Dot Jidik ko Renaaj Koba Ippān Doon

Ro jeiū im jatū jitōnbōro, ro m̧ōtta jitōnbōro, n̄aij boktok iakwe im kōjeraam̧m̧an ko an Būreejtōnji eo Kein Kajuon im Doulul eo an Jon̄oulruo Rijilōk ro.

Im̧ōņōņō in pād ippami im eļaptata kam̧m̧oolol bwe ewōr iien ad ron̄ jān kōrā eo ippa.

Harriett ej meram in mour e aō. Aolep ro rejeļā kajeen rej iakwe. Ej kōm̧m̧an bwe ro ipeļaakin rej em̧m̧anļo̧k im m̧ōņōņōļo̧k. Em̧ool ekar bar im̧we eō.

Āinwōt ami kar ron̄ ippān Sister Uchtdorf, kem kar dik ke kem kar m̧are. Kiiō, ālikin elōn̄ iiō ko ij kam̧m̧oolol kōn aolep iien ko ippān Harriet.

Ium̧wn iien, iar ekkatak ke kem ro jān epepen eo erūtto elōn̄ am ejja kajjitōk ko an mour me ebar wōr ippami—ijoke etoļo̧k am kajjitōk kaki. Kajjitōk ko āinwōt:

Ippād ke ilo iaļ eo ejim̧we?

Anij ej ke kile eō? E ej ke kea?

Etke jet iien n̄aij en̄jake jobwābwe, eddodo, armej rejjab kileō, ak ajimakeke?

Etke Anij ar jab m̧ōkaj an letok kabwilōn̄lōn̄ eo ij aikuji?

Etke E ekar kōtļo̧k bwe in en̄jake būrōm̧ōj, nan̄inmej, im kabūrom̧ōjm̧ōj in?

Kajjitōk kein reppen ilo jabdewōt iiō.

Kajjitōk rōt kein emaron̄ lukkun kakūtōtō n̄e jejjab bōk uwaak ko rem̧ōkaj. Raan kein jemaron̄ kajjitōk ippān Google eitōn aolep men im bōk uwaak ko ilo ium̧win jejjo jekōn ko.

Ijoke uwaak ko n̄an kajjitōk ko ad raorōk tata, an juon make, im ko rem̧wilaļ ejjab aolep iien ej m̧ōkaj aer itok. Ekkā, jej lelōn̄ļo̧k būruōd n̄an lan̄, im āinwōt n̄e men eo de eo ej waļo̧k ke juon men ej load wōt.

Enana ippād kōttar, m̧ool ke?

N̄e jaikuj in kōttar bar jejjo jekōn n̄an an juon kein kappukot uwaak letok uwaak, jej ļōmņak ejorrāān konekjen eo. Ilo ad kūtōtō, jemaron̄ elļo̧k jān kappukot eo ad. Ak n̄e ej itok n̄an kajjitōk ko an indeeo,men ko an jetōb, jej aikuj in kijenmej.

Ejjab aolep uwaak jon̄an aurōkier wōt juon. Uwaak ko jān jeļālokjen ko an laļin ak ļōmņak ko rebun̄bun̄ epidodo aer itok, ak em̧ōkaj an jako aurōkier n̄e juon bar ļōmņak in uwaak ekāāl ak ebun̄bun̄ ej walōn̄tak. Uwaak ko an lan̄—uwaak ko an indeeo—eļap aurōkier. Bōk uwaak kein ekkā an bōk en̄taan, jerbal, im mennin ālijlij.

Ak n̄aij kallim̧ur n̄an eok, uwaak kein eļap tokjān kōttari.

Eļan̄n̄e elōn̄ am̧ kajjitōk ejjanin̄ lōn̄ uwaakier, n̄aij kam̧ool n̄an kwe jeļā eo aō bwe Jemedwōj Ilan̄ ej ron̄ ainikiōm̧, E jeļā kajeem̧, im E jamin eļļo̧k jān eok. Kōn menin jab eļļo̧k jān E. Wōnm̧anļo̧k wōt in ļo̧o̧r iaļ eo An im E “naaj tōlļo̧k kom̧.” n̄an loe uwaak ko rebwe n̄an tōl kom̧ n̄an wōnm̧aanļo̧k wōt ilo iaļ eo ejim̧we—ijelo̧kin an kapan̄ ami eddōk ļo̧k im iien em̧m̧an ko n̄an kōjerbal tōmak ak iien em̧m̧an ko n̄an kōjerbal anemkwoj in kāālet eo ad.

