Nodra Madigi kei na iTavi na Qasenivuli ni VVL ena ika 21 ni Senijiuri

Kemuni na taciqu kei na ganequ, vinaka vakalevu na nomuni igu matalia mo ni vakalougatataka nodra bula na itabagone ena Lotu.

Au a raica lesu ena dua na gauna qai oti wale toka na ivola vou Ena Vuli vakakina ena Vakabauta: Duanadrau na Yabaki ni Semineri kei na Inisitute ni Lotu. Sa dua na italanoa ni veivakadrukai! Niu vakawilika voli, au raica na itavi erau vakaitavitaki rau kina na tukaqu vakarua o Joseph F. Smith kei na tukaqu o Melvin J. Ballard ena kena tauyavu ka vakarabailevutaki na vuli ena Lotu.

Nikua au veiqaravi tiko ena vanua erau a dau veiqaravi tu kina ena dua na gauna ena vuku ni noqu itavi vei kemuni. Mai na 1985, a donumaki au kina na madigi dokai meu veiqaravi ena 14 na yabaki ena Matabose ni Vuli, ka 7 na yabaki oqori au a tiko kina ena Komiti Liu, ka voleka ni 4 na yabaki oqori au a kena jeameni.

Ena noqu gauna ena Matabose, au a vakatoroicaketaka na noqu vakavinavinaka levu kina iVakarau ni Vuli ni Lotu. Ena bogi nikua au na vosa ena vukudra kece na itubutubu, na tubunigone kei na tubudra vakarua ena Lotu oqo ena noqu vakavinavinaka vei kemuni kece na qasenivuli kei kemuni na iliuliu kei na nomuni matavuvale ena nomuni yalodina ena veiqaravi. Na veika sa rawata na VVL ena 100 na yabaki sa oti oqo e veivakurabuitaki. Ia, au sa nanamaki tu ki na 100 na yabaki mai oqo kei na ivakarau e rawa ni o ni vukei ira kina na nomuni gonevuli me ra sotava na bolebole dauveiveisau ni ika 21 ni senijiuri.

Ena dua na nodra soqoni ni veituberi na Vakaitutu Raraba, a veivakavulici kina o Peresitedi Gordon B. Hinckley ena ulutaga “vakasavasavataka tiko na ivunau ka vakataudonutaka na mua ni Lotu.” E a kaya kina, “Sa dodonu me da qaqarauni vakavinaka. Sa dodonu me da qarauna me da kakua ni gole tani [mai na ilakolako]. Ena noda sasaga me da rairai vou ka bulabula ka duatani, e rawa ni da vakavuvulitaka na veika e sega ni salavata kei na ivunau taumada ni Lotu i Jisu Karisito ka sa vakalesuimai. … Ka vinaka me da yadrava vinaka. … Sa dodonu me da ivakatawa ena vale cecere.”

Ni da tosoya ki liu na vuli ena Lotu ena ika 21 ni senijiuri, o ni na gadreva yadua mo ni vakasamataka kevaka o gadreva mo cakava eso na veisau ena nomu vakavakarau mo veivakavulici, na ivakarau ni nomu veivakavulici, kei na cava mo vakavulica kevaka mo taracake na vakabauta tudei ena nodra bula na noda itabagone vakamareqeti.

Sa oti na gauna e dau taro vakadodonu kina e dua na gonevuli ka sauma yani o qasenivuli, “Kua ni leqataka qori!” Sa oti na gauna me dau tukuna cake mai e dua na gonevuli e dua na kauwai dina qai wasea yani o qasenivuli nona ivakadinadina me kena isau, kena inaki me levei kina na leqa. Sa oti na gauna era dau taqomaki kina na gonevuli mai vei ira na tamata era dau vakacacana na Lotu. Kalougata, ni sa vakarautaka na Turaga na ivakasala donu oqo ka na donu ena veigauna kecega: “Ia me vaka ni sa sega ni taucoko sara na nomudou vakabauta, dou gumatua sara mo dou veivakavulici vakai kemudou ena veika mo dou yalomatua kina; dou gumatua sara mo dou kila ka; io ena vuli kei na vakabauta.”

Oqo e yaga sara ena gauna oqo baleta e sega ni o ira kece na nomu gonevuli sa veiganiti na vakabauta e tu vei ira me ra sotava kina na veibolebole e tu mai liu vakakina ni vuqa vei ira era sa vakila tiko mai na initaneti na kaukauwa veivakacacani eso ni vuravura vakayago vou oqo. Sa vakarabailevutaka tiko ga na initaneti na kena revurevu e vuravura raraba me yacova yani voleka ni veivale kece ki na ligadra kei na nodra vakasama na nomuni gonevuli.

