Relief Society: Usa ka Komunidad sa Pakigsaad

Presidente Camille N. Johnson

Akong pinalanggang mga sister, mapaubsanon ug malipayon ang among gibati sa pag-abiabi kaninyo dinhi sa taas nga andana sa Red Brick nga Tindahan sa makasaysayanong Nauvoo, Illinois. Kini usa ka sagrado nga luna, diin, niadtong 1842, ang Propeta Joseph Smith miorganisar sa Relief Society subay sa sumbanan sa pagkapari ug aron makompleto ang pagpahiuli sa tanang butang isip kabahin sa nagpadayon nga Pagpahiuli sa ebanghelyo ni Jesukristo.

Dinhi sa Nauvoo nga ang mga sister sa Relief Society nangandam alang sa mga panalangin sa balay sa Ginoo. Ilang giandam ang mga sister sa temporal nga paagi, ug sila miabag sa pagtukod sa templo pinaagi sa pagdumala sa mga umahan ug pagtahi og mga bisti ug pagbuhat sa bisan unsa nga ilang mahimo aron makatabang sa pagpangandam alang sa mga panalangin sa balay sa Ginoo. Apan sila nangandam usab sa espirituhanong paagi, ug dinhi ug sa mga kakahoyan palibot sa Nauvoo nga sila adunay kahigayonan nga direktang makadungog gikan sa atong Propeta nga si Joseph Smith. Dinhi siya nagtudlo kanila agi og pagpangandam alang sa mga panalangin nga moabot samtang sila moapil sa mga ordinansa sa balay sa Ginoo.

Kami nakahibalo og mopadayag sa among pagpamatuod nga ang kalig-on ug gahom nga naggikan sa paghimo og pakigsaad ug pagtuman sa pakigsaad mao ang mipanalangin sa mga kinabuhi niadtong mga sister ug mga brother ug sa tanang Santos nga mipadayon ngadto sa kamingawan human sa ilang kasinatian sa Nauvoo. Kami malipayon kaayo nga makabaton niini nga kahigayonan nga makigbahin niining sagradong luna kauban ninyo. Bisan asa pa man kamo nagpuyo sa kalibotan, nanghinaot ako nga kamo nakahibalo nga ang inyong kaliwatan nagsugod sa Nauvoo. Isip mga sakop sa Relief Society, ang atong mga gamot gibutang dinhi. Ug karon, nagpadayon sa paglambo ug pagdaghan sa tibuok kalibotan, nanghinaot ko nga kamo mibati og koneksyon niining sagradong luna diin ang kababayen-an wala motutok sa mga kabalaka sa adlaw-adlaw nga panginabuhi ug hingpit nga mitutok sa atong Manluluwas nga si Jesukristo ug sa paghimo og mga pakigsaad uban Kaniya.

Unsay inyong gibati nga maanaa dinhi?

Sister J. Anette Dennis

Nindot nga kasinatian nga maanaa niini nga luna diin kadtong 20 ka babaye unang giorganisar ug dayon maghunahuna ninyong tanan sa tibuok kalibotan. Isip Relief Society nga mga igsoon, aduna kamo niana nga kabilin tungod kon unsa ang gisugdan dinhi.

Presidente Johnson

Sila nagmugna og komunidad sa pakigsaad dinhi sa Nauvoo, dili ba?

Sister Kristin M. Yee

Sila nag-atiman sa usag usa.

Presidente Johnson

Gibuhat gayod nila kini. Ug kita nakamugna og komunidad sa pakigsaad sa tibuok kalibotan karon isip mga sister nga moapil sa mga ordinansa sa pagkapari ug maghimo ug magtuman sa mga pakigsaad. Kita nagmugna og tibuok kalibotan nga komunidad aron mopanalangin sa mga kinabuhi sa atong kaigsoonan.

Sister Yee

Diin sila nag-amuma sa usag usa, diin ilang giatiman ang usag usa. Samtang akong gibasa ang mahitungod sa mga istorya dinhi sa Nauvoo, kana ang nakapadayeg kaayo nako, nga adunay usa ka tawo nga magdala og usa ka butang ngadto sa tawo nga nanginahanglan o nag-atiman sa usa ka tawo. Ug natural lang nga kabahin sa unsay ilang gibuhat. Ug kini natural natong gibuhat isip mga sister sa Relief Society. Ang Ginoo naghatag og organisasyon diin ang mga sister mahimong mosunod niadtong natural nilang mga pagbati, nga mao ang pagkapuangod ug usa ka dapit sa pagbuhat niini aron andam kaayo nilang mabati ang Iyang kahupayan.

