Vakararavi Vua na Kalou

Kemuni na taciqu kei na ganequ lomani, kemuni na noqu itokani gone lomani, au lomani kemuni niu raici kemuni tiko vakayalo ena veivanua e vuravura raraba. O ni sa vakasakiti. O ni rairai totoka. Au diva meu mokoti kemuni vakayadudua.

Sa ka talei dina na tiko kei kemuni nikua. Au taleitaka talega niu tiko kei noqu iApositolo taleitaki duadua. Au kila ni sega ni dodonu meda taleitaka vakatabaki dua edua, ia vei au, ena DONU beka baleta ni watiqu o koya. Keirau sa vakamau

Wale tiko ga oqo, keirau a marautaka kina na i ka 62 ni yabaki ni neirau vakamau. Keirau se veidomoni tiko ga vakai keirau!

Sa duatani ga na ivua ni kosipeli! Ena gauna keirau ciqoma kina na itukutuku ni vakanuinui vinaka kei na loloma mai vei iratou na makubui keirau kei ira na makubui keirau vakarua, keirau vakila kina na talei ni veivakalougatataki ni lewena na Lotu oqo kei na kosipeli i Jisu Karisito.

Vei kemuni o ni sega ni vakawati, veisere, se o ni sotava tiko na veibolebole ena veituvaki vakamatavuvale eso, au vakadinadinataka vei kemuni ni Kalou e kilai ka lomani kemuni, ka ke o ni dinata tiko ga na nomuni veiyalayalati, na reki ni bula vakamatavuvale ena sega ni vakalekalekataki se vakuwai vei kemuni. Au sega sara ni kila se na rawa vakacava, ia au kila ni loloma soliwale, loloma veivueti, kei na loloma ni Turaga e rauti keda vakavinaka sara. Ena vakayacora o Koya ena Nona gauna kei na Nona sala ga.

Niu raici kemuni au vakila na iserau totoka ni nomuni vinaka kei na igu, au vakananumi ena dua na gauna digitaki keirau a tubu mai kina kei Dieter ena tabana vata ga mai Frankfurt, Jamani.

Au kila ni a dau vinakati au lo tiko, ia au a sega ni malele sara kina. E a tamata vinaka, ia e a noqu itokani ga ni Lotu. Keirau a vulica vata na danisi ena neirau itaviqaravi ni Lotu. Oya na gauna ni foxtrot, boogie-woogie, kei na rock and roll.

Ni oti nona lewena na Mataivalu e Macawa vaka dua na pailate ni waqavuka ni vala, au a sega ni raici koya tu me rauta e rua na yabaki. Na kena dina, ena nona lesu mai ki Frankfurt, e a sega soti ni vinaka na noqu nanuma taumada. E a rairai vakai ira na tagane qaciqacia ena iyaloyalo na Top Gun

Ia, ena gauna a vosa kina vei au, au a qoroqoro dina; a sa matua mai ena loma ni rua na yabaki oya. A kila vinaka o koya na veika a vinakata me cakava ena nona bula, ka dei tu ena kosipeli. A dei na nona vakatulewa kei na nona sasaga ni veigadivi. Ena vica na vula e muri, keirau a vakamau.

Kemuni na noqu itokani gone lomani, au se sega ni veivutunitaka na noqu raici koya vakavinaka vakarua, ka dina ga niu a sega ni malele taumada vua.

O Dieter na isakisaki ni noqu bula ka tama ka tukadra vakasakiti na luvei keirau kei ira na makubui keirau.

Ia au sa liu sara tiko ena ka au vinakata meu wasea vata kei kemuni.

Niu se qai yabaki 11, a takali o tamaqu ena vuku ni kenisa. Ni oti nona mate, a yaco na neitou vale me vanua ni rarawa, dredre kei na yalolailai.

E a vaka ni sega ni dua na ka, se tamata e rawa ni vakacegui tinaqu se o keitou na gone. Ia, e sega sara ni vakakina! Na Tamada Vakalomalagi, ena Nona loloma cecere. e a sega ni guilecavi keitou.

Ni oti e walu na vula mai na nona takali o tamaqu, rau a tukituki ena neitou mata ni katuba e Frankfurt, Jamani e rua na daukalotu ni Amerika. Oi rau na daukaulotu oya, rau a liutaki mai vua na Yalo, me rau biuta tu mai vei tinaqu na iVola i Momani vakamareqeti. Sa dua na ka noqu taleitaka na iVola i Momani.