E rawa ni o vukei ira na gonevuli ena nomu vakavulica vei ira na kena ibalebale me ra cokovata taka na vuli kei na vakabauta ni ra vuli voli. Vakavulici ira ena nomu vakaraitaka na maqosa kei na iwalewale oqo ena kalasi.

E dikeva o Peresitedi Harold B. Lee:

“Keimami na vakananuma vei kemuni ni kena rawati na kilaka mai na vakabauta e sega ni gaunisala rawarawa ni vuli. Ena vinakata na sasaga kaukauwa sara kei na segati tikoga ni vakabauta. …

“Me vakalekalekataki ga, na vuli ena vakabauta e sega ni nodra cakacaka na tagane [se yalewa] vucesa. E dua a kaya vaqo, ni iwalewale oqori e gadrevi kina me vagolei taucoko na yalo, me vakayagataki na kaukauwa taucoko ni vakasama vakatamata ka semati ira vua na Kalou—me vakarautaki na isema dodonu. Ena gauna ga oqori sa na qai yaco mai kina na “kilaka ena vakabauta.”

Na kilaka ena vakabauta ena vakavurea na ivakadinadina savasava, na ivakadinadina savasava e tiko kina na kaukauwa ni veivakabulai, me vaka e vakaraitaki ena tolu na italanoa leleka oqo.

iMatai, a biuta na nona itikotiko mai Maine o Phoebe Carter me laki duavata kei ira na Yalododonu mai Ohio ena 1830 vakacaca. A nanuma lesu, “Era qoroya na noqu itokani na noqu vakatulewa, vakakina o au, ia e dua na ka e lomaqu e vakauqeti au tiko. Na rarawa nei tinaqu ena noqu biubiu mai vale e voleka sara niu sega ni taura rawa, kevaka a sega na yalo o ya e lomaqu keu a sa suka.”

A muria o Phoebe na parofita ka laki duavata kei ira na Yalododonu mai Ohio ka yaco yani ki Utah, na vanua a laki mate kina me vaka e dua na Yalododonu Edaidai yalodina, ka vakaivua vata kei na watina na Peresitedi ni Lotu o Wilford Woodruff.

Na italanoa tarava oqo e yaco mai na kena itukutuku o Marion G. Romney.

Ni gonevuli voli ena koliji, sa vakatulewataka o Marion ni sa na sega ni rawa ni laki kaulotu ena vuku ni ituvaki ni bula vakailavo ni nona matavuvale. Ena dua na gauna, a rogoca na vosa nei Elder Melvin J. Ballard. E tukuni ena itukutuku oya, “E sega tiko ni kila o [Marion] ni sa vakarau me veisau vakadua, ena dua ga na gauna lekaleka, na nona bula.”

E tomani ena italanoa: “[Na tamai Marion] sa tukuna vei iratou na luvena … na levu ni duidui vei rau e rua na tamata e dua e bula voli ena veivakauqeti ni Yalotabu kei na dua e sega, me vaka na kedrau duidui e dua na vunikau bula kei na dua na duriduri mate. Sa qai taucoko kina ena imatai ni gauna … na nona kila o Marion se dau vakacava na veivakauqeti. A vakila na yalona e dua na veivakauqeti veilauti, totoka. … Se bera vakadua ni tarai vakalevu na yalona me vaka ena gauna oqo, ni vakarorogo ki na nona vosa na iApositolo vou duadua oqo. …

A vakauqeti vakaukauwa … na cauravou o Marion. Na iserau ni kena irairai na iApositolo kei na savasava ni nona ivakadinadina e vakasinaiti koya ena dua na gagadre sega ni tabonaki me laki kaulotu. … E kila o koya ni dodonu me na vakadaroi mada na tosoi ni vuli.”

Sega ni dede, sa lako ki Ositerelia o Marion, ka laki veiqaravi kina ena yalodina. E muri, a qai yaco me dua na iApositolo qaqa ka lewe ni Mataveiliutaki Taumada.

Na iotioti ni talanoa a tukuna o Peresitedi Boyd K. Packer me baleta na veivakauqeti ni dua na qasenivuli vei William E. Berrett. Na qasenivuli qase a saumaki mai ki na Lotu mai Norway ka lailai sara nona kila na vosa Vakavalagi. Ia, e dina ni tu nona malumalumu na qasenivuli, a nanuma lesu o Peresitedi Packer ni a “vakdinadinataka o Baraca Berrett ena vica na gauna ni, ‘Rawa ni vakatakatai na ligada ena katakata ni nona vakabauta.’”

E muri, a qai yaco o William me liutaka na semineri, inisitute, kei na veikoronivuli ni Lotu.

