Mauaina o le Mana o le Atua

Tuafafine pele, ua tatou potopoto i maotatapua’i i le salafa o le lalolagi e faamanatuina le Aualofa. Ua faamanuiaina i tatou e faalogologo atu i lo tatou Au Peresitene Aoao maoae o le Aualofa. Latou te musuia pea a’u. Latou te faaaogaina se faatosinaga faaKeriso e faaosofia ai a’u e fai ia sili atu, ma ia ou lelei atili. Sa latou saunoa mai mai le Faleoloa Piliki Mumu i Navu, Ilinoi, i le Iunaite Setete, le nofoaga o le faalapotopotoga o le Aualofa. E faaopoopo atu la’u molimau i a latou molimau, tuafafine. E alofa le Atua ia te oe. E silafia oe e le Atua. Ma e taua oe ia te Ia.

O le talafaasolopito o le Aualofa e musuia. E pei ona saunoa mai Ema Samita, le uluai Peresitene Aoao o le Aualofa, “O le a tatou faia se mea maoae.” E pei ona sa faatoa aoao mai e Peresitene Johnson, Sister Dennis, ma Sister Yee i tatou, sa le’i faamoemoeina lenei faalapotopotoga e avea na o se kalapu faaagafesootai po o se vaega o galuega alofa. O lona faamoemoega sa paia ma o loo paia foi lava. E fesoasoani ai i fanau a le Atua e toefoi atu i Lona afioaga.

A maea la’u tautalaga, o le a mafai ona outou fefaasoaai a outou molimau i faamanuiaga ua afua mai ia Iesu Keriso, Lana Ekalesia, ma lenei faalapotopotoga paia a tamaitai. Ou te iloa o loo silafia e Iesu Keriso o outou tulaga ma finagalo e faamanuia outou. E manaomia foi e Ia lau tosinaga i Lana Ekalesia. O a outou taumafaiga e auauna atu i fanau a le Atua e ala i le Aualofa e taua tele.

Na aoao mai e Iosefa Samita e faapea o le galuega i aso e gata ai o le faaolataga ma le faaeaga o se galuega “ua faamoemoe e aumaia ai le faaumatiaina o mana o le pogisa … ma le faaolataga o le auaiga o tagata soifua.” E taua le aualofa ma outou i lenei galuega. E pei ona sa aoao mai e Peresitene Russell M. Nelson, “E le o mafai ona atoa le malo o le Atua ma e le mafai lava ona atoa e aunoa ma tamaitai o e osia feagaiga paia ona tausia lea, o tamaitai o e e mafai ona tautatala atu ma le mana ma le pule a le Atua.”

O tamaitai tausi-feagaiga e le gata ina latou iloa le manaomia o le mana o le Atua i o latou olaga, ae ua i ai foi se avanoa faapitoa e maua ai lena mana e ala i feagaiga latou te osia. Se faamanuiaga ina a ofoofogia o le “mafai lea ona maua le mana faaleatua—mana lea ua lava e taulimaina ai avega, faafitauli, ma faaosoosoga o o tatou aso.” Ioe, o feagaiga o le papatisoga ma le malumalu e le o ni punavai o le mana, i totonu ma na o i latou lava. O le Alii o Iesu Keriso ma lo tatou Tama Faalelagi o le punavai o mana uma faalefeagaiga.

Ae aua ne’i faaseseina. O le mana o le Atua e le o se malosiaga lētinoa i le vateatea e aunoa ma Ia. O le mana Na Te ofoina mai e le pei o se lamepa faamaneta e faatinoina ni mana’o, po o se meafaitino faapea ua pa’ia e avea ai o se faapogai o le mana. E oo lava i le ofusa o le perisitua paia e le mamana na o le ofu lava ia. Leai, o le mana o le Atua ua fesootai tatau lava ma Ia ma Ona faamoemoega.

