Onimakina te Atua

Tariu ao mwaneu aika kam tangiraki, kairake aika kam tangiraki, I noori ngkami mai nanou n taabo ni kabane ni kabutaa te aonaaba. Kam tamaroa. Kam tikiraoi. Tera ngke I kona n rabwatii ngkami n tatabemani ngkami nako.

E rangi n tamaroa te kaitibo ma ngkami n te bong aei. I kukurei naba ngkai I mena ikai ma au Abotoro ae mamaten nanou. I ataia bwa e riai n akea ae mamaten nanora, ma I bon irou, e taraa n Tamaroa. Bwa I mareaki ma ngaia.

E aki maan n nako, ti katekeraoa ara ka 62 n ririki i mwiin marera. Ti teimatoa n tangiriira i marenara!

Marooroakina taekan uaan te euangkerio! Ngke ti karekei taeka ni katekeraoi ao taeka n tangira mairouia tibura ao tibutorura, ti namakina aron kakaawakin kakabwaia n riki bwa kaain te Ekaretia ao ana euangkerio Iesu Kristo.

Ngkami ake kam tuai iein, kam raure, ke kam maeka ma taian kangaanga n ami utu, I kakoauaa nakoimi bwa e atai ngkami ao man tangiri ngkami te Atua, ao ngkana ko kokoaua nakon am berita aika tabu, e na bon aki kai toki kakimwareirein te maiu n utu ke ni kakeaaki mairoum. I ataia raoi ni koaua bwa e kanga n ae na riki aio, ma I ataia bwa e tau ibukira ni kabane ana akoi te Uea, nanoanga, ao ana tangira. E na karaoia ni kaineti nakon Ana kawai ao Ana tai.

Ngkana I tarai ngkami ao n namakina ootan tamaroana ao korakorana, I kauringaki taekan te tai ae onoti ngke ti ikawairake ngai ao Dieter n te mwaanga ae ti teuana i Frankfurt, Tiaman.

I ataia bwa e tatanai, ma kanga e aki reke nanou iai. E bon tamaroa ma ngaia bon temanna raoraou n te Ekaretia. Ti ikotaki n reiakina te mwaie n ara waaki ni kakukurei n te Ekaretia. Anne bon taai ni mwamwaieea ngkoa te foxtrot, boogie–woogie, ao te rock and roll.

Ngke e nako n rin te Taanga ni Buaka ao n riki bwa te tia buaka ae te bwairati, e kaan uoua te ririki ae I aki nooria iai. I bon koaua raoi, ngke e okirakaaki nako Frankfurt, e aki rangi n nakoraoi moan noorakina irou. Kanga ai aron taraaia mwaane ae a nanomatoa mwaakan aron te birim ae Top Gun.

Ma ngke e taetae ma ngai, I rangi ni miimi, e a mwaane i nanon te uoua n ririki akanne. E ataia bwa tera ae tangiria ni karaoia i nanon maiuna, ao e rangi ni matoatoa n te euangkerio. E tataua ma nanona ao ni bati ana waaki n ana tai n iraorao. Ti mareaki tabeua te namwakina i mwiina.

Raoraou aika kairake, E aki matebuaka manga taraana te kauoua n tai, e ngae ngke iai te nanououa n te moan tai.

Dieter bon au tangira ni maiu ao te karo ao te tibu ae tamaroa nakoia natira ao natiia natira.

Ma I a biririmoan ae I tangiria n tibwaia ma ngkami.

Ngke 12 au ririki, e mate tamau man te aoraki ae te kaentia. Imwiin matena, e riki mweengara bwa te tabo n nanokawaki, karawawata, ao te akea ni kaantaninga.

E taraa n ae bon akea te bwai, ke temanna, ae kona ni karaua nanon tinau ao ngaira natina. Ma, tiaki raoi anne! E aki mwanuokiniira Tamara are i Karawa, n Ana tangira ae korakora.

Waniua te namwakaina i mwiin maten tamau, a karebwerebwe uoman mitinare aika kaain Amerika n ara mataroa i Frankfurt, Tiaman. Ni kairakiia mitinare ake uoman akanne mairoun te Tamnei, a kautuka te boki ae rangi ni kakaawaki ae Ana Boki Moomon iroun tinau. I rangi n tangira Ana Boki Moomon.