Steve Jobs, cofounder eo an Apple, ear ba: “Epen kakobaik dot ko ilo reim̧aanļo̧k. Konaaj kobaik er wōt n̄e kwoj reilikļo̧k, kiiō kwoj aikuj lōke bwe dot ko renaaj koba ippān doon ilju im jekļaj eo am̧.”

Ta meļeļe an ba menin? Bōlen em̧ōj am̧ loe juon jin̄a kar kōm̧m̧ane ilo aer je jidik dot in kōļar ioon kein jin̄a eo. Ilo epaak, dot kein āinwōt n̄e rejjab koba ippān doon. Ak n̄e kwoj lale aolep jin̄a eo, kwoj loe an dot ko koba āinwōt kōļar ko im an kōļar ko ejaak annan̄ ko me ej kwaļo̧k juon jekjek eaiboojoj. Kar m̧okta āinwōt kar kajidede im ekaipokpok ej jino meļeļe.

Jet iien mour ko ad rej āinwōt jin̄a kein. Dot ko me rej ejaak e en̄jake ko ad ilo mour in remaron̄ āinwōt n̄e rejjab koba ippān doon im kaipokpok elōn̄ iien ko. Jejjab lo jabdewōt ekkarier. Jejjab maron̄ kejōkļo̧kjen ke ewōr aer jibadbad n̄an jidik.

Ijoke, n̄e kwoj kalimjōk mour eo am̧ jān kōļmenļo̧kijeņ eo ejjeļo̧k jem̧ļo̧kin an gospel eo an Jisōs Kraist, kwoj jino loe wāween an dot ko koba ippān doon n̄an ejaake karōk eo eļap an Anij n̄an eok.

Im ilo am̧ kajjieon̄ lōke Anij im ļoor Nejin, Jisōs Kraist, juon raan konaaj loe karōk eo ededeļo̧k, im konaaj jeļā bwe Masta Rijin̄a eo ear wōr juon an karōk n̄an dot ko rekaipokpok. Konaaj loe bwe E kar keppooj eok n̄an iien em̧m̧an im tōpar ko raiboojojļo̧k jān ko komaron̄ kar kejōkļo̧kjen kaki ak kōtōpraki ippam make. Lukkuun m̧ool em̧ōj aō loe menin ilo mour eo aō make.

Jet iaami maron̄ jeļā bwe ke ikar dik, baam̧le eo aō kar erom rijipo̧kwe ruo katten. Ilo iien kein ruo, ekar alikkar bwe armej ro ilo ijo jikum ekāāl raar likūt kem “ettā jān er.” Ibwiljin ajri ro dretta wōt, ainikien aō kōnono ekar kakōļļeik eō bwe n̄aij juon rilikin, im ekar juon mennin kajirere n̄an er.

Ekar pen an ro jinō im jema kake aikuj ko an baam̧le eo am. Kiiō jinō ear jino juon pejnej in kwalkoļ nuknuk, aolep raar jipan̄, im n̄a, kōn juon bajekōļ im kein bwilbwil, ikar jerbal āinwōt juon “ribokto boktak n̄an m̧oko” n̄an pejnej eo ālkin iien jikuuļ.

Kamijak im en̄taan in em̧akūt ko am raar kōm̧m̧an aō ļe lik ilo katak ko aō, im ikar jab jikuuļ juon iiō likio.

Ilo Rear in Germany, iar ekkatak kajin Russia āinwōt kein karuo kajin. Ekar pen, ak iar maron̄ kōm̧m̧ane. Kiiō, ilo Ralik in Germany, kar mennin aikuj bwe in ekkatak kajin In̄lij.

