9:58

ទុកចិត្តលើព្រះ

ការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យ

ហ៊ែរៀត រៃក អុជដូហ្វ

ថ្ងៃទី២ ខែកុម្ភៈ ឆ្នាំ២០២៥

បងប្អូនប្រុសស្រីជាទីស្រឡាញ់របស់ខ្ញុំ មិត្តវ័យក្មេងជាទីស្រឡាញ់របស់ខ្ញុំ ខ្ញុំស្រឡាញ់បងប្អូននៅគ្រប់ទីកន្លែងជុំវិញពិភពលោក ។ បងប្អូនអស្ចារ្យណាស់ ។ បងប្អូនស្រស់ស្អាតណាស់ ។ ខ្ញុំចង់ឱបបងប្អូនម្នាក់ៗ ។

វាគឺជាឱកាសដ៏ល្អដែលបានជួបបងប្អូននាថ្ងៃនេះ ។ ខ្ញុំក៏ចូលចិត្តដែរ ដែលខ្ញុំបាននៅទីនេះជាមួយនឹងសាវកដែលខ្ញុំចូលចិត្តផងដែរ ។ ខ្ញុំដឹងថា យើងមិនគួរមានការជ្រើសរើសនោះទេ ប៉ុន្តែក្នុងករណីរបស់ខ្ញុំ វាហាក់ដូចជាមិនអីទេ ព្រោះខ្ញុំបានរៀបការជាមួយនឹងលោក ។

ថ្មីៗនេះ យើងបានប្រារព្ធគម្រប់ខួបអាពាហ៍ពិពាហ៍លើកទី ៦២ របស់ពួកយើង ។ ហើយយើងនៅតែស្រឡាញ់គ្នា !

និយាយដល់ផលផ្លែនៃដំណឹងល្អ ! នៅពេលយើងទទួលសារអបអរសាទរ និងសេចក្ដីស្រឡាញ់មកពីចៅៗ និងចៅទួតរបស់យើង នោះយើងដឹងអំពីពរជ័យដ៏ធំធេងនៃសមាជិកភាពក្នុងសាសនាចក្រ និងដំណឹងល្អនៃព្រះយេស៊ូវគ្រីស្ទ ។

ចំពោះបងប្អូនដែលនៅលីវ ដែលបានលែងលះគ្នា ឬរស់នៅក្នុងគ្រួសារមួយដែលជួបបញ្ហាពិបាក ខ្ញុំសូមថ្លែងទីបន្ទាល់ទៅកាន់បងប្អូនថា ព្រះស្គាល់ ហើយស្រឡាញ់បងប្អូន ហើយនៅពេលបងប្អូនបន្តស្មោះត្រង់ចំពោះសេចក្ដីសញ្ញារបស់បងប្អូន នោះអំណរនៃជីវិតគ្រួសារនឹងកើតមានចំពោះបងប្អូន ។ ខ្ញុំពុំដឹងថា វានឹងកើតឡើងដោយរបៀបណាទេ ប៉ុន្តែខ្ញុំដឹងថា ព្រះគុណ សេចក្ដីមេត្តាករុណា និងសេចក្ដីស្រឡាញ់របស់ព្រះមានគ្រប់គ្រាន់សម្រាប់យើងទាំងអស់គ្នា ។ ទ្រង់នឹងធ្វើឲ្យវាកើតឡើងស្របតាមរបៀប និងកាលវេលារបស់ទ្រង់ ។

នៅពេលដែលខ្ញុំសម្លឹងមើលទៅបងប្អូន និងទទួលអារម្មណ៍នៃពន្លឺចែងចាំងដ៏អស្ចារ្យនៃសេចក្តីល្អ និងកម្លាំងរបស់បងប្អូន ខ្ញុំបាននឹកឃើញអំពីពេលវេលាដ៏ពិសេសមួយដែល ឌៀថើរ និងខ្ញុំធំឡើងនៅក្នុងសាខាតែមួយ នៅទីក្រុងហ្រែ្វងហ្វឺត ប្រទេសអាល្លឺម៉ង់ ។

ខ្ញុំបានដឹងថា គាត់បានលួចស្រឡាញ់ខ្ញុំ ប៉ុន្តែខ្ញុំពុំបានចាប់អារម្មណ៍លើគាត់ទេ ។ គាត់ជាមនុស្សល្អ ប៉ុន្តែគាត់គ្រាន់តែជាមិត្តភក្តិនៅក្នុងសាសនាចក្ររបស់ខ្ញុំប៉ុណ្ណោះ ។ យើងហាត់រាំជាមួយគ្នានៅឯសកម្មភាពរបស់យើងក្នុងសាសនាចក្រ ។ កាលនោះវាជាសម័យពេញនិយមនៃចង្វាក់ ហ្វកត្រូត, ប៊ូហ្គី-វ៉ូហ្គី និង រ៉ក់ អែន រ៉ូល ។