E pei o taimi uma lava, ua saunia e Iesu Keriso le faataitaiga laualuga mo i tatou. O mana uma “i le lagi ma le lalolagi” na tuuina atu e le Atua ia Iesu Keriso aua na faatagaina e Iesu Keriso Lona loto ia “tofatumoanaina i le finagalo o le Tamā.” I le muai olaga, na fetalai atu ai le Faaola, “Tama, ia faia lou finagalo.” Na Ia toe fetalaia foi lenei mea i Ketesemane ma i luga o le satauro. I le mavae ai o Lona toetu, sa Ia toe faia foi i tagata o le Tusi a Mamona ma i le amataga foi o lenei tisipenisione. Sa Ia maua le mana mai le Atua aua sa muaifaauuina o Ia ia mauaina, ma sa mafai ona faatuatuaina o Ia e faaaoga lena mana e pei ona faia ai e le Tama Faalelagi lava ia.

Mafaufau i le perofeta o Nifae i le Tusi a Mamona, le atalii o Helamana. Ina ua faamatuu atu le mana o faamauga ia Nifae, sa ta’u atu e Iesu Keriso ia te ia, “O le a ou faamanuiaina oe e faavavau; … Ia faia mea uma … e tusa ai ma lau upu.” O le mafuaaga na faatuatuaina ai Nifae e Keriso i lenei mana e aofia ai mea uma ona sa tofia Nifae e avea ma perofeta, ma ona sa ia faia e le aunoa ma le le fefe le finagalo o le Atua. Sa ia sailia le finagalo o le Atua, ae le o lana lava. Na te le’i faia ma o le a le “ole atu lava i se mea e le tusa ai ma le finagalo o le [Atua].” Sa mafai ona ia maua le mana o le Faaola ona sa mafai ona faatuatuaina o ia e faaaoga le mana e faapei ona faia e Iesu Keriso lava Ia.

Tusa foi pe tatou te taumafai malosi e faateleina le mana o le Atua i o tatou olaga, e tumau lava o Lona mana. O le mana faalefeagaiga lea tatou te maua, e le nofomau i totonu o i tatou. O le ala foi lea o le mauaina “o soo se faamanuiaga mai le Atua e ala i le usiusitai i lena tulafono e autu i ai,” e faapena foi, o le mauaina o le mana o le Atua e faalagolago “i mataupu faavae o le amiotonu.” E le mafai ona faaaoga le mana o le Atua mo faamoemoega manatu faapito pe faaaoga ai se pule i soo se tasi. O le taumafai e faaaoga Lona mana “i soo se tikeri o le amioletonu” e mafua ai ona “aveesea” Lona mana, ma ua lapata’ia i tatou “o le a liua e avea ma o tatou ta’usalaga.” O i latou e le tuuina lo latou faatuatuaga i le Atua, o e tautevateva i lo latou avea ai ma so’o, po o e foi e faama’a’a o latou loto, pe solipala i o latou vae Le Paia o Isaraelu, e le mafai ona latou mauaina Lona mana. Ina ia atina’e la le mana o le Atua i o tatou olaga, e tatau ona tatou taumafai ia amiotonu, taumafai e fai le mea tonu, ma taumafai e faatino e tusa ai ma Lona finagalo.

O le osia ma le tausiga o feagaiga e tele ma le Atua, e faalatalata atili ai oe ia te Ia, suia ai oe, ma tele ai ina faigofie ona e maua Lona mana. O tamaitai tausi-feagaiga “ua faataapeapeina i luga o le lalolagi atoa” ma “ua faaauupegaina i latou i le amiotonu ma le mana o le Atua i le mamalu tele.” Po o fea lava le mea o e i ai, o le mana lenei e mo oe. E fesoasoani e te maua mai ai se fiafiaga, filemu, ma le malologa sili atu. E fesoasoani e te maua ai se malamalama sili atu, avea o se soo malosi atu o le amiotonu, ma avea ai o se suli moni i le malo o le Atua. E te mauaina le mana e tetee atu ai i faaosoosoga ma salamo ai pe a e tautevateva. E te mauaina foi le mana e faamalosia lelei ai oe e tatalia tofotofoga ma lototiga.

Ou te fia faasoa atu se faataitaiga patino i le ala na taitaiina ai e feagaiga o le malumalu i se filemu faateleina ma le faamautinoaga mo lo’u toalua, o Ruth, ma a’u. I nai tausaga ina uma ona ma faaipoipo, sa matua’i ma’i tigaina Ruth i se kanesa o le faa’autagata [tulou]. Sa manaomia ai ni taotoga se lua ma se kimo. O la ma tama e toatasi, e 16 masina o Ashley, sa le’i tuueseesea lava ma lona tina ma sa matua’i lē tautagata lava ma faali’i ma itaitagofie. Sa le fiaai i meaai sa ou saunia, o lea sa fai ai se ma “maliega” ma i’u ai ina ou fafagaina o ia i aisakulimi ma fagusuamalie.

