Ena Veisemati Kece

Kemuni na taciqu ganequ, kei na itokani lomani, au kauta mai vei kemuni nai loloma kei na veivakalougatataki ni Mataveiliutaki Taumada kei na Kuoramu ni iApositolo Le Tinikarua.

Au marau ni rawa niu tiko vata kei kemuni ka marau vakalevu ni rawa nio ni rogoci na watiqu.

O Harriet na matanisiga ni noqu bula. O ira kece na kilai koya era taleitaki koya. E dau vakavinakataka ka vakamarautaki ira era maliwai koya. E vakauqeti au vakalevu.

Me vaka oni sa rogoci Sister Uchtdorf, keirau vakamau ni keirau se gone. Ia, au qase toka, ia au marautaka na veiyabaki, vakabibi na veiyabaki talei vata kei Harriet.

Ni toso na gauna, au kila nio keda na itabatamata qase eda vakataroga e vuqa na taro baleta na noda bula—ia sa balavu na noda taroga tiko. Na taro vaqo:

E donu tiko beka na noqu ilakolako?

E raici au dina tiko beka na Kalou? E kauwai tiko beka o Koya?”

Cava na vuna au dau lomalala kina, uabaleti, vakawaleni, se galili?

Cava na vuna e sega ni vakarautaka kina na Kalou na cakamaca na gauna au gadreva kina?

Na cava e vakatara kina o Koya meu sotava na rarawa, tauvimate, se na veika ca?

Oqo na taro dredre ni yabaki cava ga ni bula.

Na taro oqo eda rawa ni lomakatakata kina ni sega ni saumi mai vakatotolo. Ena gauna oqo eda rawa ni taroga ga e dua na ka ena Google ka ciqoma na kena isau ena loma ga ni dua na sekodi.

Ia na isau ni taro baleti keda yadua, na ka bibi, kei na kena e cecere sara era sega ni yaco mai vakatotolo. Vakawasoma, eda dulaka na yaloda i lomalagi, eda na qai wawa balavu tu yani.

Eda besetaka na wawa, se vavei?

Nida wawa me vica na sekodi me saumi mai na noda vakatataro, eda nanuma ni sa cavuka na keda isema. Nida lomaleqa, ena rawa meda biuta na vakasaqaqara oqori. Ia ni yaco ena vei taro tawamudu, na veika ni yaloda, e dodonu meda na vosota tiko vakadede.

Ia na isaunitaro taucoko e sega ni tautauvata na kena bibi. Na isaunitaro ni vuku vakavuravura se na nanuma eso e rawarawa na kena yaco mai, ia e totolo talega na kena yali na kedra yaga ni yaco mai na veivakasama vovou. Na isaunitaro vakalomalagi—na isaunitaro tawamudu—era tawasaumi rawa. Me ciqomi na isaunitaro e gadrevi kina na solibula, cakacaka, ka tomani tikoga.

Ia au vakadeitaka vei kemuni, na isaunitaro oqo e yaga meda waraka.

Ke tiko eso na taro sebera ni saumi, au vakadinadinataka vei kemuni nio Tamamuni mai Lomalagi e rogoci iko, e kilai iko, ka sega vakadua ni biuti iko. Ia mo kua ni biuti Koya. Saga tikoga mo muria na Nona sala nio Koya “ena liutaki kemudou tiko” me kunei na isau ni taro e ganita na veidusimaki me mua tiko kina sala dodonu—ka sega ni yalani na nomu tubu se madigi mo cakacakatak ana nomu vakabautani bulataki na vakabauta.

E kaya vakaoqo o Steve Jobs, na itaukei ni Apple: “E [ka] dredre sara me sema na veika kece nida rai tiko i liu. Ena rawa walega mera semati nida rai imuri, mo rawa ni nuitaka nira na veisemati na nomu veisiga ni mataka.”

Na cava na kena ibalebale? E rairai o raica beka na droini era caka ena kena semati na roka ena sulu ni droini. Ni laurai vakavoleka, e vaka era sega tu ni veisemati ka veituyaki tu. Ia, ena gauna o raica kina na droini taucoko, ona raica na kena waki vata na na roka kei na kena tuvani na kena irairai e vakaraitaka na kena totoka. Na veika e sega tu ni matata ka veilecayaki sa tekivu me matata mai.

