Aualofa: O Se Nuu o le Feagaiga

Peresitene Camille N. Johnson

O’u uso pele, ua faalotomaualaloina lava i matou ma fiafia e faafeiloai atu outou i le fogafalealuga o le Faleoloa Piliki Mumu iloga i Navu, Ilinoi. O se avanoa paia lenei, lea na faatulaga ai i le 1842, e le Perofeta o Iosefa Samita le Aualofa e mulimulita’i i le mamanu o le perisitua ma le faamae’aina o le toefuataiga o mea uma o se vaega o le Toefuataiga faifaipea o le talalelei a Iesu Keriso.

O iinei i Navu sa saunia ai uso o le Aualofa mo faamanuiaga o le maota o le Alii. Sa latou sauniaina uso i le faaletino, ma sa latou lagolago atu i le fauina o le malumalu e ala i le taulimaina o faatoaga ma le su’iina o ofutino ma le faia o soo se mea e mafai ona latou faia e fesoasoani ai i le tapenaga mo faamanuiaga o le maota o le Alii. Ae sa latou sauniaina foi i le faaleagaga, ma o iinei ma i pupu laau faataamilo i Navu sa latou maua ai le avanoa e faalogo tuusa’o ai mai lo tatou Perofeta o Iosefa Samita. O iinei na ia faatonuina ai i latou i tapenaga mo faamanuiaga o le a oo mai ao latou auai i le faatinoga o sauniga o le maota o le Alii.

Matou te iloa ma faailoa atu la matou molimau e faapea, o le malosiaga ma le mana na ausia mai le osia o feagaiga ma le tausiga o feagaiga na faamanuiaina ai olaga o na uso ma tuagane ma le Au Paia uma na agai i luma i le vao i le mavae ai o lo latou aafiaga i Navu. Ua matou matuai fiafia lava i lenei avanoa e faasoa atu lenei avanoa paia ma outou. Po o fea lava e te nofo ai i le lalolagi, ou te faamoemoe ua e iloa o lou gafa e amata iinei i Navu. I le avea ai ma sui o le Aualofa, sa totoina o tatou a’a iinei. Ma i le taimi nei, i le agai i luma, a o tupu a’e le laau ma talaulau ma oo atu lala i le lalolagi atoa, ou te faamoemoe e te lagona lou fesootai i lenei avanoa paia lea na faapafala ai e tamaitai atugaluga o le lalolagi ae taulai atoa atu i lo tatou Faaola, o Iesu Keriso, ma le osia o feagaiga ma Ia.

O le ā sou lagona i le i ai iinei?

Sister J. Anette Dennis

O se aafiaga matagofie le i ai i lenei avanoa na uluai faatulaga ai na tamaitai e to’a 20 ona mafaufau ai lea ia te outou uma i le lalolagi atoa. I le avea ai ma tuafafine o le Aualofa, ua outou maua uma lena talatuu ona o le mea na amata iinei.

Peresitene Johnson

Sa latou fatuina se nuu o le feagaiga iinei i Navu, a ea?

Sister Kristin M. Yee

Sa latou fetausia’i.

Peresitene Johnson

Na latou faia. Ma ua tatou fatuina se nuu o le feagaiga i le salafa o le lalolagi i le taimi nei o ni uso e auai i sauniga o le perisitua ma osia ma tausi feagaiga. Ua tatou fatuina se faalapotopotoga tele i le lalolagi e faamanuia ai olaga o o tatou uso ma tuagane.

Sister Yee

Lea e amana’ia ai e le tasi le isi, lea latou te fetausia’i ai. A o o’u faitau i tala iinei i Navu, o le mea lena na sili ona faagaeetia ai a’u, o le i ai pea o se tasi e aumaia se mea i se tasi e manaomia po o le alofa i se tasi. Ma o se vaega masani lea o mea sa latou faia. Ma o le mea masani lava tatou te faia o ni uso o le Aualofa. Ua saunia e le Alii se faalapotopotoga e mafai ai e tamaitai ona galulue i na faalogona masani na latou maua, o le agaalofa ma se nofoaga e faia ai lenei mea ia mafai ai ona latou lagona Lana fesoasoani ma ofo atu Lana fesoasoani ma le loto i ai.