Sa na o le 28 o’u tausaga, ma sa ou le iloa pe faapefea ona ma ola ma Ashley e aunoa ma Ruth. Sa muta moemitiga mo se aiga toatele, ae o se tasi lena o o ma popolega itiiti. I le uluai taofiga o Ruth i le falema’i, sa ou matuai lofituina faalelagona ma faigata ai ona ou tatalo. Sa foliga mai sa le’i au a’u tatalo i le lagi.

O le po na te’a mai ai Ruth mai lona taotoga muamua, sa ma sauni ai e tatalo, pei ona masani ai, a o le’i momoe. I lo’u palaai, sa ou fai atu ai ia Ruth e tatalo. O le a le galo ia te a’u upu muamua o lana tatalo. Fai mai a ia, “Le Tama Faalelagi e, matou te faafetai i Lau Afio mo le mana o le perisitua lea ua mafai ai e tusa lava po o le a le mea e tupu, e mafai ona matou faatasi e faavavau.”

O ana upu, na tatala lautele ai le papupuni na ou vaaia i le va o a’u ma le Atua. A o o’o a’e i le lagi le tatalo a Ruth, sa alu ifo le aoaoga faavae autu o aiga e faavavau mai lo’u ulu i lo’u loto. Na faaitiitia o ma atugaluga mo lo ma lumanai ona sa ma osia feagaiga i le malumalu ma faamauina i le maota o le Alii. Na aumaia e le mana mai le Atua le filemu i o ma’ua loto. Tolusefulu-ono tausaga mulimuli ane, na faasoa mai ai e Peresitene Nelson upu o loo olaola pea ia te au. Na ia aoao mai, “Pe a e aapa atu i luga mo le mana o le Alii i lou olaga i le malosi atoa e tutusa ma se tagata o loo malemo ma tau’ā’ā pea mo le ea, o le a avea le mana mai ia Iesu Keriso ma ou mana.” O le ala lena na tatalo ai Ruth. Ma sa oo mai lena mana.

I se ala foi faapena, o le a fesoasoani le Atua ia e malamalama i le mana ma le filemu o faaeega paia o le malumalu.

O le a fesoasoani le faaee mai o le mana e faamalolo ai oe pe a faapea na faamanu’alia oe, fetotoa’i, pe nutipalaina i soo se itu. E mafai ona e valaau atu i mana o le lagi ia maua ai se faaaliga patino ma malamalama ai i le mataupu autu a Keriso. O le a fesoasoani le mana o le Atua ia te oe e puipuia ai, punipuni, ma faamalolosia ai isi. Faatasi ai ma Peresitene Nelson, ou te molimau atu “e mafai e [Iesu Keriso] ona aumaia le mana [tou] te moomia mo o [outou] olaga ma pe a [outou] aumaia Lona mana i o [outou] olaga, o le a [outou] taufai olioli ma [le Faaola].”

Ioe, tuafafine, o loo outou faia se mea maoae, ma e mafai ona outou oo i se mea maoa’e. Faafetai i lo outou faatuatua, mo lo outou malosi, mo lo outou gafatia e taitai, mo lo outou poto, mo lo outou naunautaiga ma le tomai e osia ma tausia feagaiga ma le Atua. Ua outou aumaia faamanuiaga ia te outou lava, o outou aiga, le Ekalesia, o outou alalafaga, ma le lalolagi. Ua i ai le mana o le Atua i o outou olaga e fesoasoani ai ia outou lelei ma faia mea lelei. O loo faamoemoe mai o Ia ia te oe. O loo faamoemoe mai Lana Ekalesia ia te oe. Ia faamanuia outou e le Atua i le avea ai pea o outou ma soo.

O loo soifua le Atua. O Iesu o le Keriso, o lou Faaola ma lo’u Faaola. O Ia o lau uo agalelei, poto, ma faalelagi. Ua [Ia] toefuataiina mai Lana Ekalesia i le lalolagi. Ua ou iloa nei mea. I le suafa o Iesu Keriso, amene.