Ena so gauna na noda bula e vaka na droini oqo. E yaco mera veisemati me vaka na noda bula e vakanira sega tu ni sema ka dredre ena so na gauna. Eda sega ni raica rawa na kedra ituvatuva dodonu. Eda sega ni vakasamataka ni tu na kedra inaki.

Ia, nio raica na nomu bula ena rai tawamudu va kosipeli i Jisu Karisito, ona raica nira sema tiko kina ituvatuva cecere ni Kalou me baleti iko.

Nio saga mo nuitaka na Kalou ka muria na Luvena, o Jisu Karisito, ena dua na siga ona raica na kena icavacava, ona qai kila na nona ituvatuva na Daunidroini Cecere ena veigauna kece. O na raica ni vakarautaki iko tiko o Koya me baleta na veimadigi kei na gauna donu e lagilagi cake mai na kena o sega ni vakasamataka rawa se rawata rawa vakai iko. Au raica na dina na veika oqo ena noqu bula.

Eso vei kemuni ona rairai kila niu se gone sara, keitou biuvanua vakarua. Ena rua na gauna oqori, e kilai vinaka nio ira era tiko voliti keitou era vakatoka me keitou “lolovira cake mai vei ira.” Vei ira na gone keimami yabaki vata, e vakaduiduitaki au na itautau ni noqu vosa, ka dua na ka e vakayagataki vakalevu mera dredrevaki au kina.

E dredre vei rau na noqu itubutubu me rau qarava na neitou matavuvale. A qai tekivuna o tinaqu e dua na bisinisi savaisulu, keitou veivuke kece, au dau vodo basikeli vakaqiqi, meu qarava na kena “usani kina veivale” na iyaya niu suka na vuli.

Na dredre kei na lomaocaoca ni neitou veitokiyaki a vakavuna me luluqa na noqu vuli, au sega tu ni vuli me dua na yabaki.

Mai na Tokalau kei Jamani, au vulica na vosa vaka-Rusia me ikarua ni vosa. A dredre sara, ia au rawata. Io oqo, ena Ra kei Jamani, e vinakati kina meu vulica na vosa vaka-Valagi.

Vaka meu sega ni rawata! Au vakabauta ni gusuqu a sega ni buli me vosa vaka-Valagi.

Niu se cauravou, au domona lo e dua na goneyalewa totoka, ka dravudravu na yaloka n imatana levu. E ka ni rarawa, o Harriet e sega mada ga ni taleitaki au mai vakalailai. Se cava ga au saga, e vaka meu sega ni rawata rawa. Ia, oni rogoca na kena italanoa.

Ia, oqori o au, e dua na cauravou takiveiyaga ka sasaga tiko me bula voli e Jamani ni oti na ivalu ka vaka me sega na madigi me rawata vakavinaka na nona bula.

Ia, e vica na ka vinaka e yaco vei au.

Au kila ni lomani au na noqu vuvale. E koronivuli kei na lotu era tu na qasenivuli era vakayaloqaqataki au me tuvana na noqu lalawa ka kua ni yalolailai. Au nanuma na nona vakatavulica na daukaulotu gone ni Amerika, “Kevaka sa totaki [iko] na Kalou, o cei me na [kemu] meca?” Ni “sa rawarawa vua na Kalou na ka kecega.”

E dua na ka baleta na ivolanikalou tarai au vakalevu na kena kaukauwa. Ke sa vakaoqori, au vakasamataka, na cava meu rere kina?

Au qai vakabauta. Au nuitaka na Kalou.

Dua na gauna, au a vuli e parokaramu ni vulitara. A bolei au e dua na qasenivuli meu vinaka cake ka meu na vuli bogi meu vulica na idinia vakamekeniki. A muataki au meu kila niu taleitaka na vukataka na waqavuka

E kani kidacala vei au niu kila ni dodonu meu kila na vosa vaka-Valagi meu rawa kina ni pailate. Au vinakata saraga meu pailate, ia, e veivakurabuitaki, ni sa vaka me veisau na gusuqu, ka sa sega soti ni dredre na vosa vaka-Valagi.

