Trastem God

Ol dia brata mo sista blong mi, ol dia yang fren blong mi, mi luk yufala wetem hat blong mi long evri ples raon long wol. Yufala i luk gud tumas. Yufala i naes tumas. Mi wantem blong mi save givim bigfala hag long wanwan long yufala.

Hem i gud tumas blong stap wetem yufala tedei. Mi laekem tu blong stap long ples ia wetem fevret Aposol blong mi. Mi save se yumi no mas gat ol fevret, be long situesen blong mi, hem i Oraet. Mi maredem hemia.

I no longtaem i pas, mitufala i selebretem 62 mared aniveseri blong mitufala. !Mo mitufala i stap lavlavem mitufala yet!

!Tokbaot ol frut blong gospel! Taem mitufala i kasem ol mesej blong kongratulesen mo lav we i kam long ol apupikinini mo apu apupikinini blong mitufala, mitufala i filim hamas ol blesing blong membasip mo gospel blong Jisas Kraes i naes tumas.

Long yufala we i singgel, divos o stap laef long ol situesen blong famli we i gat ol jalenj, mi testifae long yu se God i save mo i lavem yu, mo taem yu stap tru long ol kavenan blong yu, glad blong famli laef bae i no kam sot o bae yu filim i stap oltaem. Mi no save stret se hemia bae i olsem wanem, be mi save se gladhat, sore mo lav blong Lod, i inaf blong yumi evriwan. Bae Hem i mekem i hapen folem wei mo taem blong Hem.

Taem mi luk yufala mo filim naesfala laet blong gud fasin mo paoa blong yufala, oli rimaenem mi long wan spesel taem we Dieter mo mi i groap long wan semmak branj long Frankfurt, Germany

Mi save se hem i stap laeklaekem mi, be mi no bin intres tumas. Hem i wan gud man be hem i stap olsem wan long ol fren blong mi nomo long Jos. Mitufala i lanem blong danis tugeta long ol Jos aktiviti blong mifala. Hemia i bin taem blong kwik mo slo danis, bugi‑wugi, mo rokenrol (rock and roll).

Afta we hem i joenem Ea Fos blong kam wan paelot blong plen blong faet, mi nomo luk hem blong kolosap tu yia. Blong talem stret, taem hem i kambak long Frankfurt, fas filing blong mi i no bin gud tumas. Hem i luk olsem ol man we tras blong olgeta i ova tumas insaed long muvi blong Top Gun

Be taem hem i toktok long mi, mi gat wan gudfala filing; hem i bin gro long saed blong tingting blong tu yia taem ia. Hem i save wanem blong mekem wetem laef blong hem, mo hem i stap strong long gospel. Hem i gat strong tingting mo hem i save krietem ol wei long ol efot blong hem taem mitufala i stap fren. Sam manis i pas, mitufala i mared.

Ol dia yang fren blong mi, mi neva rigret blong lukluk gud hem bakegen nambatu taem, iven afta long wan fas filing we mi no bin sua long hem.

Dieter hem i lav blong laef blong mi mo wan gudfala papa mo bubuman long ol pikinini mo ol apupikinini blong mitufala.

Be mi stap go aot smol long wanem we mi wantem blong serem wetem yufala.

Taem mi bin gat 12 yia, papa blong mi i ded from sik ia kansa. Afta long ded blong hem, hom blong mifala i kam wan ples blong harem nogud, safaring mo i no gat hop.

I luk olsem se i no gat wan samting, o i nogat wan, we i save givim kamfot long mama blong mi o mifala ol pikinini. !Yes, be i no hemia nomo! Papa blong yumi long Heven, tru long bigfala lav blong Hem, i no bin fogetem mifala.

Eit manis i pas, afta we papa blong mi i bin ded, tu misinari blong Amerika i bin noknok long doa blong mifala long Frankfurt, Jemani. Tufala misinari ia, we Spirit i bin lidim tufala, i bin livim naesfala Buk blong Momon wetem mama blong mi. O hamas mi lavem Buk blong Momon.