Mennin elukkuun kar pen n̄an n̄a. Iar tōmak ke lo̧n̄iū ekar jab ekkar n̄an Kajin In̄lij.

Iiō ko ke iar jodikdik, ikar kōņaan juon leddik eo em̧m̧an im deo, iju in mejen rebūraun. Būrom̧ōj bwe āinwōt Harriett ear jab wōr an kōņaan ippa. Jekdoon ta eo iar kajjieon̄e, āinwōt ke in jaje bōjrak. Ekwe, em̧ōj am̧ kar ron̄ bwebwenato eo an make.

Innem n̄a eo, juon likao eo ejjeļo̧k bōnbōn in im ej en̄taan ilo mour ālkin pata ilo Germany eo me āinwōt edik an tōprak ilo mour in.

Ijoke, ewōr jejjo men ko raar em̧m̧an ilo mour eo aō.

Iaar jeļā bwe baam̧le eo aō rej iakwe eō. Ilo jikuuļ im jikin jar ekar wōr rūkaki ro me raar rōjan̄ eō bwe in aolep iien kōļap kōtōpar ko aō im jab ebweer. Ij keememej wōt juon likao mijenede in Amedka ear katakin, “Eḷan̄n̄e Anij Ej pād [ippam̧], wōn ej juṃae [eok]?” im “Anij enaaj maron̄emen otemjej.”

Ekar wōr juon men kōn eoon kein me ekar kajoor an kalel eō. N̄e āindein, iar ļōmņak, innem etke ij mijak?

Innem iaar tōmak. Im iar lōke Anij.

Ilo jidik iien, iar juon rikatak ilo juon būrookraam̧. Juon iaan rūkaki ro aō ear un eō bwe in pād ilo juon kūlaaj in bon̄ n̄an ekkatak mechanical engineering. Mennin ear tōl eō bwe in lo ikdeelel eo aō ilo ekkāke.

Im iar ilbōk ke ij jeļā bwe n̄an erom juon paeļōt, iar aikuj ekkatak In̄lij. Iar lukkun kōņaan erom juon paeļōt, im ilo juon wāween ekabwilōn̄lōn̄, lo̧n̄iū ear oktak, im In̄lij ear jab juon kajin eo epen kiiō.

Aaet, ejjab meļeļein bwe ear em̧m̧an aolep men.

Ke eaar 19 aō iiō, iar em̧akūt n̄an San Antonio, Texas, n̄an jino ekkatak in paeļōt an Air Force. Ilo baluun eo, iar jijōt turin juon em̧m̧aan me elluukun kajoor ainikien ri Texas eo an. Iar kile ilo aō inepata ke In̄lij eo iaar lukkun ekkatak ekar jab āinwōt In̄lij eo me rej kōjerbale ilo Texas!

Ilo jikuuļ in paeļōt eo, ewōr men raar bar pen. Ekar juon būrookraam̧ eļap jiāe ie, aolep rej kajjieon̄ n̄an pād lōn̄tata ilo iien kadiwōjļo̧k. Iar kajju jeļā ke ikar pād ilo juon jekjek epen kōnke eitōn aolep rijikuuļ ro m̧ōtta kajin eo aer ej kajin In̄lij.

Rūkaki in ekkāke eo aō ear kakkōl eō kōn bar juon jekjek epen—eļap aō joļo̧k iien ilo kabun̄ in. Ro uwaan kabun̄ in ijo raar karuwainene eō n̄an branch eo aer im n̄an m̧oko m̧weer, im aaet kem kar kalōk juon m̧ōn jar ilo Big Spring ilo tore eo aō. Rūkaki ro aō raar inepata bwe kain m̧akutkut rōt kein raar kam̧ōjņoik aō maron̄ naaj tōprak juon kūlaaj eutiej. Ijjab ļōmņak rōt in. Iar lōke Anij im kōm̧m̧an jon̄an wōt aō maron̄.

Innem, iar katak In̄lij (bōtaap ij ekkatak wōt). Iar kadedeļo̧k jikuuļ in paeļōt eo aō ilo ļap tōprak. Iar erom juon fighter pilot innem tokelik juon kapen n̄an juon baļuun. Im leddik eo edeo me ebūraun mejen iar kōņaan? En̄e ijin ippa.

