E Na Toma Taian Taoti (Dots)

Tariu ao mwaneu aika kam tangiraki, raoraou aika a tangiraki, I uota nakoimi aia tangira ao aia kakabwaia te Moan Beretitentii ao te Kooram n Abotoro n te Tengaun ma Uoman.

I rangi ni kukurei ni botaki ma ngkami ao n rangi ni kakaitau bwa e reke ara tai n ongora mairoun kainabau.

Harriet bon otan maiu. Aomata ake a kinaa a tatangiria. E karikiia naake a mena irarikina bwa a na nakoraoi ao ni kukurei. E bon reke naba te kairoro anne nakoiu.

N aron are ko ongo iroun Titita Uchtdorf, ti mare ngke ti rangi ni uarereke. Ngkai, imwin ririki aika bati I kakaitau ibukin taai ae ngai ma Harriet.

Inanon te tai, I a tia n reiakinna ae ngaira te roro ake rimoa bon iai titiraki ibukin te maiu ae tibebo ma are kam mena inanona—ma ti a tia n titirakiniia n ae maan riki. Titiraki n aron:

Eeti te kawai ae I toua?

E koaua bwa e bon norai te Atua? E koaua ae E tabe ibukiu?

Bukin tera n tabetai akea te bwai ae I namakinna, I a taonakinako, katinanikuaki, ke ni maroaa?

Bukin tera te Atua e aki katauraoa te kakai are I kainanoia?

Bukin tera E kariaia bwa N na rinanon te nanokawaki aei, te aoraki, ke te kangaanga?

Aikai bon titiraki aika matoatoa inanon rooro nako.

Titiraki ae aron aikai a kona ni karikiira bwa a na bwara nanora ngkana ti aki karekei kaekaaia ni waekoa. Ni bong aikai ti kona n titirakina Google n taekan bwaai ni kabane ao ni karekei kaeka n te tekan.

Ma kaeka nakon titiraki ake bon ibukira, aika kakawaki, ao ni kangaanga aki waekoa n roko. N taainako, ti tabeki nanora nako karawa, ao te bwai ae ti karekea bon katukara n tataninga n rangi ni maan.

Ti aki tangiria n tataninga, ke ti tangiria,?

Ngkana ti katukaki n tataninga n ae riaon tabeua te teekan bwa e na karaoa ana kakaae te kaombiuta, ti a taku bwa e a bua te reitaki. Ngkai e a bwara nanora, ti na bae ni kitana ao ni katoka ara kakaae. Ma ngkana ai te titiraki n te bwai ae akea tokina, ni kaineti ma te tamnei, ti riai n rangi n taotaonii nanora.

Tiaki ae ni kabane kaeka titebo kakawakiia. Kaeka man wanawanan te aonaaba ke iango aika kakanongora a bebete rekeia, ma e kai bua kakawakiia ngkana kabwarabwara ke waaki aika boou a manga roko. Kaeka mai Karawa—kaeka aika akea tokiia—akea booia. Karekean kaeka aikai aki toki ni kainanoa te anganano, te mwakuri, ao kaokiokakin bwaai.

Ma I kakoauaa nakoim, a bon materaoi tataningaan kaeka aikai.

Ngkana iai am titiraki aika tuai kaekaaki, I taekina koauana nakoimi bwa Tamami are i Karawa E ongo, E kinako, ao E na bon aki kona ni kitaniko. Ngaia are, tai bwarannano mai Irouna. Teimatoa keiaki ni iriira Ana kawai ao E “na kaiririko i nanon kawaim” ni kunei kaeka ma kairakim ae e bon tau ni waaki rake n te kawai ae eti—n aki tiana aron rikirakem ke taai ni kamwakura te onimaki.

E taku Steve Jobs, temanna ae katea te Apple: “E [bon] rangi ni kangaanga katomaan taian taoti ngkana ko taraa mooa. Ko bon ti konaa ni katomai ngkana ko tan rikaaki, bwa ko na kakoauaa bwa tao a bon toma taian taoti inanon maium ibukin taai aika i mwaim.”