Tufala yang misinari ia i tekem ol ansa blong God i kam long mitufala. Mesej blong plan ia blong sevem man, plan blong hapines, i bin naes tumas mo i gat paoa. Oli tekem hop mo laet i kambak long hom blong mifala. Taem mifala i hang strong long gospel we i bin kambak, ol hat we i soa, hop we i bin lus mo harem nogud, oli kam oraet bakegen.

Wetem mesej blong gospel blong Jisas Kraes we i bin kambak, i nomo bin gat tudak long hom blong mifala, from se laet mo tudak i no save stap tugeta long semmak spes long semmak taem.

Tufala misinari ia tufala i bin tu naes yang adalt. Long mifala, tufala i bin tu enjel blong glori we God i bin sendem long mifala.

!Ol dia yang fren blong mi, oli bin mekem yu long semmak tabu materiol ia! Yufala i olgeta we oli bin jusumaot blong ol dei blong yumi, we tru long toktok mo aksen, yufala i laef folem mesej blong gospel long weaples yufala i stap long hem. From stamba tingting ia, oli putum yu long siti blong yu, skul o wokples mo famli blong yu. Yu no fogetem se, yu gat paoa ia blong stap ol enjel blong glori long olgeta we oli stap long saed long yu.

Yu ripresentem Jos Ia blong Jisas Kraes, mo yufala ol lida we i gat paoa blong stap talemaot mesej blong gospel tru long gud laef mo strong testemoni blong yufala.

Wan lida i wan we i stap helpem ol narawan blong luk, filim mo faenem stret rod. Ol dia yang fren blong mi, helpem wanwan long yufala blong faenem stret rod mo blong stanap strong insaed long Jos mo long gospel.

Evri simpol mo klia toktok o aksen blong gudfala fasin, fasin blong stap tru, jareti,, kaen fasin, seves, fasin blong soem lav mo sore, oli save kam aksen blong lidasip blong yu insaed long kingdom blong God. No tingdaon long save mo paoa we yu gat blong mekem gud samting.

Letem mi ademap long ples ia, sam toktok blong ol naesfala sista blong yumi. Long ol hadtaem ia, oli singaotem yufala blong yusum ol talen mo strong paoa long tingting blong yufala blong faet bitwin gud mo ivel.

Long 1979, Presiden Spencer W. Kimball i talem profesi: “Plante long ol bigfala samting we i stap kam long Jos long ol las dei, bae oli kam from plante long ol gudfala woman blong wol ia … we bae oli kam joenem Jos long bigfala namba. … Hemia bae i hapen folem mak blong digri we ol woman blong Jos ia oli soemaot long stret mo gud fasin … long laef blong olgeta; mo … oli luk olgeta se oli spesel mo ol defren … long ol wei we i glad— aot long ol woman we oli folem fasin blong wol.”

Presiden Russell M. Nelson i ademap long 2015, “[Ol sista, mifala] i nidim paoa, jenis blong hat, strong tingting, mo paoa blong save lidim, waes tingting mo voes blong yufala. Kingdom blong God i no mo no save fulwan sapos i nogat woman we i mekem ol tabu kavenan mo kipim olgeta.”

Ol dia brata mo sista blong mi, Jos mo Lod i givim ol risos we oli gat paoa long yu blong yu mekem i hapen ol stamba tingting blong laef blong yu.

Ridim ol skripja, mekem Kam Folem Mi mo program blong institiut, wantem blong stap toktok wetem Papa long Heven oltaem tru long ol prea, go long jos, mo folem ol trutok blong gospel mo ol tijing insaed long evri dei laef blong yu. Mekem mo kipim ol kavenan. Yusum fasin blong sakem sin blong kasem fogivnes. Trastem Papa long Heven. Trastem Jisas Kraes. Bambae Tufala i lidim yu. Tufala i lavem yu. Mo Tufala i stap.

Ol dia yang fren blong mi, plis save abaot lav ia mo fasin blong talem tangkyu blong mi long wanwan long yufala. Ol prea mo ol blesing blong mi oli stap wetem yufala. Yufala i ol spesel pat blong naesfala mo tabu wok blong God long taem ia naoia long histri blong wol. Wetem hemia, mi testifae long nem blong Jisas Kraes, amen.