Faalagolago i le Atua

O’u uso e ma tuagane pele, a’u uo talavou pele, ua ou lagona lo’u alofa tele mo outou i le lalolagi atoa. Lalelei o tou foliga. Ma outou aulelei. Ma’imau pe ana mafai ona ou opoina outou taitoatasi.

E matagofie naua lo tatou mafuta ai i le asō. Fiafia foi ua ma i ai iinei ma la’u Aposetolo ou te faamemelo i ai. E le tatau ona i ai ni tatou faapitoa, ae i lo’u tulaga, e le afaina. Ua ou faaipoipo i ai.

Na ma faamanatuina talu ai nei le 62 tausaga o la ma faaipoipoga. O lea lava e alofa faavalea le tasi i le isi!

Talanoa i fua o le talalelei! A ma mauaina ni feau faamalo ma alofaaga mai le ma fanau a fanau, ma a latou fanau, ma te iloa le taua tele o faamanuiaga o le avea ma tagata o le Ekalesia ma le talalelei a Iesu Keriso.

O outou na o loo nofotoatasi, tete’a, pe o ola i tulaga luitauina faaleaiga, ou te molimau atu e silafia ma alofa le Atua ia te outou, ma a outou tumau faamaoni i tou feagaiga, o le a lē faapuupuuina pe taofia foi mai ia te outou le olioli o le olaga faaleaiga. Ou te le iloa tonu pe faapefea ona tupu lenei mea, ae ou te iloa ua lava le alofatunoa, alofa mutimutivale ma le alofa o le Alii mo i tatou uma. O le a Ia faia ia tupu e tusa ma Lana ala ma Lana taimi.

A ou tilotilo atu ia te outou ma lagona le susulu matagofie o lo outou lelei ma le malolosi, ou te manatua ai se taimi faapitoa na ma ola a’e ai ma Dieter i le paranesi e tasi i Frankfurt, Siamani.

Sa ou iloa sa fia alu ia te a’u, ae sa ou le’i naunau tele i ai. Sa lelei o ia, ae sa na o se tasi o a’u uo i le Lotu. Sa ma aoao e sisiva faatasi i gaoioiga a le Ekalesia. O le taimi lena o le foxtrot, boogie-woogie, ma le rock and roll.

Ina ua auai o ia i le Ea Fosi ia avea ma se pailate o vaalele tau, toeitiiti lua tausaga ou te le’i toe vaai i ai. O le mea moni, ina ua ia toefoi i Frankfurt, sa le’i lelei tele o’u uluai lagona. Sa foliga o ia e pei o tama maoaluma i le ata o le Top Gun.

Ae ina ua ma talanoa, sa faagaeetia a’u; ua faatagatamatua o ia i na tausaga e lua. Sa ia iloa le mea na ia manao e fai i lona olaga, ma sa malosi o ia i le talalelei. Sa fai si ona naunautai ma faama’ite i ana taumafaiga faatafai. Sa ma faaipoipo i ni nai masina mulimuli ane.

A’u uo talavou pele, ou te le’i salamo i lo’u toe vaai toto’a ia te ia i le taimi lona lua, e ui i o’u uluai lagona le mautonu.

O Dieter o le fatu o lo’u olaga ma o le tamā ma le tamā matua ofoofogia o le ma fanau ma a latou fanau.

Ae ua fai si o’u vave mai mea ou te fia faasoa ma outou.

Ina ua 12 o’u tausaga, sa maliu lo’u tama i le kanesa. I le mavae ai o lona maliu, sa faanoanoa lo matou fale, mafatia, ma leai se faamoemoe.

Sa peisea’i sa leai se tasi e faamafanafanaina lo’u tina ma i matou le fanau. Ia, toeitiiti lava! O lo tatou Tama Faalelagi, i Lona alofa tele, sa le’i faagaloina i matou.

Valu masina talu ona maliu lo’u tama ae tu’itu’i e ni faifeautalai Amerika se to’alua le matou faitotoa i Frankfurt, Siamani. O na faifeautalai e toalua, na ta’iala e le Agaga, na tuua se Tusi a Mamona i lo’u tina. E maeu lo’u fiafia i le Tusi a Mamona.