Me baleti iratou o Phoebe, Marion, kei William, na rogoci kei na rawati ni dua na ivakadinadina savasava sa yaco me yavu ka veisautaki kina vakadua na nodratou bula. E rawa ni vakakina vei ira na nomu gonevuli. Ia ni da raica tu na veika dina sa yaco tu e vuravura, ena sega beka ni dau rauta e veigauna na ivakadinadina savasava. O Phoebe, Marion, kei William eratou a savasava ka savavuka, galala mai na iyaloyalo vakasisila kei na veika vakavuravura, ni ratou dabe vata kei ira na daukaulotu, qasenivuli, kei ira na iliuliu. E rawa na kena curuma na Yalotabu na yalodra malumu ka savavuka.

Nikua sa duidui sara vakalevu na italanoa, me vaka ni so beka vei ira na nomu gonevuli sa takavi ira oti beka na iyaloyalo vakasisila kei na veika vakavuravura ni se bera ni ra yacova yani na nomuni kalasi.

Ena dua ga na tabatamata sa oti se yala wale toka ga na veika e rawa ni ra raica na noda itabagone me baleta na noda itukutuku makawa, ivunau, kei na noda ivakarau ena veiyaragi ga e dau tabaka na Lotu. E vica wale sara na gonevuli era dau raica na veika tale eso. E vakavuqa, ni vakarurugi tu na nodra bula na noda itabagone.

Na noda lewenivuli ena gauna oya, e dina ni vinaka na kena ibalebale, e sega ni vakarautaki ira na gonevuli me baleta na gauna nikua—na gauna sa rawa kina vei ira na gonevuli me ra raica vakatotolo e voleka ni veika kecega me baleta na Lotu mai na veiyasana kecega e rawa. Nikua, na veika era raica ena nodra iyaya veikauyaki e rawa ni bolea nodra vakabauta me vaka na kena rawa ni vakavinakataka cake nodra vakabauta. E levu na noda itabagone era kila vinaka cake na Google mai na kosipeli, era kidakida cake ki na initaneti mai na veivakauqeti, ka vakaitavi vakalevu cake ena iVolamata mai na vakabauta.

Ena veibolebole oqori, e sa vakadonuya na Matabose ni Vuli e dua na vakasama vou ena semineri na Doctrinal Mastery (Bulataki ni Vakavuvuli vakalotu). E taraicake tiko mai ena veika sa vakayacori tiko ena Scriptural Mastery (bulataki ni vakavuvuli vakaivolanikalou), na vakasama vou oqo ena vakanamata ki na taraicake ka vaqaqacotaki na nodra vakabauti Jisu Karisito na gone ka vakaiyaragitaki ira ka vakalevutakacake na nodra rawa ni bulataka na kosipeli ena nodra bula. Ni ra goleva na ivolanikalou kei na nodra vosa na parofita, era na vulica mera cakava ena vakabauti Karisito mera rawata na kila ka vakayalo ka kila vinakacake na Nona kosipeli. Ena qai nodra na madigi mera bulataka na ivakavuvuli i Karisito kei na kosipeli ena veitaro kei na ibolebole era rogoca ka raica ena veisiga ena nodra ilawalawa kei na veimaliwai raraba.

Na vakasama vou oqo e veivakauqeti ka veidonui vinaka. Ena dua na veivakayarayarataki totoka vei ira na noda itabagone. Ia, na rawaka ni Doctrinal Mastery (Bulataki ni Vakavuvuli vakalotu), kei na veiparokaramu ni vuli ena VVL, ena vakatau vakabibi sara ga vei iko.

Ena veibolebole oqori, na cava beka na nomuni madigi kei na itavi me vaka ni o ni qasenivuli ni VVL ena ika 21 ni senijiuri? E matata, ni o ni lomana na Turaga, Nona Lotu, kei ira nomuni gonevuli. Sa dodonu talega mo ni dau wasea na ivakadinadina savasava ena yalodina ka wasoma. Me kena ikuri, me vakalevu cake mai na veigauna kecega me tekivu mai na ivakatekivu era gadreva talega na nomuni gonevuli me ra vakalougatataki ena nodra vulica na ivunau se na itukutuku makawa ena vuli kei na vakabauta ka salavata kei na ivakadinadina savasava me rawa ni ra sotava kina e dua na saumaki yalomatua ka tudei ki na kosipeli kei na solibula ena gauna ni bula taucoko vei Jisu Karisito. Na saumaki yalomatua ka tudei e kena ibalebale ni ra na “toka ga ena boto ka tautauri matua” ena nodra bula taucoko.

Mo kila na lewe vakaivunau kei na itukutuku makawa ni ivolanikalou kei na veituvaki ena ivolanikalou kei na keda itukutuku makawa, o na gadreva mo vuli mai na “ivola vivinaka,” me vaka e dusimaka na Turaga. Na “ivola vivinaka” e wili kina na ivolanikalou, na nodra ivakavuvuli na parofita kei na iapositolo ni gauna oqo, kei na ivola ni vuli vinaka duadua ni YDE era tu. Mai na nomu sasaga gugumatua mo vulika ena vuli kei na vakabauta, ena rawa kina mo vukei ira na nomu gonevuli me ra vulica na maqosa kei na ivakarau ni rai e gadrevi me ra kila kina na duidui ni itukutuku nuitaki ka na laveti ira cake kei na dina veimama kei na ivakadewa cala ni ivunau, itukutuku makawa kei na ivalavala ka na kauti ira sobu.

