Lōke Anij

Ro jeiū im jatū, rūm̧m̧an ded ro aō jitōnbōro, ij lo kom̧ kōn būruwō ilo jikin ko otemjej ipeļaakin laļ in. Kom̧ lukkuun em̧m̧an. Kom̧ lukkuun kōjaiij. Ikōņaan bwe in kar bakwij kajjojo iami.

Elukkuun em̧m̧an bwe imaron̄ pād ijin ippāmi rainin. Ebarāinwōt em̧m̧an ippa bwe imaron̄ pād ijin ippān Rijilōk eo em̧m̧antata ippa. Ijeļā bwe ejjab aikuj kar wōr ro em̧m̧antata ippād, ak ilo jekjek in aō, āinwōt em̧m̧an wōt. Bwe pāleeō.

Jet raan rem̧ootļo̧k, kōm̧ kar kōļo̧ke 62 iiō in m̧are eo am̧ro. Im kōm̧ij lukkuun iakwe wōt doon!

Kōnono kōn leen ko an gospel in! Ke kōmij bōk naan in kōjeraam̧m̧an ko im iakwe ko jān ajri ro jibūm̧ im ajri ro jibūm̧ jibūm̧, kōm̧ij en̄jake wāween an aiboojoj kōjeraam̧m̧an ko an membōr in Kabun̄ in im gospel eo an Jisōs Kraist.

N̄an kom̧ ro me rej single, kar jepel, ak rej mour ilo jekjek ko rekapan̄pan̄ an baam̧le, ij kam̧ool n̄an kom̧ bwe Anij ejeļā im ej iakwe kom̧, im n̄e kom̧ naaj m̧ool wōt n̄an bujen ko ami, lan̄lōn̄ an mour in baam̧le ej jāmin kadu ak dāpij jān eok. Ijjab lukkuun jeļā ewi wāween an menin maron̄ waļo̧k, ak ijeļā bwe jouj, tūriam̧o̧ an Irooj, im iakwe rebwe n̄an kōj aolep. E enaaj kōm̧m̧an bwe en tōprak ekkar n̄an wāween eo An im iien eo An.

Ke ij reiwaj n̄an kom̧ im en̄jake aiboojoj in em̧m̧an eo im kajoor eo, ij keememej juon iien ejenolo̧k ke Dieter im n̄a kar rūttoļo̧k ilo juon wōt branch ilo Frankfurt, Germany.

Ikar jeļā ke ekar wōr an kōņaan eļap ilo n̄a, ak ikar jab lukkuun reel. Ekar em̧m̧an ak ekar wōt juon iaan ro m̧ōtta ilo Kabun̄ in. Kōm̧ ar katak eb ippān doon ilo m̧akūtkūt ko am ilo Kabun̄ in. Ekar tōre ko an foxtrot, boogie-woogie, im rock and roll.

Ālkin an kar kobaļo̧k ilo Air Force n̄an erom juon rūkāke in baļuun in tariņae, ikar jab loe e enan̄in ium̧win ruo iiō ko. N̄an lukkuun m̧ool n̄an kom̧, ke ekar ro̧o̧ltok n̄an Frankfurt, en̄jake eo aō im̧aantata ekar jab kanooj em̧m̧an. Paaktokin ekar āinwōt em̧m̧aan ro eļap aer lōke er make ilo pija in alooj eo etan Top Gun

Ak ke ekar kōnono ippa, ikar bwilōn̄; ekar eddōkļo̧k ium̧win iiō ko ruo. Ekar jeļā ta eo ekar kōņaan kōm̧m̧ane kōn mour eo an, im ekar kajoor ilo gospel in. Ekar lukkuun pen būruwōn im jeļā ta en kōm̧m̧ane ilo kijejeto ko ilo an jerāik n̄a. Jejjo allōn̄ tokālik, kōm̧ ar m̧are.

Rūm̧m̧an ded ro m̧ōttā rejitōnbōro, ij jan̄in kar ajļo̧k n̄an bōk bar juon iien aō ļōmņak kake e n̄an kalimjōk e, aaet mekarta ālikin en̄jake eo aō imaantata me ekar jab em̧m̧an.

Dieter ej riākwe eo an mour eo aō im juon baba im jim̧m̧a elukkuun em̧m̧an n̄an ajri ro nejūm̧ im ajri ro jibum̧.

Ak ij ļe im̧aan jidik kōn ta eo ikar lukkuun kōņaan kwaļo̧ke ippāmi.

Ke ikar 11 iiō detta, jema ekar em̧m̧akūt jān mour in kōn nan̄inmej in kāānjer. Ālkin mej eo an, m̧weo im̧ōm̧ ekar erom juon jikin būrom̧ōj, en̄taan, im jeļo̧k kōjatdikdik.

Ekar waļo̧k ke ekar ejjeļo̧k juon men, ak juon armej, eo ekar maron̄ kaenōm̧m̧an jinō ak kōm̧ ajri ro. Ekwe, ekar jab lukkuun m̧ool! Jemādwōj Ilan̄, ilo iakwe eo An eļap, ekar jab meļo̧kļo̧k kōm̧.

Ralitōk allōn̄ ālkin jako eo an jema, ruo mijenede in Amedka ro rekar kōļļaļļaļ ilo kōjām̧ eo am ilo Frankfurt, Germany. Mijenede rein ruo, rekar tōl tok jān Jetōb eo, likūt Bok in Mormon eo eaiboojoj ippān jinō. Ekōjkan aō iakwe Bok in Mormon.