Ma o le taeao lenei a o ou manatunatu ma mafaufau e uiga ia Uso Ema ma lana misiona ma le avea ai ma soa i le Perofeta, na oo mai le manatu ia te au, “Sa latou tatalo i tatalo lava ia na tatou faia.” Sa latou tatalo mo a latou fanau. Sa latou tatalo mo a latou tane ma a latou avā. Sa tatalo le tasi mo le isi. O manaoga uma e tasi o ia i tatou, sa ia i latou foi. E tele atu mea tatou te tutusa ai nai lo le eseese. Sa latou faalagolago i le Alii. Ma sa tele naua foi le faaletonu i lena taimi, e sa’o? Sa i ai le maliu ma sa i ai foi le faaogea i mea moomia. Ae na latou faalagolago lava ia te Ia. Ua i ai foi le faaogea ia i tatou lea tatou te manaomia ai le Atua, tatou te moomia ai a tatou feagaiga, tatou te moomia ai ona faalagolago ia te Ia. E tele taimi e tatau ona tatou faamamulu ai ae faalagolago ia te Ia—o le a Ia taiala i tatou i na avanoa—ina ia mafai ona tatou faatuatuaina o Ia mo o tatou aiga, ina ia mafai ona tatou faatuatuaina o Ia e sili ona moni nei feagaiga ma nei folafolaga nai soo se mea tatou te vaaia ma sili atu ona moni nai soo se mea e mafai ona tatou lagonaina.

Peresitene Johnson

I le Mataupu Faavae ma Feagaiga vaega e 25, ua fai mai le faaaliga na tuuina atu ia Ema Samita, “Pipiimau i [au] feagaiga.” Ou te manatu o le mea tonu lena o loo e faamatalaina. O se isi faaupuga o le “Talitonu mai ia te au. Talitonu i folafolaga na ou faia ia te oe aua e mautinoa a’u folafolaga.” Ma o na lava foi folafolaga tatou te faia i le maota o le Alii, ma i le papatisoga, o se folafolaga ua toe foi mai ia i tatou o le a faatasi pea o Ia ma i tatou—o le a i ai Lona Agaga faatasi ma i tatou, o le a i ai agelu e siosiomia i tatou ma auauna mai ia i tatou ma taulima o tatou manaoga. Ou te iloa o loo moni pea na mea. Ma o folafolaga na Ia faia, na Ia faia i na Au Paia pele iinei i Navu, ua Ia faia foi na lava folafolaga ia i tatou pe a tatou auai i sauniga o le talalelei a Iesu Keriso o loo mafai ona tatou maua e ala i ki o le perisitua.

Sister Dennis

Ou te manatu ia Ema—e toafia ana fanau na maliliu, lona siitia mai lea nofoaga i lea nofoaga, lo latou matitiva. Ae sa i ai a latou feagaiga, e amata i le papatisoga. Sa latou maua lena sootaga o le feagaiga ma le Atua lea na lagolagoina ai i latou. Na lagolagoina ai Ema i na mea uma. Ou te le manatu na mafai ona ia faia mea na ia faia e aunoa ma lena sootaga faalefeagaiga ma le Atua na ia iloa o ia te ia ma na folafolaga na i ai.

Sister Yee

E moni lena mea—e oo mai lena mautu ia Iesu Keriso, le mea lea o loo e faamatalaina, e sa’o? O le a minoi isi mea uma ma suiga i o tatou olaga. O le a ō mai tagata, ma ō. Ae o lena sootaga ma Ia o iina e i ai moni lo tatou mausali, e sa’o?

Peresitene Johnson

Ou te lagona e pei o le mea lena na tuleia ai i latou i luma—o le fau o lena malumalu, ma saunia mo na feagaiga faaopoopo. Ma o le mea lena na latou maua ai le malosiaga e agai ai i luma i le lemailoa i se taimi atonu na matuai lagona ai le faaletonu. O lo latou mautinoa o le feagaiga e fai si—e le o se mea e tatau ona tulagaese aua e tatau ona tofusia ai i tatou—ae o se faataitaiga matagofie tele mo i tatou uma, le tuu o lo tatou mautinoa o le feagaiga i le Alii ma i le sui tofia o le Alii, se perofeta i le lalolagi i le taimi nei.

