai, ae sa Ia silafia.

E oo lava i taimi faigata sa ou manatu ai na tuulafoaiina au, sa i ai o Ia ma a’u—ua ou vaai nei i ai.

I le Faataoto, tatou te maua ai le folafolaga lenei: “Faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”

Ou te augani atu ia e talitonu o le a lelei atu lou olaga pe a e faalagolago i le Atua e taiala ou laasaga. Na te silafia mea e le mafai ona e iloaina, ma ua ia te Ia se lumanai ua saunia mo oe e le o mafai ona e mafaufauina. Sa molimau mai le Aposetolo o Paulo, “O mea e lei vaaia e mata, … e lei lagona foi e taliga, … e lei oo foi i le loto o se tagata, [o mea] ia ua saunia e le Atua mo i latou e alolofa ia te ia.”

Fesili ifo la ia te oe lava, “O lava ea lo’u faatuatua e talitonu ai i le Atua? O o’u loto ea e faatuatuaina e alofa o Ia ia te a’u ma finagalo e faatonu o’u ala?”

Afai e mafai ona e maua sina iota o le faatuatua pei o se fatu o le sinapi i lou loto—tusa pe na o se manao e talitonu—amata iina.

E silafia e le Atua le ala e liliu ai tama’i fatu i laau tetele. Fai mea iti ma le faatauvaa, ona “faateleina lea e le [Atua] e sautuaafe ma faamanuia outou e pei ona ia folafola mai!]”

E te le tau alu mamao i le aganuu o nei aso e faalogo ai i leo feteenai ia e faalotovaivaia pe oo foi ina tauemua faalauaitele ai talitonuga i le Atua, ma i le tatou tapuaiga patino lava.

E faateleina e faasalalauga faaagafesootai na leo.

Ae o la outou tupulaga e le na o le pau lea o se tupulaga ua luitauina ma tauemuina lo latou faatuatua i le Atua. Ua foliga mai o lenei mea o se vaega lava o le tofotofoga faaletino mo fanau uma a le Atua.

“Afai o ni tagata o le lalolagi outou,” sa fetalai atu ai Iesu i Ona soo, “po ua alofa mai le lalolagi i ona tagata; ae le ni ō le lalolagi outou, a ua ou filifilia outou … , o le mea lea e inoino ai le lalolagi ia te outou.”

E sili ai lou taliaina o le tulaga e faapea, o le taimi lava e te faia ai le tautinoga e mulimuli i le Faaola, o le a le fiafia mai i latou o e nonofo i totonu o le fale tele ma le ateatea—fai lava si leotetele i nisi taimi. Atonu latou te taumafai foi e faapalopalo ma faamaasiasi outou.

Ae ia manatua tou te le tali atu ia i latou. Tou te tali atu i le Atua. E i ai le aso o le a e tu ai i Ona luma ma tali atu mo lou olaga.

O le a Ia fesili atu pe na e mulimuli i le Faaola, pe na e alofa i lou tuaoi, pe na e taumafai ma le naunautai e tumau i luga o le ala o le avea ma soo ma faamamalu au feagaiga.

A’u uo talavou pele, o le taimi lenei e tuuto atu ai ia Keriso ma mulimuli i Ona ala.

O le a i ai se aso o le a tootutuli ma tautau atu e fanau uma a le Atua, o Iesu o le Keriso, le Togiola, le Faaola o le lalolagi. O le a latou iloa na maliu o Ia mo i latou.

I lena aso, o le a manino lava o Lona siufofoga ua na o le pau lea o le siufofoga e taua moni lava.

Ia, a tatou talanoa i le tuu atu i le Atua e taiala o tatou olaga, ou te fia faamaninoina se mea se tasi. Atonu tou te le fiafia i mea o le a ou ta’u atua ia te outou. A e ole atu i le Atua mo se taitaiga e uiga i faaiuga i lou olaga—e aofia ai nisi o faaiuga taua—atonu Na te le avatua ia te oe se tali auiliili.