Vakavulica vei ira na bolebole e tu e matadra ni ra vakararavi ki na Initaneti me sauma na veitaro bibi me baleta na tawamudu. Vakananuma vei ira ni a sega ni tukuna o Jemesa, “kevaka e lailai na vuku vua e dua vei kemudou, mo Google

O ira na tamata yalomatua era sega ni dau vakararavi ena Initaneti me kunei ka wali na dredre vakayalo, vakasama, kei na mate vakayago, vakabibi na kena e rawa ni vakaleqai kina na bula. Ia, era na vakasaqarai ira na kenadau ena qaravi bula, o ira era vakavulici ka vakadonui mai vei ira na matabose kilai ni bula kei na matanitu. Ena gauna sara mada ga oqori, o ira na tamata yalomatua era dau vaqara e dua na ikarua ni vakasama.

Kevaka o koya qori na sala dodonu me muri me kunei na iwali ni leqa vakayalo, vakasama, kei na bula vakayago, sa na ganita sara vakalevu cake kevaka e baleta na bula tawamudu. Kevaka e rawa ki na dua na ka me vakaleqa noda bula vakayalo, na isema vakamareqeti ni matavuvale, kei na noda lewena na matanitu, sa dodonu me da vaqarai ira na iliuliu ni Lotu vakasama vinaka ka yalodina me ra vukei keda. Kevaka e gadrevi, sa dodonu me da kerei ira era sa rawata na kena vuli, kila, ka ra kenadau me ra veivuke.

Oqo saraga na ka au dau cakava niu gadreva e dua na isau ni noqu taro kau sega ni rawa ni sauma vakataki au. Au dau vaqara na veivuke mai vei ira na noqu iTokani iLiuliu ena Kuoramu ni Le Tinikarua kei ira tale eso era kenadau ena itukutuku makawa ni Lotu kei na ivunau.

O kemuni mo ni liu, ena taudaku ni nodra matavuvale na nomuni gonevuli, mo ni vakaraitaka na ivurevure dei ena veiulutaga ka sega soti ni kilai vinaka se sega ni matata me rawa kina ni ra vakarautaka na nomu gonevuli na veika era rogoca se qai wilika e muri mai na veika o sa vakavulica oti vei ira.

O kila ni da dau culai ira na noda daukaulotu vakamareqeti ni se bera ni gole yani ki na buturara ni kaulotu me ra taqomaki kina mai na mate veitauvi ka dau rawa ni vakaleqai ira se vakamatei ira. Ena dua na iwalewale tautauvata, yalovinaka ni bera ni ko vakatalai ira yani ki vuravura, culai ira nomu gonevuli ena nomu vakarautaka na ivakadewa dina, vakasamataki vakavinaka, ka dodonu vinaka ni ivunau ni kosipeli, keda itukutuku makawa, kei na ulutaga ka dau tauricala ena so na gauna ni bera ni da talai ira yani ki vuravura.

Meu tukuna mada e vica na ulutaga ka sega soti ni kilai vinaka se dau veiletitaki, au tukuna tiko na vakamau vakalevu, vatu ni daurairai, itukutuku duidui ni iMatai ni Raivotu, na iwalewale ni kena vakadewataki na iVola i Momani se na iVola i Eparaama, na veika baleta noda tagane se yalewa, matatamata kei na matabete, se na Tinada Vakalomalagi.

Na sasaga ni nodra culai na noda itabagone e nomuni vakalevu na qasenivuli ni VVL. Ni tiko na vakanananu oqori ena noda vakasama, vakasaqara na gauna mo vakasamataka na nomu madigi kei na nomu itavi.

O ira na iliuliu ni Lotu nikua, ni ra kila vinaka tu na sega ni vakaiyalayala ni noda raica na itukutuku, era sa sasaga tiko ena nodra igu me vakarautaki na itukutuku kei na kilaka dodonu vakavinaka me baleta na Veivakalesuimai. E dua na ivakaraitaki uasivi ni sasaga oqo na 11 na italanoavolai ni Ulutaga Vakosipeli ena LDS.org ka vakarautaka na ivakavakadewa vakatautauvatataki ka nuitaki ni ka dina me baleta na veiulutaga vaka-Lotu sega ni matata.