Tera te bwai ae e nanona n anne? Tao ko a tia n nora te korobanna ae karaoaki man taian taoti aika a uarereke aika a karakara iaon te kunikai ni koro tamnei. Karaua kaaniia, ao taian taoti aikai a taraa n aki tomatoma ao a maenako. Ma ngkana ko bon taraa te korobanna ae bwanin, ko noria bwa a kanga taian taoti ni irengan ni karaia ao a kanga taiani kara ni karaoa banan te bwai are e a kaota te baeten ae tamaroa. Te bwai are e tara ngkoa n aki bwai ao tao ni kamangaongao e a moanna n tei tamneina.

N tabetai korobanna aikai ai bon aron maiura. Taian taoti ake a karikii bwaai ake ti rinanona n te maiu aei a tara n aki tomatoma ao n aki barongaaki n taai tabetai. Ti aki noori ae iai te babaronga iai. Ti aki kona n iangoia ae ngaia bon iai te kantaninga ibukiia.

Irarikin anne, ngkana ko tara maium n te taratara ae akea tokina n ana euangkerio Iesu Kristo, ko na moanna n noria bwa a kanga taian taoti n tomatoma nakon oin ana kantaninga te Atua ibukim.

Ngkai ko kekeiaki n onimakina te Atua ao ni iriira Natina, Iesu Kristo, n te bong teuana ko na nora mwiin te bwai are ko karaoia, ao ko na ataia ae te Mataniwi n te Korobanna ngaia bon iai ana babaire ibukin taian taoti akana a maenako. Ko na noria ae E bon katauraoiko ibukin taai ao waaki aika moan te kakukurei nakon are ko bon iangoia ke ni kakoroa nanona i bon iroum. I a bon tia n nora aei inanon maiu.

Tabeman i buakomi a ataia ae ngke I uarereke, a riki au utu bwa taan taenikai mai abaia uatai. N taai akanne, e bon rangi n teretere bwa aomata ake n ara tabo ae boou a taraira bwa “akea arora n ai aroia.” Ibuakoia ataei ake au roro, au een n au taetae e a karikai bwa te ianena, ao anne bon oin kamamaeau ao bwainingareau irouia.

E matoatoa irouia au karo ni karekei bwaai ibukiia au utu. Ngaia are, e a moana ana bitineti tinau n te uaati, ti bane ni ibuobuoki, ao ngai, ma au bwatika ao te aenika, I a riki bwa “te tia nikirikiri n te mweenga” n te bitineti anne imwin te reirei.

Te kangaanga ao te rawawata ni mwaingingira e a karika ae I a tio ibuki n au kamatebwai, ao e bon bane teuana au ririki n aki reirei.

I Tiaman Mainiku, I kamatebwaia te taetae n Rutia bwa au kauoua n taetae. E rangi ni kangaanga, ma e reke irou. Ngkai, i Tiaman Maeao, I kainanoaki bwa N na reiakina te taetae ni Imatang.

E a bon aki kona n reke aei irou! I kakoaua bwa e bon aki tau wiiu ibukin te taetae ni Imatang.

I nanon au tai ngke tebwi tabun au ririki, E reke tanakin te aine ae e rangi n nakoraoi ao n botonaine, ma matana aika a burauun. Te kananokawaki, bwa Harriet e bon aki bwaka naba nanona irou. E bane au anga, ma e bon aki taraa n ae e na rin waau irouna. Eng, ko a tia n ongo ana itera n te karaki.

Ngaia are anne boni Ngai, te ataeinimwaane ae akea arona ao ni korakai ni maiu n tain te buaka i Tiaman are kanga ai bon akea te bwai ae e na riki ni maiu.

Ma irarikina, iai uoua bwaai aika a taraa n nakoraoi ibukiu.

I ataia bwa a tangirai au utu. Iai taan reirei n au reirei ao n te taromauri aika a kaungaai bwa N a teimatoa ni katea au kouru ae rietaata ao n tai bwaranano. E teimatoa uringan ana reirei te kairake ni maitanare mai i Amerika, “Ngkana tao te Atua bon [ibukim], antai ae e na [kaitarako]?” Ao “a bane ni konaaki bwaai iroun te Atua.”

Iai te bwai n taekan kiibu aikai aika a rootai n rangi ni korakora. Ngkana bon ngaia anne, I iango, ngkanne e aera ngkai N a maaku?

Ngaia are I kakoaua. Ao I onimakina te Atua.