O le mea moni o nisi taimi e le afaina i le Alii le mea ua e filifilia, pau lava le mea o lou tumau i totonu o feagaiga faavae ma mataupu faavae autu o le talalelei toefuatai a Iesu Keriso.

E i ai taimi e i ai se ala patino a le Atua e manao o Ia e te mulimuli ai. E i ai foi taimi o le a Ia lapataia ai oe mai filifiliga patino ona o tulaga lamatia e le mafai ona e muai vaaia. Ae e i ai foi taimi e tele ai ni tali “sa’o” i se fesili, ma e mafai ona e maua le olioli i soo se tali o na tali pau lava le mea ia e ola i upumoni faavavau a le Atua.

Ina ua tupu lenei mea ia Iosefa Samita ma ana soa, sa tuu atu e le Alii se tali mata’ina a o latou saili atu i Lana taitaiga. Na Ia fetalai, “E le afaina [ia te au].”

Ona Ia faaopoopo atu lea, “Tau ina ia faamaoni.”

Masalo e fai si le fiafia i le faalogo atu e le avatua tonu e le Atua ia te oe se faasologa auiliili mo lau malaga i le olaga. Ae pe e te manao moni e faatonutonu oe i auiliiliga uma?

Pe e te manao moni i auala ‘alo i le olaga ae e te lei mauaina se avanoa e fuafua ai mea mo oe lava ia? O le a le ituaiga malaga o le a i ai lena malaga? Mata o le a le aveesea ai ou lagona ua e ausia se mea? O le a faapefea ona e tuputupua’e ma faateleina lou talitonu mautinoa i le Alii ma oe lava ia?

Na tau atu e le Alii ia Oliva Kaotui, “E ao ina e suesue i ai i lou mafaufau; ona e ole mai lea ia te au pe ua sa’o.”

Na tuuina atu e le Tama Faalelagi ia te oe Lana fuafuaga, Lona Ala. Na Ia avatu ia te oe le ata tele. Ua tuu atu foi e ia ia te oe se faiai ma se loto. A e faalagolago ia te Ia, o le a Ia fesoasoani atu ia te oe e faaaoga uma [le faiai ma le loto] i au faaiuga fai. Ua Ia faatuatuaina oe e fai faaiuga sili e tatau ai, e ala i le mulimuli ia Iesu Keriso.

I le tele o tulaga, o faaiuga e te faia i le taimi atonu e le taua e pei o le mea e te faia pe a uma ona faia le faaiuga.

Mo se faataitaiga, atonu e filifili se ulugalii e faaipoipo e ui e manatu nisi o aiga e le o se paaga tutusa atoatoa. Peitai, e maoae lo’u faamoemoe mo se ulugalii faapea, pe afai e uma ona faia le faaiuga, la te tumau ona tuuto i le tasi ma le isi ma i le Alii ma o la loto ma mafaufau atoa. E ala i le taulimaina o le tasi ma le isi i le alofa ma le agalelei ma taulai atu i manaoga faalelagona, faaleagaga, ma faaletino—ma e ala i le faia pea o mea “iti”—e oo ina avea i laua ma paaga tutusa atoatoa.

O le eseesega, mafaufau i le ulugalii le e manatu tagata uma na la pikiina le tagata “atoatoa” ae ona manatu lea ua tuanai atu vaega faigata uma. Afai la te le toe āuāu le tasi i le isi, le toe talanoa, faatuatuanai a la feagaiga paia, ma see atu i le faasausili ma le manatu faapito, o lenei ulugalii ua i ai i luga o se ala e tau atu i le faanoanoa ma le lotofaavauvau.

E faatatau foi lenei mataupu faavae i filifiliga faalematata eseese. E i ai lo’u faamoemoe tele mo i latou o e filifili e masalo e pikiina se galuega e faalē-taualoa ae latou te faia le mea sili e saili ai auala e faaaoga ai a latou galuega e viia ai le Atua ma manuia ai Ana fanau.

