Paggamit sa Diosnong Gahom

Pinalangga nga mga sister, kita nagpundok sa mga meetinghouse sa tibuok kalibotan aron saulogon ang Relief Society. Kita napanalanginan nga makapaminaw gikan sa atong talagsaon nga Kinatibuk-ang Kapangulohan sa Relief Society. Wala gayod sila mapakyas sa pagdasig kanako. Sila naghatag og Kristohanong impluwensiya nga nagdasig nako nga mobuhat og mas maayo ug mahimong mas maayo. Sila namulong kanato gikan sa Red Brick nga Tindahan sa Nauvoo, Illinois, sa Estados Unidos, ang dapit sa pag-organisar sa Relief Society. Akong idugang ang akong pagsaksi ngadto sa ilaha, mga sister. Gihigugma kamo sa Dios. Ang Dios nakaila kaninyo. Ug bililhon kamo ngadto Kaniya.

Ang kasaysayan sa Relief Society makapadasig. Sama sa giingon ni Emma Smith, ang unang presidente sa Relief Society, “Atong buhaton ang talagsaon nga butang.” Sama sa bag-o lang nga gitudlo kanato ni Presidente Johnson, Sister Dennis, ug Sister Yee, kini nga organisasyon wala gitukod aron mahimo lang nga social club o manggihatagon nga grupo. Ang katuyoan niini kaniadto ug karon balaanon. Kini mao ang pagtabang sa mga anak sa Dios nga makabalik sa Iyang presensiya.

Human sa akong pakigpulong, kamo makapakigbahin sa inyong mga pagpamatuod kauban sa usag usa kabahin sa mga panalangin nga naggikan kang Jesukristo, sa Iyang Simbahan, ug niining balaan nga organisasyon sa kababayen-an. Nakahibalo ko nga si Jesukristo nasayod sa inyong mga kahimtang ug nagtinguha sa pagpanalangin ninyo. Siya nagkinahanglan usab sa inyong impluwensiya sa Iyang Simbahan. Ang inyong mga paningkamot sa pagserbisyo sa mga anak sa Dios pinaagi sa Relief Society importante.

Si Joseph Smith nagtudlo nga ang buhat sa kaluwasan ug kahimayaan sa ulahing adlaw usa ka kawsa nga “gitagana aron mapahinabo ang kalaglagan sa mga gahom sa kangitngit … ug ang kaluwasan sa tawhanon nga pamilya.” Ang Relief Society ug kamo mahinungdanon niini nga buhat. Sama sa gitudlo ni Presidente Russell M. Nelson, “Ang gingharian sa Dios dili kompleto ug dili mahimong makompleto kon wala ang mga babaye kinsa naghimo og sagradong mga pakigsaad ug dayon sundon kini, mga babaye nga makasulti uban sa gahom ug awtoridad sa Dios.”

Ang nagtuman sa pakigsaad nga kababayen-an dili lang moila sa panginahanglan sa gahom sa Dios sa ilang kinabuhi apan usab adunay espesyal nga akses niana nga gahom pinaagi sa mga pakigsaad nga ilang gihimo. Unsa kadako nga panalangin ang “makagamit kita sa diosnong gahom—igong gahom sa pag-atubang sa mga palas-anon, mga babag, ug mga tentasyon sa atong panahon.” Siyempre, ang bunyag ug mga pakigsaad sa templo dili, mismo, ang tinubdan sa gahom. Ang Ginoong Jesukristo ug ang atong Langitnong Amahan mao ang tinubdan sa tanang gahom sa pakigsaad.

Apan ayaw kasayop. Ang gahom sa Dios dili usa ka tulukibon nga pwersa sa uniberso nga wala magsalig Kaniya. Ang gahom nga Iyang gitanyag dili sama sa magic nga lampara nga mohatag sa mga gipangandoy o usa ka nahabilin nga bahin sa lawas sa usa ka tawo nga gisantos nga giangkon nga usa ka tinubdan sa gahom. Bisan ang garment sa balaan nga pagkapari dili gamhanan sa kaugalingon niini. Dili, ang gahom sa Dios kinahanglan gayod nga konektado Kaniya ug sa Iyang mga katuyoan.