Kiiō m̧ae iien likio in pija eo ej waļo̧k, jab ebbweer kōn jerbal ko reļļap im reppen an mour in. Keememej bwe men ko reļļap rej ejaak jān men ko reddik. Eļan̄n̄e kwōj kallim̧ur n̄an kōm̧m̧ani “men ko reddik im reļam waan” Anij ej kipel eok bwe kwōn kōm̧m̧ani—im lukkuun tiljek ilo am̧ kōm̧m̧ani, men ko reļļap renaaj waļo̧k.

Jet iaan “men ko reddik im reļam waan” ekoba m̧ool ilo jar kajjojo raan, ekkatak jeje ko rekwojarjar, kōm̧m̧an bwe Itok Ļoor Eō im N̄an Kōkajoorļo̧k Jodikdik ro en m̧ōttan men ko kwōj kōm̧m̧ani aolep raan, mour kōn Naan in Mālōtlōt, etal n̄an iien jar, kōļļā m̧ōttan jon̄oul im jortak ko, im lukkuun lale bwe en wōr am pepa in mālim n̄an delōn̄e tampeļ.

Kōm̧m̧ani men kein jekdoon n̄e kojjab kōņaan, jekdoon n̄e kaarmejet ej mennin aikuj. Kaarmejet eo ej kōm̧m̧an bwe ren ekwojarjar, im “kaarmejet ej boktok kōjeraam̧m̧an ko an lan̄.”

Ilo juon wāween, en̄taan ko am̧ “reddik im reļam waan” rej dot ko an kajjojo raan in mour me rej ejaake juon pija eļap ilo mour eo am̧ Komaron̄ jab loe elmen an dot kein koba ippān doon, im kojjab aikuj kiiō. Kwōn tōmak n̄an iien in me kwoj mour ie kiiō. Lōke Anij, im “jān men ko reddik [enaaj itok] men eo eļap.”

Ke ikar iiō kane ami, iar jaje ia eo mour e ao enaaj kar tōl eō n̄ane. Lukkuun m̧ool iaar jab lo jabdewōt dot rej koba im̧aan meja.

Ak iaar lōke Anij. Iaar tōmak bwe n̄e inaaj kar kōm̧m̧an jon̄an wōt aō maron̄ ilo iien eo, Anij enaaj jerbale pija eo eļap.

Im E ekar.

E ekar jeļā jem̧ļo̧k eo jekdoon n̄e iar jab.

Iar jab maron̄ lo ilju im jekļaj, ak E ekar.

Jekdoon ilo iien ko reppen, me iaar ļōmņak iaar make iaō, E ekar pād ippa—ij loe menin kiiō.

Ilo Jabōn Kōnnaan Ko, jej loe kallim̧ur in:“Lōke Irooj kōn aolepān būruom̧, im kwōn jab atartar ioon jeļāļo̧kjeņ eo am̧.” Kwōn kwaļo̧k E ilo iaļ ko am̧ otemjeļo̧k, innām Enaaj ba kajjien iaļ ko am̧.”

Ij kipel eok n̄an tōmak mour eo am̧ enaaj em̧m̧anļo̧k wōt eļan̄n̄e kwoj atartar ioon Anij n̄an tōl būn̄ten neem̧. E ejeļā men ko kojjab maron̄ jeļā, im juon ilju im jekļaj E ekar keppooj n̄an kwe me kojjab maron̄ loe. Rijilōk Paul ear kam̧ool, “Mej ear jab loi, … lọjiliñ ear jab roñjake,, … re jañin deḷọñ ilo būruon armej [ta] ko jabdewōt Anij e ar kapojak ñan ro rej yokwe E.”

Kiiō kajjitōk ippam̧ make, “Imaron̄ ke ejaak jon̄an tōmak n̄an lōke Anij? Ij ke ikdeelel in lōke ke E ej iakwe eō im kōņaan tōl iaļ eo aō?