បន្ទាប់ពីគាត់បានចូលក្នុងកងទ័ពអាកាសដើម្បីក្លាយជាអ្នកបើកយន្តហោះចម្បាំង ខ្ញុំពុំបានឃើញគាត់អស់រយៈជិតពីរឆ្នាំ ។ និយាយឲ្យស្មោះទៅ នៅពេលគាត់ត្រឡប់មកទីក្រុងហ្រែ្វងហ្វឺតវិញ ខ្ញុំពុំសូវមានចំណាប់អារម្មណ៍លើគាត់ប៉ុន្មានទេ ។ គាត់មានរូបរាងដូចជាមនុស្សម្នាក់មានទំនុកចិត្តលើខ្លួនឯងពេក ដូចនៅក្នុងខ្សែភាពយន្តរឿង Top Gun ។

ប៉ុន្តែនៅពេលគាត់មកនិយាយរកខ្ញុំ ខ្ញុំមានភាពភ្ញាក់ផ្អើលជាខ្លាំង គាត់មានភាពចាស់ទុំច្រើនក្នុងរយៈពេលពីរឆ្នាំនោះ ។ គាត់បានដឹងពីអ្វីដែលគាត់ចង់ធ្វើក្នុងជីវិតរបស់គាត់ ហើយគាត់រឹងមាំនៅក្នុងដំណឹងល្អ ។ គាត់មានការតាំងចិត្ត និងមានគំនិតច្នៃប្រឌិតក្នុងការខិតខំប្រឹងប្រែងរបស់គាត់ ។ ប៉ុន្មានខែក្រោយមក ពួកយើងបានរៀបការ ។

មិត្តវ័យក្មេងជាទីស្រឡាញ់របស់ខ្ញុំអើយ ខ្ញុំមិនដែលសោកស្តាយក្នុងការមើលដោយព្រិតព្រៀងទៅលើគាត់ជាលើកទីពីរនោះទេ ទោះបីជាក្រោយពីចំណាប់អារម្មណ៍លើកទីមួយមិនសូវជាល្អច្បាស់លាស់ក៏ដោយ ។

ឌៀថើរ គឺជាម្ចាស់ជីវិតរបស់ខ្ញុំ និងជាឪពុក និងជាជីតាដ៏ល្អសម្រាប់កូនៗព្រមទាំងចៅៗរបស់យើង ។

ប៉ុន្តែខ្ញុំកំពុងនិយាយហួសបន្តិចអំពីអ្វីដែលខ្ញុំចង់ចែកចាយជាមួយបងប្អូន ។

នៅពេលខ្ញុំមានអាយុ ១២ឆ្នាំ ឪពុករបស់ខ្ញុំបានទទួលមរណភាពដោយសារជំងឺមហារីក ។ បន្ទាប់ពីគាត់ស្លាប់ទៅ ផ្ទះរបស់យើងបានក្លាយជាកន្លែងនៃទុក្ខសោក ការរងទុក្ខ និងភាពអស់សង្ឃឹម ។

វាហាក់ដូចជាមិនមានអ្វី ឬគ្មាននរណាម្នាក់ដែលអាចលួងលោមម្តាយរបស់ខ្ញុំ ឬពួកយើងជាកូនបានឡើយ ។ មែនហើយ ហាក់ដូចជាគ្មានទេ ! ដោយសេចក្ដីស្រឡាញ់ដ៏ធំធេងរបស់ទ្រង់ ព្រះវរបិតាសួគ៌របស់យើង ពុំបានភ្លេចយើងឡើយ ។

បន្ទាប់ពីឪពុករបស់ខ្ញុំបានទទួលមរណភាពទៅបានប្រាំបីខែ ក៏មានពួកអ្នកផ្សព្វផ្សាយសាសនាជនជាតិអាមេរិកកាំងពីរនាក់មកគោះទ្វារផ្ទះរបស់យើងនៅឯទីក្រុងហ្រែ្វងហ្វឺត ប្រទេសអាល្លឺម៉ង់ ។ ពួកអ្នកផ្សព្វផ្សាយសាសនាទាំងពីរនោះ ដឹកនាំដោយព្រះវិញ្ញាណ បានទុកព្រះគម្ពីរមរមនដ៏មានតម្លៃឲ្យម្តាយរបស់ខ្ញុំ ។ ខ្ញុំស្រឡាញ់ព្រះគម្ពីរមរមនខ្លាំងណាស់ ។

