Faama’ite Faavaomalo e Faaleleia le Soifua Maloloina Lelei mo Tamaitai ma Tamaiti
Aiseā e Faamuamua ai Fanau ma O Latou Aiga?
O le faamuamuaina o manaoga o tamaitai ma tamaiti i le lalolagi e le gata ina tausia ai i latou taitoatasi, ae faaleleia ai foi tulaga o o latou aiga ma faamalosia ai le nuu atoa.
“Soo se taimi lava tatou te faia ai soo se mea e aumaia ai le toomaga i isi—faaletino pe faaleagaga—ua tatou aumaia i latou ia Iesu Keriso ma o le a faamanuiaina e maua lo tatou lava toomaga ia te Ia.”
E Faapefea Ona Maua e Fanau ma O Latou Aiga le Fesoasoani?
Ua matou iloaina e fa vaega o taumafaiga e faapitoa lava le fesoasoani i tamaiti ma o latou aiga. O nei vaega e fa o meaai paleni a tamaiti, tausiga o tina ma pepe fou, tui puipui, ma aoaoga.
Taumafa Paleni a le Tamaitiiti
O le le lava o meaai paleni e mafai ona matuai aafia ai le atiina ae lelei o le faiai, tino, ma le faiga o le atina’ega o le puipuiga, aemaise lava mai le taimi o le foafoaina o le ola e oo i le 2–3 tausaga. E ala i le suesueina o meaai paleni, aotauina o matua, tuuina atu o le mauaina o vai mama ma le tumama, ma le faafesootai atu o fanau i punaoa faatino i le lotoifale, matou te faamoemoe e faaitiitia ai le le lava o meaai paleni i tamaiti o le ekalesia ma faatulagaina i latou mo se lumanai sili atu ona susulu.
Tausiga o Failele ma Pepe Fou
O lenei taumafaiga e faatatau i le fesoasoani i tina ia maua se aafiaga sili ona lelei i le taimi o le maitaga, fanauina o se tamaitiiti, ma le faasusuina o pepe. O le tuuina atu o aoaoga faamasani, masini faafomai, ma aoaoga lagolago mo tina fou, matou te faamoemoe ia faaitiitia le aofai o tina ma pepe e maliliu i le faatosagaina, a o tuuina atu le tausiga sili atu mo tina ma a latou pepe a’o le’i fananau mai ma pe a uma ona fananau mai.
Tui Puipui
O tui puipui e tetee atu ai i le misela, mami, rupela, tetanus, ma’i pipili, malaria, ma faama’i faapena e mafai ona puipuia, ua faamaonia e aveesea ai le faatafunaga o nei faama’i e mafai ona aafia ai aiga. Faatasi ai ma le fesoasoani a faalapotopotoga galulue faatasi, e mafai ai ona tatou tuuina atu le tausiga faalesoifua maloloina ma tui puipui e faaitiitia ai le pasene o le oti o tamaiti ma tulaga lamatia o faafitauli o le soifua maloloina mo se taimi umi.
Aoga
O aoaoga mo tamaitai ma tamaiti e maua ai avanoa e le faatapulaaina e aafia lelei ai fanau a le Atua. Matou te uunaia matua e tuuina atu i a latou fanau le avanoa ma punaoa latou te manaomia ina ia sili atu ai. E le gata i lea, o aoaoga mo tamaitai e tuuina atu ai ia i latou tomai ma le malamalama latou te manaomia ina ia ola tutoatasi ai ma faamalolosia ai i latou e tausia o latou aiga.
“Ua uma ona faafaileleina e tuafafine o le Aualofa isi i o latou aiga ma nuu. E tusa lava pe le o aafia tonu i latou [i lenei taumafaiga], o i latou o se vaega o se usoga a tamaitai i le lalolagi atoa o loo faia se eseesega i olaga o tagata.
O Le A se Mea e Mafai Ona Ou Faia?
E ui lava atonu e te le o aafia tonu i taumafaiga agaalofa i le lalolagi atoa, ae e mafai ona e maua se aafiaga tumau pe a e faia galuega fesoasoani alofa i totonu o lou nuu. Ua ia te oe le mana e faatosinaina ai o outou lava aiga ma nuu. O nisi nei o punaoa mo le auala e musuia ai le faaleleia o lou nuu.
Amata Nei Loa
Aoao
O le aoao e uiga i faafitauli e aafia ai tamaitai ma tamaiti (ma le faaaogaina o mea ua e aoaoina) e aafia ai lou aiga ma le nuu. Mo se faataitaiga, e mafai ona e aoao e uiga i autu e faatatau i meaai paleni (e pei o le taumafa maloloina, faasusuina, ma le sauniaina o meaai saogalemu).
Volenitia
Pe a e saofaga i le galuega e tausia ai i latou e le tagolima, e mafai ona e fesoasoani i tamaitai ma tamaiti i lou nuu ina ia lauusiusi. Tagai i avanoa e auauna atu ai i lo outou eria.
Foai
O foai limafoai a tagata o le Ekalesia ma uo a le Ekalesia e faalauteleina ai a tatou taumafaiga e tausia i latou e le tagolima. Aoao atili e uiga i le ala e tausia ai e le Ekalesia i latou e le tagolima.