N̄e komaron̄ lo tōmak ilo būruōm̧ jon̄an wōt juon ine—jekdoon n̄e ej juon en̄jake in tōmak wōt—ijjino ijōņe.

Anij ejeļā ekōjkan ukōt ine jidikdik ko n̄an wōjke kileplep. Kōm̧m̧ani me ko reddik im relam waan, im Anij enaaj “korļo̧k kom̧ juon to̧ujin alen jān kiiō im kōjeraam̧m̧an kom̧ āinwōt Ear kallim̧ur n̄an kom̧!”

Kojjab aikuj etal etoļo̧k ilo m̧anit ko an raan kein n̄an ron̄ ainikien jelm̧ae ko me rej kabbweer ak kajirere kōn tōmak ilo Anij ijoko jabdewōt im ļaptata ilo kabun̄ in ad.

Social Media ko rej kōmejaja ainikien rōt kein.

Ak epepen in am̧ ejjab epepen eo wōt tōmak ko aer ilo Anij rej jelm̧ae im kajirere kake. Menin āinwōt ej m̧ōttan māllijon̄ ko an mour in kanniōk n̄an aolep ajri ro nejin Anij.

“Eļan̄n̄e kom̧ an laļ,” Jisōs ear jiron̄ rikaļoor ro An, “laļ enaaj kar yokwe men eo an; a bwe kom̧ jab an laļ, a Iar kāālōt kom̧ … , kōn men in laļ ej kōjdate kom̧.”

Komaron̄ kōtmān bwe iien eo kwoj kōm̧m̧an kallim̧ur in ļoor Rilo̧mo̧o̧r, armej ro rej jokwe ilo m̧weo eļap im kilep reban errā—jet iien kōn ainikien ko reļaaj. Remaron̄ bar kajjieon̄ in ko̧kkure eok im kajook eok.

Ak keememjej bwe kojjab uwaak n̄an er. Kwoj uwaak n̄an Anij. Juon raan, konaaj jutak im̧aan Anij n̄an kwaļo̧k jem̧ļo̧kin mour eo am̧.

E enaaj kajjitōk ippām̧ eļan̄n̄e kwaar ļoor Rilo̧mo̧o̧r, eļan̄n̄e kwaar iakwe ritūrum̧, eļan̄n̄e kwaar kate eok kajjieon̄ pād wōt ilo iaļ in kaļoor eo im kautiej bujen ko am̧.

Rum̧m̧an ded ro m̧ōtta jitōnbōro, kiiō ej iien eo n̄an kallim̧ur n̄an Kraist im ļoor iaļ eo An.

Juon raan aolep ajri ro nejin Anij renaaj juubkwe im kwaļo̧k ke Jisōs ej Kraist, Ripinmuur, im Rilo̧mo̧o̧r an laļin. Renaaj jeļā ke E ekar mej kōn er.

Ilo raan eo enaaj alikkar ke E ainikien eo me eaorōktata.

Kiiō, ilo ad kōnono kōn kōtļo̧k bwe Anij en tōl mour ko ad, ikōņaan kalikkar juon men. Emaron̄ jab em̧m̧an ippami ta eo ij tōn jiron̄ kom̧. N̄e kwoj kajjitōk tōl ippān Anij kōn kāālet ko ilo mour eo am̧—ekoba kāālet ko raorōk—E emaron̄ jab tipdiki waj juon uwaak.

M̧ool eo ke jet iien ejjab aorōk ippān Irooj ta eo kwoj kāālete toon wōt am̧ pād wōt ilowaan bujen im pedped ko raorōk an gospel eo an Jisōs Kraist kar kōjepļaaktok.

Ewōr iien me ewōr juon iaļ Anij ekōņaan bwe kwon ļoore. Ebar wōr iien me E enaaj kakkōl eok ņae jet kāālet ko kōnke kōn kauwatata ko kojjab loi. Innem ebar wōr iien me juon kajjitōk elōn̄ļo̧k jān juon uwaak “jim̧we” n̄ane, im komaron̄ lo m̧ōņōņō ilo jabdewōt iaer toon wōt am̧ mour kōn m̧ool ko an Anij.

