Christmas—lub Caij rau Ib Leeg Hlub, Pab, thiab Zam Txim rau Ib Leeg

Kuv nyiam pom cov me nyuam txoj kev zoo siab thiab kev cia siab ntsoov nyob hauv lub caij Christmas! Kuv nco txog kuv txoj kev cia siab ntsoov thaum kuv yog ib tug me nyuam hauv lub Koom Haum Me Nyuam Yaus nyob hauv Argentina. Muaj ib xyoo, peb cov xib hwb hauv lub Koom Haum Me Nyuam Yaus hais kom peb tu peb cov khoom ua si qub, ntxuav peb cov me nyuam roj hmab cov plaub hau, kho lawv tej daim tiab kom peb thiaj li pub rau cov me nyuam tub thiab ntxhais uas yuav tsum nyob hauv lub tsev kho mob thaum hnub Christmas.

Thaum txog lub lim tiam uas kuv tu kuv cov me nyuam roj hmab qub, kuv niam nug seb kuv ua dab tsi. Kuv piav txog qhov uas peb cov xib hwb hauv lub Koom Haum Me Nyuam Yaus tau hais, thiab nws piav hais tias, “Koj yuav tau pub ib qho khoom ua si zoo rau cov me nyuam thiab.”

Hais li ntawd kuv teb hais tias, “Ua cas kuv yuav ua li ntawd?”

Ces nws hais ib yam uas kuv nco ntsoov txij thaum ntawd los. Nws hais tias, “Cris, yeej yog ib qho zoo yog peb pub ib yam uas peb nyiam tiag tiag, ib yam uas ua nyuaj rau peb pub vim peb nyiam heev, ib yam uas yog kev txi. Peb Leej Txiv Saum Ntuj Ceeb Tsheej lub txiaj ntsim uas Nws pub rau peb yeej zoo li ntawd. Nws txib Nws Leej Tub, Yexus Khetos—tsis yog ib tug tub li lwm tus. Nws txib Nws Leej Tub uas Nws Hlub thiab zoo tag nrho los kom peb thiaj yuav rov qab nrog Nws nyob dua ntxiv.”

Xyoo ntawd thaum kuv pub ib qho khoom ua si uas kuv nyiam heev, kuv tau to taub zoo dua txog peb Leej Txiv Saum Ntuj Ceeb Tsheej lub txiaj ntsim uas nws tau pub rau peb—Nws Leej Tub uas Nws Hlub, Yexus Khetos, tus uas muaj kev hlub thiab tsis xav txog Nws tus kheej thaum Nws txo Nws txoj sia pub rau peb.

Txhua xyoo, thaum peb ua koob tsheej txog Christmas, kuv txiv twb nyeem zaj zoo kawg nyob hauv vaj lug kub hauv phau Lukas:

“Lub sij hawm ntawd Vaj Ntxwv Aunkuxataus hais rau cov pej xeem uas nyob thoob plaws txhua lub teb chaws uas yog cov nom tswv Loos kav, kom sawv daws tuaj sau npe. …

“Txhua tus nyias txawm mus sau npe rau hauv nyias lub nroog.

“Yauxej tawm hauv lub nroog Naxales uas nyob pem Kalilais mus rau hauv lub nroog Npelehees uas nyob nram lub xeev Yudas uas thaum ub yug Vaj Ntxwv Daviv; …

“Yauxej coj Maivliag tus uas nws twb qhaib lawm nrog nws mus sau npe thiab. Thaum ntawd Maivliag suab ib plab me nyuam.

“Thaum nkawd tseem nyob hauv lub nroog Npelehees, twb txog caij uas Maivliag yug me nyuam lawm.

“Maivliag yug nws tus metub hlob, nws muab khaub ncaws qhwv tus me nyuam thiab muab tso pw rau hauv ib lub dab zaub, rau qhov tej tsev so, neeg twb so puv tas lawm.

“Nyob thaj tsam ntawd muaj ib cov neeg yug yaj, lawv mus pw zov lawv cov yaj tom teb, thaum tsaus ntuj,

“Thiab tus Tswv ib tug tim tswv los cuag lawv, thiab tus Tswv lub tshwj chim ci ntsa iab tuaj rau lawv, lawv poob siab thiab ntshai kawg li.

“Tus tim tswv ntawd hais rau lawv hais tias, Nej tsis txhob ntshai! Kuv los ntawm no yog coj txoj moo zoo uas yog txoj kev zoo siab kawg nkaus rau txhua haiv neeg los qhia rau nej paub.

“Hnub no nej tus Cawm Seej twb yug los rau hauv Daviv lub nroog lawm, nws yog Khetos uas yog tus Tswv!

“Nej yuav pom ib tug me nyuam mos qhwv khaub ncaws pw hauv lub dab zaub, qhov ntawd yog lub cim uas qhia hais tias, tus ntawd yog tus uas kuv hais.