Ug karong buntaga samtang naghunahuna ug namalandong ko mahitungod ni Sister Emma ug sa iyang misyon ug iyang pag-uban sa Propeta, nakahunahuna ko, “Sila nag-ampo sa samang pag-ampo nga atong giampo.” Sila nag-ampo alang sa ilang mga anak. Sila nag-ampo alang sa ilang mga bana ug mga asawa. Sila nag-ampo alang sa usag usa. Sama nga panginahanglan nato, sila aduna usab. Kita mas adunay pagkaparehas kaysa wala. Misalig sila sa Ginoo. Ug adunay grabe nga walay kasegurohan niadtong higayona, dili ba? Adunay kamatayon ug adunay tumang kalisod. Apan sila misalig Kaniya. Ug matag usa kanato dunay kalisod diin nagkinahanglan kita sa Dios, diin nagkinahanglan kita sa atong mga pakigsaad, diin kinahanglan kita nga mosalig Kaniya. Ug kinahanglan kita nga mopadayon sa daghang higayon ug mosalig Kaniya nga Siya—nga Siya mogiya kanato niadtong mga luna—nga kita makasalig Kaniya uban ang atong mga pamilya; kita makasalig Kaniya nga kini nga mga pakigsaad ug kini nga mga saad mas tinuod kaysa bisan unsa nga atong makita, mas tinuod kaysa bisan unsa nga atong mabati.

Presidente Johnson

Diha sa Doktrina ug mga Pakigsaad seksiyon 25, ang pagpadayag nga gihatag ngadto ni Emma Smith, nag-ingon, “Tumana ang mga pakigsaad nga imong gihimo.” Ug tingali mao gayod kana ang inyong gihulagway. Kini lain nga paagi sa pagsulti og, “Salig nako. Salig sa mga saad nga akong gihimo nganha nimo tungod kay ang akong mga saad segurado.” Ug kadtong sama nga mga saad nga atong gihimo sa balay sa Ginoo, ug diha sa bunyag, usa ka saad nga mobalik kanato nga Siya kanunay nga mag-uban nato—nga kita makabaton sa Iyang Espiritu nga mobantay kanato, nga adunay mga anghel nga molibot kanato aron sa pagpangalagad kanato ug mohatag sa atong mga panginahanglan. Nakahibalo ko nga kadto tinuod gihapon. Ug kadto nga mga saad nga Iyang gihimo, Iyang gihimo ngadto niadtong mga Santos dinhi sa Nauvoo, Iyang gihimo kadtong sama nga mga saad nganha kanato kon kita moapil sa mga ordinansa sa ebanghelyo ni Jesukristo nga anaa alang nato pinaagi sa mga yawe sa pagkapari.

Sister Dennis

Naghunahuna ko ni Emma—pila ka anak niya ang namatay, giunsa niya pagbalhin sa matag dapit, nga dili igo ilang kapanguhaan. Apan sila anaay ilang mga pakigsaad, sugod sa pagbunyag. Aduna sila nianang relasyon sa pakigsaad uban sa Dios nga nagpalig-on kanila. Nakapalig-on kini ni Emma latas niadtong tanan. Tingali dili niya mahimo ang unsay iyang gibuhat kon wala kana nga relasyon sa pakigsaad uban sa Dios nga nakahibalo siya nga anaa niya ug kadtong mga saad nga anaa didto.

Sister Yee

Tinuod kana—kanang kalig-on nga naggikan ni Jesukristo, mao ang imong gihulagway, di ba? Ang uban pang butang molihok ug mausab sa atong kinabuhi. Ang mga tawo moabot ug mobiya. Apan diha niana nga relasyon uban Kaniya makita ang atong tinuod nga kalig-on, di ba?

