Qasenivuli e Lako Mai vua na Kalou

Kemuni na taciqu kei na ganequ, au vakavinavinaka niu tiko rawa kei kemuni ena bogi nikua.Au via vakaraitaka ga noqu vakavinavinaka vei kemuni kece na qasenivuli kei ira na watimuni kei ira kece era dau tokoni ira na dau veivakavulici. Dua tiko na vugoqu tagane ka dau vakavulica na seminari ena mataka lailai kau kila na solibula kei na yalo dina ena gadrevi me qaravi na vakavulici ni kalasi ena mataka lailai kau sa raica na veika lelevu era sa cakava na qasenivuli vei ira na itabagone tubucake tiko mai wili kina o ira na makubuqu. Me vakalougatataki kemuni na Kalou ena itavi o ni qarava tiko.

Ena Okosita sa oti au a vosa vei kemuni me baleta na noda gagadre me da tucake yani ki na itavi e noda. E gadrevi me da vakavulici ira na isausau vou vakatitobu ka vakalevu me vaka eda se bera vakadua ni bau cakava. Sa kena ibalebale qori ni dodonu me da vinaka cake ka cakava vakavinaka cake me vaka eda se bera vakadua ni bau cakava e liu.

Niu vakasamataka na ivakaro oqori mai vua na Turaga kei na madigi meu cavuta e vica na malanivosa nikua, e gole noqu vakasama ki na itukutuku ni nona lako o Nikotimo vua na iVakabula ena bogi, me vaka e volai ena ikatolu ni wase ni Joni. A kaya ko Nikotimo: “Vakavuvuli, keitou sa kila ni kemuni sa lako mai vua na Kalou me ivakavuvuli: ni sa sega e dua na tamata e cakava rawa na veika mana  oqo ko ni sa cakava, kevaka  erau sa sega ni tiko kaya na Kalou.”¹

Na malanivosa oqori e sega walega ni tukuna o cei o Jisu—na qasenivuli e lako mai vua na Kalou—ia na cava talega era dau cakava na qasenivuli era lako mai vua na Kalou: Era dau cakacaka mana ena nodra bula o ira era vakavulica baleta ni tiko vata kei ira na Kalou.

Au kila vinaka e dua na qasenivuli vakaoqori. Au vinakata meu wasea vei kemuni ena bogi nikua e dua na italanoa vakaibalebale me baleti koya. E vakatokai “Na iTalanoa Vakaibalebale ni iLiuliu ni iSususu.”

A kacivi e dua na marama me iliuliu ni isususu ena nona tabanalevu. Sa vuli vakavinaka mai na univesiti o koya, ka levu tu na veimataqali itaviqaravi kei na cakacakaniliga e rawa ni ra cakava na gone. Sa mani nanuma me cakava na isususu me gauna ni vakaraitaki ka.

Ni oti e vica na macawa sa yalolailai mai na marama oqo. Sa yaco me icolacola na isususu. Sa vakacauoca ena raici ira na gone. E dina ni tu nona ituvatuva, era sa vosavosa na gone ka tagitagi ka sega ni via rogoci koya e veimacawa. E sega ni yaga kecega na ka e via cakava. E lesu mai vale e veimacawa ena mata tagitagi.

Ena vakacauoca a kailavaka, “Au sa vakayacora na noqu igu taucoko! Na cava tale e rawa niu cakava?”

Qai votu mai e dua na vakasama: Taroga na Tamada Vakalomalagi na ka mo cakava. E qusia na wai ni matana ka tekiduru ena masu. A masulaka me baleta na isususu, na nona vakanuinui, na nona vakacauoca, kei na nona yalorarawa. A masuta na Nona veivuke kei na veituberi.

A sauma na Tamada Vakalomalagi na nona masu. A yaco mai e dua na veivakauqeti kaukauwa: Na ituvatuva ni nomu lesoni e baleti iko ga. Vakanamata vei ira na gone; vulica mo kilai ira ka lomani ira.

O ya e dua na ivakaro ka itukutuku vinaka ia e dredre me rogoci. E kila na marama oya ni dodonu me veivutuni. E gadreva e dua na ivakarau vou ni rai kei na dua na iwalewale vou kina isususu. A masu ka vulica na ivolanikalou me vakauqeti.