ពួកអ្នកផ្សព្វផ្សាយសាសនាវ័យក្មេងទាំងនេះបាននាំចម្លើយរបស់ព្រះដល់យើង ។ សារលិខិតនៃផែនការនៃសេចក្តីសង្គ្រោះ ផែនការនៃសុភមង្គល គឺស្រស់ស្អាត និងមានឥទ្ធិពលខ្លាំងណាស់ ។ វាបាននាំមកនូវសេចក្តីសង្ឃឹម និងពន្លឺត្រឡប់មកផ្ទះរបស់យើងវិញ ។ នៅពេលយើងទទួលយកដំណឹងល្អដែលបានស្ដារឡើងវិញ នោះការឈឺចាប់ក្នុងចិត្ត ភាពអស់សង្ឃឹម និងភាពសោកសៅរបស់យើងត្រូវបានព្យាបាល ។

ដោយមាននូវសារលិខិតនៃដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទ នោះគ្មានភាពងងឹតទៀតទេនៅក្នុងគ្រួសាររបស់យើង ដោយសារតែពន្លឺ និងភាពងងឹតមិនអាចនៅក្នុងកន្លែងតែមួយក្នុងពេលតែមួយបានឡើយ ។

ពួកអ្នកផ្សព្វផ្សាយសាសនាទាំងពីរនាក់នេះគឺជាយុវមជ្ឈិមវ័យដ៏ល្អ ។ សម្រាប់យើង ពួកគេគឺជាទេវតានៃសិរីរុងរឿងពីររូបដែលព្រះបានបញ្ជូនមក ។

មិត្តយុវវ័យជាទីស្រឡាញ់របស់ខ្ញុំអើយ ក្មួយៗត្រូវបានបង្កើតឡើងដោយអង្គធាតុដ៏ទេវភាពដូចៗគ្នា ! ក្មួយៗគឺជាពួកជម្រើសសម្រាប់ជំនាន់របស់យើង ដែលបង្រៀន ហើយរស់នៅតាមសារលិខិតនៃដំណឹងល្អនៅគ្រប់ទីកន្លែងដែលក្មួយៗរស់នៅ ។ ដោយសារគោលបំណងនេះហើយ ទើបក្មួយៗត្រូវបានដាក់នៅក្នុងទីក្រុង សាលារៀន ឬកន្លែងការងារ គ្រួសាររបស់ក្មួយៗ ។ សូមកុំភ្លេចថា ក្មួយៗមានសក្ដានុពលដើម្បីធ្វើជាពួកទេវតានៃសិរីរុងរឿងដល់អស់អ្នកដែលនៅជិតក្មួយៗ ។

ក្មួយៗតំណាងឲ្យសាសនាចក្ររបស់ព្រះយេស៊ូវគ្រីស្ទ ហើយក្មួយៗគឺជាថ្នាក់ដឹកនាំដ៏មានអានុភាពនៅក្នុងការប្រកាសសារលិខិតនៃដំណឹងល្អតាមរយៈជីវិតដ៏ប្រពៃ និងទីបន្ទាល់ដ៏ក្លៀវក្លារបស់ក្មួយៗ ។

អ្នកដឹកនាំគឺជាបុគ្គលម្នាក់ដែលជួយមនុស្សដទៃឲ្យមើលឃើញ ទទួលអារម្មណ៍ ហើយរកឃើញផ្លូវត្រូវ ។ មិត្តវ័យក្មេងជាទីស្រឡាញ់របស់ខ្ញុំអើយ សូមជួយគ្នាទៅវិញទៅមកដើម្បីស្វែងរកផ្លូវត្រូវ និងដើម្បីចាក់គ្រឹះឲ្យបានជ្រៅនៅក្នុងសាសនាចក្រ និងនៅក្នុងដំណឹងល្អ ។

រាល់ពាក្យសម្ដី ឬទង្វើដ៏សាមញ្ញ ហើយច្បាស់នៃសេចក្ដីល្អ សេចក្ដីថ្លែថ្នូរ សេចក្ដីសប្បុរស សន្ដានចិត្តល្អ ការបម្រើ សេចក្ដីស្រឡាញ់ និងសេចក្ដីអាណិតអាសូរអាចក្លាយជាទង្វើនៃភាពជាអ្នកដឹកនាំរបស់ក្មួយៗនៅក្នុងនគរនៃព្រះ ។ សូមកុំមើលស្រាលចំពោះឥទ្ធិពល និងអានុភាពរបស់ក្មួយៗសម្រាប់សេចក្ដីល្អឡើយ ។

ខ្ញុំសូមបន្ថែមនៅទីនេះពីរបីពាក្យទៀតទៅកាន់បងប្អូនស្រីជាទីស្រឡាញ់របស់យើង ។ នៅគ្រាដ៏លំបាកទាំងនេះ បងប្អូនត្រូវបានអំពាវនាវឲ្យប្រើនូវទេពកោសល្យ និងភាពក្លាហានរបស់បងប្អូនក្នុងការប្រយុទ្ធរវាងល្អ និងអាក្រក់ ។