Presidente Johnson

Gibati nako nga ang nagdasig nila nga magpadayon—ang pagtukod niana nga templo, nag-andam alang niadtong dugang nga mga pakigsaad. Ug dayon kana ang naghatag nila og kalig-on nga moabante sa unahan ngadto sa wala pa mahibaloi sa panahon nga tingali dili pa segurado ngadto nila. Ang ilang kamasaligon sa pakigsaad daw talagsaon—nan, dili kini kinahanglan nga makapahingangha tungod kay kitang tanan kinahanglan aduna niini—apan nindot kaayo kini nga ehemplo alang natong tanan, ang ihatag ang atong kamasaligon sa pakigsaad diha sa Ginoo ug sa gitudlo nga tinugyanan sa Ginoo, ang propeta sa kalibotan karon.

Sister Dennis

Ganahan ko sa istorya sa dihang si Brigham Young naa sulod sa templo, anaa siya didto aron sa pagpahigayon sa mga ordinansa. Daghan, daghang tawo ang didto, ug didto siya hangtod sa lawom na nga gabii aron ang katawhan makadawat sa ilang pagtuga. Ug siya miingon, “OK, human na kita.” Nagkaanam na og kadelikado tungod sa mga manggugubot sa palibot kanila. Panahon na, miingon siya, nga mag-andam na aron mopahawa, nga molayag latas sa Mississippi. Apan pagkasunod buntag sa dihang siya mibangon, ang gawas sa templo ug ang templo mismo napuno sa mga tawo nga dili mobiya hangtod nga madawat nila ang ilang mga pagtuga. Nasayod sila nga gikinahanglan nila kadtong mga panalangi ug tingali sa daghan pa kaayon katuigan sa dili pa sila makaangkon og laing templo. Ang atong mga pakigsaad mao ang motabang nato nga mahimong mas lawom ang koneksiyon ngadto sa atong Amahan sa Langit ug ni Jesukristo ug maghatag nato sa kalig-on nga atong gikinahanglan aron molambo, sama sa gihimo niadto nga mga Santos, bisan asa pa man kita sa kalibotan.

Presidente Johnson

Pipila sa akong katigulangan ang nakadawat sa panalangin ug kahigayonan nga matugahan niadtong kataposang mga adlaw diri sa Nauvoo. Ug ako mikuha og kalig-on sa pagtuo gikan nila ug sa mga pinalangga nga mga sister kinsa, uban sa pagtuo, mipadayon sa pag-abante nga adunay kamasaligon sa pakigsaad.

Sister Dennis

Sultihi kami mahitungod sa inyong katigulangan.

Presidente Johnson

Hinoon, si Fanny Dapp Parish ug ang iyang anak nga babaye nga si Jane, siyempre, ug ang akong ikaupat nga lolo sa tuhod nga si Samuel Parish, silang tanan natugahan dinhi niadtong Pebrero sa 1846—kabahin nianang pundok sa lima ka libo nga inyong gihisgotan. Ug ganahan ko sa mga pulong nga gigamit ni Jane sa paghulagway nianang panahona. Siya miingon, “Anaa nato ang ebanghelyo ni Jesukristo, anaa nato ang Simbahan, ug anaa nato ang templo.” Ug siya miingon, “Ah, kadakong kalipay ang mipuno sa among mga kalag tungod kay kami adunay templo.”

Namalandong lang ko niana ug naghunahuna nga kini mao ang panahon sa kawalay kaseguradohan alang kanila. Sila nangandam nga mobiya niining matahom nga komunidad nga ilang gitukod ug moadto sa kamingawan. Ug bisan pa kini usa ka panahon sa dakong kamaya. Unsa pa ang makapasabot sa kamaya nga iyang gibati, sa kalinaw nga iyang gibati?

Sister Yee

Taliwala sa tanan nilang mga hagit, kamo adunay kalinaw ug kamaya.

Presidente Johnson

Aduna sila. Ug kini tungod sa lang paghimo og pakigsaad. Ug ang katigulangan ni Kristin nagpuyo dinhi sa samang panahon. Ug kami medyo segurado tungod kay magkaduol ra ang ilang edad nga managhigala sila, sama nga kita managhigala karon.

Sister Yee

Ug kon dili man gani sila niadto, managhigala na sila karon.

Presidente Johnson

Sila managhigala karon. Oo, walay duda.

Sister Yee

Si Nancy Sabin nga kaliwat sa akong inahan, siya mga 17 dihang siya mipasakop sa Simbahan. Ug mga nianang panahon nga siya usab natugahan sa sulod sa balay sa Ginoo. Ug ang imong Jane 20 lang.

Presidente Johnson ug Sister Yee

Ug naghunahuna kami nga sila nagpuyo nga duol ra kaayo sa usag usa.