Ni gole na qasenivuli oqo ki na isususu ena Sigatabu ka tarava, sa sega ni dua na rere. E vakabauta na Turaga. E sotavi ira na gonelalai e katuba, lolou sobu ki na nodra itagede, ka kidavaki ira ena dui yacadra. E vosa vei ira me baleta nodra matavuvale, kedra kakana taleitaki, kei na vuqa tale na ka. E cakava na gauna ni lagasere ka wili italanoa vei ira. Eso na gone era tagitagi ka vosakudrukudru, ia sa duatani na draki ni bula ena isususu ena macawa oya. Ia ni sa oti, sa oca na marama oya, ia sa sega na tagi.

Vakalalai, ni sa yaco me kilai ira vakavinaka cake na gonelalai na marama vinaka oqo, sa veisau na yalona me baleti ira. Sa dau vakanamata ki na Sigatabu na iliuliu ni Lalai. E dau nanamaki ka marau me tiko vata kei ira na lalai ena isususu. E lomani ira.

Ia … sa yaco mai na veivakauqeti. Ena dua na macawa a kauta e dua na itaba ki na isususu ka tabaki ira yadua na gone. A vakarautaka e dua na papa ni itaba, kabira na kedra itaba yadua na gone ena papa, ka kauta na papa ki na isususu e veimacawa. Era taleitaka na gone na nodra raici ira ena papa. E sega walega ni ra vakila na kedra bibi; era vakila ni ra lomani.

Ni oti e dua na gauna, sa vakayagataka na iliuliu ni isususu na nona itaviqaravi kei na nona cakacaka me vakavulici ira na gone. Era taleitaka vakalevu na gone. Era taleitaka vakalevu na isususu na gone era dau cici yani ki na isususu ni oti na soqoni ni sakaramede. Era dau taleitaka na gone na tiko ena isususu. Era taleitaka na iliuliu ni isususu, ka taleitaki ira o koya.

E levu na ivakavuvuli eda rawa ni vulica mai na italanoa oqo. Na ka bibi duadua na vakabauta na Tamada Vakalomalagi kei na Luvena o Jisu Karisito. Na nona vakabauta na qasenivuli e vakavuna na nona tekiduru ena masu, na vakabauta e vakavuna nona veivutuni, kei na vakabauta e vakavuna nona toso ki liu ka sega tiko mada ni kila vinaka na cava me caka. Na vakabauta na imatai ni ivakavuvuli.

Na ikarua na inuinui. E rawa ni dredre vei ira na gonelalai na tiko ena isususu. E rawa ni ra rere, se galili, se guilecavi sara mada ga. E rawa ni ra vakataroga se dua beka na sala ki tuba. A vakila na iliuliu ni isususu na veika vata oqori, ia sa lakosivita, ka kila ni tu na inuinui vei Karisito. E “bulabula,” “serau,” ka “ramase,” na nona inuinui ka ra vakila na gone.

Na ikatolu ni ivakavuvuli na yalomalumalumu. Na qaciqacia kei na vakararavi ki na kaukauwa vakatamata e dua na leqa rerevaki vua e dua na qasenivuli. Na yalomalumalumu—vakavulici rawarawa—na iwali cecere ni qaciqacia. A cakacaka ena vakabauti Karisito na iliuliu ni isususu me vakamalumalumutaki koya kina vei Tamana Vakalomalagi. A vakararamataki Koya ka vakalougatataki koya ena yalomatua ena kaukauwa ni Yalo Tabu.

Na ikava ni ivakavuvuli na loloma—na loloma savasava i Karisito. Ni se qai tekivu, a sega ni rawarawa na lomani ira na gonelalai. Ia a vakabauti Karisito na iliuliu ni isususu, ka toso ki liu ena yalomalumalumu ka vakanuinui Vua me lomani ira na gonelalai ko ya. A vakalougatataki koya na Kalou ena loloma savasava i Karisito, ka ra vakila na gone. A tauyavutaka na iliuliu ni isususu na ivau ni loloma uasivi vei ira na gone oya. Sa yaco na ivau oqori me sala vakayalo ka na drodro mai kina na vuli, veivakayaloqaqataki, kei na inuinui.

Kemuni na taciqu kei na ganequ, au masuta na veivakalougatataki ni Kalou me sobuti keda, me rawa vei keda kece, evei ga na vanua eda veivakavulici kina, me da cakacakataka na ivakavuvuli ni vakabauta, inuinui, yalomalumalumu, kei na loloma ena gugumatua, yaloqaqa, kei na vosota vakalevu cake. Au kila ni kevaka eda vakayacora vakakina, ena tiko kei keda na loloma soliwale na Karisito ka da na yaco dina me qasenivuli e lako mai vei Karisito, ka cakamana ena nodra bula na noda gonevuli. Au vakadinadinataka ena yaca i Jisu Karisito, emeni.