“Tam sim ntawd muaj ib pab tim tswv ceeb tsheej coob coob los nrog tus tim tswv ntawd hu nkauj qhuas Vajtswv li no,

“Thov kom Vajtswv tus uas nyob saum ntuj ceeb tsheej tau koob meej, thiab thov kom cov neeg uas nyob hauv ntiaj teb txhua tus uas ua haum Vajtswv siab tau zoo nyob kaj siab lug!”¹

Cov nus thiab cov viv ncaus, peb yuav ua li cas kom nyob kaj siab lug thiab xav ua zoo rau lwm tus neeg li no?

Thaum kuv tau xav txog qhov no tau ob peb lim tiam tas los, thiab kuv nco ntsoov tias Christmas yog lub caij pub tej yam rau lwm tus, ua rau kuv xav txog peb yam uas peb ua tau—yog peb yam txiaj ntsim uas peb txhua tus yuav pub rau lwm tus. Peb yeej pub tau tej txiaj ntsim no txhua lub sij hawm, tiam sis thaum lub caij Christmas zoo kawg no, peb nco txog Leej Txiv lub txiaj ntsim uas yog Nws Leej Tub thiab xav txog qhov uas peb yuav ua li cas kom coj raws li Nkawd tus yam ntxwv thaum peb muaj peev xwm ntxiv thiab xav pub tej yam rau lwm tus.

1. Christmas yog lub caij pub kev hlub.

Peb Leej Txiv Saum Ntuj Ceeb Tsheej thiab peb tus Cawm Seej, Yexus Khetos, yog ob tug uas coj yam ntxwv txog kev hlub zoo tshaj plaws. Ib nqe vaj lug kub qhia hais tias, “Rau qhov Vajtswv hlub neeg ntiaj teb kawg li, nws thiaj txib nws tib Leeg Tub los rau hauv ntiaj teb. Tus uas ntseeg nws Leej Tub, tus ntawd yuav tsis tuag, tiam sis yuav tau txoj sia ntev dhawv mus ib txhis.”²

Peb tus Cawm Seej coj yam ntxwv rau peb kom hlub lwm tus. Nws kuj qhia peb kom hlub Vajtswv thiab hlub peb cov neeg zej zog ib yam li peb hlub peb tus kheej.

Txwj Laug John A. Widtsoe piav hais tias:

“Tej zaum peb yuav tsis to taub lub ntsiab ntawm kev hlub tag nrho, tiam sis muaj tej yam uas qhia tias yog kev hlub tiag tiag.

“Kev hlub yeej muaj lub hauv paus ntawm qhov tseeb. … Kev dag kev ntxias, los yog kev txhaum txoj kev cai coj zoo, yeej qhia tias tsis muaj kev hlub. Kev hlub tuag thaum nyob hauv qhov tsis tseeb. … Yog li ntawd, … tus uas hais lus dag rau tus uas nws hlub, los yog ua ib yam uas tsis yog raws li qhov tseeb, tus ntawd tsis hlub tiag tiag.

“Tsis tas li ntawd xwb, kev hlub yeej tsis ua rau tus uas yus hlub tu siab los yog raug qhov mob. … Kev hlub yeej tsis muaj kev ua lim hiam … ib yam li qhov tsesb yeej tsis muaj ib yam uas tsis tseeb. …

“Kev hlub yog ib lub hwj chim zoo. Kev hlub pab tus uas yus hlub. Yog tias xav tau ib yam dab tsi, kev hlub yuav pub yam ntawd. Yog tias muaj kev qaug zog, kev hlub yuav txhawb yus lub zog. … Kev hlub uas tsis pab dab tsi yog kev hlub cuav los yog kev hlub uas tsis nyob ntev.

“Txawm yog tej yam no yuav qhia tias yog kev hlub tiag tiag, muaj ib yam tseem ceeb dua. Kev hlub yeej yog kev txi pub rau tus uas yus hlub. … Qhov no yog qhov kawg. Khetos twb pub Nws tus kheej, txo Nws txoj sia pub rau peb, Nws thiaj li tshaj tawm txog nws txoj kev hlub rau nws cov kwv tij thiab cov muam tiag tiag.”³

Peb Leej Txiv Saum Ntuj Ceeb Tsheej caw peb txhua tus, uas yog Nws cov me nyuam, kom hlub thiab ua kev txi pub rau lwm tus. Tus Cawm Seej hais tias, “Nej pub rau lwm tus, Vajtswv thiaj yuav pub rau nej.”⁴ “Kuv pub lub hwj chim dawb dawb rau nej, yog li ntawd, nej yuav tsum pub dawb rau lwm tus tsis txhob yuav nqi.”⁵

2. Christmas yog lub caij pub kev pab rau lwm tus.

Tus Tswv thiab tus Cawm Seej twb pab lwm tus neeg, txhawb nqa cov txom nyem, ua rau cov poob siab muaj kev cia siab, thiab nrhiav cov uas poob zoov. Nws ua rau cov dig muag pom kev, kho cov neeg mob thiab cov neeg uas mus tsis taus kev kom mus tau, thiab tsa cov neeg tuag sawv hauv qhov tuag rov qab los.