Sister Yee

Segurado, nga nagka-istoryahanay sila. Apan kanindot usab hunahunaon nga karon ang ilang kaliwat naglingkod dinhi, ug nga adunay panaghigalaay dinhi nga mahitabo. Ug kita usab motuman sa atong mga pakigsaad sama kanila—nga kita adunay sama nga pagtuo, nga kita misalig sa Ginoo sa tibuok natong kasingkasing. Ug kana wala mawala kanato. Gidala nato kana gikan sa henerasyon ngadto sa henerasyon.

Anaa man o wala ang atong katigulangan dinhi, anaa man o wala kitay katigulangan sa kalibotan, nagsugod kita dinhi uban sa atong mga pakigsaad ug kana makanunayon sa kahangtoran. Tanang pagpili nga atong himoon karon importante. Kini importante dili lang alang ninyo, apan alang niadtong moabot human ug niadtong nahauna na—niining bahin sa tabil ug sa pikas nga bahin sa tabil—samtang atong gituman ang atong mga pakigsaad. Ug tingali dunay daghang sister diha sa atong Relief Society karon—tingali mibati nga sila batan-on pa kaayo o sila tigulang na kaayo. O tingali dili sila edukado, o dili sila mahinungdanon—kamo na ang mokompleto sa pahayag. Tingali inyong gibati nga dili kamo andam sa paghimo niini nga buluhaton. Apan gusto namong ipakigbahin kaninyo nga kamo andam ug kami nagkinahanglan ninyo karon. Ang Ginoo nagkinahanglan ninyo karon nga mahimong kabahin niini. Kamo adunay mga gasa ug mga talento nga gikinahanglan kaayo karon sa kalibotan.

Presidente Johnson

Kami nakadawat og propetikanhong kasugoan nga isip mga sister kita makahimo ug kinahanglan nga mousab sa kalibotan. Kinahanglan natong andamon ang kalibotan sa Ikaduhang Pag-anhi sa Manluluwas, si Jesukristo. Ug unsaon man nato sa paghimo niana? Nan, himoon nato kana pinaagi sa pagmugna og komunidad sa pakigsaad. Ug usahay ang akong komunidad sa pakigsaad usa ka komunidad sa pakigsaad sa usa—sa pagkatinuod sa duha, tungod kay ako adunay relasyon sa pakigsaad uban Kaniya.

Sister Yee

Tinuod kana.

Presidente Johnson

Apan unya ang inyong komunidad sa pakigsaad mapalapdan ug motubo. Napahinumdoman ko sa usa nako ka kasinatian bag-ohay lang nga nindot gayod kaayo. Usa kini ka pundok sa mga sister sa Relief Society. Kaming tanan naglingkod nga naglingin nga nag-abot ang mga tuhod. Ako anaa sa usa ka district, ug ako nakigtagbo sa presidente sa Relief Society sa district, sa presidente sa Primary sa district, ug sa presidente sa Young Women sa district nga gibunyagan nga miyembro sa Simbahan sulod sa usa pa lang ka bulan. Ug gibati niya nga medyo nabug-atan ug mipadayag og pipila ka kabalaka ngadto namong tanan mahitungod kon unsaon niya pagtuman ang bag-o nga buluhaton. Ang akong paborito nga bahin niana nga panagtigom mao ang sa dihang ang presidente sa Relief Society milingi niya ug sa tibuok kasingkasing miingon, “Ayaw kabalaka, tabangan ka namo.” Mao kana ang ideya. Bisan asa man kita, kita magmugna niana nga komunidad sa pakigsaad nga nakatutok ni Jesukristo. Ug kauban niadtong tiunay nga mga gasa nga gihatag kanato, kita nag-atiman sa usag usa. Kana ang tukma gayod nga mahitabo didto. Dili siya kinahanglan nga mabalaka. Siya makasalig sa Ginoo. Anaa ang iyang mga sister sa Relief Society.

Sister Dennis

Tungod kay kitang tanan sakop sa Relief Society, bisan asa pa man kita nagserbisyo.

Presidente Johnson

Sakto. Mao nga sa usa ka panahon, siya magserbisyo sa Young Women kauban ang batan-ong mga babaye. Apan siya sa kanunay kabahin sa Relief Society. Ug kadtong mga sister sa Relief Society migakos kaniya, ug sila moatiman kaniya.