E bibi mo kila vinaka na lewe ni italanoa oqo me vaka ga na nomu kila na daku ni ligamu. Kevaka e tu kina nomu vakatataro, yalovinaka ka taroga e dua sa vulica oti ka kila vinaka. “Dua tale na kena itukutukuni, “mo kilaka, io ena vuli kei na vakabauta” ena nomu kila vinaka na lewe ni italanoa ni lewe ni italanoa oqo.

Sa dodonu talega mo kila na mataveilawa ni Joseph Smith Papers kei na iwasewase ni itukutuku makawa ni Lotu ena LDS.org kei na ivurevure tale eso mai vei ira na vuku ni YDE.

Me tiko na yalogalala ena vuli kosipeli kei na icula vakayalo mai na vulici vakavinaka ni ivunau kei na itukutuku makawa, qai salavata kei na ivakadinadina qaqa, sai koya na wainimate vinaka duadua e tu vei keda me vukei ira na gonevuli me ra levea ka/se sotava na taro se vakatitiqa kei na veiletitaki ni vakabauta e rawa ni ra sotava ena itabayabaki vakaitukutuku.

Ena nomu sasaga vakaqasenivuli mo kila vinaka na keda itukutuku makawa, ivunau, kei na ivalavala—me vinaka cake mai na gauna oqo—o sa na tuvakarau kina mo vakarautaka na isaunitaro vakasamataki vakamalua, qarauni vinaka, ka vakauqeti vei ira na nomu gonevuli.

E dua na sala mo kila kina na taro e tu vei ira na nomu gonevuli sai koya mo vakarorogo vinaka vei ira.

Na imatai ni neirau goneyalewa lailai, ni se qai yabaki lima, a kaba mai ki sagaqu niu wili pepa tiko. A tukuna tiko mai vei au e dua na ka bibi vua, kau qai sega tiko ni vakarorogo. Qai tatara cake mai na ligana lalai, dreta sobu na niusipepa, taura na yasa ni mataqu ruarua e ligana, raica vakadodonu mai na mataqu, ka kaya, “Tata, iko sega ni vakarorogo tiko vei au!” E dina o koya—kau cala o au niu sega ni vakarorogo vua. Na qasenivuli vinaka kece e dodonu me ra vakarorogo vakavinaka.

Me ikuri ni nomu vakarorogo vei ira nomu gonevuli, vakauqeti ira ena kalasi se ni drau sota taurua me taroga vei iko na veika baleta na ulutaga cava ga.

E dua vei ira na taro bibi ena taroga na nomu gonevuli sai koya “Na cava na vuna?”

Ni torogi ena yalodina me kila, “Na cava na vuna?,” e dua na taro vinaka. Sai koya na taro era dau vinakata na daukaulotu me ra taroga na nodra dauvakadidike. Na cava na vuna eda mai tu kina eke? Na cava na vuna e yaco kina vei ira na tamata vinaka na ka ca? Na cava na vuna me da masu kina? Na cava na vuna me da muri Karisito kina? E vakavuqa na taro, cava na vuna e dau vakavuna na veivakauqeti kei na ivakatakila. Ni da kila na ituvatuva ni veivakabulai ni Tamada Vakalomalagi ena vukea noda sauma e vuqa na taro “na cava na vuna”. Au na qai tukuna tale eso na ka me baleta na tikina oqo ena vica na miniti mai oqo.

Oqo e dua na iotioti ni idusidusi me baleta na saumi taro. Sa ka bibi me ra vakavulici na nomuni gonevuli ni dina ga ni dau vakarautaka na kosipeli e vuqa, kevaka e sega ni o ira kece, na isau ni veitaro bibi duadua ni bula, eso na taro ena sega ni saumi rawa ena bula oqo baleta ni sega vei keda na itukutuku e gadrevi me saumi kina vakadodonu na taro. Me vaka eda vulica ena Jekope: “A ka levu ka veivakurabuitaki na cakacaka ni Turaga. Sa sega ni kilai rawa na titobu ni nona veika vuni; ka sa sega ni kilai rawa na lomana. Ia sa sega na tamata e kila rawa na lomana kevaka sa sega ni vakatakila vua ko Koya.”

Ia, oqo me dua mada na ivakasala ni qaqarauni: Yalovinaka ka vakadinadinataka ni rawa ni yaco mo nanuma, me vaka e vuqa vei ira nomu gonevuli, ni o iko e dua na kenadau ni ivolanikalou, na ivunau, kei na itukutuku makawa. E dua na vuli e vakatakilai kina ni “kena levu ga ni nodra nanuma na tamata ni ra kila e dua na ulutaga na nodra rawa ni kaya ni levu cake na ka era kila, eso na gauna e rawa sara ni tukuni ni ra kila eso na ka e sega ni dina kei na itukutuku buli.”

