Auauna Atu i le Tasi i Lou Nuu

Na faamanatuina e Peresitene Russell M. Nelson lona aso soifua lona 100 ia Setema 2024 i se talosaga mai le loto mo i tatou uma ina ia aapa atu ma auauna atu i le tasi, e pei lava ona faamatalaina e Keriso i le faataoto i le mamoe na leiloa. I lenei faataoto, na alu atu ai le leoleo mamoe alofa i le vao e sue le tasi na manaomia le fesoasoani—o se faamanatu o lo tatou taua tele i le Faaola.

Sa taliaina ma le naunautai e tagata o le ekalesia i le lalolagi atoa lenei valaaulia e auauna atu i le toatasi i o latou nuu—pe o se tasi o le aiga, se uo, po o se tuaoi. Na tuuina mai e Peresitene Nelson le taitaiga mo lenei taumafaiga, i le faapea mai, “I masina a sau, ou te valaaulia ai outou e mafaufau ma le agaga tatalo: o ai tou te iloa o ono lotovaivai? O ai atonu e te manaomia ona faalelei i ai pe talosaga atu mo se faamagaloga? Pe na i ai se igoa se tasi i lou mafaufau talu ai nei, e ui e te le iloa lelei pe aisea? A o e aumaia nei fesili i le Alii, o le a Ia musuia oe ia iloa pe faapefea ona e aapa atu ma siitia se tasi e manaomia le fesoasoani.”

Mafaufau i manatu nei e taiala ai oe i le auauna atu i le toatasi o manaomia le fesoasoani i lou nuu.

1. Feiloai ma se uo: Aapa atu i se tasi e mafai ona faaaogaina lau mafutaga faalesoa. Saili se taimi e feiloai ai i lenei tagata mo se talanoaga, se taumafataga o le aoauli, po o se savalivaliga.
2. Fai se taumafataga: Valaaulia se tasi mo le taumafataga o le afiafi pe aumai se meaai i se tasi e manaomia le fesoasoani.
3. Faufautua i se tamaitiiti po o se talavou: Valaaulia se tamaitiiti e faitau atu se tusi ia te oe, fesoasoani i se tamaitiiti aoga i meaaoga, pe suesue ma se tagata mo se suega.
4. Foai atu lavalava, meaai, po o isi mea: Tuu atu mea e manaomia i se taumafaiga i le lotoifale, fale, po o se galuega alofa.
5. Fesoasoani i lou aiga: Faamama ipu, fesoasoani i ou tei e faamama o latou potu, pe opo se tagata o le aiga.
6. Faalogo: Faaalu se taimi e nofonofo ai ma se tagata o le aiga, uo, po o se tuaoi ma faalogologo i ai. O le faalogo e faaalia ai lou popole ma e mafai ona e maua ai ni malamalamaaga i le auala e auauna atu ai ia i latou e te alofa i ai.
7. Auina atu se feau tusitusia po o se faamatalaga: Auina atu i se tasi se tusiga faigofie, pe tusi ni faamatalaga agalelei e faailoa atu ai i tagata o loo popole mo i latou.
8. Fai atu faafetai lava: Tuu ni faamatalaga o le agaga faafetai mo uo, aiga, po o tagata foi e fesoasoani ia te oe i aso taitasi, e pei o lau tufa meli.
9. Talanoa i ou autaitai o le Ekalesia i le lotoifale: Fesili i lou peresitene o le Aualofa po o le korama a toeaina pe i ai se tasi i lou nuu e manaomia le alofa ma auaunaga.
10. Tatalo mo le taitaiga: Ole atu i le Atua e taiala ma musuia oe i au taumafaiga e tausia tagata o loo manaomia le fesoasoani.
11. Saili avanoa mo auaunaga i le JustServe.org: Asiasi i le justserve.org pe sii mai le polokalama e saili ai mo galuega faatino o auaunaga e latalata ane ia te oe.