Sister Yee

Ganahan ko niana. Adunay koneksyon ang tanan, di ba?

Presidente Johnson

Oo, walay duda.

Sister Yee

Kay kon kita mopanalangin og bata, kita mopanalangin og pamilya. Kita mopanalangin og inahan, kita mopanalangin og pamilya. O usa ka amahan. Ang tanan nagsumpay niana nga paagi, nga nindot kaayo. Kita adunay dakong panag-uban ni Jesukristo. Siya ang atong labing dako nga kauban nga makatabang nato sa tanang butang. Ug usahay sa akong hunahuna, labi na sa kababayen-an, ganahan kitang mobuhat og mga butang sa atong kaugalingon. Ug dili kana daotan. Usa kana ka gasa nga Iyang gihatag kanato nga mobuhat sa mga butang. Apan usahay naghunahuna ko, para nako lang, nakahibalo ko nga usahay Siya mobutang nako sa usa ka sitwasyon diin ako igo nga nabug-atan aron ako igo nga mosalig Kaniya. Ug aron kita makamugna og relasyon uban Kaniya, aron kita masayod nganong gibuhat nato ang atong gibuhat. Ug wala ba mo maghunahuna nga kining mga sister dinhi sa Nauvoo nakahibalo nganong nabuhat nila ang unsay ilang gibuhat? Tungod kay nahigugma sila sa Ginoo, ug gusto nila nga tumanon ang Iyang mga pakigsaad uban Niya, ug mao usab kita.

Sister Dennis

Ug samtang sila mitabang sa uban nga mobati sa Iyang gugma, gibati nila kini mismo. Tingali kinahanglan natong hinumdoman, nga adunay pipila kanato nga naglisod sa pagbati sa gugma sa Ginoo, bisan unsa man nga rason niini. Apan samtang kita mogawas ug tiunay nga mogakos sa uban ug mopabati kanila sa atong gugma, nan sila sa kasagaran magsugod usab sa pagbati sa gugma sa Manluluwas.

Sister Yee

Siya nakahibalo nga kinahanglan natong mabati kanunay ang Iyang gugma, mao nga gibutang Niya kadtong maaghop nga mga pagbati diha kanato nga moserbisyo sa uban aron mabati kita ug sila sa gugma.

Presidente Johnson

Naghunahuna ko nga ang tanan sa atong mga sister adunay kahigayonan nga mahimong kabahin sa tibuok kalibotan nga buhat alang sa kaayohan sa kababayen-an ug kabataan samtang sila moapil, maghimo og yano nga mga butang diha sa ilang kaugalingon nga mga panimalay, sa ilang kaugalingon nga kasilinganan ug mga komunidad. Ug gibuhat nato kana usa ka inahan, usa ka babaye, usa ka bata sa matag higayon, sama sa buhaton sa Manluluwas.

Sister Yee

Usa kana ka nindot nga pagdapit, di ba? Nga temporal man ug espirituwal nga paagi, kita makaduol Kaniya. Nagkinahanglan kita sa temporal samtang atong buhaton ang espirituwal, di ba? Makapaikag kon giunsa nga daw ang mga sirkumstansiya mas minos ang kaimportante kaysa atong koneksyon sa atong Langitnong Amahan ug sa Manluluwas—mikalit lang og sulod sa hunahuna.

Ug usahay naghunahuna ko nga kita makalingkod sa Relief Society ug mobati nga daw nag-inusara kita—o molingkod bisan asa ka man—apan makaamgo nga ang tanan nga tupad nimo aduna usab mga hagit ug nangandoy usab nga higugmaon ug usab gihigugma ug gihatagan og bili ug nahisakop. Ug naghunahuna ko nga kon kita mopakigbahin diha sa atong mga Relief Society, ug kita adunay kahigayonan nga mopakigbahin, adunay kahigayonan nga makaamgo nga kita adunay daghan nga pagkaparehas kaysa atong pagkalahi.