Sister Dennis

Ou te fiafia i le tala i le taimi na i ai Polika Iaga i le malumalu, sa ia i ai iina e faatautaia sauniga. E anoanoa’i tagata na i ai iina, ma sa i ai o ia iina seia oo ina leva le po ina ia mafai e tagata ona maua o latou faaeega paia. Ma sa ia fai mai “Lelei, ua mae’a.” Sa oo ina matua’i lamatia ona o tagata leaga o siomia i latou. Ua oo i le taimi, na ia fai mai ai, e tapena mea mo lo tatou kolosia o le Misisipi. Ae o le taeao na sosoo ai ina ua ala a’e o ia, sa faatumulia laufanua o le malumalu ma le malumalu lava ia i tagata sa le fia o ese seia oo ina latou mauaina o latou faaeega paia. Sa latou iloaina o le a latou manaomia na faamanuiaga ma atonu e tele naua tausaga ae latou te lei maua se isi malumalu. O a tatou feagaiga e fesoasoani tatou te fesootai atili ai i lo tatou Tama o i le Lagi ma Iesu Keriso ma tatou maua ai le malosi tatou te moomia e agai ai i luma, e pei lava ona faia e na Au Paia anamua, pe o fea lava tatou te i ai i le lalolagi.

Peresitene Johnson

Sa i ai nisi o o’u tuaa ma i latou na i na aso faaiu iinei i Navu sa maua faamanuiaga ma le avanoa e maua ai faaeega paia. Ma ou te tu i luga o o latou tauau a o tatou tutu uma i luga o tauau o nei uso pele, ia na agai i luma ma le faatuatua ma le mautinoa o feagaiga.

Sister Dennis

Faamatala mai ou tuaa.

Peresitene Johnson

Ia, o Fanny Dapp Parish ma lana tama teine o Jane, ma lo’u tamamatua lona fa, o Samuel Parish, sa fai uma o latou faaeega paia iinei ia Fepuari o le 1846—o se vaega o lena vaega o le lima afe na e talanoaina. Ou te fiafia i upu na faaaoga e Jane e faamatala ai lena taimi. Fai mai a ia, “Ua ia i tatou le talalelei a Iesu Keriso, ua ia i tatou le Ekalesia, ma ua i ai se tatou malumalu.” Sa ia fai mai foi, “Oka se olioli na faatumulia ai o tatou agaga ona ua i ai le tatou malumalu.”

Na ona ou tomanatu i lena mea ma mafaufau o se taimi lea o le le mautonu mo i latou. Sa latou saunia e tuua lenei nuu matagofie sa latou faavaeina ma o i le vao. Ae sa o se taimi o le olioli tele. O le a se isi mea e mafai ona faamatala ai le olioli ma le filemu sa ia lagonaina?

Sister Yee

E ui i luitau uma sa latou i ai, sa ia i latou le filemu ma le olioli.

Peresitene Johnson

Sa latou olioli. Ona o a latou feagaiga na osia. Sa i ai foi tuaa o Kristin iinei i le taimi lava lea. E fai a si o matou mautinoa ona e vavalalata o la tausaga ma sa la uo, pei ona tatou faauo nei.

Sister Yee

Ma afai e lei uo i lena taimi, ua uo nei.

Peresitene Johnson

O la ua uo nei. Sa’o lelei

Sister Yee

O Nancy Saban i le itu o lo’u tina, pe tusa o lona 17 na auai ai i le Ekalesia. Pe o le taimi foi lena na maua ai ona faaeega i le maota o le Alii. O lau Jane sa na o le 20.

Peresitene Johnson ma Sister Yee

Pei a foi sa nonofo felata’i.