ក្នុងឆ្នាំ១៩៧៩ ប្រធាន ស្ពែនស៊ើរ ដបុលយូ ឃឹមបឹល បានព្យាករថា « ការរីកចម្រើនចម្បងបំផុតដែលកំពុងតែកើតមានក្នុងសាសនាចក្រនៅថ្ងៃចុងក្រោយនឹងកើតមានឡើងដោយសារតែស្ត្រីល្អៗជាច្រើនក្នុងពិភពលោកនេះ… នឹងនាំមកក្នុងសាសនាចក្រ… ។ ការណ៍នេះនឹងកើតឡើងដល់កម្រិតដែលពួកស្ត្រីនៃសាសនាចក្រជាអ្នកឆ្លុះបញ្ចាំងពីសេចក្ដីសុចរិត … នៅក្នុងជីវិតរបស់ពួកគេ ហើយ … ត្រូវបានគេឃើញថា ដោយឡែកពីគេ និងខុសពីគេ—ក្នុងរបៀបដែលសប្បាយ—ខុសពីស្ដ្រីនៃពិភពលោកនេះ » ។

ប្រធាន រ័សុល អិម ណិលសុន បានមានប្រសាសន៏បន្ថែមនៅឆ្នាំ២០១៥ ថា « [បងប្អូនស្រីៗ យើង] ត្រូវការកម្លាំងរបស់បងប្អូន ការប្រែចិត្តជឿរបស់បងប្អូន ជំនឿរបស់បងប្អូន លទ្ធភាពដឹកនាំរបស់បងប្អូន ប្រាជ្ញារបស់បងប្អូន និងសំឡេងរបស់បងប្អូន ។ នគរព្រះគឺពុំមាន និងពុំអាចមានពេញលេញដោយគ្មានស្ត្រី ដែលធ្វើសេចក្ដីសញ្ញាពិសិដ្ឋ រួចហើយរក្សាសេចក្ដីសញ្ញានោះឡើយ » ។

បងប្អូនប្រុសស្រីជាទីស្រឡាញ់របស់ខ្ញុំអើយ សាសនាចក្រ និងព្រះអម្ចាស់ប្រទានដល់បងប្អូននូវធនធានដ៏មានឥទ្ធិពលជាច្រើន ដើម្បីសម្រេចគោលបំណងទាំងនេះរបស់បងប្អូននៅក្នុងជីវិត ។

សូមអានព្រះគម្ពីរ ឱបក្រសោប ចូរមកតាមខ្ញុំ និងកម្មវិធីថ្នាក់វិទ្យាស្ថាននានា សូមទូលទៅកាន់ព្រះវរបិតាសួគ៌ក្នុងការអធិស្ឋានរបស់បងប្អូនប្រកបដោយចេតនា ចូលរួមក្នុងព្រះវិហារ និងអនុវត្តសេចក្តីពិតនៃដំណឹងល្អ និងការបង្រៀនទាំងឡាយនៅក្នុងជីវិតប្រចាំថ្ងៃរបស់បងប្អូន ។ សូមចុះ ហើយរក្សាសេចក្ដីសញ្ញាទាំងឡាយ ។ អនុវត្តការប្រែចិត្តដើម្បីទទួលបានការអភ័យទោស ។ ទុកចិត្តលើព្រះវរបិតាសួគ៌ ។ ទុកចិត្តលើព្រះយេស៊ូវគ្រីស្ទ ។ ទ្រង់ទាំងទ្វេនឹងដឹកនាំបងប្អូន ។ ទ្រង់ទាំងទ្វេស្រឡាញ់បងប្អូន ។ ហើយទ្រង់ទាំងទ្វេគង់នៅទីនោះ ។

មិត្តវ័យក្មេងជាទីស្រឡាញ់របស់ខ្ញុំអើយ សូមដឹងថា ខ្ញុំស្រឡាញ់ ហើយមានអំណរគុណចំពោះក្មួយៗគ្រប់គ្នា ។ ការអធិស្ឋាន និងពរជ័យរបស់ខ្ញុំគឺនៅជាមួយនឹងក្មួយៗ ។ ក្មួយៗគឺជាផ្នែកដ៏សំខាន់នៃកិច្ចការដ៏អស្ចារ្យ និងដ៏ពិសិដ្ឋរបស់ព្រះនៅពេលនេះនៅក្នុងប្រវត្តិសាស្ត្រពិភពលោកនេះ ។ ខ្ញុំសូមថ្លែងទីបន្ទាល់អំពីការណ៍នេះនៅក្នុងព្រះនាមនៃព្រះយេស៊ូវគ្រីស្ទ អាម៉ែន ។