Ke menin ear waļo̧k n̄an Josep Smith im ro m̧ōttan, Irooj ear leļo̧k juon uwaak eo ekaikdeelel ke raar kappukōt An tōl. E ekar ba, “ej jab aorōk n̄an Eō.”

Innem E ekar kakkobaba, “kom̧in tiljek wōt.”

Bōlen ekainepata n̄an ron̄ ke Anij eban lewaj juon jibadbad elikio an iaļ in mour eo am̧. Ak kolukkuun ke kōņaan bōk tōl ilo aolep men dikdik?

Kolukkuun ke kōņaan uwaak ko an mour m̧okta jān am̧ pukot kilen men ko ippam̧ make? Kain rōt naaj itoitak in? Menin eban joļo̧k en̄jake in tōprak eo am̧ ke? Ekōjkan am̧ naaj eddōkļo̧k im kōļapļo̧k lōke eo am̧ ilo Irooj im ippam̧ make?

Ke Irooj ear jiron̄ Oliver Cowdery, “Kwōj aikuj ekkatak kake ilo ļōmņak eo am; innām kwōj aikuj kajjitōk Ippa eļan̄n̄e e jim̧we.”

Jemedwōj Ilan̄ ear lewaj karōk eo An, iaļ eo An. Ear lewaj n̄an eok pija eo eļap. Im Ear lewaj juon kōmelij im juon bōro. Eļan̄n̄e kwoj lōke E, E naaj jipan̄ eok kōjerbale ilo jejjet ilo am̧ kōm̧m̧an kāālet. Ej lōke eok n̄an kōm̧m̧ani kāālet ko rem̧m̧antata ilo am̧ ļoor Jisōs Kraist.

Ilo elōn̄ jekjek ko, kāālet ko kwoj kōm̧m̧ani jet iien remaron̄ jab aorōk jān ta eo kwoj kōm̧m̧ane ālkin kōm̧m̧ane kāālet eo.

N̄an waanjon̄ak, ruo ripālele remaron̄ kāālet in m̧are jekdoon n̄e jet iaan ro uwaan baam̧le eo aer rejjab tōmak ke rejejjet n̄an doon. Ijoke, eļap aō kōjatdikdik n̄an kain ripālele rōt in eļan̄n̄e, ālkin kōm̧m̧ane kāālet eo, rej pād wōt im m̧ool n̄an doon im n̄an Irooj kōn aolepen būruer im aer kōļmenļo̧kjen. Ilo aer iakwe doon im jouj n̄an doon, mije aikuj ko an doon ilo en̄jake, jetōb im kanniōk—im ilo ikutkut kōm̧m̧ani men ko “reddik” —rej erom ripālele ko rekkar tata n̄an aolep.

Ilo bar juon wāween, ļōmņak kōn ripālele ro rej ļōmņak raar kāālet armej eo “ejjejet” bōtaab kōtmān bwe ejem̧ļo̧k aolep jerbal ko reddo. N̄e ebōjrak aer kwaļo̧k aer kōņaan doon, bōjrak kōnono, jab kaorōk bujen kwojarjar ko aer, im jeer n̄an utiejbōro im ļōmņak kake er make, ripālele rein repād ilo juon iaļ me ej tōl n̄an būrom̧ōj im ajļo̧k.

Pedped ej bar jerbal n̄an kāālet ko an jeļāļo̧kjen. Eļap aō kōjatdikdik n̄an ro rej kāālet in bōk juon jerbal ettā ak ro rej kōmaat aer maron̄ im kappukot wāween ko n̄an kōjerbal jerbal ko aer n̄an kaiboojoj Anij im kōjeraam̧m̧an ajri ro Nejin.

Edik aō kōjatdikdik n̄an ro rej kāālet jerbal ko me reutiej ak, ilo iaļ eo ļo̧k, jako aer mije lukkun wōn er im em̧m̧an eo remaron̄ kōtōprake ilo aer jerbal n̄an Anij im ajri ro Nejin ilo juon wōt iien.