Sister Yee

E mautinoa, sa fai se la talanoaga. Ae ese le matagofie i le manatu o loo nonofo mai ii a latou fanau, ma o i ai foi se faauooga o le a tulai mai. Ma ia tatou pipii foi i a tatou feagaiga e pei ona latou faia—ia tutusa lo tatou faatuatua, ma tatou te faalagolago i le Alii ma o tatou loto atoa. O le taua lea o le tausi o feagaiga. Tatou te faaauauina lena mea mai lea tupulaga i lea tupulaga.

Pe o i ai pe leai ni o tatou tupuaga iinei, pe o i ai pe leai ni tuaa i le salafa o le lalolagi, sa tatou amata iinei i a tatou feagaiga ma o loo faaauau ai e faavavau. O filifiliga uma tatou te faia nei e taua. E le na o oe e taua i ai, ae mo i latou o le a mulimuli mai, ma i latou e muamua atu—i lenei itu o le veli, ma le isi itu o le veli—a o tatou tausia a tatou feagaiga. Ou te manatu foi ua toatele uso atonu i la tatou Aualofa i le taimi nei—atonu latou te manatu e laiti tele pe ua matutua tele foi. Pe le’i a’otauina, pe leai foi—e te faatumuina le avanoa. Atonu e te lagona e te le o saunia e faia lenei galuega. Ae matou te mananao e faasoa atu ia te oe ua e saunia, ma e matou te moomia oe i le asō. Ua manaomia oe e le Alii i le asō e avea o se vaega o lenei mea. E i ai au meaalofa ma taleni lea e matua manaomia nei i le lalolagi.

Peresitene Johnson

Ua tatou maua se taitaiga faaperofeta faapea e mafai ma e tatau e i tatou o ni uso ona suia le lalolagi. E moomia ona tatou saunia le lalolagi mo le Afio Mai Faalua o le Faaola, o Iesu Keriso. E faapefea ona tatou faia o lea? Ia, o le a tatou faia lena mea i le fatuina o se nuu o le feagaiga. Ma o nisi taimi o lo’u nuu o le feagaiga o se nuu o le feagaiga e tasi—e lua moni lava, aua o loo i ai sa’u sootaga faalefeagaiga ma Ia.

Sister Yee

E moni lena mea.

Peresitene Johnson

Ae e mafai ona faalautele ma ola lou nuu o le feagaiga. Ou te manatua ai se aafiaga sa ou maua talu ai nei sa matuai matagofie. Sa o se vaega o uso o le Aualofa. Sa matou nonofo uma i se li’o e fesootai tuli. Sa ou i ai i se itu, ma sa ma fono ma le peresitene o le Aualofa a le itu, le peresitene o le Peraimeri a le itu, ma le peresitene o Tamaitai Talavou o le itu sa avea o se tasi o le Ekalesia na papatisoina mo na o le tasi le masina. Sa fai si ona lofituina ma sa faaalia ni atugaluga ia i matou uma i le pe o le a faapefea ona ia ausia lona tofiga fou. O la’u la vaega e sili ona ou fiafia i ai o lena fonotaga o le taimi na liliu atu ai le peresitene o le Aualofa ia te ia ma le loto atoa ma fai atu, “Aua e te popole, o le a matou fesoasoani atu ia te oe.” O le manatu lena. Po o fea lava o tatou i ai, tatou te fatuina lena nuu o le feagaiga e taulai ia Iesu Keriso. Faatasi ai ma na meaalofa tuuloto e aumaia ia i tatou, tatou te fetausia’i ai. O le mea moni lena o le a tupu iina. E le moomia ona ia popole. E mafai ona ia faatuatuaina le Alii. Sa i ai ona uso a Aualofa.

Sister Dennis

Ona o i tatou uma o sui o le Aualofa, e le afaina po o fea tatou te auauna atu ai.

Peresitene Johnson

Sa’o. O le a auauna la o ia mo se taimi i Tamaitai Talavou faatasi ma tamaitai talavou Ae o le a avea pea o ia o se tasi o le Aualofa. Ma sa opoina e na uso o le Aualofa o ia, ma o le a latou vaaia ma tausia o ia.