Oi rau na daukaulotu gone oqo erau a kauta mai na isau ni taro eso mai vua na Kalou. Na itukutuku ni ituvatuva ni veivakabulai, na ituvatuva ni marau, e a totoka vakaidina ka kaukauwa. Ea kauta lesu mai na inuinui kei na rarama ki na neitou vale. Ni keitou ciqoma na kosipeli vakalesui mai, e a vakabulai na mosi ni yaloi keitou, kei na rarawa.

Ena itukutuku ni kosipeli vakalesui mai i Jisu Karisito, sa sega ni kune kina na butobuto ena neitou vale ni sega ni rawa ni tiko vata na butobuto kei na rarama ena dua vata ga na vanua ena gauna vata ga.

Oi rau na daukaulotu e rua oqo erau a cauravou totoka. Vei keitou, erau a rua na agilosi mai lagi ka talai mai vua na Kalou.

Kemuni na noqu itokani gone lomani, o ni a buli talega ena veigacagaca vakalou vata oya! O ni sa tamata digitaki ni noda gauna, ena vosa kei na cakacaka o ni vakavulica ka bulataka kina na itukutuku ni kosipeli ena veivanua ko ni dui tiko kina. Ena inaki oqo, o ni sa vakatikori kina ena nomuni siti, koronivuli se vanua ni cakacaka, ena nomuni matavuvale. Kakua ni guilecava, e rawa ni o yaco mo agilosi mai lagi vei ira sara ga na tiko volekati iko.

O ni matataka tiko na Lotu i Jisu Karisito, ka o ni iliuliu qaqa ena kena vakatetei tiko nai tukutuku ni kosipeli ena nomuni bula dodonu kei na vakadinadina qaqa.

Na iliuliu sai koya edua e vukei ira tale eso me ra raica, vakila, ka kunea na sala dodonu. Kemuni na noqu itokani gone lomani, ni veivukei mo ni raica na sala dodonu ka yavutaki dei tiko ena Lotu kei na kosipeli.

Na veivosa rawarawa ka macala se caka vinaka kece, yalodina, loloma uasivi, yalovinaka, veiqaravi, loloma kei na yalololoma ena rawa ni yaco me nomu cakacaka ni veiliutaki ena matanitu ni Kalou. Kakua ni beca na nomu veivakayarayarataki kei na mana ni nomu caka vinaka.

Meu vakuria mada eke e vica na vosa talei vei ira na tacoda yalewa lomani. Ena veigauna dredre oqo, o ni sa kacivi mo ni vakayagataka na nomuni taledi kei na yaloqaqa ena ivalu ena maliwa ni vinaka kei na ca.

Ena 1979, ea parofisaitaka o Peresitedi Spencer W. Kimball: “Ena levu sara na tubu ena yaco ena Lotu ena iotioti ni gauna oqo ena yaco mai baleta ni levu na marama vinaka ena vuravura oqo era na lako mai kina Lotu ena iotioti ni gauna. Ena yaco oqo ni ra sa vakaraitaka tiko ena nodra bula na marama ena Lotu na bula dodonu … ena nodra bula … e sa rairai tiko ni ra duatani ka duidui—ena veisala mamarau eso—mai vei ira na marama ni vuravura.”

E a tomana o Peresitedi Russell M. Nelson ena 2025, “Eda … gadreva na nomu kaukauwa, nomu saumaki mai, nomu ivakadinadina, nomu rawa ni veiliutaki, nomu yalomatua, kei na domomu. E sega ni taucoko na matanitu ni Kalou, ka na sega ni rawa ni taucoko kevaka e sega na marama era cakava nodra veiyalayalati ka bulataka.”

Kemuni na ganequ kei na taciqu lomani, erau vakarautaka vei kemuni na Lotu kei na Turaga na ivurevure kaukauwa me rawati kina na vei inaki oqo ni nomu bula.

Wilika na ivolanikalou, vakamareqeta na Lako Mai, Mo Muri Au kei na parokaramu ni inisitute, vosa ena yalodina vua na Tamada Vakalomalagi ena nomu masu, dau tiko ena lotu ka bulataka e veisiga na dina kei na ivakavuvuli ni kosipeli. Cakava ka maroroya na veiyalayalati. Veivutuni me rawati kina na veivosoti. Vakararavi vua na Tamada Vakalomalagi. Vakararavi vei Jisu Karisito. Erau na vaqaqacotaki kemuni. E rau lomani kemuni. ka ra sa noqu.

Kemuni na noqu itokani gone lomani, yalovinaka mo ni kila na noqu loloma kei na vakavinavinaka vei kemuni yadua. Na noqu masu kei na veivakalougatataki me sa nomuni. O ni sa tiki bibi ni cakacaka totoka ka vakatabui ni Kalou ena gauna sara ga oqo ena itukutuku kei vuravura. Au vakadinadinataka oqo, ena yaca i Jisu Karisito, emeni.