Apan ako nakahibalo ug ako mopamatuod nga kita wala gayod mag-inusara—nga ang atong Langitnong Amahan ug ang Manluluwas nakaila kaninyo. Nga Sila nakahibalo sa inyong panginahanglan, Sila nagpakabana mahitungod sa inyong gikabalak-an ug nagtinguha sa pagpanalangin ninyo, ug nga kadtong mga sister nga tupad ninyo aduna niadtong sama nga mga tinguha nga higugmaon ug adunay kahigayonan nga makahatag, ug mobati nga gihatagan og bili. Nakahibalo ko nga Siya nasayod—nga Siya anaa sa atong tupad diha sa atong mga desisyon ug mga hagit ug sa atong mga kalipay. Nga Siya anaa tupad nato. Makigtinambagay kita uban Kaniya. Kana usa ka maanindot ug bulahan nga kahigayonan nga makahibalo nga tungod kay Siya milakaw sa dalan nga nag-inusara nga kita dili na kinahanglan, bisan kanus-a.

Sister Dennis

Nakahibalo ba mo nga ako naghunahuna og mga pundok sa mga sister sa tibuok kalibotan nga nagtan-aw niini karon. Sa dili madugay kita maadunay kahigayonan nga maminaw sa usa ka Apostol, si Elder Dale G. Renlund sa Korum sa Napulog Duha. Kita bulahan kaayo nga makadungog gikan kaniya. Ug human niana, kamo makabaton og kahigayonan nga mopamatuod ngadto sa usag usa sa mga butang nga inyong gibati diha sa inyong kasingkasing nga gipamatud-an sa Espiritu nganha kaninyo—kon unsa nga panalangin ang Relief Society, ug sa pakigsaad ninyo kauban sa Manluluwas ug unsa Siya diha sa inyong kinabuhi. Espesyal kaayo ang pagbati nga maghunahuna sa tanang pundok sa mga sister sa tibuok kalibotan ug mabati nga kita tibuok kalibotan nga panag-igsoonay sa pakigsaad, bisan asa pa man kita. Gihigugma namo kamo, mga Sister!

Presidente Johnson

Pagkadako nga panalangin nga mahimong mga babaye sa pakigsaad sa Ang Simbahan ni Jesukristo sa mga Santos sa Ulahing mga Adlaw. Mga sister, mahimayaon kini nga panahon, ug kami hiniusang mopamatuod nga kita apil sa buluhaton sa atong Manluluwas nga si Jesukristo. Nasayod mi nga Siya buhi. Nasayod mi nga Siya nahigugma nato. Nasayod mi nga Siya nagtinguha nga kita makabaton og relasyon sa pakigsaad uban Niya. Ug kami nasayod nga gusto Niya nga ipaabot ang Iyang kahupayan ngadto sa atong kaigsoonan sa tibuok kalibotan. Ug samtang buhaton nato kini—kay kita ang instrumento diin Siya mohatag sa Iyang kahupayan ngadto sa uban—kita makakaplag sa Iyang kahupayan alang sa atong kaugalingon.

Kini ang among pagpamatuod nga ang Simbahan ni Jesukristo sa mga Santos sa Ulahing mga Adlaw gigiyahan sa usa ka buhi nga propeta. Kami nahigugma Kaniya. Gitahod ug gipaluyohan namo siya.

Among pagpamatuod nga si Joseph Smith mao ang propeta sa Pagpahiuli, nga iyang gipahiuli ang tanang butang, lakip na ang karaan nga kapunongan sa kababayen-an, nga hiniusang nagdala sa kahupayan ni Jesukristo ngadto sa uban. Ang atong katuyoan gikan sa sinugdanan, sukad sa 1842, mao ang pagdala sa tanang anak sa atong Langitnong Amahan balik sa panimalay. Kami nasayod nga kana posible pinaagi sa atong Manluluwas nga si Jesukristo. Tungod sa Iyang Pag-ula, kita mahimong limpyo ug mamaayo ug mabalaan ug makabalik sa panimalay—ngadto sa atong langitnong panimalay, ug mahimaya ug makapuyo sa presensya sa atong Langitnong Amahan ug sa atong Manluluwas nga si Jesukristo.

Ang tanan nagsugod dinhi alang nato isip mga sakop sa Relief Society.

Ug unsa ka mahimayaon nga okasyon alang nato nga maanaa niining sagrado nga luna.

Kami mibati nga adunay mga anghel nga nagpalibot kanato karon.

Among pagpamatuod, mga sister, nga kamo gihigugma, nga kamo nailhan, ug kamo bililhon diha sa mga mata sa Dios. Kami mobilin niana nga pagpamatuod diha kaninyo sa sagrado nga ngalan sa atong Manluluwas nga si Jesukristo, amen.