E dina sara, ni sega ni kena ibalebale oya ni maravu tu ga na ilakolako.

Niu se yabaki 19 au gole ki San Antonio, Texas, meu lai tekivu vuli pailate ni Waqavuka ni Mataivalu. Ena loma ni waqavuka, au dabe tikiva e dua na turaga totoka sara na nona vosa vaka Texas. Au kurabui ni vosa vaka-Valagi au cakacakataka ena noqu igu meu vulica e sega ni tautauvata kei na kena era vosataka mai Texas!

Ena koronivuli ni pailate, e dredre vakalevu. E dua dina na parokaramu dredre ni veisisivi, era sasaga kece tiko mera rawata na ulu ni icovi ni taurivola. Au kila sara niu sega ni kalougata vakalevu baleta ni vuqa na lewe ni noqu kalasi e nodra vosa na vosa vaka-Valagi.

E vakaroti au na noqu qasenivuli me baleta e dua tale na ka e vakatatao tiko—sa rui levu na gauna au solia tiko ena lotu. Era kidavaki au o ira na lewe ni lotu kina nodra tabana kei na nodra vale, ka keimami tara vata e dua na vale ni lotu ena noqu tiko mai Big Spring, Texas. Era leqataka na noqu qasenivuli ni veitaviqaravi oqori era na vakaluluqataka na noqu sasaga meu rawata na iulu ni icovi ni noqu kalasi. Au sega ni nanuma ni vakakina. Ia, au nuitaka ga na Kalou ka cakava na noqu vinaka duadua.

E yaco, meu vulica na vosa vaka-Valgi (e dina ga niu se vulica tiko ga). Au qai rawata vakavinaka na noqu vuli pailate. Au yaco meu pailate ni mataivalu ka qai yaco meu kavetani ni waqavuka. Kei koya na goneyalewa mata vinaka ni noqu tatadra? E tiko kei au.

Ia me yacova ni vakatakilai mai na iyaloyalo taucoko, mo kua ni uabaleti ena veicakacaka lelevu, ka dredre ni bula oqo. Mo nanuma tiko ni veika lelevu era caka mai ena veika lalai. Kevaka o dinata mo cakava na “veika lalai ka rawarawa” e kerei iko kina na Kalou mo cakava—ka o qai cakava ena nomu igu taucoko o rawata, ena muria mai na veika lelevu.

Eso vei ira na “veika lalai ka rawarawa” eoka kina na masu e veisiga, vulici ni ivolanikalou, cakava na Lako Mai, Mo Muri Au kei na Me iSakisaki ni iTabagone me tiki ni ilakolako, ka bulataka na Vosa ni Vuku, tiko ena lotu, ka sauma na ikatini kei na isolisoli.

Cakava na veika oqo ena gauna mada ga nio sega ni vinakata, ni gadrevi mada kina na solibula. Na solibula e cakava me ka tabu, kei na “solibula ena kauta mai na kalougata mai lomalagi.”

Dua na kena vakasama, na nomu solibula “lalai ka rawarawa” era tiki ni bula ni veisiga yadua e cakava me cecere ka vakasakiti na nomu bula. O na sega beka ni raica na sala era sema tu kina, ka sega ni gadrevi mo raica oqo. Mo na vakabauta tiko mada ga ena gauna o bula tiko kina oqo. Nuitaka na Kalou, ni ena “veika lalai ka rawarawa [ena yaco mai] na veika lelevu.”

Niu vakataki kemuni, au sega tu ni kila ena kauti au ivei na noqu bula. Au sega saraga ni bau raica ni veisemati tu.

Ia au nuitaka na Kalou. Au vakabauta ni kevaka au cakava na noqu vinaka taucoko ena gauna oya, na Kalou ena raica na veika lelevu.

A vakayacora dina o Koya.

E kila o Koya na itinitini mai na ivakatekivu au sega tu ni kila.

Au sega ni raica rawa na siga ni mataka, ia e rawa Vua.