Sa kanunay, si Jesukristo mipakita sa hingpit nga ehemplo alang kanato. Ang tanang gahom “lakip sa langit ug sa yuta” gihatag sa Dios ngadto ni Jesukristo tungod kay si Jesukristo mitugot nga ang Iyang kabubut-on mahimong “kabahin sa kabubut-on sa Amahan.” Sa kinabuhi sa wala pa dinhi sa yuta, ang Manluluwas miingon, “Amahan, ang imong kabubut-on matuman.” Kini Iyang giusab sa Getsemani ug sa krus. Human sa Iyang pagkabanhaw, Iya kining giusab og sulti ngadto sa katawhan diha sa Basahon ni Mormon ug usab sa sayo nga bahin niini nga dispensasyon. Siya nakadawat og gahom gikan sa Dios tungod kay siya giordinahan na daan nga modawat niini, ug Siya masaligan nga gamiton kana nga gahom sama sa buhaton sa Langitnong Amahan Mismo.

Ikonsiderar usab ang propeta sa Basahon ni Mormon nga si Nephi, ang anak nga lalaki ni Helaman. Sa dihang ang gahom sa pagselyo gihatag ngadto ni Nephi, si Jesukristo miingon kaniya, “Ako mopanalangin kanimo sa kahangtoran; … nga kanang tanan nga butang mahimo … sumala sa imong pulong.” Ang rason nganong gisalig ni Kristo kang Nephi kining malukpanon nga gahom tungod kay si Nephi gitawag isip propeta, ug tungod kay siya walay pagkaluya ug walay kahadlok nga mibuhat sa kabubut-on sa Dios. Gusto niya nga tumanon ang kagustohan sa Dios, dili ang iyang kaugalingon. Siya wala ug dili “mangayo niana nga supak sa kabubut-on sa [Dios].” Siya nakadawat og akses sa gahom sa Manluluwas tungod kay Siya masaligan sa paggamit niana nga gahom sama sa buhaton ni Jesukristo Mismo.

Bisan kon kita maningkamot sa pagpadugang sa gahom sa Dios diha sa atong kinabuhi, kini magpabilin nga Iyang gahom. Ang gahom sa pakigsaad nga atong gi-akses wala magpuyo nato. Sa samang paagi nga ang pagkadawat og “bisan unsa nga panalangin gikan sa Dios kini tungod sa pagsunod niana nga balaod diin kini gipasikad,” mao nga, usab, ang pag-akses sa gahom sa Dios nag-agad sa “mga baroganan sa pagkamatarong.” Ang gahom sa Dios dili mahimong gamiton alang sa hinakog nga mga katuyoan o sa pagkontrol ni bisan kinsa. Ang pagsulay og gamit sa Iyang gahom “sa bisan unsa nga matang sa pagkadili matarong” maoy hinungdan nga ang Iyang gahom “mobiya,” ug kita gipasidan-an “mosangpot kini nga silotan hinuon [kita].” Kadtong mapakyas sa pagbutang sa ilang pagsalig ngadto sa Dios, kinsa dili makanunayon sa ilang pagkadisipulo, o mipatig-a sa ilang kasingkasing, o moyatak sa ilang mga tiil sa Usa nga Balaan sa Israel, dili makadawat og akses sa Iyang gahom. Aron maugmad ang gahom sa Dios diha sa atong kinabuhi, nan, kita obligado nga maningkamot nga mahimong matarong, maningkamot nga buhaton ang matarong, ug maningkamot nga molihok sumala sa Iyang kabubut-on.

Ang paghimo ug pagtuman sa daghang pakigsaad uban sa Dios makapaduol ninyo ngadto Kaniya, mousab ninyo, ug mohatag ninyo og mas dako nga akses sa Iyang gahom. Ang nagtuman sa pakigsaad nga kababayen-an “nagkatibulaag sa ibabaw sa tibuok yuta” ug “gisangkapan sila sa pagkamatarong ug sa gahom sa Dios sa dako nga himaya.” Bisan asa pa man kamo, kini nga gahom alang ninyo. Kini makatabang ninyo nga makaangkon og mas dako nga kalipay, kalinaw, ug kapahulayan. Kini makatabang ninyo nga makabaton og mas dako nga kahibalo, mahimong mas lig-on nga sumusunod sa pagkamatarong, ug mahimong angayan nga manununod sa gingharian sa Dios. Makadawat kamo og gahom sa pagbatok sa tentasyon ug sa paghinulsol kon kamo mapandol. Kamo usab makadawat og gahom nga molig-on ninyo aron mas makaantos sa mga pagsulay ug mga kasakit.

Gusto kong mopakigbahin og personal nga ehemplo kon sa unsang paagi nga ang mga pakigsaad sa templo mopadulong sa dugang nga kalinaw ug kaseguradohan alang sa akong asawa, si Ruth, ug nako. Pipila ka tuig human sa among kaminyoon, si Ruth adunay grabe nga sakit nga kanser sa ubaryo. Nagkinahanglan siya og duha ka operasyon ug chemotherapy. Ang among bugtong anak, 16-ka-buwan ang edad nga si Ashley, wala pa gayod nabulag gikan sa iyang inahan ug nahimong aburido ug sapoton. Dili siya mokaon sa pagkaon nga akong giandam, mao nga “nagsabot,” mi ug sa kataposan ako siyang gihatagan og ice cream ug soft drinks.