Sister Yee

Manaia tele. E fesootai uma lava, a ea?

Peresitene Johnson

Sa’o lelei

Sister Yee

Aua a tatou faamanuiaina se tamaitiiti, ua tatou faamanuiaina se aiga. Tatou te faamanuiaina se tina, ua tatou faamanuiaina se aiga. Po o se tamā. E fesootai uma lava faapena, lea e ese le manaia. O loo i ai sa tatou faigapaaga ma Iesu Keriso. O la o la tatou soa silisili e mafai ona fesoasoani i mea uma. O nisi taimi ou te manatu, aemaise o tamaitai, tatou te fia faia mea e i tatou lava. Ma e le o se mea leaga lena mea. O se meaalofa lena ua Ia tuuina mai e taulamua ai ma faia mea. Ae o nisi taimi, ia a’u lava ia, ou te iloa ua Ia tuu au i se tulaga ou te matuai lofituina ai lava ina ia ou matuai faalagolago atu ai ia te Ia. Ma ia mafai ai ona tatou fauina lena sootaga ma Ia, ina ia tatou iloa ai le pogai tatou te faia ai na mea. Tou te le manatu la na iloa e nei uso iinei i Navu le mea na ala ai ona latou faia mea na latou faia? Aua sa latou alolofa i le Alii, ma sa latou mananao e tausi Ana feagaiga ma Ia, e faapena foi i tatou.

Sister Dennis

A o latou fesoasoani ia lagona e isi Lona alofa, sa latou lagonaina foi. Ou te manatu e tatau ona tatou manatua uma, e i ai nisi o i tatou e faigata ona lagonaina le alofa o le Alii, po o le a lava le mafuaaga. Ae a o tatou o atu ma opoina moni o tatou lima i isi ma tuu atu ia latou lagonaina lo tatou alofa, ona amata lea ona latou lagonaina foi le alofa o le Faaola.

Sister Yee

Ua Ia silafia tatou te manaomia ona lagonaina soo Lona alofa, o lea e tuu ai e Ia na lagona agaalofa i totonu o i tatou e auauna atu ai i isi ina ia mafai ai e i tatou ma i latou ona lagonaina le alofaina.

Peresitene Johnson

Ou te manatu e tofu maua uma e o tatou uso se avanoa e avea ai o se vaega o le taumafaiga i le lalolagi atoa mo le soifua manuia o tamaitai ma fanau a o latou auai ai, e faia mea faigofie i o latou lava aiga, i o latou pitonuu ma alalafaga. Ma e tatou te faia lena i le tina e tasi, tamaitai e tasi, le tamaitiiti e tasi i le taimi, e faapei ona faia e le Faaola.

Sister Yee

O se valaaulia manaia tele lena, a ea? E le gata i le faaletino ae o le faaleagaga, e mafai ai ona tatou o mai ia te Ia. Tatou te moomia le faaletino ma le faaleagaga, a ea? E malie le foliga mai faapea e faalētaua tulaga nai lo le tatou sootaga ma lo tatou Tama Faalelagi ma le Faaola—lea faatoa ou manatua.

Ma o nisi taimi ou te manatu e mafai ona tatou nonofo i lalo i se Aualofa ma lagona e pei ua tuua na o i tatou—pe nofo foi i lalo i soo se mea o e i ai—ae iloa o tagata uma o nonofo i ou autafa o la foi e i ai luitau ma o loo mananao foi ia alofaina, ma e alofagia foi ma taua, ma o loo i ai se nofoaga. Ma ou te manatu a tatou fefaasoaai i a tatou Aualofa, ma maua le avanoa e faasoa ai, o loo i ai se avanoa e iloa ai e tele lava ina tatou tutusa nai lo le eseese.