Ena gauna mada ga ni dredre, au nanuma niu sa biu, a tu vata kei au o Koya—au mai raica oqo.

Ena Vakaibalebale, eda raica kina na yalayala: “Vakararavi vei Jiova ena vu ni yalomu; ka mo kakua ni vakararavi kina nomu yalomatua. Mo vakarogotaka vua na nomu sala kecega, ia ena vakadodonutaka na nomui lakolako ko koya.”

Au vakauqeti kemuni moni vakabauta ni na vinaka sara na nomuni bula kevaka oni vakararavi tiko vua na Kalou me dusimaka na nomu ilakolako. E kila o Koya na veika ona sega ni rawa ni kila vakataki iko, ka sa vakarautaka tu o Koya na nomu veisiga ni mataka ona sega ni rawa ni vakasamataka rawa. A vakadinadinataka na iApositolo o Paula, ni “Sa sega na mata sa kunea, … se na daliga sa rogoca, … [sa sega] ni curu ki na loma ni tamata [na veika] sa vakarautaka na Kalou me nodra era sa lomani koya.”

Mo qai tarogi iko kina, “E rawa beka meu vakaukautaka na noqu vakabauta na Kalou? E rawa beka meu nuitaki Koya ka gadreva me dusimaka noqu sala?”

Kevaka ona rawa ni kunea e dua na tiki ni vakabauta vaka na sore ni mosita ena yalomu—kevaka madaga e gadrevi kina mo vakabauta—tekivu kina.

E kila tu na Kalou na sala me vukica na sorenikau lalai mera vunikau lelevu. Cakava na veika lalai ka rawarawa, ia na Kalou ena qai “vakaikuritaki kemuni mada vakaudolu ka vakalougatataki kemuni me vaka sa vosataka vei kemuni!”

E sega ni gadrevi moni curuma na itovo vakavuravura mo rogoca na domo veibasai e vakaluluqataka se vakalewa na vakabauta na Kalou kei na noda lotu vakatabakidua.

Na itukutuku raraba e dau voqataka vakalevu na domo vakaoqori.

Ia na nomuni e sega walega ni tabatamata e vakatovolei se vakasesewataki na nomuni vakabauta na Kalou. E vaka tiko oqo ni tiki ni veivakatovolei vakayago vei ira na luve ni Kalou.

“Kevaka dou vakavuravura,” a kaya o Jisu vei iratou na Nona tisaipeli, “ena lomana na kai nona ko vuravura: ia ni dou sa sega ni vakavuravura, ka niu sa digitaki kemudou, … , sai koya oqo sa cati kemudou kina ko vuravura.”

E sa na vinaka cake beka ga mo ciqoma ni gauna ga o yalataka mo muria na iVakabula, o ira era tiko ena vale vakaitamera era na sega ni duavata kina—ena domo levu ena so na gauna. Era na saga talega mera veivakasaurarataki ka vakamadualaki iko.

Ia, nanuma tiko nio sega ni saumi taro vei ira. O na saumi taro vua na Kalou. Dua na siga, ona tu e Matana ka saumi taro me baleta na nomu bula.

Ena tarogi iko o Koya kevaka o a vakamuria na iVakabula, kevaka o a lomana na wekamu, kevaka o tovolea vakaidina mo muria tiko ga na salatu ni bula vakatisaipeli ka rokova na nomu veiyalayalati.

Kemuni noqu itokani itabagone lomani, oqo sa kena gauna mo yalayala mo muria na Nona salatu o Karisito.

Ena dua na siga era na tekiduru ka vakatusa na luvena kece na Kalou, ni o Jisu na Karisito, na Dauveivueti, na iVakabula kei vuravura. Era na kila ni a mate ena vukudra.

Ena siga o ya ena kilai ka matata ni sa Domona duadua ga ena ka dina.

Ena gauna oqo, nida tukuna tiko meda biuta me dusimaka noda bula na Kalou, au vinakata meu vakamatatataka e dua na ka. O na sega beka ni taleitaka na veika au vakarau tukuna vei kemuni. Nio kerea vua na Kalou me dusimaka na veivakatulewa ni nomu bula—oka kina eso na vakatulewa bibi—ena sega beka ni solia vei iko o Koya e dua na isaunitaro matata.