N te tai ae maan, I a kaaina te burokuraem ni kataneiai. Temanna au tia reirei e kaewenakoai bwa n na rin n te kauarinan ni kamatebwaia te intiia. Aio are e a kairai ni kunea mamaten nanou n te kibakiba!

Ao bon te kubanako ngai ngke I reiakinna bwa te riki ni bwairati, I riai n ataa te taetae ni Imatang. I rangi n tangiria bwa N na bwairati, ao kanga bon, te kakai, bwa wiiu e taraa ni bitaki, ao e a aki kangaanga te taetae ni Imatang irou.

Ni koauana, tiaki nanona ae a na nakoraoi bwaai n tainako.

Ngke te 19 au ririki, I mwananga nako San Antonio, Texas, ni moana au kataneiai bwa te bwairati n te Bootaki ni Buaka n te Kibakiba. I aon te wanikiba, I tekateka irarikin te mwane ae e taetae ma te ee n Texas. I a ataia ma te maaku bwa te taetae ni Imatang are I a tia ni keiaki n reiakinna bon tiaki te taetae ni Imatang are e kabonganaaki i Texas!

N te tabo ni kataneiai n te kibakiba, a bon kangaanga bwaai nako. Bon te burokuraem ae e korakora te kaiangatoa iai, are angiia kaaina a uneakina te moanna n tain te angabeeba. I ataia n te tai anne bwa e na kangaanga irou ibukina bwa angiia kaain au kiraati bon aia taetae te Ingiriti.

E kauringai au tia reirei n te kibakiba iaon teuana riki kabwakau—I rangi ni kakabanea au tai n te taromauri. A butimwaeai membwa n te tabo nakon aia mwaanga ao ni mweengaia, ao ti bon katea naba te umantabu ngke I mena n te Big Spring, Texas. A raraoma au tia reirei bwa waaki n aron aikai a tutukai man karekean neu ae rietaata n te kiraati. Ma irou a bon aki. Ngaia are I onimakina te Atua ao I karaoa au kabanea n tamaroa.

N tokin te tai, I reiakina te taetae ni Imatang (ma ae I bon mwakuri naba iaona). I kabwanina au kataneiai n te kibakiba n ae rangi n tamaroa. I riki bwa te bwairati ni wanikiba ni buaka ao imwina te kaben ni wanikiba ni bwatintia. Ao te teinaine are botonaine, ni buraun–matana are kanoani miiu? Ngaia ae e mena i rarikiu ngkai.

Ngaia are ni karokoa ko noori bwaninin bwaai, tai karekea ae ko na taonakinako man buburan mwakuri, aika kangaanga n te maiu. Uringnga bwa bwaai aika bubura a moa karaoakiia man bwaai aika uarereke. Ngkana ko motinnanoia ni karaoi “bwaai aika uarereke man bebete” are e tuangko te Atua bwa ko na karaoi—ao ko karaoi ma te botumwaaka, a na roko bwaai aika bubura rimwi.

Tabeua bwaai aika “uarereke man bebete” a raonaki ma tangiran te tataro ni katoa bong, kamatebwaian koroboki aika tabu, karikan Nakomai Iriirai ao Ibukin Kakorakoraia Kairake bwa mwakoron kateim, maiuakina Tuan te Mauri, kakaea te taromauri, kabwaka am kabwianibwai ao anganano, ao taraia bwa iai am rekomente nakon te tembora ae tuai bane taina.

Karaoi bwaai aikai e ngae ngkana ko aki kan karaoi, riki ngkana e kainanoa te anga nano. Bon te anga karea ae e karikii bwa ana na tabu, ao “te anga karea a uoti kakabwaia mai karawa.”

N tarakina, am anga karea aika “uarereke ao ni bebete” bon taoti ni bongin nako maium ae a kaota tamaroan am mwakuri ni maium. Ko na bon aki noori bwa a kanga taoti akanne n irekereke ngkai, ao ko aki riai n noori n te tai aei. Bon ti karekea te onimaki ae tau ibukin te tai ae ko maiu inanona ngkai. Onimakina te Atua, ao “man bwaai aika uarereke [e na kaoti] te bwai ae korakora.”

Ngke rorou ngkami, I aki ataia bwa e na uotai nakea maiu aio. I bon aki norii taian taoti n tomatoma imatau.