Na veitemaki oqo “na vakilakila,” sa dodonu mo ni levea sara na qasenivuli ni VVL. E sega sara ga ni dua na kena leqa kevaka eda kaya, “Au sega ni kila.” Ia, ni sa tukuni, sa nomu itavi mo vaqara na isaunitaro vinaka duadua e rawa ni kunei ki na veitaro vakasamataki vakavinaka era dau taroga na nomu gonevuli.

Ni o vakavulici ira na nomu gonevuli ka sauma na nodra taro, au vakasalataki kemuni mo ni kakua ni solia yani na italanoa rogo vukavuka ni vakabauta se sega ni vakadeitaki se vakasama, ivalavala kei na ivakamacala sega ni vakadeitaki ka makawa ni noda ivunau. E vinaka me da dau vakamatautaka na vulica na nodra vosa na parofita bula kei na iapositolo; mo kila vinaka tiko na veika e yaco tiko ena Lotu ena gauna oqo, na lawatu, kei na itukutuku ena mormonnewsroom.org kei na LDS.org; ka vakadidike ena nodra cakacaka na vuku kilai, dau vakasama vakamalua, ka yalodina ni YDE mo vakadeitaka ni o sega ni vakavuvulitaka tiko na veika e sega ni dina, makawa, se rairai duatani ka matalia.

O ira era a vulica me baleta na vakilakila era raica rawa ni “ivalavala ni vakilakila, vakauasivi vei ira era dau kaya ni ra kenadau, e rawa ni yaco me ra vakayalolailaitaki ira na tamata mai na nodra vakavulici ira ena veivanua era nanuma ni ra sa kila vinaka.”

Na ivukevuke ni peresitedi ni koronivuli na BYU e dikeva rawa, “Ni da kenadau ena dua na ulutaga e rawa ni vakavurea na nanamaki vei ira na gonevuli kei na itokani vakacakacaka era dau vakarorogo matua kina veika eda tukuna. Ia, kevaka e sega na yalodina ki na vuli tikoga eda na yaco me dua na dauvakilakila, ka sega ni dua e taleitaka e dua sa kila na ka kecega.’”

Au tokaruataka na ivakasala nei Peresitedi Hinckley, “Sa dodonu me da qaqarauni vakavinaka. Sa dodonu me da qarauna me da kakua ni gole tani [mai na salatu].”

Me ikuri ni noda yaco me da vuli voli ena noda bula taucoko, sa dodonu mo cakava tale tikoga na veika ena nomu bula ka na vakatara na Yalo Tabu me cakacaka e lomamu. Na veika oqori, e oka kina na masu ena yalodina e veisiga, na lolo yalodina, vulici ka vakananumi vakatitobu e veigauna ni ivolanikalou kei na nodra vosa na parofita bula, cakava me ka rekitaki na Siga ni Vakacecegu, vakayagataka na sakaramede ena yalomalumalumu ka dau nanuma tikoga na iVakabula, sokalou ena valetabu ena kena levu ga e rawa, ka qai yacovi ira yani na vakaleqai, dravudravua, kei na galili—o ira era voleka vei iko kei ira ena veiyasai vuravura.

Noqu itokani vakaqasenivuli, mo sotava vakavinaka na nomu madigi kei na nomu itavi, sa dodonu mo bulataka tiko na veika o vunautaka!

Mo yaloqaqa ena nomu kerea na ivakasala kei na veivakadodonutaki mai vei ira o vakabauta—na watimu, iliuliu ni matabete, se supavaisa. Taroga vei ira na vanua e rawa ni o vakavinakataka cake ena nomu bula vakatisaipeli. Oqo e bibi cake sara vei ira na noda cakacaka tudei, o ira era tokoni tiko ena ilavo bibi ni ikatini ni Lotu. Mo levea na veika kecega ena vakasava tani na Yalotabu.

Me kena ikuri, meu sa na vakatututaka mada mo dau vakatarogi iko ga vakawasoma—ena nomu railesuva na 2 Nifai 26:29–32, Alama 5:14–30, kei na Vunau kei na Veiyalayalati 121:33–46, me vukea na kilai ni mataqali veivakatovolei e rawa ni da sotava kece. Kevaka me na gadrevi me veisau e dua na ka ena nomu bula, sasagataka sara mo cakava.

Levea na veitemaki mo taroga na nodra inaki o ira o ni cakacaka vata. Ia, dikeva vakatitobu na yalomu ka vakasaqaqara ena nomu gagadre kei na nomu nakinaki. Oqori na gauna ena qai rawa ni veisautaka kina na yalomu na iVakabula ka veidutaitaka na nomu gagadre kei na inaki ki na Nona.

O ira na isausauvou e dodonu me ra kila, ciqoma, mareqeta, ka vakaitavi ena ituvatuva ni veivakabulai ni Kalou. Na kilai ni ituvatuva ena solia vei ira na kila vakalou me ra raici ira kina ni ra luvena tagane ka luvena yalewa na Kalou ka vakarautaka e dua na iloilo me ra kila kina ni ivunau, ivalavala, kei na lawatu kecega ni Lotu.