Na dina o ya ni sega ni dua na ka vua na Turaga na nomu vakatulewa ni bibi ga mo na tiko ena nomu veiyalayalati bibi kei na ivakavuvuli ni kosipeli vakalesuimai i Jisu Karisito.

Eso na gauna e dau tiko vua na Kalou e dua na salae vinaka o Koya mo muria. E tiko talega na gauna ena vakaroti iko mo kua ni muria na digidigi eso baleta na ka rerevaki o sega ni raica rawa. Ia dau tiko na gauna eso ni dua na taro e vica toka na kena isaunitaro “dodonu” ka rawa mo kune reki ena dua vei ira oqo ia mo bula tiko ga ena dina tawamudu ni Kalou.

Ni yaco na veika oqo vei Josefa Simici kei ira na nona itokani, e vakayagataka na Turaga e dua na isaunitaro talei nira vakasaqara na Nona veidusimaki. A kaya o Koya, “E sega ni dua na ka [vei au].”

A qai kuria, “Ia mo dou yalodina tikoga.”

Ena veivakayalolailaitaki beka nomu rogoca ni na sega ni solia vei iko na Kalou na matailalai ni nomu ilakolako ni bula. Ia o gadreva dina beka mo dusimaki vakamatailalai?

O gadreva dina beka e dua me solia vei iko na kila ni lawaki ni bula ni bera nio qai mai kila ga vakai iko? Na mataqali ilakolako vakacava oqori? Ena kauta tani beka qori na nomu gadreva mo rawata? O na vakatubura beka vakacava ka laveta cake na nomu yalonuidei vua na Turaga kei iko?

E kaya na Turaga vei Oliver Cowdery, “Sa dodonu mo vakasamataka vakavinaka ena nomu vakasama; oti e dodonu mo qai taroga vei au kevaka e sa dodonu.”

E solia vei iko na Tamada Vakalomalagi na Nona ituvatuva, na Nona Sala. E solia vei iko na iyaloyalo levu. E solia vei iko e dua na mona kei na uto. Ke nuitaki Koya, ena vukei iko mo vakayagataka ruarua vakavinaka ena nomu vakatulewa. E nuitaki iko o Koya mo vakatulewataka vakavinaka ena nomu muri Jisu Karisito.

Ena vuqa na gauna, na nomu vakatulewa ena gauna o ya ena sega beka ni bibi na veika mo cakava ni oti na vakatulewa o cakava.

Me vakataka, nodrau digitaka e rua me rau vakamau, e dina ga ni so ena nodrau matavuvale era sega ni nanuma ni rau veiganiti. Ia, e tiko na noqu vakanuinui levu vei ira na veitau vakaoqo, kevaka ni oti na vakatulewa, rau sa na dau gumatua tiko vakairau ka vakakina vua na Turaga ena yalodrau kei na nodrau vakanananu kecega. Ni rau veilomani ka veikauwaitaki tiko vakairau ka vakanamata tiko ena tarai cake ni lomadrau, gagadre vakayalo, ka vakayago—ena nodrau cakava vakawasoma tiko na veika “lalai”—erau yaco me rau taleitaki mai vei ira kece.

Me ivakatauvata, vakasamataka na veiwatini era nanuma ni rau sa digitaka na tamata e “taucoko” ka qai nanuma ni sa oti na icolacola bibi. Kevaka sa mai mudu na nodrau veimusumusuki, oti na nodrau veivosaki, vakawalena na nodrau veiyalayalati tabu, ka taiki me boletaki rau kei na bula vakadonui koya, na veiwatini oqo erau sa lakova e dua na salatu e veimuataki kina rarawa kei na luluqa.

E dina talega oqo ena digidigi vakacakacaka. Au nuitaka nio ira era digitaka na cakacaka lailai era cakava na nodra vinaka taucoko ka kunea na sala mera vakayagataka na nodra cakacaka mera vakacaucautaka kina na Kalou ka vakalougatataki ira na Luvena.