Ma I bon onimakina te Atua. I kakoaua bwa ngkana I karaoa au kabanea n tamaroa n te tai aei, e na tabeakinii bwaai ake imwina te Atua.

Ao E karaoia.

E ataa te toki mai moani bwaai ngkana I aki atai.

I aki kona n norii boong aika a na roko, ma E kona n norii.

Bon inanon naba taai ni kangaanga, ngkana I a taku bwa I a katinanikuaki, E bon raonai—I nora anne ngkai.

N Taeka n Rabakau, ti kunea te berita aio: “Ko na onimakina Iehova ma nanom ni kabanea; ao tai mwiokoa oin am ataibwai. Ko na ataia n nakonakom ni kabane, ao e na kaeti kawaim.”

I kaumakiko bwa ko na kakoauaa ae e na bon nakoraoi maium ngkana ko katuka am onimaki iaon te Atua bwa e na kaira kawaim. E atai bwaai ake ko bon aki atai, ao iai kakabwaia ae E katauraoi ibukim n taai aika a na roko ae e na kangaanga iangoakina iroum. E kaota koauana te Abotoro ae Bauro, “Baike e tuai n nori te mata, … ke n ongo te taninga, … [akea] n rin inanon te aomata [tera] ae katauraoia te Atua ibukiia ake a tangiria.”

Ngaia are titirakiniko, “I kona ni kabwarikoa te onimaki ae tau ni kakauaa te Atua? I tauraoi ni kakoauaa ae E tangirai ao E kan kaira kawaiu?”

Ngkana ko kona ni kunea aekan uarereken koraan te mwakeke n am onimaki inanom—ngkana tao bon ti tangiran te kan kakoaua—moanna mai ikanne.

Te Atua e ataa aron onikan koraa aika uarereke nakon aroka aika bubura. Karaoi bwaai aika uarereke ao ni bebete, ao te Atua e na “karikirakeko tengaa te tai ao ni kakabwaiako n aron are e a tia ni berita!”

Ko aki riai ni kakae nako inanon ara katei ni boong aikai n ongo bwanaa aika kakaitara ake a kabwaraa nanom ke ni bon totokoi koaua iaon te Atua mai irouia aomata ao ni bon ianon ara aro.

A kakorakorai aekaki ni bwanaa aikai bwaai n reitaki.

Ma tiaki ti ami roro ae ami onimaki a kakaewenakoaki ao ni kaitaraaki. E tara n ae aio bon mwakoron te kakatai n te maiu ae mamate aei ibukiia ni kabane natin te Atua.

“Ngkana tao ana bwai te aba ngkam,” E tuangiia Ana reirei Iesu, “ao e bon tangiriia ana bwai: ma e ribaingkami te aba ba tiaki ana bwai te aba ngkami, ma I rineingkami … , ma e ribaingkami te aba.”

Ko na bon bae ni butimwaea ae n te tai are ko karaoa am motinano ni iriira te Tia Kamaiu, te koraki ake n te kateitei ae bubura a na aki boutokaiko—a na bon kaotia ni bwanaia n taai tabetai. A na kataia ni imanonoiko ao ni kamamaeko.

Ma uringnga bon tiaki ngaiia ae ko na kaeka nakoia. Ko na kaeka nakon te Atua. N te bong teuana, ko na tei Imatana n anga mwin am mwakuri ibukin maium.

E na titirakiniko ngkana ko iriira te Tia Kamaiu, ngkana ko tangiriira kaain rarikim, ngkana ko nanonna raoi ni keiaki n tiku iaon te kawai bwa ana reirei Iesu ao ni karinei am berita aika tabu.

Raaou aika kairake aika kam tangiraki, aio bon te tai ni kamatoaa nanom nakon Kristo ao ni iriira Kawaina.

N te bong teuana natin ni kabane te Atua a na katorobubua ao ni kaotia bwa Iesu bon te Kristo, te Tia Kabooira, te Tia Kamaiua te aonaaba. A na ataia ae E mate ibukiia.

N te bong anne ao e na mataata ae Ngaia bon ti te bwanaa ae rangi ni kakawaki.