Ni da qasenivuli ni VVL nikua, sa dodonu mo ciqoma na madigi kei na itavi mo vakavulici ira na isausauvou ni ika 21 ni senijiuri ena ivakavuvuli dodonu me baleta na ituvatuva, wili kina na kena vakadonui vakalou na ivunau ni vakamau kei na itavi ni matavuvale ni matavuvale me vaka sa tabaki tu ena iVakaro ki Vuravura Raraba.

Na ivunau ni vakamau tawamudu kei na matavuvale sa tiki bibi ni ituvatuva ni bulamarau ni Kalou. E oka kina na noda dui matavuvale sa vauci ena valetabu ni ra tiki ni nona matavuvale tawamudu na Tamada Vakalomalagi ena matanitu selesitieli. Baleta ni semati vakadodonu sara ga ki na Nona matavuvale kei ira na Luvena vakayalo, eda vakavulici ena iVakatekivu “na tagane kei na yalewa sa buli rau ko koya” sa qai vakaroti rau ko Tata Atama kei Nana Ivi ko Koya me rau “tubu ka lewevuqa, ka vakatawai vuravura.”

Sa tukuni oti ni ituvatuva ni veivakabulai e tekivu ka tini ena matavuvale. Dina sara, na itekivu ni matavuvale a yaco mai na vuravura taumada, na vanua eda a bula kina vakalewe ni nodrau matavuvale na noda iTubutubu Vakalomalagi. Na kena itinitini, na yalayala ena noda dui matavuvale kei na isema ni veilomani ena sega walega ni tomani tikoga, ena tubu me lewelevu ena iwalewale ni vakatubukawa.

Na tikina e semata vata kece—ka vakatau kina na ituvatuva ni Kalou kei na noda dui icavacava ka yavutaki kina na veika kece sara—na noda iVakabula o Jisu Karisito. Na Nona isoro ni veivakaduavatataki e rawa kina na veika kecega, oka kina, ka sega walega ni dua na vakamau kei na matavuvale dau veilomani, veikauwaitaki, ka tawamudu.

E vakavulica vei keda na Turaga ni sega ni dua na tamata sega ni vakawati, veitalia na nona buladodonu, me na rawata na veika sa vakarautaka na Tamada Vakalomalagi baleti ira kece na luvena. Ni dua ga na tamata ena veimama tu ga, ka sega ni rawa ni laki bula ena itikotiko cecere duadua ni matanitu silesitieli.

Dodonu mera kila na nomu gonevuli ni inaki ni bula vakayago me rawa ni da yaco me vaka na Kalou ena noda rawata na yago, vakayagataka na galala ni digidigi, ka vakaitavitaki ena itavi a dau nodrau tu ga na itubutubu vakalomalagi—itavi ni tagane vakawati, yalewa vakawati, ka itubutubu.

Era sa veivakadeitaki na parofita vei ira era bulakilikili ka dau vakararavi vei Jisu Karisito ka sega ni se vauci ena ivau ni vakawati se sa vakaluveni ena bula oqo ena donumaki ira na madigi oqori ena vuravura sa bera mai.

Vakavulica vei ira nomu itabagone ni ena nona Lotu na Turaga, e tu kina na tikina me baleta na tamata kece, me ra sokalou, veiqaravi, ka tubucake vata ni da veitacini ka veiganeni ena kosipeli. Vakananumi ira ena ka e vakavulica o Liai ni inaki ni Kalou ka inuinui baleti ira kece na luvena ena rawa ni vakaoqo: “Sa lutu ko Atama me sucu kina na tamata; ia sa sucu na tamata me rawata na marau.”

E vinakata na Tamada Vakalomalagi me da ciqoma na Nona ivakamacala ni vakamau ka rokova na imatai ni Nona ivakaro me da “tubu me lewevuqa ka vakatawa”—sega walega me vakataucokotaka na Nona ituvatuva ia me kunea talega na marau ka nakiti me solia na Nona ituvatuva vei ira na Luvena tagane kei na yalewa.

E sega ni o ira ga na lewenilotu era vakadinadinataka na ivakavuvuli oqo. Na dauvolavola ena New York Times o David Brooks e dikeva, “Era na sega ni vinaka cake na tamata ni soli vei ira vakalevu na galala me ra cakava ga na ka era vinakata. Era na vinaka cake ni ra vakavolivoliti ena veika me ra cakava ka levu cake mai na ka era taleitaka—yalodina ki na matavuvale, Kalou, cakacaka kei na matanitu.”

