Pagserbisyo sa Usa diha sa Inyong Komunidad

Gimarkahan ni Presidente Russell M. Nelson ang iyang ika-100 nga adlawng natawhan niadtong Septiyembre 2024 pinaagi sa usa ka kinasingkasing nga hangyo sa tanan kanato sa pag-adto ug pagserbisyo sa usa, sama sa gihulagway ni Kristo sa sambingay sa karnero nga nawala. Niini nga sambingay, ang mahigugmaong tigbalantay sa karnero miadto sa kamingawan sa pagpangita sa usa nga nanginahanglan—usa ka pahinumdom kon unsa kabililhon kita ngadto sa Manluluwas.

Ang mga miyembro sa tibuok kalibotan mahinamong mihangop niini nga pagdapit sa pagserbisyo sa usa nganha sa ilang mga komunidad— sa usa ka sakop sa pamilya man, sa usa ka higala, o sa usa ka silingan. Si Presidente Nelson mihatag og giya alang niini nga paningkamot, nag-ingon, “Sa umaabot nga mga bulan ako modapit kaninyo sa paghunahuna sa mainampoong paagi: kon kinsa ang inyong nailhan nga tingali nawad-an og kadasig? Kinsa kaha ang gikinahanglan ninyo nga pakig-ulian o pangayoan og pasaylo? Aduna bay usa ka ngalan nga anaa sa inyong hunahuna bag-ohay lang, bisan kon wala gayod kamo makahibalo kon ngano? Samtang dalhon ninyo kini nga mga pangutana ngadto sa Ginoo, Siya modasig kaninyo nga makahibalo kon unsaon ninyo sa pagtabang ug sa pagdasig ang usa nga nanginahanglan og tabang.”

Ikonsiderar ang mosunod nga mga ideya nga mogiya kaninyo sa pagserbisyo ngadto sa usa nga nanginahanglan diha sa inyong komunidad.

1. Pakigkita og usa ka higala: Adtoa ang usa ka tawo nga tingali nagkinahanglan sa inyong pakig-uban. Pangita og panahon nga makigkita niana nga tawo aron makig-istorya-istorya, maniudto, o maglakaw-lakaw.
2. Mag-andam og pagkaon: Magdapit og usa ka tawo alang sa pagpangaon o magdala og pagkaon ngadto sa tawo nga nagkinahanglan.
3. Motudlo og usa ka bata o batan-on: Pagdapit og usa ka bata nga mobasa diha nimo og usa ka libro, motabang og usa ka estudyante sa iyang homework, o magtuon kauban sa usa ka tawo alang sa eksamin.
4. Modonar og mga sinina, pagkaon, o ubang mga butang: Mohatag og gikinahanglan nga mga butang alang sa usa ka lokal nga kalihokan, dangpanan, o manggihatagong organisasyon [charity].
5. Motabang sa inyong pamilya: Manghugas sa mga plato, motabang sa inyong mga igsoon sa paglimpyo sa ilang mga kwarto, o mogakos sa usa ka sakop sa pamilya.
6. Maminaw: Mogahin og panahon nga makig-uban sa usa ka sakop sa pamilya, higala, o silingan ug maminaw lang. Ang pagpaminaw nagpasabot nga kamo nagmahunahunaon ug makahatag og mga panglantaw kon unsaon sa pagserbisyo niadtong inyong mga gimahal.
7. Magpadala og text o mubo nga sulat: Magpadala ngadto sa usa ka tawo og yano nga text, o magsulat og mabinationg mga pulong aron ang mga tawo mahibalo nga gipangga sila.
8. Magpasalamat: Magbilin og mubo nga sulat sa pasalamat alang sa mga higala, pamilya, o gani sa mga tawo nga nagtabang ninyo sa matag adlaw, sama sa tighatod sa inyong sulat.
9. Makigsulti sa inyong lokal nga lider sa Simbahan: Pangutan-a ang inyong presidente sa Relief Society o sa elders quorum kon duna ba sa inyong komunidad ang nagkinahanglan og paghigugma ug pagserbisyo.
10. Mag-ampo alang sa giya: Mohangyo sa Dios nga mogiya ug modasig kaninyo sa inyong mga paningkamot sa pag-atiman sa mga tawo nga nanginahanglan.
11. Mangita og mga oportunidad sa pagserbisyo diha sa JustServe.org: Bisitaha ang justserve.org o i-download ang app aron maka-search alang sa mga proyekto sa pagserbisyo nga duol kaninyo.