N te tai aei, ngkai ti taetae iaon kariaiakan te Atua bwa e na kairii maiura, I kan kamataata teuana te bwai. Tao ko na bon aki tangira te bwai ae N a tuangko. Ngkana ko butiia te Atua ibukin kairam iaon taian babaire inanon maium—n raonaki ma babaire aika kakawaki—E na bae n aki anganiko kaeka aika bwarabwara.

Te koaua iai bwa n tabetai e bon aki kakawaki iroun te Uea bwa tera ae ko baireia ma teimatoa tiiku iaon berita ao tuua aika kakawaki n Ana euangkerio ae kaokaki Iesu Kristo.

Iai taai ae te Atua e tangiriko bwa ko na toua te kawai ae onoti. Iai naba taai ae E na kauringngko n totokoi rinerine tabeua ibukina bwa iai kangaanga aika ko aki norii. Ma ngkanne iai naba taai ngkana te titiraki e a rawata kaekaana aika “eti”, ao ko kona ni karekea te kimwareirei man kaeka n tatabeua nako ti ngkana ko maiuakin ana koaua te Atua aika akea tokiia.

Ngke e riki aio nakon Iotebwa Timiti ao toana, e anganiia te kaeka ae kamiimi te Uea ngke a ukora Ana kairiiri. E taku,,“E aki akaaka [rou].”

Ngkanne E reitia, “Ma ti kakaonimaki.”

Tao e na kaun n ongo ae te Atua e aki anganiko kabwarabwaraan tein aron mwanangam inanon maium. Ma ko bon tangiria bwa ko na kakairaki ni bwaai ni kabane?

Ko bon tangira te koute ni babakanikawai nakon te maiu imwain ae e reke am tai ni karekei rekeia ibon iroum? E na aekakira aron te mwananga ae aron anne? Tiaki ae e na buribaiko nakon namakinan ae ko tokanikai? Ko na kanga n rikirake ao ni kamwaita am onimaki iroun te Uea ao i bon iroum?

N aron are e tuanga Oliver Cowdery te Uea, “Ko riai moa ni kamatenanoa n am iango; ngkanne ko riai n titirakinai ngkana e bon eti.”

E anganiko Tamara are i Karawa Ana babaire, Ana Kawai. E anganiko te tamnei ae bubura. Ao E a tia n anganiko te kaburoro ao te maamaa. Ngkana ko Onimakinna, E na buokiko bwa ko na kabonganai raoi n tain karaoan am babaire. E onimakiniko bwa ko na karaoi rinerine aika moan te tamaroa man irirakin Iesu Kristo.

N angiin keiti, rinerine ake ko karaoi n te tai teuana e na bon aki rangi ni kakawaki nakon riki te bwai ae ko karaoia imwin karaoan te rinerine.

Te katooto, a rineia te taanga bwa a na mareaki e ngae ngke tabeman kaain aia utu aki noriia bwa a katauaki imarenaia. Ma e ngae n anne, bon iai au kantaninga ae korakora ibukiia taanga akanne, imwin aia reinerine are a karaoia, a teimatoa ni kokoaua imarenaia ao nakon te Uea ma nanoia ao aia iango ni kabane. Man boutokakiia i marenaia ma te tangira ao te akoi, ni katurua aia iango nakon aia namakin, maiun tamneia, ao kainanoia n rabwataia—man reitinakoan karaoan te bwai ae “uarereke”—a na riki bwa bon rao aika a katauaki imarenaia.

Ni kaitaraana, iangoa te taanga aika a taku aomata bwa a rinea te aomata ae “kororaoi” ma imwina a taku bwa a nakoraoi bwaai imwina. Ngkana a katoka aia iraorao imarenaia, katoka te reitaki, aki mutiakin aia berita aika tabu, ao n tabeitera n taraia bwa e kakawaki riki nakoia tabeman ao ni iangoia ibon irona, te taanga aio bon iaon kawaia nakon te kananokawaki ao te raraoma.

E kaeineti naba te tua aei nakon te rinerine nakon bwain te mwakuri. E korakora au kantaninga ibukiia naake a baireia tao n rinea nakoaia ae aki bati ni kinaaki ma a karaoa aia kabanea n tamaroa ao ni kunea te kawai ni kabongana aia mwakuri ni kamoamoaa te Atua ao ni kakabwaiaia Natina.