Ni o qasenivuli ena Lotu, vakavulica vei ira na itabagone mera kila na ituvatuva ni Kalou ena yaco na bula marau ka na yaco mai vei ira kece na luvena. Vukei ira mera kila, mera vakamareqeta, mera vakaitavi kina, ka taqomaka. Mai na noqu sa veiqaravi tiko ena 40 na yabaki ena Vakaitutu Raraba au sa dau kauwai ena levu ni lewe ni noda Lotu gone kei na qase ka ra sega sara ga ni kila na ituvatuva baleta na nodra icavacava vakalou.

Ia, kemuni na noqu itokani qasenivuli, meda vasaqara ka vakamareqeta na madigi ni kena vakamacalataki vakaivunau ka vakakina na kena vakayalo na vuna eda vakabauta kina ni noda kila na ituvatuva levu ni marau na Kalou ena sauma e levu na taro ka tekivu tiko ena “cava na vuna” kevaka mena tarogi vei keda. Na noda vakaraitaka na vakabauta me baleta na bula taumada ka da bula kina vakaluvena vakayalo e dua na Tamada Vakalomalagi kei na dua na Tinada Vakalomalagi ena rawa kina ni da vakamacalataka na vuna e buli kina na vuravura. Dua na inaki ni mai bula vakayago sa ikoya na noda rawa ni bulataka na bula vakamatavuvale, ia e da na bula vaka itubutubu ka sega ni vaka na gonelalai. Vakamareqeta na veika o kila baleta na ivunau kei na inaki ni Tamada Vakalomalagi baleta nona ituvatuva ni bula marau tawamudu. Tomana tikoga nomu vakavulica.

Meu tinia ka vakalekalekataka, mai na vosa nei Elder Kim B. Clark vei keda ena yakavi nikua, eda vulica ni o kemuni o ni qasenivuli ka talai mai vua na Kalou, vakasinaiti ena vakabauta, vakanuinui, yalomalumalumu, kei na loloma.

Na veika au sa wasea vei kemuni na:

• Vakavulici ira na gonevuli me ra vakaduavatataka na kilaka ena vuli kei na vakabauta ena ivakadinadina savasava. Vakavulici ira me ra vodo tikoga ena waqa ka tautauri matua.

• Vakavulica vei ira na gonevuli me ra qarauna nodra iyaya veikauyaki ka vakanamata ki na nodra dau semati ira vakalevu cake ki na Yalo Tabu mai na Initaneti.

• Culai ira na gonevuli ena dina ni yavu ni veivakabulai ka na laurai ena kosipeli i Jisu Karisito.

• Mo kenadau ena lewe ni italanoa volai ni Ulutaga Vakosipeli.

• Nanuma tiko ni “Na cava na vuna?” e dua na taro vinaka ka na veimuataki yani kina kilai ni kosipeli.

• Kakua ni dau vakilakila, ka kakua ni rerevaka mo tukuna, “Au sega ni kila.”

• Yaco mo vuli ena bula taucoko.

• Vakasaqara na ivakasala kei na veivakadodonutaki, mai vei ira o dau vakararavi kina.

• Vakasamataka mo vakayacora na veivakatarogi ena veigauna me laurai kina na bula vakayalo yalodina kei na vakaibalebale ni veiqaravi.

• Vakavulica ni ituvatuva ni marau e tekivu ka cava ena matavuvale. Nanuma tikoga na yavu ni veivakabulai ena veigauna kece.

• Vakavulica ni vakamau kei na matavuvale e kauta mai na marau tawa vakaiyalayala.

• Nanuma tiko, ni vakaduavatataki na kilaka ena vuli, ena vakabauta, kei na ivakadinadina savasava ena kauta mai na saumaki dina ka tudei.

• Me na tiko sara e cake, na vakabauti ni Veisorovaki ni Turaga o Jisu Karisito ena gadrevi me vaqaqacotaki keda vakayalo kei na tubucake.

Kemuni na noqu itokani qasenivuli, me vakalougatataki kemuni yadudua na Kalou. Na icolacola cava ga o ni colata voli me na kau laivi. Mo ni na sotava na marau kei na vakacegu ka na yaco mai ni ko ni sa kila ni nomuni veivakavulici ko ni sa tara na bula ko ni sa laveta cake na nona bula e dua na luvena na Tamada Vakalomalagi ka tubera yani kina salatu ni lesu tale ka laki bula ena nona iserau. Au sa laiva vei kemuni na noqu ivakadinadina kau vakadinadinataka ni sa tiko vei keda na taucoko ni kosipeli tawamudu nei Jisu Karisito ka sa vakalesuimai vua na Parofita o Josefa Simici. Na taucoko ni kosipeli sa tu oqo e ligada. Meda sa na tugana kina noda vakasama vakakina ki yaloda ka vakavulica ena kaukauwa. Me na vakalougatataki keda yadua na Kalou sa noqu masu kei na veivakalougatataki, ena yaca i Jisu Karisito, emeni.