E vakalailai na noqu nuitaki ira era digitaka na cakacakavdokai ka kilai levu ia ena ilakolako qori, era sega ni vakanamata kina nodra ivakatakilakila vakalou kei na veika vinaka era rawa ni rawata nira qarava na Kalou kei ira na Luvena ena gauna vata ga oqori.

E vakarautaka na Kalou na veivakalougatataki tawamudu o sega ni vakasamataka rawa. Me vukea nomu ciqomi ira, e solia vei kemuni o Koya na ivakaro, veiyalayalati tabu, ivakasala veivakauqeti vakaparofita, na isolisoli ni Yalo Tabu, kei na galala ni digidigi savasava. E sa veirauti vinaka me muataki iko kina marau ni bula oqo kei na reki tawamudu. Ni oti oya, kakua ni yalolailai nio vakayacora eso na vakatulewa e sega soti ni vinaka sara. Oqori o na vuli kina. Oqori e tiki ni lakolako oqo!

Sega, na ilakolako oqo e sega ni dakoba tu ga mai na ivakatekivu kina iotioti. Na nomu bula ena dredre ka vinaka talega. Ia kevaka o vakabautai Jisu Karisito, ka raica na Nona solibula veisorovaki ni sa isolisoli ni loloma kei na veivutuni me sala ni kena ciqomi, ka vakadeitaka na marau tawamudu.

Ona sega ni raica rawa qo, ona qai rai lesu ka kila ni Turaga e sega vakadua ni biuti iko, dina madaga ni vakataraiiko o Koya mo digidigi vakai iko. O na raica nira veisemati kece ga.

Io, na cava au nuitaka mo nanuma ena noda gauna vata nikua?

iMatai, mo kila ni Kalou e dau sauma mai vakamalua na nomu taro bibi sara, ka dau yaco mai ena sala o sega sara ni namaka. Ia na isaunimasu ni Kalou era sa yavubula tawamudu. E vinaka meda waraka.

iKarua, kakua ni uabaleti nio lakova tiko na sala ni bula vakatisaipeli. Mo cakava vaka vinaka na veika lalai, ena qai muria mai na veika lelevu.

iKatolu, me tiko vakalailai nomu vakabauta. Vakabauta nio bibi vua na Kalou, ni raica o Koya na veika o sega ni raica, ka na liutaki iko ena sala dodonu. E lomani iko o Koya. Nuitaki Koya.

iKava, kakua ni vakatara na domo veivakayalolailaitaki me vagolei iko mai na nomu ilakolako ni vakabauta. Nanuma tiko, o sega ni saumitaro vei ira na tani. O saumitaro vua na Tamamu mai Lomalagi. E bibi vei Koya oiko.

iKalima, vakasaqara na veidusimaki ni Turaga, kei na gauna e kaya kina o Koya, “E sega ni dua na ka,” mo cakava sara na nomu vakatulewa vinaka e yavutaki ena dina o sa kila tu. Oti mo “yalodina tikoga”

Au solia vei kemuni na noqu veivakalougatataki tekivu ena yabaki vou oqo nio saga vakaidina mo kila na Tamamuni Vakalomalagi, muri Jisu Karisito, ka doka na Nona veiyalayalati, ena tubu na nomu vakabauta.

Ena tubu na nomu yalonuidei nio vakasaqara mo muria na nomu iVakabula kei na Nona ivakavuvuli.

O na kunea vei Jisu Karisito, Nona kosipeli, kei na Nona Lotu, na marau, reki, kei na vakacegu! Ia ena dua na siga, ena mokoti iko o Koya ena Nona loloma vakalou.

Ena yalo ni vakavinavinaka sega ni tukuni rawa, ona raica ni Kalou vakataki Koya, ena Nona veikaroni, loloma soliwale, kei na yalololoma uasivi, sa tu ga kina, ka dau wanonovi iko tu, ka vakalougatataki iko, ka vakarautaka e dua na vanua me nomu.

Au vakadinadinataka ka solia vei kemuni na noqu veivakalougatataki, ena yaca i Jisu Karisito, emeni.