E uarereke au kantaninga ibukiia naake a rinea nakoaia ae tamaroa ma n anainano ma, inanon aia waaki, a kabuaa aia taratara iaon kinakiia ae mairoun te Atua ao baika a tamaroa ae a kona ni karaoi man buokan te Atua ao Natina n taai akanne.

E a tia te Atua ni katauraoi kakabwaia aika akea tokiia n ae riaon are ko iangoia. Ni buokiko bwa ko na karekei, E anganiko tuua, berita aika tabu, reirei n taeka n burabeti aika mairoun te tamnei, ana bwai n tutuaraoi te Tamnei ae Raoiroi, ao ni inaomatam n rinerine n ae riai. Anne ae moan te tau ni kairiko nakon kukureim n te maiu aei ao te kimwareirei ae akea tokina. N riaon aikai, tai karawawatako ngkana ko karaoi rinerine tabeua aika aki tara ni kororaoi. Anne aron reiakinam. Anne mwakoron te boborau!

E aki kona, n ae e na aoraoi te borau mai moana nakon te tia. Ana iai taai ni kakukurei ao taai n nanokawaki ni maium. Ma ngkana ko kakaonimaki nakon Iesu Kristo, tara ana anga karea ni kamaiu bwa te bwai n tangira n akoi ao n rairannano bwa te kawai ni butimwaaia, ko na bon kakoauaa bwa te kakukurei tokina.

Ko na bon aki noria ni karokoa taai rimwi riki, ma are ko na tan rikaaki ao n ataia bwa e aki kitaniko te Uea, e ngae ngke E katuka te rinerine ae mwaiti nakoim bwa ko na bon karaoia ibukim. Ko na noria bwa a bon tomatoma taian taoti.

Ngaia are tera ae I kantaningaia bwa kam na ururingnga man ara tai ni bootaki n te bong aei?

Te moan, ataia bwa Ana kaeka te Atua nakon am titiraki aika a rangi ni kakawaki a kona n anaa te tai ae uarereke, ao a kona n roko ni kawai are ko aki kantaningaia. Ana kaeka te Atua akea tokin kakawakiia. E materaoi te tataninga ibukiia.

Te kauoua, tai bwaranano ngkai ko nakonako i aon kawaimi ngkai ana reirei Iesu. Ti karaoa am kabanea n tamaroa ma bwaai aika uarereke, ao a na roko bwaai aika bubura n onea mwiia.

Te kateniu, karekea te onimaki ae uareeke. Kakoauaa ae ko rangi ni kakawaki iroun te Atua, bwa E norii baike ko aki kona n norii, ao E na kairiko iaon te kawai ae eti. E tangiriko. Onimakinna.

Te kaaua, tai kariaia bwanaa aika a kabwara te nano ni kairikonako man mwanangam n te onimaki. Uringnga, ko aki kaeka nakoia naake a tirebureiko. Ko kaeka nakon Tamam are i Karawa. Baike E kaotii bwa a bongana a na butimwaiaki.

Te kanimaua, ukoukora Ana kairi te Uea, ao ngkana E kangai, “E aki akaaka,” karaoa te rinerine ae tamaroa ni kaineti iaon te koaua are ko ataia. Imwiina “Onimaki.”

I katuka au kakabwaia nakoimi ni moan te ririki ae boou aei bwa ngkai ko kabanea nanom ni keiakina atakin Tamara are i Karawa, ni iriira Iesu Kristo, ao ni karinei Ana berita aika tabu, e na rikirake am onimaki.

E na rikirake onimakinam i bon iroum ngkai ko ukoria ni iriira am Tia Kamaiu ao Ana reirei.

Iroun Iesu Kristo, Ana euangkerio, ao Ana Ekaretia, ko na kunea te kukurei, te kimwareirei, ao te rau! Ao n te bong teuana, E na rabwatiko n te tangira ae mairoun te Atua.

Ma te kakaitau ae aki kona n taekinaki, ko na noria ae te Atua, n Ana tangira ae akea tiana, ana akoi, ao ana nanoanga, aki toki n tauraoi, n tararuaiko, kakabwaiako, ao ni katauraoa te tabo ibukim.

N aei ao I kakoaua ao n anganiko au kakabwaia n aran Iesu Kristo, amen.