E ui e tofu faalapotopotoga taitasi ma ana lava ia vaega e faapitoa i ai, ae ua tatou faasoa faatasi i le sini e tasi o le faamāmāina o mafatiaga o fanau a le Atua.
Auala e Galulue ai le Ekalesia ma Isi Faalapotopotoga
Matou te faia se faiga tuufaatasi i galuega fesoasoaniga alofa, e saili ai e tausia i latou e le tagolima a o faalauiloa atu le ola tutoatasi mo tagata taitoatasi, nuu, po o faalapotopotoga mo se taimi umi. Ina ia faataunuuina lenei galuega, matou te galulue faatasi ma le tele o faalapotopotoga o fesoasoaniga alofa o e faatinoina mataupu faavae o le ola tutoatasi i a latou polokalama ma ua faamaonia faamaumauga o le faamanuiaina.
Anotusi Fesootai
Faitau i tusiga o loo i lalo mo faataitaiga lata mai nei o la tatou galuega faatasi ma isi faalapotopotoga e tausia ai tamaitai ma tamaiti i le lalolagi atoa.
Fesili Masani
O le a se mea o ta’u mai e tusitusiga paia e uiga i le tausiga o tamaitai ma tamaiti?
I tusitusiga paia, ua poloaiina soo ai i tatou e le Faaola ia tausia tamaitai ma tamaiti (tagai Esoto: 22:22–24; Mataupu Faavae ma Feagaiga 83:2, 4).
Mataio 18:14 e faitauina faapea,“Aua e faapea lo outou Tama o i le lagi, e le finagalo ia ina ia fano se tasi o i latou nei e faatauvaa.” E ala i le tausia o tamaiti, tatou te faamautinoa ai tatou te mulimuli i le poloaiga a le Faaola e fafaga, aoao atu, ma tausia tamaiti. Ua aoao mai foi i tatou e tusitusiga paia e faapea o tamaiti o e aoaoina ma fafagaina (faalemafaufau, faaleagaga, ma faaletino) i o latou talavou e mafai ona tuputupu a’e e faia se eseesega ia i latou lava (tagai Faataoto 22:6).
I le Faataoto 31 ua tatou aoao ai e faapea o se tamaitai amio mama e siitia lona aiga ma tagata uma o siomiaina o ia. Na te “faaloaloa atu lona lima i e matitiva; ioe, e aapa atu o ia i ona lima i e ua lē tagolima” (fuaiupu 20); e “vaai lelei o ia i ala o lona aiga” (fuaiupu 27); ma na te faamanuiaina lana fanau ma lona toalua (tagai fuaiupu 28). E ala i le fesoasoani i tamaitai, tatou te tuuina atu ai ia i latou ni meafaigaluega e faia ai se eseesega sili ona tele mo le lelei.
Tagai foi Mareko 9:36–37.
O faapefea ona aafia alii ma tamā i lenei taumafaiga?
O le siitiaina o le soifua manuia o tamaitai ma tamaiti e masani ona amata i alii ma tamā. E mafai e alii ona sailia, foai atu, pe volenitia i faalapotopotoga e siitia ai tamaitai ma tamaiti, e pei o malutaga a tamaitai, polokalama fesoasoani mo tagata sulufai, ma taumafaiga o meaai paleni mo tamaiti. O le tele lava o taimi, e i ai i alii ma tamā le aafiaga sili pe a latou faaaogaina mataupu faavae o le auauna atu ma le alofa i totonu o ō latou lava aiga, aiga, ma nuu. Taumafai e aoao e uiga i autu e pei o taumafa tatau mo tamaiti po o manaoga o le soifua maloloina ma le tumamā o tamaitai. Ona faaaoga lea o mea ua e aoaoina i lou lava olaga.
O le a le mea na faia e le Ekalesia e tausia ai tamaitai ma tamaiti i le 2023?
I le 2023, na faia ai e le Ekalesia meaai paleni a le tamaitiiti o se faamuamua e ala i foai tetele i faalapotopotoga faatuatuaina. Sa faafaigofieina foi e le Ekalesia ana lava taumafaiga o meaai paleni e fesoasoani ai i tamaiti o tagata o le Ekalesia o e sa lamatia i le matelaina. E le gata i lea, sa galulue le Ekalesia e faaitiitia le pasene o tina ma pepe fou maliliu, tuuina atu le tausiga sili atu mo tina ma pepe, ia sili atu ona faigofie ona maua aoaoga lelei mo tamaitai ma tamaiti, ma tuuina atu avanoa e atiina a’e ai galuega e faamalosia ai tamaitai.
Siaki le Aotelega Faaletausaga 2023 o taumafaiga a le Ekalesia e tausia i latou e lē tagolima ia aoao atili ai.
E mafai faapefea ona ou fesoasoani i lo’u nuu?
O le auala sili e siitia ai tamaitai ma tamaiti i lou nuu o le amata lea i lou lava aiga. Faitau i manatu o loo maua i le sootaga o i lalo mo musumusuga i mea e mafai ona e faia e fesoasoani ai i lou aiga ma le nuu.
Auala e 25 e Auai ai i le Faama’ite Faavaomalo mo Tamaitai ma Tamaiti