E itiiti so’u faamoemoe mo i latou e filifilia ni galuega faagaeetia ae i le aluga o le ala, e le taulai ai i lo latou faasinomaga paia ma le lelei e mafai ona latou ausia e ala i le auauna atu i le Atua ma Ana fanau i lea lava taimi.

Ua saunia e le Atua faamanuiaga faavavau i talaatu o lou iloa. Ina ia fesoasoani ia mauaina, na Ia avatu ai poloaiga, o feagaiga paia, fautuaga musuia faaperofeta, le meaalofa o le Agaga Paia, ma le filifiliga saoloto tatau. Ua matua lava lea e taitai atu ai oe i le fiafia faaletino ma le olioli e faavavau. E ese mai lena, aua nei e faanoanoa pe a e faia ni faaiuga e le atoatoa. O le auala lena e te aoao ai. O le vaega lena o lau malaga!

Leai, e le sologa lelei lava ni malaga mai le amataga e oo i le tini. O le a i ai maninoa ma afā. Ae afai e te faatuatua ia Iesu Keriso, vaai i Lana taulaga togiola o se meaalofa o le alofa ma le salamo o le auala e taliaina ai, e mafai ona e mautinoa faaiuga fiafia.

Atonu e le mafai ona e vaai i ai seia oo i se taimi mulimuli ane, ae o le a e tepa i tua ma iloa ai e le’i tuulafoaiina lava oe e le Alii, tusa lava pe na ia tuu e te faia ni faaiuga se tele mo oe lava. O le a e vaai e fesootai lava togitogi.

O le a la le mea ua ou faamoemoe o le a outou manatuaina mai le tatou faatasiga i lenei aso?

Muamua, ia iloa o tali a le Atua i au fesili aupito sili ona loloto e ono alu ai se taimi, ma e oo mai i ni auala e te lei faamoemoeina. O tali a le Atua e i ai le taua e faavavau. E taua le faatalitali i ai.

Lua, aua e te lofituina a o e savali i le ala o le avea ma soo. Tau lava o le fai o le mea sili e te mafaia i nai mea iti, ma o le a tulaga lelei ai mea tetele.

Tolu, ia i ai sina faatuatua. Ia talitonu e taua oe i le Atua, e silasila o Ia i mea e te le mafai ona vaaia, ma o le a Ia taitai oe i luga o le ala sa’o. E alofa o Ia ia te oe. Faalagolago ia te Ia.

Fa, aua nei faatagaina leo faalotovaivai e faavaivaia oe mai lau malaga o le faatuatua. Manatua, e te le tali atu i e faitio mai ia te oe. E te tali atu i lou Tama Faalelagi. O Ana tulaga faatauaina e taulia.

Lima, saili le taitaiga a le Alii, ma a oo ina Ia fetalai mai, “E le afaina,” ia faia faaiuga sili e mafai ona e faavaea i luga o mea moni ua e iloa. Ona “faamaoni lea.”

Ou te tuuina atu a’u faamanuiaga mo outou i le amataga o lenei tausaga fou, a o outou tauivi ma le naunautai e iloa lo outou Tama Faalelagi, mulimuli ia Iesu Keriso, ma faamamalu i Ana feagaiga, o le a faateleina lo outou faatuatua.

O le a tuputupua’e lo outou talitonu mautinoa a o outou saili e mulimuli i lo outou Faaola ma Ana aoaoga.

Ia Iesu Keriso, o Lana talalelei, ma Lana Ekalesia, o le a outou maua ai le fiafia, olioli, ma le filemu! Ma e i ai le aso, o le a Ia opomauina ai oe i le alofa paia.

Faatasi ai ma se lotofaafetai lematalatalaina, o le a outou vaaia o le Atua lava Ia, i Lona alofa tele, alofatunoa, ma le alofa mutimutivale naua, o loo leoleo outou, faamanuia outou, ma saunia se nofoaga mo outou.

Ou te molimau atu ai i lenei mea ma tuu atu a’u faamanuiaga ia te outou, i le suafa o Iesu Keriso, amene.