Mijenede rein reddik rekar bōktok n̄an kōm uwaak ko an Anij. Ennaan eo an karōk in lo̧mo̧o̧r eo, karōk in m̧ōņōņō eo, ekar lukkuun aiboojoj im kajoor. Ekar bōktok kōjatdikdik im kōro̧o̧ltok meram eo n̄an m̧weo im̧ōm̧. Ke kōm̧ kar kaorōk kojeļaaktok eo an gospel in, metak in būruwōm̧, inepata, im būrom̧ōj rekar mour.

Kōn ennaan eo an jepļaaktok eo an gospel eo an Jisōs Kraist, ekar bar ejjeļo̧k maroklep ilo baam̧le eo am, kōnke meram im maroklep rejjab maron̄ jerbal ilo juon wōt jikin ilo juon wōt iien.

Mijenede rein ruo rekar ruo rūm̧m̧an ded rem̧m̧an. N̄an kōm, rekar ruo enjeļ in aiboojoj kar jilkintok jān Anij.

Rūm̧m̧an ded jitōnbōro ro m̧ōtta, kar kōm̧anm̧an kom̧ jān juon wōt m̧ōņakjen eo ekwojarjar! Kom̧ij ro kāālet er an raan kein ad, ro jān naan im kōm̧m̧an rej katakin im mour kōn ennaan eo an gospel in jekdo̧o̧n ia eo kom̧ij pād ie. Kōn un in, kar likūt kom̧ ilo bukwōn ko ami, jikuuļ ko ami ak jikin jerbal ko, baam̧le eo ami. Jab meļo̧kļo̧k, ewōr ami kōjatdikdik eo n̄an erom enjeļ in aiboojoj ro n̄an ro itūrumi.

Kom̧ij jutak kōn Kabun̄ eo an Jisōs Kraist, im kom̧ij ritōl ro rekajoor ilo kwaļo̧k ennaan eo an gospel eo jān mour eo ami em̧m̧an im naan in kam̧ool eo ami aiboojoj.

Juon ritōl ej juon eo ej jipan̄ ro jet n̄an loe, en̄jake, im pukot iaļ eo ejim̧we. Rūm̧m̧an ded ro mōtta rejitōnbōro, jipan̄ doon pukot iaļ eo ejim̧we im n̄an pād ijo em̧wilaļ tata ilo Kabun̄ in im ilo gospel in.

Aolep naan ko reļam waan im mera ak kōm̧m̧an ko rem̧m̧an, m̧ool, iakwe em̧ool, jouj, jerbal in jipan̄, iakwe, im tūriam̧o̧ maron̄ erom m̧akūtkūt in tōl eo ami ilo aelōn̄ in kiin̄ an Anij. Jab pere kajoor in kareel eo ami im kajoor eo n̄an em̧m̧an.

Imaron̄ ke kobaiktok jejjo naan ko n̄an sister ro ad raorōk. Ilo iien kein reppen, kar kūr kom̧ n̄an kōjerbali tōļan ko ami im peran ilo tariņae kōtaan em̧m̧an im enana.

Ilo 1979, Būreejtōn Spencer W. Kimball ekar kanaan: “Elōn̄ iaan wōnmanļo̧k ko rellap rej waļo̧k ilo kabun̄ in ilo raan ko āliktata kōnke elōn̄ kōrā ro rem̧m̧an ilo laļin … renaaj kobatok ilo kabun̄ in. … Menin enaaj bōk jikin n̄an jon̄an eo me kōrā ro ilo Kabun̄ in renaaj romak kōn wāppen … ilo mour ko aer im … rej loe er āinwōt rejenolo̧k im oktak—ilo wāween ko rekam̧ōņōņō—jān kōrā ro jet ilo laļ in.”

Būreejtōn Russell M. Nelson ekar kakobaba ilo 2015 eo: “[Sister ro, jej] … aikuji kajoor eo ami, ami oktak, ami peran, maron̄ eo ami n̄an tōl, jeļāļo̧kijeņ eo ami, im ainikiemi. Aelōn̄ in kiin̄ eo an Anij eban im ejjab maron̄ dedeļo̧k n̄e ejjeļo̧k kōrā ro rej kōm̧m̧ani bujen ko rekwojarjar innām kōjparoki.”

Ro jeiū im jatū jitōnbōro, Kabun̄ in im Irooj rej lewaj n̄an kom̧ kein jipan̄ ko rekajoor n̄an ami kōttōbrak unleplep eo am̧ ilo mour in.

Riiti jeje ko rekwojarjar, kaorōke Itok, Loor Eō im būrookraam̧ in jikuuļ ko, kōnono ilo lukkuun m̧ool ippān Jemādwōj Ilan̄ ilo jar ko ami, etal im jar, im mour kōn m̧ool an gospel eo im katak ko ilo aolep iien ami mour. Kōm̧m̧ani im kōjparok bujen ko. Kōjerbal ukweļo̧k n̄an bōk jeorļo̧k bōd. Lōke Jemādwōj Ilan̄. Lōke Jisōs Kraist Renaaj tōl kom̧. Rej iakwe kom̧. Im reped ijōn.

Rūm̧m̧an ded ro m̧ōtta jitōnbōro, jouj jeļā kōn iakwe eo im kam̧m̧oolol eo aō n̄an kom̧ kajjojo. Jar ko aō im kōjeraam̧m̧an ko rej pād ippāmi Kom̧ij juon m̧ōttan ekabwilōn̄lōn̄ an aiboojoj eo an Anij im jerbal eo ekwojarjar ilo iien in ilo bwebwenato an laļ in. Jān menin ij kam̧ool, ilo etan Jisōs Kraist, amen.