Nyob hauv lub caij Christmas, kuv xav txog cov tub txib—cov txwj laug, cov viv ncaus, cov laus, thiab cov thawj tswj hwm ntawm qhov chaw tshaj tawm txoj moo zoo nyob thoob plaws lub ntiaj teb—cov uas sawv cev rau Yexus Khetos, pub lawv lub sij hawm thiab pab txhua leej txhua tus. Kuv xav txog cov nus thiab cov viv ncaus no uas rau siab siv sij hawm ntev ua lawv txoj hauj lwm. Thiab thaum lub sij hawm no, kuv xav txog cov txiv neej thiab cov poj niam txhua tus uas ua tub rog kom pab peb nyob nyab xeeb. Ua nej tsaug rau nej txoj kev pab!

Tiam sis txawm yog peb tsis ua hauj lwm rau tus Tswv los yog peb lub teb chaws txhua lub sij hawm, peb muaj cib fim pab lwm tus txhua lub sij hawm. Tej lus zoo thiab tej hauj lwm zoo yeej txhawb nqa thiab pab lwm tus kom lawv zoo siab! Peb Leej Txiv Saum Ntuj Ceeb Tsheej caw peb txhua tus pab lwm tus. Thiab thaum peb ua li ntawd “Vaj ntxwv yuav teb [thiab hais rau peb hais tias], thaum nej pab kuv cov kwv tij no ib tug, txawm yog tus ntawd tsis muaj hwj chim dab tsi li los yog, nej tseem pab nws thiab, qhov uas nej pab li ntawd twb yog nej pab kuv ntag.”⁶

3. Christmas yog lub caij pub kev zam txim rau lwm tus.

Kev zam txim rau lwm tus ua rau peb muaj kev kaj siab lug thiab kev xyiv fab hauv peb lub neej. Thawj Tswj Hwm Heber J. Grant qhia hais tias: “Tsis muaj ib yam dab tsi ntxiv uas yuav ua rau peb muaj Vajtswv tus Ntsuj Plig npaum li … kev ua siab zoo, kev txawj xav, kev muaj siab hlub, kev ua siab ntev thiab kev zam txim. Tsis muaj ib yam dab tsi uas yuav ua rau peb muaj kev xyiv fab npaum li qhov uas peb txaus siab zam txim pub rau peb cov neeg zej zog uas ua txhaum rau peb, thiab tsis muaj dab tsi uas yuav ua rau peb raug txim npaum li qhov uas peb ua peb lub siab tawv kom peb tu siab thiab xav ua pauj thaum peb xav txog cov uas nyob ib puag ncig peb.”⁷

Yog peb xav txais kev zam txim rau peb tej kev txhaum, peb yuav tsum zam txim pub rau lwm tus.

Kev zam txim pub rau lwm tus ua rau peb kov yeej kev npau taws, kev tu siab, los yog kev xav ua pauj. Es leej twg yuav xav muaj tej no thaum lub caij Christmas? Kev zam txim yuav kho peb tej kev mob ntawm sab ntsuj plig thiab ua rau peb nyob kaj siab lug thiab muaj txoj kev hlub uas Vajtswv ib leeg pub tau.

Peb Leej Txiv Saum Ntuj Ceeb Tsheej xav kom peb hloov siab lees txim thiab zam txim pub rau txhua tus—tsis hais peb tus kheej los yog. Txwj Laug Jeffrey R. Holland hais tias: “Txawm nej xav tias nej lig npaum li cas, txawm nej xav tias tsis muaj cib fim ntxiv, txawm nej tau ua yuam kev npaum li cas, los yog nej xav tias nej tsis muaj txuj ci, los sis nej nyob deb ntawm nej tsev neeg thiab Vajtswv npaum li cas los, kuv ua tim khawv tias nej tsis tau mus deb txaus kom Vajtswv txoj kev hlub yuav ncav tsis cuag nej. Nej nyob hauv lub qhov tob npaum li cas los Yexus Khetos txoj kev Theej Txhooj tseem yuav ci ntsa iab ua tau txoj kev kaj rau nej.”⁸

Cov nus thiab cov viv ncaus, nyob hauv lub caij Christmas no, thov kom peb txhua tus pub tej txiaj ntsim zoo tshaj plaws. Thov kom peb ua Vajtwv tsaug ua kev txi pub peb tej khoom ua si uas peb nyiam tshaj plaws—tsis yog tej uas peb twb siv tas lawm. Thiab thov kom peb pub lub txiaj ntsim kev hlub, lub txiaj ntsim uas yog kev pab lwm tus nyob ib puag ncig peb, thiab lub txiaj ntsim uas yog kev zam txim tiag tiag. Vim thaum peb hloov siab lees txim, Ixayees tus Dawb Huv zam txim pub rau peb. Kuv ua tim khawv hais tias Nws muaj txoj sia nyob. Nws yog tus Vaj Ntxwv ntawm txhua tus vaj ntxwv, tus Tub Vaj Ntxwv ntawm txoj Kev Thaj Yeeb Nyab Xeeb, peb tus Cawm Seej, peb tus Txhiv Dim, thiab peb tug Phooj Ywg. Los ntawm Yexus Khetos lub npe, amees.