Anij ear keppooj kōjeraam̧m̧an ko ejjeļo̧k jem̧ļo̧kier. N̄an jipan̄ eok buki, E ekar lewaj kakien ko, bujen ko rekwojarjar, kapilōk in kanaan ko, mennin letok eo an Jetōb Kwojarjar, im anemkwoj in kāālet. Eļap menin n̄an tōl eok n̄an m̧ōņōņō eo ioon laļ im lan̄ļōn̄ ejjeļo̧k jem̧ļo̧kin. Eļapļo̧k jān menin, jab ebbweer n̄e kwoj kōm̧m̧ani jet kāālet ko me rejjab jejjet. Wāween dein am̧ ekkatak. Menin ej m̧ōttan itoitak eo!

Jaab, itoitak ko rejjab jejjet jān jinoin n̄an jem̧ļo̧kin. Enaaj lōn̄ men ko rem̧m̧an im nana ilo mour eo am̧. Ak eļan̄n̄e kwoj tiljek n̄an Jisōs Kraist, kalimjōk en̄taan in pinmuur eo an āinwōt juon mennin letok in iakwe im ukweļo̧k n̄an mour kake, komaron̄ kōjatdikdik kōn m̧ōņōņō eo ilo jem̧ļo̧kin.

Emaron̄ rum̧ij am̧ loe, ak konaaj reilikļo̧k im jeļā ke Irooj ear jab likūt eok atajinemjen, jekdoon n̄e Ear kōtļo̧k bwe kwon make kōm̧m̧ane elōn̄ kāālet. Konaaj lo ke dot ko rej koba ippān doon.

Kiiō, ta eo ij kōjatdikdik bwe ko naaj keememej jān iien in ad ippān doon?

M̧oktata, jeļā bwe uwaak ko an Anij n̄an kajjitōk ko raorōk am̧ remaron̄ bōk iien, im remaron̄ itok ilo wāween ko kwaar jab kōtmāni. Uwaak ko an Anij raorōk. Ewōr tokjen kōttari.

Kein karuo, jab ebbweer ilo am̧ etetal ilo iaļan kaļoor eo. Kōm̧m̧ane wōt ta eo komaron̄i lo men ko reddik, im men ko reļļap renaaj waļo̧k.

Kein kajilu, en wōr am̧ tōmak. Tōmak bwe kaorōk ippān Anij, im Ej lo ta eo kojjab maron̄ loe, im E enaaj tōl eok ilo iaļ eo ejim̧we. Ej iakwe eok. Lōke E.

Kein kemān, jab kōtļo̧k bwe ainikien kabweerer ko ren kajeer eok jān iaļ in tōmak eo am̧. Keememej, kojjab uwaak n̄an rijum̧ae ro. Kwoj uwaak n̄an Jem̧ōm̧ Ilan̄. Jinōkjej ko an raorōk.

Kein kōļalem, kappukōt tōl an Irooj, im n̄e Ej ba, “ej jab aorōk,” kōm̧m̧ani kāālet ko rem̧m̧antata ekkar n̄an m̧ool ko kojeļā. Innām “kom̧in tiljek.”

N̄aij likūt aō kōjeraam̧m̧an ilo jino in iiō in ekāāl bwe konaaj tiljek in kajjieon̄ jeļā Jemedwōj Ilan̄, ļoor Jisōs Kraist, im kautiej bujen ko An, tōmak eo am̧ enaaj ļapļo̧k.

Am̧ lōke enaaj eddōkļo̧k ilo am̧ kappukot n̄an ļoor Rilo̧mo̧o̧r im katak ko An.

Ilo Jisōs Kraist, gospel eo An, im Kabun̄ in An, konaaj lo m̧ōņōņō, lan̄lōn̄, im aenōm̧m̧an. Im juon raan, E enaaj atbakwoj eok ilo iakwe eo an ekwojarjar.

Kōn kam̧m̧oolol eļap, konaaj lo Anij Make, ilo An iakwe, jouj, im tūriam̧o, E ear pād ijo, im lale eok, kōjeraam̧m̧an eok, im keppooj juon jikum̧.

Kōn menin ij kam̧ool im lewaj aō kōjeraam̧m̧an, ilo etan Jisōs Kraist, amen.