A uoti kaeka mairoun te Atua mitinare aika a kairake aikai nakoira. E rangi n tamaroa ao ni mwakaroiroi rongorongon te babaire ni kamaiu, te babaire ni kakukurei. E uota te kaantaninga ao ni manga kaoka te oota i nanon mweengara. Ngke ti taua te euangkerio ae kaokaki, ti kamaiuaki man marakin atuura, bwarannano, ao te nanokawaki.

Ma te rongorongo ae kaokan ana euangkerio Iesu Kristo, ai akea manga te rootongitong n ara utu ngkai a bon aki kona n bootaki n te tai ae ti teuana te oota ao te rootongitong.

Bon kairake ni ikawai aika a tamaroa mitinare aika uoman aikai. Ma iroura, bon anera aika uoman aika a mimitong ae a roko mairoun te Atua.

Raaou aika kairake, kam karaoaki ma bwaai mai karawa! Ngkami aika kam rineaki n ara bong aikai, man taeka ao mwakuri kam reireia ao ni maiuakina taekan te euangkerio n taabo ake kam mena iai. Ibukin aei, kam mena n ami kaawa, ami reirei ke taabo ni mwakuri, am utu. Tai mwaninga, iai iroumi te konaa n riki bwa anera aika a mimitong nakoia ake a mena i rarikimi.

Kam tei n onea mwiin Iesu Kristo, ao taan kairiiri aika kam korakora ngkami n tataekinan rongorongon te euangkerio ni maiumi ae raoiroi ao ami koaua aika a ninikoria.

Te tia kairiiri bon te aomata ae buokia tabeman n noora, namakina, ao nikunea te kawai ae eti. Raaou aika kairake, ibuobuoki i marenami bwa kam na kunea te kawai ae eti ao n tiku n nene n te Ekaretia ao n te euangkerio.

NI kabane taeka aika a bebete ke a raraoi, te raoiroi, tangira ae kororaoi, akoi, beku, tangira, ao te nanoanga a kona n riki bwa am mwakuri ni kairiiri n abanuean te Atua. Tai kamwiinibaea arom ao korakoram ibukin te raoiroi.

N na kaairia ma taeka tabeua nakoia tarira aika a kakaawaki. N taai ni kangaanga aikai, kam weteaki bwa kam na kabonganai ami taarena ao ninikoriami ni buaka imarenan te raoiroi ao te buakaka.

N 1979 e taetae ni burabeti Beretitenti Spencer W. Kimball: “Mwaitin te rikirake ae korakora are e roko nakon te Ekaretia n te kabanea ni bong e na roko bukin mwaitia aine aika raraoi n te aonaaba … a na karokoaki nakon te Ekaretia. … E na riki aei n te aro ae aine n te Ekaretia a kaota te raoiroi … inanon maiuia ao … a nooraki n okoro ao ni kaokoro—n kawai aika kakukurei—mairouia aine n te aonaaba.”

E taekinna Beretitenti Russell M. Nelson n 2015 “[Aine], ti … kainnanoa korakorami, rairakimi, ami kakoaua, ami konabwai ni kairiiri, wanawanami, ao bwanaami. Abanuean te Atua e bon aki ao n aki kona ni bwanin ngkana akea aine aika a karaoi berita aika tabu ao man kawakini.”

Tariu ao mwaaneu aika kam tangiraki, e anga bwaai ni ibuobuoki aika a korakora nakoimi te Ekaretia bwa kam na kakoroa bukin maiumi.

Warekii koroboki aika tabu, maiuakinna Nakomai, Iriirai ao te burokuraem n te inititute, marooro raoi ma Tamara are i Karawa n ami tataro, roroko n te taromauri, ao maiuakina koauan te euangkerio ao reirei ni maium ni katoabong. Karaoi ao kawakin berita aika tabu. Karaoa te rairannano ni karekei kabwaraan buure. Onimakina Tamara are i Karawa. Onimakina Iesu Kristo. A na kairiko. A tangiriko. Ao a raoniko.

Raaou aika kairake, taiaoka noora au tangira ao au kakaaitau nakoimi. A mena iroumi au tataro ao au kakabwaia. Ngkami bon kaain ana mwakri ae tamaroa ao n tabu te Atua n te tai aei n rongorongon te aonaaba. Man aikai I kakoaua, n aran Iesu Kristo, amen.