Ae ou te iloa ma e mafai ona ou molimau atu, e le tuulafoaiina lava i tatou—e silafia oe e lo tatou Tama Faalelagi ma le Faaola. La te silafia ou manaoga, ma e popole i La’ua i mea o e atugalu ai ma finagalo e faamanuia oe, ma o loo i ai foi i na uso i ou autafa na lava manaoga ia alofaina ma maua le avanoa e saofagā ai ma lagona le faatauaina. Ou te iloa o loo Ia silafia—o loo i ai o Ia i o tatou autafa i a tatou faaiuga ma o tatou luitau ma o tatou olioliga. O loo i ai o Ia i o tatou autafa. E mafai ona tatou talanoa ma Ia. O se avanoa matagofie ma faamanuiaina le iloa o lena mea, aua sa Ia savalia na o Ia le ala lea o le a tatou le savalia lava.

Sister Dennis

Tou te silafia, o loo ou vaai faalemafaufau i vaega o uso i le lalolagi atoa o loo maimoa mai i le taimi nei. E le o toe mamao ona tatou maua lea o le avanoa e faalogologo ai i se Aposetolo, o Elder Dale G. Renlund o le Korama a le Toasefululua. Ua matua faamanuiaina i tatou i le mafai ona faalogologo atu ia te ia. A mae’a lena, o le a outou maua le avanoa e molimau atu ai le tasi i le isi i mea na e lagonaina i lou loto na molimau atu e le Agaga ia te oe—o le faamanuiaga o le Aualofa, ma feagaiga na outou osia ma le Faaola ma Lona uiga ia te oe i lou olaga. O se lagona faapitoa tele le mafaufau i vaega uma o uso i le lalolagi atoa, ma lagona o i tatou o se usoga o le feagaiga i le lalolagi, tusa lava pe o fea o tatou i ai. Matou te alolofa ia te outou, Uso e!

Peresitene Johnson

Oka se faamanuiaga o le avea ai o ni tamaitai o le feagaiga i Le Ekalesia a Iesu Keriso o le Au Paia o Aso e Gata Ai! Uso e, o se taimi mamalu lenei, ma e tatou te molimau faatasi uma atu o loo tatou punouai i le galuega a lo tatou Faaola, o Iesu Keriso. Ua tatou iloa o loo soifua o Ia. Ua tatou iloa e alofa o Ia ia i tatou. Ua tatou iloa e finagalo o Ia ia i ai sa tatou sootaga o le feagaiga ma Ia. Ua tatou iloa foi e finagalo o Ia e tuuina mai Lana fesoasoani i o tatou uso ma tuagane i le salafa o le lalolagi. A tatou faia—a o avea i tatou ma meafaigaluega e tuuina mai ai Lana fesoasoani i isi—o le a tatou maua foi Lana fesoasoani mo i tatou lava.

O la tatou molimau O Le Ekalesia a Iesu Keriso o le Au Paia o Aso e Gata Ai o loo taitaia e se perofeta soifua. Tatou te alolofa ia te ia. Tatou te faamamalu ma lagolago o ia.

O la tatou molimau o Iosefa Samita—awoi—o le perofeta o le Toefuataiga, na ia toefuatai maia mea uma, e aofia ai le faatulagaga anamua o tamaitai, ma aumaia ai faatasi le fesoasoani a Iesu Keriso i isi. O lo tatou faamoemoega lava mai le amataga, talu mai le 1842, o lona uiga ia toe aumaia fanau uma a lo tatou Tama Faalelagi i le aiga. Ua tatou iloa e mafai lena mea e ala i lo tatou Faaola o Iesu Keriso. Ona o Lana Togiola, ua mafai ai ona tatou mama ma atoatoa ma faapaiaina ma toefoi atu ai i le aiga—aiga i lo tatou aiga faalelagi, ma faaeaina ai ma ola i le afioaga o lo tatou Tama Faalelagi ma lo tatou Faaola, o Iesu Keriso.

Na amata uma iinei mo i tatou o ni sui auai o le Aualofa.

Se mea foi ina a matagofie mo i tatou le i ai i lenei avanoa paia.

Ua tatou lagonaina agelu o loo siomiaina i tatou i le aso.

O la matou molimau, uso e, e alofaina outou, e silafiaina outou, ma e taua outou i fofoga o le Atua. Matou te tuua lena molimau ia te outou i le suafa paia o lo tatou Faaola, o Iesu Keriso, amene.