Ako 28 anyos pa lang, ug wala ko kahibalo kon unsaon ni Ashley ug nako pagkabuhi nga wala si Ruth. Ang mga damgo alang sa mas dako nga pamilya natapos, apan kana ang labing minos sa among mga kabalaka. Atol sa unang pagka-ospital ni Ruth, nasagmuyo kaayo ko ug naglisod sa pag-ampo. Mura og ang akong mga pag-ampo wala maabot sa langit.

Sa gabii nga si Ruth mipauli gikan sa iyang una nga operasyon, nag-andam kami aron mag-ampo, sama sa kasagaran namong gihimo, sa dili pa matulog. Kay ako talawan, akong gitawag si Ruth aron mag-ampo. Dili gayod nako makalimtan ang unang mga pulong sa iyang pag-ampo. Miingon siya, “Langitnong Amahan, nagpasalamat kami Kanimo alang sa gahom sa pagkapari nga naghimo niini nga posible nga bisan unsa ang mahitabo, kami magkauban sa kahangtoran.”

Tungod sa iyang mga pulong, ang babag nga akong gihunahuna tali sa Dios ug nako lapad kaayo nga mibukas. Samtang ang pag-ampo ni Ruth misaka sa langit, ang doktrina sa mahangtorong mga pamilya nasabtan nako ug mas nabati nga kini tinuod. Ang among mga kabalaka alang sa among kaugmaon mikunhod tungod kay nakahimo kami og mga pakigsaad sa templo ug naselyo sa balay sa Ginoo. Ang gahom gikan sa Dios nagdala og kalinaw sa among mga kasingkasing. Katloan ug unom ka tuig ang milabay, si Presidente Nelson mipakigbahin og mga pulong nga dako kaayo og epekto kanako. Siya mitudlo, “Kon mokab-ot kamo alang sa gahom sa Ginoo diha sa inyong kinabuhi uban sa samang paningkamot sa tawo nga hapit na malumos nga naningkamot nga makaginhawa, ang gahom gikan ni Jesukristo inyong maangkon.” Ingon ana nag-ampo si Ruth. Ug kana nga gahom miabot.

Sa samang paagi, ang Dios motabang ninyo nga makasabot sa gahom ug kalinaw sa pagtuga sa templo.

Ang pagtuga og gahom motabang ninyo nga maayo kon kamo nasamdan, nabungkag, o nadugmok sa bisan unsang paagi. Kamo makatawag sa mga gahom sa langit aron makadawat og personal nga pagpadayag ug makasabot sa doktrina ni Kristo. Ang gahom sa Dios motabang ninyo nga maprotektahan, mapanalipdan, ug malig-on ang uban. Kauban ni Presidente Nelson, ako mopamatuod nga si “[Jesukristo] makahatag og gahom nga [inyong] gikinahanglan alang sa [inyong] mga kinabuhi ug nga “kon modawat [kamo] sa Iyang gahom nganha sa kinabuhi [ninyo], [ang Manluluwas] ug [kamo] magmaya.”

Oo, mga sister, kamo naghimo og usa ka butang nga labaw pa sa ordinaryo, ug kamo makasinati og usa ka butang nga labaw pa sa ordinaryo. Salamat sa inyong hugot nga pagtuo, sa inyong kalig-on, sa inyong kapasidad sa pagpangulo, sa inyong kaalam, sa inyong kaandam ug abilidad sa paghimo ug pagtuman og mga pakigsaad uban sa Dios. Kamo nagdala og mga panalangin sa inyong mga kaugalingon, sa inyong mga pamilya, sa Simbahan, sa inyong mga komunidad, ug sa kalibotan. Anaa sa inyong kinabuhi ang gahom sa Dios aron motabang ninyo nga mahimong maayo ug mobuhat og maayo. Siya misalig kaninyo. Ang Iyang Simbahan misalig kaninyo. Hinaot unta nga ang Dios mopanalangin kaninyo sa inyong gipadayon nga pagkadisipulo.

Ang Dios buhi. Si Jesus mao ang Kristo, ang inyong Manluluwas, ug akoa. Siya ang inyong mabination, maalamon, langitnong higala. Siya mipahiuli sa Iyang Simbahan sa yuta. Niini nga mga butang ako nahibalo. Sa ngalan ni Jesukristo, amen.