Na aumai e nei faifeautalai le tali mai le Atua. Sa matagofie ma mamana le feau o le ata o le faaolataga, le ata o le fiafia. Na toe aumaia ai le faamoemoe ma le sulu i lo matou fale. A o matou talia le talalelei toefuataiina, sa mavae lo matou lototiga, faavauvau, ma le faanoanoa.

Faatasi ai ma le feau o le talalelei toefuataiina a Iesu Keriso, sa le toe i ai se pogisa i lo matou aiga ona e le mafai ona i ai le malamalama ma le pouliuli i le taimi e tasi.

O nei faifeautalai o ni talavou matutua lelei. O i la’ua o ni agelu o le mamalu na auina mai e le Atua mo i matou.

Au uo talavou pele, o anomea lava foi ia ua faia ai outou! O outou o ē filifilia o o tatou aso, o e e ala i upu ma galuega e aoao atua ma ola i le savali o le talalelei. Mo lenei faamoemoega, ua tuu ai outou i o tou aai, a’oga, falefaigaluega, ma tou aiga. Aua nei galo, ua ia te outou le gafatia e avea ai ma agelu o le mamalu ia i latou i o outou autafa.

O outou o sui o le Ekalesia a Iesu Keriso; o taitai mamana i le folafolaina atu o le savali o le talalelei e ala i o outou olaga lelei ma molimau totoa.

O se taitai o se tasi e fesoasoani i isi ia vaai, lagona, ma maua le ala sa’o. A’u uo talavou pele, fesoasoani i le tasi ma le isi e sue le ala tonu ma ia maua’a i le Ekalesia ma le talalelei.

O upu po o galuega uma faigofie ma faatauvaa o le lelei, amiosa’o, alofa mama, agalelei, auaunaga, alofa, ma le agaalofa e mafai ona avea ma ou faatinoga o le taitaiga i le malo o le Atua. Aua e te manatu faatauvaa i lau faatosinaga ma le mana mo le lelei.

Se’i ou faaopoopo atu ni nai upu i o tatou uso pele. I nei taimi faigata, ua tofia outou e faaaoga a tou taleni ma le lototoa i le taua o le lelei ma le leaga.

I le 1979, sa valoia ai e Peresitene Spencer W. Kimball: “O le tele o le faatupulaia ua oo mai i le Ekalesia i nei aso e gata ai, o le a oo mai ona o le toatele o tamaitai lelei o le lalolagi … o le a tosina mai i le Ekalesia. … O le a tupu lenei mea i se maualuga e faapea ona atagia mai ai i tamaitai o le Ekalesia le amiotonu … i o latou olaga … oni tamaitai iloga ma le tulaga ese—ini tulaga fiafia— mai tamaitai o le lalolagi.”

Na faaopoopo mai Peresitene Russell M. Nelson i le 2015, “[Tamaitai, matou te] manaomia lo outou malosi, lo outou liua, lo outou talitonuga maumaututu, lo outou tomai e taitai, lo outou atamai, ma o outou leo. E le atoatoa le malo o le Atua ma e le mafai foi ona atoatoa e aunoa ma tamaitai o e osia feagaiga paia ona tausia lea.”

O’u uso e ma tuagane pele, ua ofo atu e le Ekalesia ma le Alii ia te outou punaoa mamana e ausia ai nei faamoemoega i le olaga.

Faitau tusitusiga paia, opomau le Sau Mulimuli Mai ia te A’u ma le polokalama inisitituti, talanoa ma le loto i le Tama Faalelagi i a tou tatalo, ō i le lotu, ma faaaoga upumoni ma aoaoga o le talalelei i o tou olaga. Osia ma tausia feagaiga. Faaaoga le salamo ia maua le faamagaloga. Faalagolago i le Tama Faalelagi. Faalagolago ia Iesu Keriso. O le a La taiala oe. E alolofa i Laua ia te oe. Ma o loo i ai i laua iina.

A’u uo talavou pele, faamolemole ia outou iloa lo’u alofa ma le lotofaafetai mo outou taitoatasi. Ua ia te outou a’u tatalo ma faamanuiaga. O outou o se vaega taua o lenei galuega ofoofogia ma le paia a le Atua i le taimi lenei i le talafaasolopito o le lalolagi. Ou te molimau atu ai i nei mea, i le suafa o Iesu Keriso, amene.